Samfala pipol faendem hard for lovem God. Olketa tingse God no interest long olketa, olketa no minim hem, or tingse hem raf. Diswan nao samting wea samfala talem abaotem God:

• “Mi prea long God for helpem mi, bat mi feel olsem hem no interest long mi. Mi tingse God nating tingim eniwan.”​—Marco, Italy.

• “Mi laek for worshipim God, bat mi tingse hem no interest long mi. Mi tingse hem wanfala raf God wea savve panisim pipol nomoa. Mi nating bilivim hem savve kaen long eniwan.”​—Rosa, Guatemala.

• “Taem mi smol pikinini, mi tingse God hem lukluk nomoa long eni mistek wea iumi duim for panisim iumi. Gogo taem mi big, mi tingse hem nating interest long mi. God hem olsem wanfala prime minister wea rulim pipol long kantri, bat hem no barava tingim olketa.”​—Rayna, Canada.

Hao nao tingting bilong iu? Waswe, hem hard for lovem God? For staka handred year nao olketa Christian faendem hard for lovem God. Olsem example, long olketa year from 500 go kasem 1500 C.E olketa Christian barava fraet long Olmaeti God and datwan mekem olketa no savve prea long hem. Will Durant, man wea raet abaotem history hem sei: “Man wea sin bae fraet tumas for prea long God wea farawe and wea no interest long pipol.”

Why nao pipol tingse “God hem farawe and hem no interest long pipol”? Wanem nao Bible teachim abaotem God? Waswe, wei for savve long tru samting abaotem God bae helpem iu for lovem hem?

BILIV BILONG PIPOL

“Mifala no savve agree sapos God hem garem nem, and mifala no savve agree long wanem nao nem bilong hem.”—Professor David Cunningham, Theological Studies.

TRU SAMTING WEA BIBLE TALEM

God hem sei: “Mi nao Jehovah. Hem nao nem bilong mi.” (Isaiah 42:8) Datfala nem Jehovah hem Hebrew nem wea minim “Hem Mekem Kamap.”​—Genesis 2:4, footnote.

Jehovah laekem iumi for iusim nem bilong hem. Bible hem sei: “Praisem nem bilong hem. Talemaot long pipol olketa samting wea hem duim. Talemaot datfala nambawan nem bilong God.”​—Isaiah 12:4.

Jesus iusim nem bilong God. Jesus prea olsem long Jehovah: “Mi talemaot nem bilong iu long olketa [olketa disaepol bilong Jesus] and bae mi gohed for duim olsem.” Why nao Jesus talemaot nem bilong God long olketa disaepol bilong hem? Hem sei: “Mekem olketa savve showimaot love long nara pipol olsem iu [God] tu showimaot love long mi and mekem mi savve wan mind witim olketa.”​—John 17:26.

WHY HEM IMPORTANT

Wanfala savveman, Walter Lowrie, hem sei: “Man wea no savve long nem bilong God bae hard for savve gud long hem, and sapos hem tingse God no interest long hem bae hem hard for lovem God.”

Wanfala man wea nem bilong hem Victor hem go long church evri week, bat hem sei hem nating savve long God. Hem sei: “Gogo samwan showim mi long Bible nem bilong God hem Jehovah, and hem olsem hem introducem God long mi. Mi feel olsem mi just savve nao long datfala man wea mi herem staka story abaotem hem. Mi luksavve hem interest long mi and mi start for fren witim hem.”

Jehovah tu hem fren gud witim olketa man wea iusim nem bilong hem. God talem wanfala promis long “olketa wea tingim nem bilong hem.” Hem sei: “Bae mi showimaot mercy long olketa, olsem wanfala dadi wea showimaot mercy long son bilong hem wea obeyim hem.” (Malachi 3:16, 17) God bae helpem tu olketa wea iusim nem bilong hem. Bible sei: “Eniwan wea prea long Jehovah for helpem hem, bae hem sev.”​—Rome 10:13.

BILIV BILONG PIPOL

“Olketa Catholic and Protestant religion biliv long Trinity. Olketa sei God hem Dadi, God hem Son, and God hem Holy Spirit. Long tingting bilong olketa, diswan no minim thrifala difren god hem stap, bat thrifala hia wanfala god nomoa.”—The New Encyclopædia Britannica.

TRU SAMTING WEA BIBLE TALEM

Jesus, Son bilong God, no enitaem hem sei hem semsem witim Dadi bilong hem. Bat hem sei: “Mi bae go long Dadi long heven bikos Dadi hem winim mi.” (John 14:28) Hem sei olsem tu long wanfala disaepol bilong hem: “Mi bae go long Dadi bilong mi wea hem Dadi bilong iufala tu, and go long God bilong mi wea hem God bilong iufala tu.”​—John 20:17.

Holy spirit hem no wanfala god. Olketa Christian long first century “kasem holy spirit” and Jehovah hem sei: “Mi bae givim kam spirit bilong mi long evri difren kaen pipol.” (Acts 2:1-4, 17) Holy spirit hem no part long wanfala Trinity. Hem paoa bilong God.

WHY HEM IMPORTANT

Tufala bigman bilong Catholic, Karl Rahner and Herbert Vorgrimler sei: “No eniwan bae minim Trinity sapos God no helpem olketa for minim, and nomata God duim datwan maet olketa bae no barava minim gud yet.” Waswe, bae iu lovem samwan wea hard for iu savve long hem or iu no minim hem? So datfala Trinity teaching hem stopem pipol for savve long God and for lovem hem.

Marco, wea iumi storyim finis long nara article sei datfala Trinity teaching mekem hem no savve long God. Hem sei: “Mi tingse God no laekem mi for savve long hem, and datwan mekem mi tingse hem no interest long mi. Mi hard for minim hem.” Bat Bible hem sei ‘hem no hard nomoa for savve long God.’ (Acts 17:27) Hem laekem iumi for savve long hem. Jesus hem sei: “Mifala savve hu nao mifala worshipim.”​—John 4:22.

Marco hem sei tu: “Taem mi savve God hem no part long wanfala Trinity mi start for fren gud witim hem.” Taem iumi luksavve Jehovah hem God wea interest long iumi, bae hem isi for iumi lovem hem. Bible sei: “Man wea no showimaot love hem no savve long God bikos God hem love.”​—1 John 4:8.

BILIV BILONG PIPOL

“Taem pipol wea duim bigfala sin olketa dae, soul bilong olketa go long hell. Long there nao olketa safa long ‘fire wea no savve finis.’” (Catechism of the Catholic Church) Samfala nara bigman bilong religion sei hell savve minim man hem stap farawe from God.

TRU SAMTING WEA BIBLE TALEM

Bible hem sei: “Soul wea hem sin bae dae.” (Ezekiel 18:4) Olketa wea dae finis “nating savve long eni samting.” (Ecclesiastes 9:5) Sapos soul hem dae and hem no savve long eni samting, hao nao bae hem safa long “fire wea no savve finis” or stap farawe from God?

Long Bible, Hebrew word and Greek word wea olketa transleitim “hell” hem savve minim grev bilong olketa man tu. Olsem example, taem Job safa long sik wea kasem hem, hem prea olsem: “Mi laekem tumas for iu haedem mi long grev [long Douay-Rheims Version hem sei “long hell”].” (Job 14:13, Holy Bible​—Easy-to-Read Version) Job laek for rest long grev, no long wanfala ples wea bae hem safa or wea hem stap farawe from God.

WHY HEM IMPORTANT

Sapos iumi tingse God hem raf, datwan savve mekem iumi les long hem. Rocío, wanfala woman wea stap long Mexico, hem sei: “Mi lanem datfala teaching abaotem hellfire taem mi smol. Mi fraet tumas long God, bikos mi tingse hem God wea savve kros and wea raf tumas.”

Taem Rocío lanem wanem Bible teachim abaotem olketa wea dae finis and olketa judgment bilong God, datwan helpem hem for garem stretfala tingting abaotem God. Hem sei: “Hem olsem mi free nao. Mi no fraet and no wari moa. Mi start for luksavve God laekem iumi for kasem gud samting and hem lovem iumi, and mi start for lovem hem tu. Hem olsem wanfala dadi wea holem hand bilong pikinini bilong hem and laekem olketa for kasem gud samting.”​—Isaiah 41:13.

Staka pipol lotu gud bikos olketa fraetem hellfire, bat God no laekem iumi for worshipim hem from iumi fraet long hem. Jesus hem sei: “Iu mas lovem God bilong iu Jehovah.” (Mark 12:29, 30) And tu, taem iumi luksavve God hem evritaem duim samting wea stret, iumi savve trustim olketa judgment bilong hem long future. Iumi savve garem sem tingting olsem fren bilong Job, Elihu, wea sei: “Hard tumas for tru God duim rabis samting, and for Olmaeti duim samting wea no stret.”​—Job 34:10.

Wanday taem Jesus long Jerusalem, hem story abaotem Dadi bilong hem, Jehovah, and hem showimaot biliv bilong olketa bigman bilong religion long datfala taem hem no stret. (John 8:12-30) Samting wea Jesus talem teachim iumi hao for lukluk gud long olketa biliv bilong pipol abaotem God distaem. Jesus sei: “Sapos iufala followim teaching bilong mi, iufala barava disaepol bilong mi nao. Iufala bae savve long samting wea tru, and datwan bae mekem iufala free.”​—John 8:31, 32.

Disfala toktok showimaot iumi mas ting raonem sapos olketa teaching bilong religion ‘followim teaching bilong Jesus’ and datwan bae helpem iumi for luksavve sapos olketa teaching hia hem “tru.” Taem iu herem biliv bilong pipol abaotem God, bae hem gud sapos iu tingim diswan, ‘Waswe, datfala biliv hem followim wanem Jesus teachim and wanem Bible talem?’ Hem gud for iumi followim example bilong olketa wea herem wanem aposol Paul talem and wea “lukluk gud long olketa Holy Raeting for savve sapos samting wea olketa herem hem tru or nomoa.”​—Acts 17:11.

Marco, Rosa, and Rayna, wea iumi storyim long first article, olketa lukluk gud long wanem olketa bilivim taem olketa studyim Bible witim Olketa Jehovah’s Witness. Hao nao tingting bilong olketa abaotem wanem olketa lanem?

Marco: “Man wea studyim Bible witim mi and waef bilong mi iusim Bible for ansarem evri kwestin wea mitufala garem. Mifala start for lovem Jehovah, and tu, mitufala barava fren gud tugeta!”

Rosa: “Long firstaem, mi tingse Bible hem wanfala buk abaotem olketa idea bilong man nomoa wea trae for explainim God. Bat isisi, mi kasem ansa for olketa kwestin bilong mi from Bible. Distaem mi savve Jehovah lovem mi and mi savve trustim hem.”

Rayna: “Mi prea long God for helpem mi for savve long hem. No longtaem bihaen, mi and hasband bilong mi start for studyim Bible. Long datfala taem nao mitufala lanem tru samting abaotem Jehovah! Mitufala hapi tumas for lanem God hem barava tingim iumi.”

Bible no just mekem iumi luksavve long olketa biliv abaotem God wea no stret, bat hem showimaot tru samting abaotem olketa nambawan wei bilong hem. Bible hem kam from God and hem helpem iumi for “minim olketa samting wea hem kaen tumas for givim long iumi.” (1 Corinth 2:12) Iu savve faendem ansa from Bible for olketa kwestin wea staka pipol savve askem abaotem God, plan bilong hem, and future bilong iumi. Readim olketa ansa for olketa kwestin hia long www.jw.org, then go long “Bible Teachings > Bible Questions Answered.” Iu savve askem tu wanfala Bible study long datfala Web site or askem wanfala Jehovah’s Witness. Sapos iu duim olsem, mifala sure bae iu no faendem hard for iu lovem God.