Wanfala young man lukim pipol go lo Kingdom Hall

OLKETA KWESTIN WEA YOUNG PIPOL GAREM

Why Nao Hem Gud for Go lo Olketa Meeting lo Kingdom Hall?

Olketa Jehovah’s Witness garem meeting tufala taem lo week lo ples blo olketa for worship, wea olketa kolem lo Kingdom Hall. Wat nao iu savve lanem lo Kingdom Hall, and wat nao gud samting wea iu savve kasem taem iu kam lo meeting?

Wat nao iu savve lanem lo Kingdom hall?

Kingdom Hall hem main ples for lane abaotem advaes lo Bible wea savve helpem iumi lo laef. Olketa meeting savve helpem iu for:

lanem truth abaotem God.
savve why olketa nogud samting happen distaem.
helpem iu for garem olketa gudfala wei.
garem olketa gud fren.

Maet iu laek savve. Ples wea Olketa Jehovah’s Witness meet tugeta for worship olketa kolem lo Kingdom Hall bikos Kingdom blo God main samting wea olketa storyim lo there.—Matthew 6:9, 10; 24:14; Luke 4:43.

Why nao iu shud go lo meeting?

Olketa samting wea iu herem bae helpem iu. Olketa Bible principle wea olketa discussim lo meeting blo Olketa Jehovah’s Witness bae helpem iu for “kasem [wisdom].” (Provebs 4:5) Datwan showim Bible savve helpem iu for mekem olketa gud disison lo laef. And tu, Bible givim ansa for olketa important kwestin olsem:

Diswan hem samfala title blo olketa tok wea savve kamap lo weekend meeting:

Why Nao Hem Gud for Bible Leadim Iumi?
Wea Nao Iu Savve Kasem Help Taem Iu Kasem Trabol?
Samting wea Kingdom Bilong God Duim for Iumi Distaem.

“Wanfala classmate blo mi kam lo meeting. Hem sidaon witim famili blo mi and mifala givim buk for hem iusim. Bihaen meeting, hem talem hao hem laekem tumas olketa koment wea pipol givim lo kwestin and ansa part. Hem sei tu, lo church blo hem olketa no garem olketa buk for iusim olsem iumi.”—Brenda.

Maet iu laek savve. Olketa meeting lo Kingdom Hall hem free nomoa, and olketa no kolektem eni selen.

Olketa wea iu meetim lo Kingdom Hall bae encouragem iu. Bible sei wanfala reason why olketa Christian shud meet tugeta hem for “encouragem narawan.” (Hebrew 10:24, 25) For fren witim pipol wea lovem God and tingim olketa narawan firstaem hem mekem iumi hapi, nomata iumi stap lo world wea pipol tingim olketa seleva nomoa.

“Samfala taem mi garem staka samting for duim lo skul wea mekem mi taed and sorre lo end blo day, bat olketa lo Kingdom Hall evritaem encouragem mi. Taem mi gogo bak lo haos bihaen meeting, mi hapi and redi for deal witim eni samting wea bae kamap lo next day.”—Elisa.

Maet iu laek savve. Evriwea lo world, Olketa Jehovah’s Witness garem winim 120,000 kongregeson. And winim 60,000 difren ples nao olketa savve meet tugeta lo hem for meeting. Evri year, olketa buildim samting olsem 1,500 niu Kingdom Hall bikos staka pipol moa kam lo olketa meeting.a

Wanem olketa nara young wan talem

“Taem mi lo hae skul, wanfala classmate blo mi kam witim mi lo samfala meeting. Hem tinghae lo evriwan wea garem difren age wea kam for lane tugeta abaotem Bible. No longtaem go nomoa boss blo mi tu kam lo meeting and hem laekem tumas hao iumi iusim Bible for teach. Taem mi lukim hao hem tinghae lo wat hem herem lo meeting, datwan mekem mi tinghae go moa lo olketa meeting!”—Jessica.

“Olketa meeting helpem mi for no wari tumas abaotem wat mi deal witim each day. Iumi lanem hao for garem gud laef, hao for garem olketa gud wei, and staka nara samting tu. Bihaen evri meeting, mi kasem encouragement and feel strong moa.”—Timothy.

“Wanfala man wea mi invaetem lo meeting hem sei: ‘Mi kam nomoa for pruvim if wat iufala bilivim hem no tru. Bat wat mi bilivim nao hem rong!’ Hem barava tinghae lo Olketa Jehovah’s Witness from olketa kaen lo hem. Hem sei: ‘Nomata mi just meetim iufala nomoa, hem olsem mi savve lo iufala for longtaem finis!’”—Jacob.

“Samfala taem mi ting olsem, ‘Taem meeting finis nomoa, mi go nao.’ Bat taem meeting gohed, mi no feel olsem nao. Bihaen lo meeting, mi story witim olketa narawan and mi no savve why nao mi feel olsem. If no eni meeting, bae mi no garem olketa gud fren.”—Madison.

a For faendem meeting wea klosap lo ples wea iu stap, go lo page “Olketa Kongregeson Meeting blo Olketa Jehovah’s Witness” and go lo “Faendem Meeting wea Klosap lo Iu.”