Waswe, iu tu feel olsem olketa hia taem iu ting for readim Bible? Staka ting long wei for readim Bible olsem hem hard tumas. Bat sapos Bible savve helpem iu for hapi and enjoyim laef, and iu savve duim samting wea bae mekem Bible reading hem interesting, maet datwan mekem iu laek for readim Bible.

Iumi bae storyim olketa gud samting wea samfala kasem taem olketa readim Bible.

Ezekiel, wea hem samting olsem 20 year, hem sei: “Long bifor, mi no garem olketa goal. Mi olsem man wea draevem wanfala car bat hem no tingim firstaem wea nao hem laek for go long hem. Bat wei for readim Bible hem helpem mi for garem gudfala laef. Bible garem olketa advaes wea savve helpem mi evriday.”

Frieda, wea hem tu samting olsem 20 year, hem sei: “Mi savve kwiktaem feel nogud long eni smol samting. Bat Bible reading helpem mi for kontrolem miseleva. Datwan mekem olketa narawan laek fren witim mi, so distaem mi garem staka fren.”

Eunice, wea hem samting olsem 50 year, hem sei: “Wanem mi readim long Bible helpem mi for lusim olketa nogud wei bilong mi and for garem olketa gudfala wei.”

Olketa hia and staka narawan luksavve wei for readim Bible savve helpem man for garem gudfala laef. (Isaiah 48:17, 18) Bible savve helpem iu for (1) mekem olketa gudfala disison, (2) garem olketa gudfala fren, (3) deal witim wari, and (4) lanem tru samting abaotem God, wea hem best samting for duim. Taem man followim advaes long Bible datwan bae helpem hem bikos datfala advaes hem kam from God. God evritaem givim olketa gudfala advaes.

So hem important for iumi start for readim Bible. Wanem nao samfala samting wea savve helpem iu for duim datwan and for mekem iu enjoyim Bible reading bilong iu?

Wanem nao bae helpem iu for enjoyim Bible reading and for lanem samting from datwan? Iumi bae storyim faevfala samting wea helpem staka pipol finis.

Faendem ples for read wea fitim. Read long ples wea kwaet. No letem eni samting disturbim iu. And maet hem gud tu for read long ples wea garem laet and fresh air.

Redyim mind bilong iu. Sapos iu olsem pikinini wea laekem tumas for lanem samting from dadi bilong hem, iu bae lanem staka samting from Bible bikos Bible hem kam from Dadi bilong iumi long heven. Nomata maet iu tingse hem hard tumas for readim Bible or iu no sure sapos hem toktok bilong God, trae for readim mekem God savve teachim iu.—Psalm 25:4.

Prea bifor iu read. Toktok bilong God nao hem stap long Bible, dastawe iumi mas askem hem for helpem iumi minim datwan. God promis for givim “holy spirit long olketa wea askem hem” for datwan. (Luke 11:13) Holy spirit savve helpem iu for minim Bible, nomata olketa samting wea hem no isi for minim.—1 Corinth 2:10.

Ting raonem wanem iu readim. No readread nomoa bat ting raonem samfala samting taem iu read, olsem: ‘Wanem nao olketa gudfala wei bilong man wea mi read abaotem? Hao nao mi savve followim diswan long laef bilong mi?’

Markem goal for lanem samting. Iu savve lanem staka samting from Bible reading sapos iu lukaotem olketa point wea iu savve followim long laef bilong iu. Iu savve chusim olketa topic wea iu laek for lane abaotem. Olsem example, maet iu laek for lanem moa samting abaotem God, or lanem hao for garem olketa gudfala wei, or hao for kamap gudfala hasband or waef. Then readim olketa scripture wea story abaotem datwan.a

Faevfala samting hia savve helpem iu taem iu duim Bible reading. Bat wanem nao nara samting wea iu savve duim for mekem iu enjoyim Bible reading bilong iu? Next article bae storyim samfala samting wea savve helpem iu.

Waswe, iu enjoyim wei for readim Bible or hem boring long iu? Datwan hem depend long hao iu duim Bible reading. Bae iumi storyim samfala samting wea savve helpem iu for enjoyim Bible reading.

Chusim gudfala Bible transleison. Maet bae iu no interest for readim Bible sapos hem hard tumas for iu minim, or hem garem olketa toktok wea pipol no iusim distaem. So hem gud for readim Bible transleison wea hem isi for iu minim and wea hem barava stret.a

Iusim olketa technology. Distaem pipol savve readim Bible long Internet, daonlodim long computer, tablet, or mobile phone. Samfala Bible olsem mekem hem isi for man comparem wanfala verse witim olketa nara verse wea storyim sem samting, or for comparem wanfala verse witim olketa difren Bible transleison. Iu savve herehere tu long recording bilong samfala Bible. Samfala pipol laek for lisin long olketa recording hia taem olketa go long pablik transport or long taem wea olketa duim samfala nara samting. Iu savve traem eni idea hia.

Iusim olketa study tul. Olketa Bible study tul savve helpem iu for lanem staka samting taem iu duim Bible reading. Olsem example, iu savve lukim olketa map abaotem olketa ples wea Bible storyim. Datwan savve helpem iu for savve long ples wea iu read abaotem. And tu, iu savve readim olketa article long olketa Wastaoa magasin bilong mifala or go long jw.org website long English and clickim datfala sekson, “Bible Teachings.”

Read abaotem olketa difren samting long Bible. Sapos iu tingse hem hard tumas for read start long Genesis go kasem Revelation, iu savve readim firstaem olketa Bible buk wea iu interest long hem. Sapos iu laek for savve moa abaotem olketa pipol wea Bible storyim, readim olketa scripture wea story abaotem olketa. Long box wea garem title, “Lane Abaotem Olketa Pipol wea Bible Storyim,” hem showim samfala scripture wea iu savve readim for lane abaotem samfala. Or iu savve read abaotem olketa samting followim taem wea hem happen, or readim olketa scripture wea join witim wanfala topic. Bae hem gud tumas sapos iu traem olketa idea hia.

Bible hem difren from olketa nara buk. Hem garem olketa advaes wea kam from God. (2 Timothy 3:16) Hem savve barava helpem iumi. Dastawe Bible hem sei: “Toktok bilong God hem laef and hem garem paoa.” (Hebrew 4:12) Bible garem olketa advaes wea savve helpem man long evriday laef and hem savve helpem man for savve long God and olketa promis bilong hem.—1 Timothy 4:8; James 4:8.

Bible garem olketa advaes wea savve helpem iu. Bible savve helpem iu long olketa samting olsem:

• For stap gud witim olketa long famili and olketa narawan.—Ephesus 4:31, 32; 5:22, 25, 28, 33.

• Saed long health and for kontrolem feeling bilong iumi.—Psalm 37:8; Proverbs 17:22.

• For no duim olketa nogud samting.—1 Corinth 6:9, 10.

• For waka hard for kasem wanem iumi needim.—Proverbs 10:4; 28:19; Ephesus 4:28.a

Wanfala hasband and waef long Asia barava tinghae long wei wea olketa advaes long Bible helpem tufala. No longtaem bihaen tufala marit, tufala start for no hapi long samfala wei bilong each other and for no story gud tugeta. Bat tufala start for followim wanem tufala lanem long Bible. Waswe, datwan helpem tufala? Datfala hasband, Vicent, hem sei: “Wanem mi readim long Bible helpem mi for deal witim olketa hard samting wea mitufala kasem long marit bilong mitufala. Wei for followim wanem Bible talem mekem mitufala for hapi.” Waef bilong hem, Annalou sei tu: “Olketa example wea mitufala readim long Bible barava helpem mitufala. Distaem mitufala evriwan hapi and mitufala waka gud tugeta.”

Bible helpem iu for savve long God. Vicent sei moa: “Taem mi readim Bible, datwan mekem mi fren gud witim Jehovah.” Wanem Vicent talem showimaot Bible savve helpem iu for savve long God. Datwan hem important bikos taem iu savve long God bae iu luksavve olketa advaes bilong hem bae helpem iu, and bae iu fren gud witim hem. And tu, taem iu readim Bible, bae iu lane abaotem olketa gud samting wea God talem abaotem future, olsem wei wea iumi bae kasem “datfala tru laef,” wea hem nao laef olowe. (1 Timothy 6:19) Bible nomoa storyim olketa samting hia.

Sapos iu tu start for readim Bible and gohed for duim datwan, hem bae helpem iu for garem gudfala laef and for savve long God. Bat taem iu readim Bible, maet iu garem staka kwestin. Sapos olsem, tingim example bilong datfala man bilong Ethiopia wea Bible storyim. Hem garem staka kwestin abaotem Bible. Taem Philip, wanfala disaepol bilong Jesus, askem hem sapos hem minim wanem hem readim, hem sei: “Hao nao bae mi savve sapos no eniwan minim kam long mi?”b Then hem askem Philip for teachim Bible long hem. (Acts 8:30, 31, 34) Sapos iu tu laek for lanem Bible, iu savve ask for wanfala Bible study long www.jw.org/pis or raet go long eni address wea stap long disfala magasin. And tu, iu savve askem wanfala Jehovah’s Witness for study witim iu, or iu savve go long eni Kingdom Hall wea stap klosap long iu. Hem gud tumas sapos iu start for readim Bible bikos datwan bae helpem iu for garem gudfala laef.