Wanem Nao Bible Talem Abaotem Wei for Garem Tattoo?
Ansa from Bible
Bible storyim tattoo wanfala taem nomoa. Hem long Levitikas 19:27, 28, wea sei: “Yufala mas no tatuim skin blong yufala.” God talem disfala komand long nation bilong Israel mekem olketa no olsem nara pipol wea stap raonem olketa. Pipol hia savve mekem tattoo long body wea garem nem or saen bilong God bilong olketa. (Deuteronomy 14:2) Nomata datfala Law bilong olketa Israelite hem no for olketa Christian, olketa Christian shud ting serious abaotem principle bihaenem datfala law.
Waswe, hem fitim for olketa Christian garem tattoo?
Olketa Bible principle hia bae helpem iu for ting raonem diswan:
Bible sei: “Olketa woman shud hambol and lukluk bilong olketa shud showimaot respect.” (1 Timothy 2:9, New American Bible) Datfala principle hem fitim for olketa woman and man. Diswan showimaot iumi shud tingim feeling bilong narawan and no duim samting wea bae mekhae long iumiseleva.
Samfala garem tattoo for showim olketa savve disaedem samting seleva and for difren from olketa narawan, and samfala garem tattoo for pruvim olketa savve duim wanem olketa seleva laekem. Bat Bible encouragem olketa Christian olsem: “Givim body bilong iufala olsem wanfala sakrifaes wea laef and holy and wea God savve hapi long hem. Long wei olsem, bae iufala worshipim God witim gudfala tingting.” (Rome 12:1) So tingting gud abaotem why iu laek garem tattoo. Sapos iu laek garem tattoo bikos olketa narawan tu garem tattoo or for showim iu part long wanfala grup, tingim maet iu changem mind bilong iu bihaen, bat iu bae hard for aotem tattoo. Hem gud for ting raonem why iu laek for garem tattoo, bikos datwan bae helpem iu for mekem wise disison.—Provebs 4:7.
Bible sei: “Olketa plan bilong man wea waka hard and wea tingting gud firstaem bae win, bat evriwan wea kwiktaem for duim samting and wea no tingting gud firstaem, gogo bae olketa poor.” (Proverbs 21:5, NW) Staka pipol wea garem tattoo olketa no tingting gud firstaem bifor olketa duim datwan. Bat taem man garem tattoo datwan savve affectim hao pipol ting long hem and maet datwan mekem hem hard for hem kasem samfala waka. Hem expensive tu for aotem bak tattoo, and taem olketa aotem hem savve pain tumas. Olketa wea duim research sei staka man wea garem tattoo wish nomoa olketa no duim datwan. Hem nao why staka bisnis for aotem olketa tattoo stap distaem.