Waswe, Pipol Savve Laef Olowe?
LONG March 3, 1513, Juan Ponce de León, man from Spain, startim wanfala barava important gogo. Hem sail from Puerto Rico for go kasem island bilong Bimini. Kastom story sei hem luk aotem wata wea garem mirakol paoa for mekem man young moa. Bat hem go shore nomoa long Florida, U.S.A. Hem nating faendem datfala mirakol wata bikos wata hia no stap.
Distaem, staka pipol laef kasem 70 or 80 year nomoa. Nomata Bible story abaotem pipol wea laef longtaem, datfala 2002 Guinness Book of World Records sei age bilong wanfala woman wea barava olo winim eniwan hem 122 year and 164 day. (Genesis 5:3-32) Bat, savveman John Harris sei: “Niu research showim hao long future maet iumi savve missim wei for kamap olo and dae.” Samfala didifren man wea duim research sei “maet laef olowe hem klosap kamap,” “start long year 2099 man bae no savve dae,” “olketa cell gohed for kamap niu,” and samfala samting olsem.
Mark Benecke talem disfala toktok insaed buk wea hem raetem, The Dream of Eternal Life: “Klosap evri cell long body kamap niu samfala taem long laef bilong man. . . . Bihaen samting olsem seven year, hem olsem iumi garem niu body.” Bat, diswan no happen olowe from olketa cell no gohed for duim diswan. Sapos olketa cell gohed kamap niu olowe, Benecke talem hao “body bilong man savve kamap niu evritaem.”
Tingim tu brain bilong iumi wea fit for duim bigfala waka, bat lelebet part nomoa iumi iusim long shortfala taem wea iumi laef. Encyclopædia Britannica talem hao brain “fit for duim staka moa samting winim wanem man savve iusim hem for duim insaed full laef bilong hem.” (1976 Edition, Volume 12, page 998) Datfala buk How the Brain Learns, wea David A. Sousa raetem, hem sei: “For tok stret, brain no garem eni spialaen long haomas samting hem savve rememberim.”—Page 78, Second Edition, copyright 2001.
Why nao olketa savveman no savve why iumi kamap olo and dae? And why nao brain fit for rememberim staka samting? Waswe, God creatim iumi for kasem savve for olowe? Why nao iumi garem tingting for laekem laef olowe?
Bible sei: “[God] putim feeling for laekem laef olowe insaed long heart bilong olketa, mekem olketa man bae nating savve long waka wea trufala God hem duim from start go kasem finis.” (Ecclesiastes 3:11) Toktok hia showimaot hao God wakem iumi witim feeling for laekem laef olowe. And sapos iumi kasem datwan, iumi bae evritaem lanem niu samting abaotem God and olketa samting wea hem duim. Sapos iumi laef olowe iumi bae evritaem lane abaotem staka spesol samting wea God wakem.
Toktok wea Jesus Christ talem showimaot hao man savve laef olowe. Hem sei: “Diswan nao minim laef olowe, for olketa kasem savve long iu, datfala only tru God, and long datwan wea iu sendem kam, Jesus Christ.” (John 17:3) Wanem nao tingting bilong iu? Waswe, iu laek for laef olowe?
[Olketa Piksa long page 3]
Juan Ponce de León luk aotem wata wea garem mirakol paoa for mekem man young moa
[Credit Line]
Ponce de León: Harper’s Encyclopædia of United States History