Trabol wea Givim Iumi Hope

“Long olketa last day bae hem barava difren and bae evri samting hem hard tumas.”—2 TIMOTHY 3:1.

WASWE, iu herem nius abaotem, or iuseleva lukim, eni sorre samting hia?

● Rabis sik wea killim dae plande pipol.

● Bigfala hangre wea killim dae staka pipol.

● Earthquake wea killim dae staka thousand pipol and spoelem haos bilong plande thousand pipol.

Long disfala magasin, iu bae read abaotem olketa samting wea bae mekem iu tingting strong abaotem wanem hem happen long world distaem. Iu bae lanem tu Bible talem olketa samting hia bae happen long “olketa last day.”

Olketa article hia no for mekem iu bilivim iumi stap long world wea garem staka trabol. Masbi iu luksavve finis long datwan. Bat, olketa article hia hem for givim iumi hope. Olketa storyim sixfala Bible profesi wea fulfill, wea pruvim klosap nao “olketa last day” bae finis. Olketa storyim tu tingting bilong samfala pipol wea no agree long datwan, and olketa gudfala reason for bilivim klosap nao pipol bae garem gudfala living.

Profesi 1. Olketa Earthquake

“Olketa bigfala earthquake bae sekem staka ples.”—LUKE 21:11.

● Long Haiti, olketa faendem Winnie wea 1 year and 4 month andanit long wanfala building wea foldaon. Samfala man wea reportim nius for television abaotem datfala disaster herem Winnie hem krae wiki. Mami and dadi bilong hem dae long earthquake, bat hem laef.

WASWE, HEM FULFILL DISTAEM? Taem 7.0-magnitude earthquake kasem Haiti long January 2010, winim 300,000 pipol dae. Stretawe nomoa samting olsem 1.3 million pipol no garem haos. No long Haiti nomoa kasem earthquake wea barava big and spoelem staka samting. Long April 2009 go kasem April 2010, winim 18 bigfala earthquake kasem olketa difren ples long earth.

WANEM NAO SAMFALA WEA NO AGREE TALEM? Namba bilong earthquake distaem hem semsem nomoa olsem long bifor. From distaem iumi garem niu technology dastawe iumi savve abaotem olketa earthquake winim pipol long bifor.

WASWE, HEM STRET FOR NO AGREE? Tingim diswan: Bible no story abaotem namba bilong olketa earthquake wea bae happen long olketa last day. Bat hem sei, “olketa bigfala earthquake” bae happen and “bae sekem staka ples.” Datwan hem wanfala saen wea showimaot iumi stap long olketa last day.—Mark 13:8; Luke 21:11.

WANEM NAO TINGTING BILONG IU? Waswe, iumi lukim olketa bigfala earthquake wea Bible profesi abaotem?

Earthquake no only pruv wea mekem iumi luksavve iumi stap long olketa last day. Bat hem wanfala nomoa long olketa profesi wea gohed for fulfill. Tingim mek-tu profesi.

[Blurb long page 4]

“Mifala [olketa geophysicist] sei olketa bigfala earthquake. Evri narawan sei olketa barava nogud earthquake.”—KEN HUDNUT, U.S. GEOLOGICAL SURVEY.

[Piksa Credit Line long page 4]

© William Daniels/Panos Pictures

Profesi 2. Bigfala Hangre

“Olketa taem bilong bigfala hangre bae kasem plande pipol.”—MARK 13:8.

● Wanfala man go long vilij long Quaratadji long Niger, for lukaotem kaikai. Olketa kasin, brata, and sista bilong hem tu lusim hom bilong olketa for go long there for lukaotem kaikai. Nomata olketa relative bilong hem stap, datfala man leidaon seleva long mat. Why nao hem stap seleva? Sidi wea hem chief long vilij hem sei: “Hem shame bikos hem no savve feedim [famili bilong hem].”

WASWE, HEM FULFILL DISTAEM? Long full world, klosap 1-fala long evri 7-fala pipol no garem inaf kaikai evri day. Bat hem barava nogud tumas long sub-Saharan Africa wea 1-fala long evri 3-fala pipol no garem inaf kaikai. For helpem iumi minim datwan, tingim famili wea garem dadi, mami, and wanfala baby. Sapos olketa garem kaikai wea fitim nomoa tufala man, hu nao bae no kaikai? Waswe, bae hem dadi, mami, or baby? Samfala famili mas disaedem diswan evri day.

WANEM NAO SAMFALA WEA NO AGREE TALEM? Staka kaikai stap long earth for fitim evriwan. Sapos pipol sharem gud kaikai, evriwan savve garem kaikai.

WASWE, HEM STRET FOR NO AGREE? Hem tru, olketa farmer savve growim and sendem staka kaikai winim eni taem bifor. Bae hem gud sapos olketa gavman sharem gud kaikai mekem no eniwan savve hangre. Bat, for staka year finis olketa traem datwan and olketa no savve duim.

WANEM NAO TINGTING BILONG IU? Waswe, profesi long Mark 13:8 hem fulfill? Nomata pipol iusim niu technology, waswe, pipol long staka ples short long kaikai?

Staka taem olketa earthquake and bigfala hangre happen firstaem long olketa problem wea join witim narafala saen long olketa last day.

[Blurb long page 5]

“Samting olsem wanfala long evri thrifala pikinini wea dae from pneumonia, diarrhoea, and samfala nara sik maet savve laef nomoa sapos olketa garem inaf kaikai.”—ANN M. VENEMAN, FORMER EXECUTIVE DIRECTOR BILONG UN CHILDREN’S FUND.

[Piksa Credit Line long page 5]

© Paul Lowe/Panos Pictures

Profesi 3. Sik

“Pipol bae . . . safa from olketa rabis sik.”—LUKE 21:11, Contemporary English Version.

● Bonzali waka long health long wanfala kantri long Africa wea war barava spoelem. Hem trae for treatim olketa man wea garem sik Marburg,a wea waka long mine long taon bilong hem. Hem askem finis samfala bigman long wanfala big taon for helpem hem, bat olketa no kwiktaem duim datwan. Bihaen fofala month olketa duim samting for helpem Bonzali, bat hem tu leit nao, Bonzali dae finis. Hem kasem sik Marburg from olketa man wea hem trae for helpem, wea waka long mine.

WASWE, HEM FULFILL DISTAEM? Olketa sik olsem pneumonia, diarrhoea, HIV/AIDS, TB, and malaria olketa barava nogud sik wea spoelem staka pipol. Long 2004, olketa sik hia killim dae samting olsem 10.7 million pipol. Datwan hem olsem olketa sik hia killim dae wanfala man evri 3 second long datfala year.

WANEM NAO SAMFALA WEA NO AGREE TALEM? From population long world gohed for kamap big, namba bilong pipol wea sik kamap big tu.

WASWE, HEM STRET FOR NO AGREE? Hem tru, population long world hem kamap big tumas distaem. Bat, long semtaem savve bilong man for luksavve long sik, kontrolem, and treatim kamap big tu. Sapos hem olsem, staka pipol shud no sik. Batawea olketa nogud sik kamap big tumas long world distaem.

WANEM NAO TINGTING BILONG IU? Waswe, pipol safa from olketa rabis sik olsem Bible profesi abaotem?

Olketa earthquake, bigfala hangre, and sik savve mekem staka million pipol for safa. Bat staka nara million pipol safa from nogud samting wea nara pipol duim long olketa. Staka kasem nogud samting from pipol wea shud protectim olketa. Tingim wanem nara Bible profesi talem abaotem datwan.

[Footnote]

[Blurb long page 6]

“Hem barava nogud for lion kaikaim aotsaed long body bilong man, bat hem barava nogud tu for rabis sik kaikaim insaed long man, and for lukim tu pipol kasem kaen samting olsem.”—EPIDEMIOLOGIST MICHAEL OSTERHOLM.

[Piksa Credit Line long page 6]

© William Daniels/Panos Pictures

Profesi 4. No Garem Love Insaed Long Famili

“Pipol bae . . . no garem love wea olketa shud garem for famili bilong olketa.”—2 TIMOTHY 3:1-3, God’s Word Bible

● Chris hem waka for domestic violence grup long North Wales. Chris hem sei: “Wantaem wanfala woman hem kam wea feis bilong hem boela narawe and mi no luksavve long hem nao.” Hem sei tu: “Feeling bilong samfala nara woman nogud tumas and olketa no savve luk long iu.”

WASWE, HEM FULFILL DISTAEM? Long wanfala kantri long Africa, samting olsem 1-fala long evri 3-fala woman samwan spoelem hem saed long sex taem hem pikinini. Wanfala survey long datfala kantri showimaot wanfala long thrifala man tingse hem olraet nomoa for killim nogud waef bilong olketa. Bat no just olketa woman nomoa safa from domestic violence. Long Canada, samting olsem 3-fala long evri 10-fala man, woman bilong olketa killim olketa nogud or duim eni nara samting for spoelem olketa.

WANEM NAO SAMFALA WEA NO AGREE TALEM? Long bifor, olketa garem domestic violence tu. Bat distaem nomoa iumi just herem staka story abaotem.

WASWE, HEM STRET FOR NO AGREE? Pipol distaem savve gud abaotem problem saed long domestic violence winim eni taem bifor. Bat waswe, namba bilong pipol wea kasem problem saed long domestic violence hem gogo daon? Nomoa, hem no olsem. Distaem wei for no garem love insaed famili hem big tumas.

WANEM NAO TINGTING BILONG IU? Waswe, profesi long 2 Timothy 3:1-3 hem fulfill? Waswe, pipol garem love wea olketa shud garem for famili bilong olketa?

Mek-faev profesi wea gohed for fulfill hem abaotem earth, wea hem hom bilong iumi. Tingim profesi wea Bible talem abaotem earth.

[Blurb long page 7]

“Domestic violence hem crime wea staka pipol no reportim long police. Man savve killim nogud woman bilong hem samting olsem 35 taem bifor woman hia reportim long police.”—WOMAN WEA STORY FOR WALES DOMESTIC ABUSE HELPLINE.

Profesi 5. Spoelem Earth

“[God bae] finisim olketa wea spoelem earth.”—REVELATION 11:18.

● Mr. Pirri duim waka for kolektem juice from palm tree for wakem palm wine long Kpor, long Nigeria. Bigfala oil spill long Niger Delta spoelem nao kaen waka wea hem duim. Hem sei: “Oil spill hia killim dae fish, spoelem skin bilong mifala, and spoelem olketa stream.” Hem sei tu: “Mi no garem waka nao for kasem selen.”

WASWE, HEM FULFILL DISTAEM? Samfala savveman sei evri year 6.5 million ton long rabis go insaed long sea. Samting olsem haf long datfala rabis hem olketa plastic wea bae float for staka handred year bifor hem rotten. Olketa man spoelem earth, and finisim kwiktaem tu olketa natural resource. Olketa wea duim research sei earth needim 1 year and 5 month for changem bak olketa samting wea olketa man iusim insaed 1 year. Sydney Morning Herald, niuspepa long Australia, hem sei: “Sapos population gohed for kamap big and pipol tu gohed for iusim staka samting olsem distaem, bae long year 2035 iumi needim nao tufala Earth.”

WANEM NAO SAMFALA WEA NO AGREE TALEM? Olketa man garem savve for stretem eni problem. Iumi savve duim samting for mekem earth kamap gud moa.

WASWE, HEM STRET FOR NO AGREE? Staka man wanwan and olketa grup waka hard for helpem pipol for luksavve long olketa problem saed long environment. Nomata olsem, pipol gohed for barava spoelem earth.

WANEM NAO TINGTING BILONG IU? Waswe, iu tingse iumi needim God for duim samting wea hem promisim for stopem olketa man for no spoelem earth?

Bible talem faevfala profesi abaotem olketa nogud samting wea iumi storyim finis, bat hem sei tu samfala gud samting bae happen long olketa last day. Tingim wanfala gud samting wea mek-six profesi storyim.

[Blurb long page 8]

“Firstaem mi feel olsem mi stap long paradaes, bat distaem mi stap long ples wea olketa torowem poison long hem.”—ERIN TAMBER, WANFALA WOMAN WEA STAP LONG GULF COAST LONG AMERICA WEA STORYIM SAMTING WEA KAMAP FROM 2010 OIL SPILL LONG GULF LONG MEXICO.

[Box long page 8]

Waswe, God Nao Kosim?

From Bible profesi abaotem olketa nogud samting wea happen distaem, waswe, God nao kosim olketa samting hia? Waswe, God nao mekem iumi safa? Iu savve kasem olketa gudfala ansa for tufala kwestin hia long chapter 11, long buk Wanem Nao Really Samting wea Bible Teachim? wea Olketa Jehovah’s Witness pablisim.

[Piksa Credit Line long page 8]

U.S. Coast Guard photo

Profesi 6. Preach Evriwea Long Earth

“Olketa bae talemaot disfala gud nius abaotem kingdom long evri ples long world.”—MATTHEW 24:14.

● Vaiatea hem stap long wanfala island long Tuamotu Archipelago long Pacific. Nomata Tuamotu garem samting olsem 80-fala coral island insaed wanfala area long sea wea size bilong hem winim 802,900 square kilometer, population bilong hem samting olsem 16,000 pipol nomoa. Nomata olsem, Olketa Jehovah’s Witness visitim Vaiatea and olketa narawan long island bilong hem. Why nao olsem? Bikos olketa Witness laek for preachim gud nius abaotem Kingdom bilong God long evri pipol, nomata long wea nao olketa stap.

WASWE, HEM FULFILL DISTAEM? Pipol evriwea long earth herem message abaotem Kingdom. Long 2010, Olketa Jehovah’s Witness iusim winim 1.6 billion hour for talemaot disfala gud nius long 236 kantri. Datwan hem olsem wanfala Jehovah’s Witness duim samting olsem 30 minute evri day for preach. Insaed 10-fala year wea go pas finis, olketa wakem and givimaot winim 20 billion Bible pablikeson for teachim pipol.

WANEM NAO SAMFALA WEA NO AGREE TALEM? For staka thousand year finis pipol preach abaotem message long Bible.

WASWE, HEM STRET FOR NO AGREE? Hem tru, staka pipol bifor preachim samting abaotem message long Bible. Nomata olsem, staka duim datfala waka for lelebet taem nomoa and long tu-thri ples nomoa. Bat Olketa Jehovah’s Witness organize for duim disfala waka evriwea long earth, wea datwan mekem staka handred million pipol for herem gud nius. Olketa no givap for duim preaching waka nomata samfala organization bifor wea raf and garem bigfala paoa trae for stopem olketa.a (Mark 13:13) Nara samting tu, Olketa Jehovah’s Witness no kasem pei for duim preaching waka. Olketa willing for iusim taem bilong olketa, and no salem olketa Bible pablikeson wea olketa offerim. Donation wea pipol givim nao sapotim waka wea olketa duim.

WANEM NAO TINGTING BILONG IU? Waswe, olketa gohed preachim “disfala gud nius abaotem kingdom” evriwea long world? From datfala profesi fulfill distaem, waswe, klosap nao bae pipol garem gudfala living?

[Footnote]

[Blurb long page 9]

“Sapos Jehovah letem iumi for gohed preachim gud nius abaotem Kingdom, iumi bae strong for duim datwan and iusim evri difren kaen wei for preach long pipol.”—2010 YEARBOOK OF JEHOVAH’S WITNESSES.

Gudfala Living Klosap Nao!

“Klosap nao man wea duim rabis samting bae finis . . . God bae givim earth long olketa wea hambol, and olketa bae hapi fogud bikos olketa stap gud.”—PSALM 37:10, 11.

WASWE, iu laek lukim datfala profesi kamap tru? Barava nao. Iumi garem olketa gudfala reason for bilivim klosap nao datfala profesi bae fulfill.

Iumi storyim finis sixfala Bible profesi nomoa wea pruvim iumi stap long “olketa last day.” (2 Timothy 3:1-5) God iusim holy spirit for leadim olketa man wea raetem Bible for talem olketa profesi hia for givim iumi hope. (Romans 15:4) From olketa profesi hia fulfill, klosap nao olketa trabol wea iumi kasem bae finis.

Bihaen olketa last day finis, wanem nao bae happen? Kingdom bilong God bae rulim olketa man. (Matthew 6:9, 10) Tingim samting wea Bible talem abaotem laef long earth long datfala taem:

● No eniwan bae hangre. “Staka kaikai bae stap long earth. Antap long olketa maunten hem bae fulap witim kaikai.”—Psalm 72:16.

● Sik bae finis. “No eniwan bae sei: ‘Mi sik.’”—Isaiah 33:24.

● Earth bae kamap gud moa. “Wilderness and ples wea no garem wata bae singaot from olketa hapi, and olketa flat ples wea drae bae hapi and kamap naes olsem saffron flaoa.”—Isaiah 35:1.

Iumi storyim nomoa tu-thri Bible profesi wea encouragem iumi, and wea klosap for fulfill. Feel free for askem eni Jehovah’s Witness for storyim why olketa barava sure gudfala living hem klosap nao.