Jesus Hem Laef Bak

Afta Jesus dae, wanfala rich man wea nem blo hem Joseph askem Pilate for letem hem tekem body blo Jesus from datfala post. Joseph putim paoda lo body blo hem and pasolem lo wanfala klin kaleko and putim hem lo wanfala niu tomb. Hem rolim wanfala big ston for satem datfala tomb. Bat olketa chief priest sei lo Pilate: ‘Mifala fraet nogud samfala disaepol blo Jesus bae kam tekem body blo hem and sei hem laef bak.’ So Pilate sei lo olketa: ‘Satem datfala tomb and gaedem gud.’

Thrifala day bihaen, lo early morning, samfala woman go lo datfala tomb and lukim hem open finis. Bat wanfala angel nao insaed datfala tomb and hem sei lo olketa: ‘Iufala no fraet. Jesus hem laef bak finis. Iufala go and talem olketa disaepol blo hem for go meetim hem lo Galilee.’

Mary Magdalene kwiktaem go for faendem Peter and John. Hem sei lo tufala: ‘Samwan tekem finis body blo Jesus!’ Peter and John ran go lo datfala tomb. Taem tufala lukim hem emti, tufala go bak lo haos.

Taem Mary kam bak moa lo tomb, hem lukim tufala angel nao insaed and hem sei lo tufala: ‘Mi no savve wea nao olketa tekem and putim body blo Lord blo mi.’ Then hem lukim wanfala man and hem tingse hem wanfala gardener, Mary sei lo hem: ‘Sir, plis talem mi wea nao iufala putim body blo hem.’ Bat taem datfala man hem sei, “Mary!” hem savve datfala man hem Jesus. Hem singaot olsem: “Teacher!” and hem hol strong lo hem. Jesus sei lo hem: ‘Go and talem olketa brata blo mi dat iu lukim mi.’ Semtaem nomoa, Mary ran go lo olketa disaepol and talem olketa dat hem lukim Jesus.

Lo datfala sem day, tufala disaepol wakabaot from Jerusalem go for Emmaus. Taem tufala lo road wanfala man wakabaot witim tufala and askem wat nao tufala storyim. Tufala sei: ‘Hao, iu no savve? Thri days ago, olketa chief priest killim dae Jesus. Bat distaem samfala woman sei hem laef bak!’ Datfala man askem tufala olsem: ‘Iutufala no bilivim wat olketa profet talem? Olketa sei Christ bae dae and laef bak.’ Hem gohed for explainim olketa Scripture lo tufala. Taem olketa kasem Emmaus, tufala disaepol hia askem datfala man for go witim tufala. Taem olketa kaikai, hem tekem bred and prea ovam, tufala just luksavve Jesus nao datfala man. Then hem disappear.

Tufala disaepol hia kwiktaem go lo Jerusalem lo haos wea olketa aposol hipap lo hem and talem olketa evri samting wea happen. Taem olketa stap insaed datfala haos, Jesus appear lo olketa. Firstaem, olketa aposol no bilivim dat hem nao Jesus. Then hem sei lo olketa: ‘Lukim tufala hand blo mi, tasim mi. Bikos olketa Holy Raeting talem finis Christ bae laef bak.’