1, 2. (a) Wanem samting wea barava no followim justice nao kasem Joseph? (b) Hao nao Jehovah stretem olketa samting hia wea no followim justice?

HEM barava no followim justice. Datfala naesfala young man no duim eni rong, bat hem stap long prison bikos olketa laea for sei hem reipim wanfala woman. Bat datwan no firstaem wea samting wea no followim justice kasem hem. Planti year bifor, taem hem 17 year, olketa brata bilong disfala young man, Joseph, klosap killim hem dae. Olketa sellim hem for kamap wanfala slave long nara kantri. Long there hem rejectim wei wea waef bilong masta bilong hem trae hard long hem. Datfala woman, from Joseph rejectim hem, mekapem disfala laea story, so olketa putim Joseph long prison. Sorre tumas, luk olsem no eniwan stap for duim samting for helpem Joseph.

² Nomata olsem, God wea “lovem raeteous fasin and justice” hem lukluk kam. (Psalm 33:5) Jehovah duim samting for stretem olketa samting hia wea no followim justice mekem Joseph savve kamap free. Winim datwan, Joseph—man wea olketa torowem insaed long “prison hol”—kasem bigfala responsibility and spesol honor. (Genesis 40:15; 41:41-43; Psalm 105:17, 18) Gogo, evriting showimaot Joseph hem no guilty, and hem iusim hae position bilong hem for saportim purpose bilong God.—Genesis 45:5-8.

3. Why nao iumi evriwan laekem pipol for deal witim iumi long wei wea followim justice?

³ Story olsem hem barava affectim heart bilong iumi! Iumi evriwan savve lukim samting wea no followim justice or maet datwan spoelem iumi finis. Tru nao, iumi evriwan wantem pipol for deal witim iumi long wei wea followim justice and wea no teksaed. Diswan no mekem iumi sapraes bikos Jehovah givim iumi olketa fasin wea olsem fasin bilong hemseleva, and justice nao wanfala main fasin bilong hem. (Genesis 1:27) For savve gud long Jehovah, iumi need for minim justice bilong hem. Then bae iumi ting moa hae long olketa nambawan wei bilong hem and kam moa klos long hem.

Wanem Nao Justice?

4. Long tingting bilong man, planti taem wanem nao justice hem minim?

⁴ Long tingting bilong man, justice hem minim nomoa wei for followim olketa rul bilong law long wei wea no favorim eniwan. Datfala buk Right and Reason—Ethics in Theory and Practice sei dat “justice hem join witim law, responsibility, rights, and waka, and hem givimaot judgment long wei wea no teksaed or followim samting wea man fit for kasem.” Bat, justice bilong Jehovah hem minim moa samting winim wei for just followim olketa law witim no eni feeling, for ting long hem olsem waka or responsibility nomoa.

5, 6. (a) Wanem nao mining bilong olketa word long languis wea olketa iusim for raetem Bible wea olketa transleitim olsem “justice”? (b) Wei wea God hem showimaot justice hem minim wanem?

⁵ Mining bilong justice bilong Jehovah savve kamap moa waed and deep sapos iumi lukluk long olketa languis word wea olketa iusim for raetem Bible firstaem. Long Hebrew Scripture, thrifala main word nao insaed long diswan. Word wea olketa planti taem transleitim “justice” olketa savve transleitim tu olsem wei for “duim stret samting.” (Genesis 18:25) Tufala nara word hia olketa planti taem transleitim olsem “raeteous fasin.” Insaed Christian Greek Scripture, disfala word “raeteous fasin” garem mining olsem “fasin for stret or followim justice.” So, diswan hem showimaot hao raeteous fasin and justice fasin tufala klosap semsem.​—Amos 5:24.

⁶ So taem Bible sei God hem showimaot justice, hem minim hem duim samting wea stret and honest and hem duim diswan evritaem, and no favorim eniwan. (Romans 2:11) Tru nao, hard for tingim hem bae enitaem followim wei wea difren. Elihu wea faithful sei: “Hem hard tumas for trufala God duim nogud samting, and for Olmaeti duim samting wea no stret!” (Job 34:10) For tok stret, Jehovah kanduit for no followim justice. Why? From tufala important reason.

7, 8. (a) Why nao Jehovah kanduit for duim samting wea no showimaot justice? (b) Wanem nao muvim Jehovah for raeteous, wea minim for showimaot justice long evri samting wea hem duim?

⁷ First reason, Jehovah hem holy. Olsem iumi lukim long Chapter 3, Jehovah hem evritaem klin and stret. Dastawe hem no savve duim eniting wea no raeteous or no followim justice. Tingim wanem datwan hem minim. Holy fasin bilong Dadi bilong iumi long heven givim iumi planti reason for trustim wei wea hem bae nating spoelem olketa pikinini bilong hem. Jesus hem garem kaen trust olsem. Long lastfala naet wea hem laef long earth, hem prea olsem: “Dadi long heven wea iu holy, plis lukaftarem olketa hia bikos long nem bilong iu.” (John 17:11) Disfala toktok ‘Dadi wea holy’ wea Bible storyim, datwan hem fitim Jehovah nomoa. Diswan hem fitim bikos no eni dadi long earth hem semsem witim Hem saed long holy fasin. Jesus garem full faith hao olketa disaepol bilong hem bae stap sef anda long Dadi bilong hem, wea klin evribit and no garem eni sin.​—Matthew 23:9.

⁸ Mek-tu reason, love wea no selfish hem insaed evri part long fasin bilong God. Love olsem muvim hem for raeteous, or showimaot justice taem hem deal witim nara pipol. Bat olketa samting wea no followim justice—insaed diswan wei for heitim man from difren ples, favorim, and saed witim samwan—hem planti taem kamaot from greedy and selfish fasin, tufala fasin wea opposite long love. Saed long God bilong love, Bible promisim iumi olsem: “Jehovah hem raeteous; hem lovem olketa raeteous akson.” (Psalm 11:7) Jehovah sei olsem abaotem hemseleva: “Mi, Jehovah, mi lovem justice.” (Isaiah 61:8) Iumi barava kasem comfort for savve God hem laek tumas for duim samting wea stret, and showimaot justice fasin!​—Jeremiah 9:24.

Mercy and Perfect Justice Bilong Jehovah

9-11. (a) Hao nao justice bilong Jehovah join witim mercy bilong hem? (b) Hao nao justice bilong Jehovah witim mercy bilong hem showaot klia long wei wea hem deal witim olketa man wea sin?

⁹ Olsem evri narasaed bilong nambawan fasin bilong hem, justice bilong Jehovah hem perfect, hem no short long eni wei. Taem hem praisem Jehovah, Moses raet olsem: “Datfala Rok, waka bilong hem perfect, from evri wei bilong hem followim justice. Wanfala God bilong faithful fasin, wea showimaot justice evribit; hem nao raeteous and stret.” (Deuteronomy 32:3, 4) Evri wei wea Jehovah showimaot justice hem perfect—hem no isisi tumas, or strong tumas.

¹⁰ Justice bilong Jehovah hem join long klos wei witim mercy bilong hem. Psalm 116:5 hem sei: “Jehovah hem kaen and raeteous [“showimaot justice,” The New American Bible]; and God bilong iumi hem Datwan wea showim mercy.” Tru nao, Jehovah hem showimaot justice and mercy. Tufala fasin hia no againstim each other. Wei wea hem showimaot mercy hem no long wei for katem daon justice bilong hem, maet from justice hia hem strong tumas. Bat, planti taem hem showimaot tufala fasin hia long semtaem, and maet long sem samting hem duim tu. Tingim wanfala example.

¹¹ Evri man born witim sin and fit for kasem panis bilong sin​—dae. (Romans 5:12) Bat Jehovah hem nating hapi taem olketa man wea sin dae. Hem “wanfala God wea redy for forgive, kaen and showimaot mercy.” (Nehemiah 9:17) Nomata olsem, bikos hem holy, hem no savve acceptim fasin wea no raeteous. So, hao nao hem savve showim mercy long olketa man wea born witim sin? Ansa hem stap insaed wanfala barava spesol truth insaed Word bilong God: Arrangement bilong Jehovah for givim wanfala ransom for sevem olketa man. Long Chapter 14, iumi bae lanem moa samting abaotem disfala loving arrangement. Hem barava showimaot justice and mercy long semtaem. Thru long diswan, Jehovah savve showimaot kaenfala mercy long olketa sinner wea repent and long semtaem keepim olketa standard bilong hem saed long justice wea perfect.​—Romans 3:21-26.

Justice Bilong Jehovah Hem Muvim Heart

12, 13. (a) Why nao justice bilong Jehovah pullim iumi klos long hem? (b) Wanem samting nao David luksavve long hem saed long justice bilong Jehovah, and hao nao diswan hem comfortim iumi?

¹² Justice bilong Jehovah hem no fasin wea no garem feeling mekem iumi les long hem, bat hem fasin wea pullim iumi for kam klos long hem. Bible storyim klia justice wea hem nao raeteous fasin wea Jehovah showimaot witim feeling. Iumi lukim samfala wei wea Jehovah showimaot justice wea savve muvim heart bilong iumi.

¹³ Perfect justice bilong Jehovah muvim hem for showim faithful and loyal fasin long olketa servant bilong hem. David wea raetem psalm hem minim and experiencem disfala saed long justice bilong Jehovah. From experience bilong hemseleva and from hem studyim olketa wei wea God duim samting, wanem nao David luksavve long hem? Hem sei: “Jehovah hem lovem justice, and hem bae no lusim olketa loyal wan bilong hem. Hem bae protectim olketa for olowe.” (Psalm 37:28) Datwan hem barava givim comfort! No enitaem God bilong iumi bae lusim olketa wea loyal long hem. So, iumi savve depend long hem for loving kea and wei wea hem stap klos long iumi. Justice bilong hem mekem iumi sure long disfala promis!​—Proverbs 2:7, 8.

14. Hao nao wei wea Jehovah tingim olketa wea safa hem showaot insaed Law wea hem givim long Israel?

¹⁴ Justice bilong God hem tingim olketa need bilong olketa wea safa. Interest wea Jehovah garem for olketa wea safa hem showaot klia long Law wea hem givim long Israel. Olsem example, Law hem mekem spesol arrangement for mek sure olketa pikinini wea no garem dadi and mami and olketa widow mas kasem wanem olketa needim. (Deuteronomy 24:17-21) From hem luksavve hao laef hem hard tumas for olketa famili olsem, Jehovah seleva kamap Judge and Man for Protectim olketa, datwan wea “showim justice long pikinini wea no garem dadi and long widow.”a (Deuteronomy 10:18; Psalm 68:5) Jehovah warnim olketa Israelite hao sapos olketa spoelem olketa woman and pikinini wea no savve defendim seleva, hem bae barava lisin long singaot bilong olketa hia. Hem sei: “Bae mi kros.” (Exodus 22:22-24) Nomata kros hem no wanfala main fasin bilong Jehovah, samwan wea min for duim samting wea no followim justice fasin savve muvim Jehovah for garem kros wea raeteous, especially sapos man duim olsem long olketa wea poor and no savve defendim seleva.​—Psalm 103:6.

15, 16. Wanem nambawan pruv nao showimaot Jehovah no teksaed?

¹⁵ Jehovah talem iumi tu hao hem no “favorim eniwan and no acceptim bribe.” (Deuteronomy 10:17) Olketa riches or lukluk bilong man no affectim Jehovah, wea datwan hem difren from planti man wea garem paoa. Hem barava no saedem or favorim eniwan. Tingim wanfala nambawan pruv wea showimaot Jehovah no teksaed. Chance for kamap olketa tru worshiper bilong hem, witim hope for laef olowe, hem no for tu-thri nomoa wea hem chusim. Bat, “long evri kantri long world, sapos man worshipim God and duim samting wea stret, God bae hapi long hem.” (Acts 10:34, 35) Disfala nambawan hope hem stap for evriwan nomata wanem living olketa garem, wanem kala skin, or wanem kantri olketa stap insaed. Datwan nao hem barava trufala justice!

¹⁶ Narafala part long perfect justice bilong Jehovah hem stap wea iumi bae storyim and shud respectim: hem nao wei wea hem deal witim olketa wea brekem olketa raeteous standard bilong hem.

No Free From Panis

17. Explainim why nao olketa samting wea no followim justice long world distaem hem no spoelem justice fasin bilong Jehovah.

¹⁷ Samfala maet ting: ‘From Jehovah no acceptim samting wea no raeteous, hao nao iumi savve explainim nogud wei for safa and raverave fasin wea staka tumas long world distaem?’ Nogud wei for no followim justice olsem hem no spoelem justice fasin bilong Jehovah. Planti samting bilong disfala wicked world wea no followim justice hem from sin wea olketa man kasem from Adam. Insaed world wea olketa man chus for followim wei bilong sin, wei wea no followim justice hem staka—bat no for longtaem.​—Deuteronomy 32:5.

18, 19. Wanem nao showimaot Jehovah bae no letem pipol wea min for disobeyim olketa raeteous law bilong hem go ahed olsem for olowe?

¹⁸ Nomata Jehovah showimaot mercy long olketa wea kam klos long hem witim honest heart, hem bae no letem samting wea mekem holy nem bilong hem kasem shame go ahed for olowe. (Psalm 74:10, 22, 23) No eniwan savve mekful long God bilong justice; hem bae no protectim olketa wea min for sin from strongfala judgment wea olketa fit for kasem. Jehovah hem “God wea garem bigfala mercy, hem tingim man, hem no savve kros kwiktaem, loyal love bilong hem big tumas, hem talem tru samting evritaem, . . . bat hem bae no letem wicked man for misstim panis.” (Exodus 34:6, 7) For fitim olketa toktok hia, samfala taem Jehovah mas panisim olketa wea min for disobeyim olketa raeteous law bilong hem.

¹⁹ Olsem example, tingim wei wea God deal witim Israel bifor. Nomata taem olketa stap long Promis Land, olketa Israelite planti taem duim samting wea no faithful. Nomata nogud fasin bilong olketa mekem Jehovah “feel pain,” hem no stretawe rejectim olketa. (Psalm 78:38-41) Bat, long wei bilong mercy hem givim olketa chance for change. Hem ask strong olsem: “Mi no hapi taem wicked man hem dae, bat mi hapi taem hem changem nogud wei bilong hem and go ahed for stap laef. Tan bak, tan bak from olketa nogud wei bilong iufala, from why nao iufala mas dae, O haos bilong Israel?” (Ezekiel 33:11) From hem tinghae long laef, Jehovah planti taem sendem moa olketa profet bilong hem for muvim olketa Israelite for tan bak from olketa nogud wei bilong olketa. Nomata olsem, staka wea garem hardfala heart no want for lisin and repent. Gogo, for saed bilong holy nem bilong hem and evri samting wea join witim datwan, Jehovah letem olketa enemy for win ovarem olketa.​—Nehemiah 9:26-30.

20. (a) Wanem nao iumi lanem abaotem Jehovah from wei wea hem deal witim Israel? (b) Why nao lion hem join witim ples wea God stap and throne bilong hem?

²⁰ Iumi lanem planti samting abaotem Jehovah from wei wea hem deal witim Israel. Iumi lanem hao eye bilong hem wea lukim evri samting lukim fasin wea no raeteous and diswan affectim hem long bigfala wei. (Proverbs 15:3) Iumi kasem encouragement taem iumi savve hem luk aotem olketa wei for showimaot mercy sapos reason stap for duim olsem. And tu, iumi lanem hao hem no kwiktaem for judge. Bikos Jehovah patient, planti pipol garem rong tingting for sei hem bae nating bringim judgment long wicked pipol. Bat datwan hem no tru, bikos wei wea God deal witim Israel showim iumi tu hao patient fasin bilong God garem spialaen. Jehovah hem strong for raeteous fasin. No olsem olketa man wea planti taem hol bak for showimaot justice, hem nating fraet for duim samting wea stret. Dastawe, lion wea piksarem justice wea no fraet hem join witim ples wea God stap and throne bilong hem.b (Ezekiel 1:10; Revelation 4:7) So iumi sure hem bae fulfillim promis bilong hem for finisim fasin wea no followim justice long disfala earth. Tru nao, wei bilong hem for judge hem: strong taem hem need for strong, showimaot mercy long evri chance hem garem.​—2 Peter 3:9.

Kam Klos Long God Bilong Justice

21. Taem iumi ting raonem wei wea Jehovah showimaot justice, hao nao iumi shud ting long hem, and why nao olsem?

²¹ Taem iumi ting raonem hao Jehovah showimaot justice, iumi shud no ting long hem olsem wanfala judge wea no garem feeling wea tingim nomoa wei for judgem olketa wea duim rong samting. Bat, iumi shud ting long hem olsem wanfala loving Dadi wea strong and evritaem deal witim olketa pikinini bilong hem long best wei. Olsem wanfala Dadi wea showimaot justice, wea hem nao raeteous fasin, Jehovah balancem wei for strong and samting wea stret witim fasin for kea long olketa pikinini bilong hem long earth, wea needim help and forgiveness bilong hem.​—Psalm 103:10, 13.

22. From justice leadim hem, Jehovah openem wei for iumi garem wanem hope, and why nao hem deal witim iumi long wei olsem?

²² Iumi thankiu tumas bikos justice bilong God hem minim moa samting winim wei for judgem olketa wea rong nomoa! From justice bilong hem, Jehovah hem openem wei for iumi garem nambawan hope—perfect, laef olowe insaed wanfala world wea “raeteous fasin bae stap.” (2 Peter 3:13) God bilong iumi deal witim iumi long disfala wei bikos justice bilong hem muvim hem for sevem pipol winim wei for judgem olketa. Tru nao, wei for minim hao big nao justice bilong Jehovah hem mekem iumi kam klos long hem! Insaed olketa next chapter, bae iumi lukluk moa klos long hao Jehovah showimaot disfala nambawan fasin.

1. Taem olketa samting happen wea no followim justice, hao nao diswan maet affectim iumi?

SAMWAN konim wanfala olo widow woman and tekem evri selen wea hem sevem for future bilong hem. Wanfala woman wea no garem love hem lusim niu baby bilong hem. Wanfala man go long prison for wanfala rong wea hem nating duim. Hao nao feeling bilong iu long olketa kaen samting olsem? Maet each story hia mekem iu feel nogud, and fitim for iu feel olsem. Iumi olketa pipol garem strongfala feeling for samting wea stret and samting wea rong. Taem wanfala samting happen wea no followim justice, iumi feel kros. Iumi laekem man wea kasem nogud samting for kasem bak samting wea hem lusim and man wea duim rong for kasem panis. Sapos diswan no happen, maet iumi ting: ‘Waswe, God lukim olketa samting hia? Why nao hem no duim eniting?’

2. Hao nao Habakkuk hem feel abaotem fasin wea no followim justice, and why nao Jehovah no hotem hem from diswan?

² Insaed long history, olketa faithful servant bilong Jehovah askem semkaen kwestin. Olsem example, profet Habakkuk prea olsem long God: “Why nao iu mekem mi lukim olketa barava nogud samting olsem? Why nao iu letem raf fasin, wei for brekem law, crime, and barava nogud fasin for kasem evri ples?” (Habakkuk 1:3, Contemporary English Version) Jehovah no hotem Habakkuk from hem ask stret olsem, bikos Hem nao datwan wea putim justice fasin insaed long olketa man. Yes, Jehovah putim lelebet justice fasin bilong hemseleva insaed long iumi.

Jehovah Heitim Samting wea No Followim Justice

3. Why nao iumi savve sei Jehovah hem winim iumi long wei for luksavve long olketa samting wea no followim justice?

³ Samting wea no followim justice no savve haed from Jehovah. Hem lukim evri samting wea happen. Bible sei olsem abaotem taem bilong Noah: “Jehovah lukim wei bilong olketa man long earth hem nogud tumas, and evritaem nomoa tingting and samting wea heart bilong olketa laekem hem nogud.” (Genesis 6:5) Tingim mining bilong datfala toktok. Planti taem, wei wea iumi ting abaotem samting wea no followim justice hem from wanem iumi herem or iumiseleva experiencem. Long narasaed, Jehovah hem luksavve long samting wea no followim justice evriwea long world. Hem lukim evri samting! Winim datwan, hem luksavve long olketa feeling insaed long heart—nogud tingting wea bihaenem olketa nogud samting hia.​—Jeremiah 17:10.

4, 5. (a) Hao nao Bible showimaot Jehovah hem kea for olketa wea kasem samting wea no followim justice? (b) Hao nao samting wea no followim justice kasem Jehovah tu?

⁴ Bat Jehovah duim moa samting winim wei for luksavve long samting wea no followim justice nomoa. Hem garem feeling tu for olketa wea safa from diswan. Taem olketa enemy nation deal witim pipol bilong hem long raf wei, Jehovah feel nogud tumas from hem herem krae bilong olketa bikos pipol spoelem olketa and treatim olketa nogud. (Judges 2:18) Maet iu luksavve hao taem pipol evritaem lukim wei wea no followim justice, olketa start for lusim wei for feel nogud long datwan. Datwan no happen long Jehovah! Hem lukim evri kaen samting wea no followim justice insaed 6,000 year, bat hem still garem bigfala heit for datwan. Tru nao, Bible sei hem barava heitim olketa samting olsem “tongue wea tok laea,” “hand wea killim dae innocent man,” and “false witness wea toktok bilong hem laea evritaem.”​—Proverbs 6:16-19.

⁵ Tingim tu strongfala toktok bilong Jehovah againstim olketa leader bilong Israel wea no showimaot justice. Hem muvim profet bilong hem for askem olketa olsem: “Waswe, iufala no savve finis hao for showimaot justice?” Taem hem talemaot klia wei wea olketa iusim paoa long rong wei, Jehovah talem samting wea bae kasem olketa konman hia: “Olketa bae askem Jehovah for help, bat hem bae no ansarem olketa. Hem bae haedem feis bilong hem from olketa long datfala taem, bikos olketa duim wicked samting.” (Micah 3:1-4) Jehovah barava heitim samting wea no followim justice! For tok stret, hemseleva tu kasem diswan! For planti thousand year, Satan hem tok spoelem hem long wei wea no followim justice. (Proverbs 27:11) And tu, Jehovah feel nogud tumas long samting wea barava no followim justice wea worse winim eni nara samting, taem pipol killim dae, olsem wanfala criminal, Son bilong hem wea “no enitaem hem duim sin.” (1 Peter 2:22; Isaiah 53:9) Tru tumas, Jehovah hem lukim and garem feeling for olketa wea kasem samting wea no followim justice.

6. Hao nao maet iumi feel taem samting wea no followim justice hem kasem iumi, and why nao olsem?

⁶ Nomata olsem, taem iumi lukim samting wea no followim justice—or taem iumiseleva kasem datwan—hem fasin bilong man for feel nogud tumas. God wakem iumi long image bilong hem, and samting wea no followim justice hem barava opposite long fasin bilong Jehovah. (Genesis 1:27) So, why nao God letem samting wea no followim justice for go ahed?

Datfala Important Situation wea Kamap

7. Storyim hao olketa challengem nem bilong Jehovah and hao hem rul.

⁷ Ansa bilong disfala kwestin hem join witim wanfala important situation wea kamap. Olsem iumi lukim finis, Creator garem right for rul ovarem earth and evriwan wea stap insaed. (Psalm 24:1; Revelation 4:11) Bat, start long history bilong olketa man, challenge hem kamap bikos olketa tok spoelem nem bilong Jehovah and hao hem rul. Long wanem wei? Jehovah komandim first man, Adam, for no kaikaim frut from wanfala tree insaed datfala garden wea hem Paradaes hom bilong hem. And waswe sapos hem disobey? God sei long hem: “Bae iu dae.” (Genesis 2:17) Komand bilong God hem no hard samting long Adam or waef bilong hem Eve. Nomata olsem, Satan switim Eve for tingse God hem strict tumas. So waswe sapos hem kaikaim frut from datfala tree? Satan sei olsem long Eve: “Iutufala bae no dae. God savve long day wea iutufala kaikaim datwan, eye bilong iutufala bae open and iutufala bae olsem God, and iutufala bae savve long gud samting and nogud samting.”​—Genesis 3:1-5.

8. (a) Toktok wea Satan talem hem givim wanem idea long Eve? (b) Wanem nao Satan challengem saed long nem and sovereign rul bilong God?

⁸ From disfala toktok Satan givim idea hao Jehovah no only haedem important information from Eve bat Hem laea long Eve tu. Satan hem mekem Eve for kwestinim wanem kaen Person nao Jehovah. Taem Satan duim datwan, hem tok spoelem nem bilong God. And tu, hem tok againstim hao Jehovah hem rul, or sovereign rul bilong Jehovah. Satan hem careful for no kwestinim dat God nao sovereign ruler. Bat hem challengem wei wea datfala rul hem stret, fitim, and raeteous. Or long nara wei, hem sei wei wea Jehovah hem rul hem no raeteous and olketa wea stap anda long Hem bae no kasem gud samting.

9. (a) Wanem nao happen long Adam and Eve from tufala disobey, and wanem nao olketa important kwestin wea kamaot from diswan? (b) Why nao Jehovah no distroem olketa wea againstim hem stretawe?

⁹ Gogo, Adam and Eve disobey long Jehovah taem tufala kaikaim frut wea God tambuim. From tufala disobey, tufala fit for kasem panis for dae, olsem God talem finis. Laea toktok bilong Satan mekem samfala important kwestin kamap. Waswe, Jehovah really garem right for rulim olketa man, or waswe, man shud rulim hemseleva? Waswe, Jehovah showimaot sovereign rul bilong hem long best wei? Jehovah fit for iusim olmaeti paoa bilong hem for distroem olketa wea againstim hem stretawe. Bat olketa kwestin wea kamap hem no abaotem paoa bilong God, bat hem join witim nem bilong hem, and hao hem rul. So wei for killim dae Adam, Eve, and Satan bae no pruvim rul bilong God hem raeteous. Bat maet diswan mekem planti moa kwestin kamap abaotem rul bilong hem. Only wei for luksavve sapos olketa man fit for rulim olketa seleva long gudfala wei, independent from God, hem for letem taem go pas for pruvim diswan.

10. Wanem nao history showimaot abaotem rul bilong olketa man?

¹⁰ Taem wea go pas finis hem showimaot wanem? Insaed planti thousand year, pipol traem enikaen difren gavman, olsem autocracy, democracy, socialism, and communism. Samting wea kamaot from evri rul hia hem stap long disfala toktok bilong Bible: “Man hem bossim man and spoelem hem.” (Ecclesiastes 8:9) Profet Jeremiah hem garem gud reason for sei: “Mi savve, O Jehovah, wei bilong man hem no bilong hem. Hem no bilong man wea wakabaot for disaedem gogo bilong hem.”​—Jeremiah 10:23.

11. Why nao Jehovah letem olketa man for safa?

¹¹ Long start, Jehovah savve wei wea man independent or rulim seleva bae mekem bigfala wei for safa kamap. So waswe, wei wea hem letem samting wea bae fail for go ahed, hem minim hem no followim justice? Nomoa! For minim diswan tingim: Wanfala pikinini bilong iu needim operation for healim sik wea savve mekem hem dae. Iu luksavve datfala operation bae mekem hem safa, and diswan mekem iu feel sorre tumas. Long semtaem iu savve datwan bae mekem pikinini bilong iu garem gudfala health bihaen. Olsem tu, God savve—and talem profesi tu—hao wei wea hem letem olketa man for rulim seleva bae mekem pain and safa kamap. (Genesis 3:16-19) Bat, hem savve tu hao gudfala samting for olowe bae kamap only sapos hem letem olketa man for kasem nogud samting wea kamaot from datfala bighed fasin. Long wei olsem, kwestin abaotem sovereign rul bilong God bae kasem ansa for olowe.

Datfala Kwestin Abaotem Faithful Fasin Bilong Man

12. Olsem samting wea happen long Job, wanem nao Satan accusim long olketa man?

¹² Narafala samting tu insaed long diswan. Taem Satan challengem wei wea rul bilong God hem stret and raeteous, hem no just tok laea againstim Jehovah saed long sovereign rul and nem bilong Hem bat tu, hem tok laea againstim olketa servant bilong God saed long faithful fasin. Olsem example, lukim samting wea Satan talem long Jehovah abaotem raeteous man Job: “Iu nao protectim hem and haos bilong hem and evri samting wea hem garem. Evri samting wea hem duim iu blessim, and olketa animal bilong hem staka tumas. Bat, distaem, liftim ap hand bilong iu and spoelem evri samting wea hem garem, and for sure hem bae cursim iu long feis bilong iu.”​—Job 1:10, 11.

13. Wanem nao Satan minim long toktok wea hem talem againstim Job, and hao nao evri man insaed long diswan?

¹³ Satan sei Jehovah hem iusim paoa for protectim Job long wei for switim Job for worshipim hem. Hem olsem Satan sei faithful fasin bilong Job hem hypocrite nomoa and Job worshipim God only from samting wea hem savve kasem from God. Satan sei sapos God aotem blessing from Job, bae hem cursim Creator bilong hem tu. Satan savve Job hem wanfala man wea “barava faithful and garem stretfala fasin, fraet long God and no laekem olketa nogud wei.”a So sapos Satan savve brekem faithful fasin bilong Job, waswe long evri nara man? So really, Satan hem kwestinim loyal fasin bilong evriwan wea want for servem God. Tru nao, Satan minim moa samting taem hem sei long Jehovah: “Wanfala man bae givim evri samting wea hem garem for laef bilong hem.”​—Job 1:8; 2:4.

14. Wanem nao history showimaot saed long toktok wea Satan talem againstim olketa man?

¹⁴ History showimaot hao planti pipol, olsem Job, stap loyal long Jehovah nomata olketa kasem test—wea difren evribit from wanem Satan hem sei. Olketa mekem heart bilong Jehovah hapi from faithful fasin bilong olketa, and diswan givim ansa for Jehovah iusim againstim Satan wea tokplas for sei olketa man bae no servem God taem olketa kasem hardfala taem. (Hebrews 11:4-38) Tru nao, olketa wea garem stretfala heart bae no rejectim God. Nomata taem olketa kasem barava hard taem, olketa depend long bigfala wei moa long Jehovah for givim strong for go ahed.​—2 Corinthians 4:7-10.

15. Wanem kwestin nao maet kamap saed long olketa judgment bilong God long bifor and long future?

¹⁵ Bat wei wea Jehovah showimaot justice hem no just for ansarem kwestin abaotem sovereign rul and faithful fasin bilong man. Bible givim wanfala record bilong olketa judgment bilong Jehovah saed long olketa man wanwan and olketa full nation. Hem garem tu olketa profesi abaotem olketa judgment wea hem bae duim long future. Why nao iumi savve feel sure judgment bilong Jehovah bifor and long future hem raeteous?

Why Justice Bilong God Hem Moa Hae

16, 17. Wanem nao olketa example wea showimaot tingting bilong olketa man no klia tumas saed long trufala justice?

¹⁶ Toktok hia barava fitim Jehovah: “Evri wei bilong hem followim justice.” (Deuteronomy 32:4) Toktok hia no fitim eniwan long iumi, bikos planti taem tingting bilong iumi no klia tumas saed long wanem hem stret or nomoa. Olsem example, tingim Abraham. Nomata wicked fasin hem big tumas long Sodom, Abraham barava askem Jehovah sapos Sodom fit for distroe. Hem askem Jehovah olsem: “Hao, hem tru bae iu distroem olketa wea raeteous witim olketa wea wicked?” (Genesis 18:23-33) Ansa hem, nomoa nao. Only taem raeteous Lot and tufala dota bilong hem kasem sef taon bilong Zoar, then Jehovah “mekem sulfur and fire for foldaon olsem rain” long Sodom. (Genesis 19:22-24) Bat long wei wea difren evribit, Jonah hem “kamap hot witim kros” taem God showimaot mercy long pipol bilong Nineveh. From Jonah talem finis olketa bae distroe, hem bae hapi for lukim olketa finis evribit—nomata olketa repent long heart.​—Jonah 3:10–4:1

¹⁷ Jehovah hem mekem Abraham feel sure taem hem showimaot hao justice bilong Hem no minim just for distroem wicked pipol, bat for sevem raeteous pipol tu. Long narasaed, Jonah mas lanem hao Jehovah hem garem mercy. Sapos wicked pipol changem olketa wei bilong olketa, hem “redy for forgive.” (Psalm 86:5) Jehovah, wea no olsem pipol wea wari tumas abaotem position bilong olketa, hem no givim strong judgment bikos hem laek for showim paoa bilong hem, and tu hem no hol bak for forgivim pipol from hem fraet nogud pipol maet ting hem wik. Hem wei bilong hem for showim mercy sapos eni reason stap for duim olsem.​—Isaiah 55:7; Ezekiel 18:23.

18. Showim from Bible hao Jehovah no duim samting followim feeling nomoa.

¹⁸ Nomata olsem, Jehovah no letem feeling nomoa for spoelem judgment bilong hem. Taem pipol bilong hem strong for worshipim olketa idol, Jehovah tok stret olsem: “Mi bae judgem iu followim olketa wei bilong iu and bae mi judgem iu bikos long olketa nogud samting wea iu duim. Eye bilong mi bae no feel sorre for iu, and mi bae mi no tingim iu, and bae mi mekem iu kasem nogud samting followim wanem iu duim.” (Ezekiel 7:3, 4) So taem olketa man strong for followim wei bilong olketa, Jehovah judgem olketa followim datwan. Bat judgment bilong hem garem faondeson long strongfala pruv. Dastawe taem Jehovah herem “bigfala komplen” abaotem Sodom and Gomorrah, hem sei olsem: “Mi mas go daon for faendaot sapos komplen wea mi herem hem tru or nomoa.” (Genesis 18:20, 21) Iumi thankiu tumas from Jehovah hem no olsem planti man wea judgem samting kwiktaem bifor hem herem full story! Tru nao, Jehovah hem barava olsem wanem Bible talem abaotem hem, “wanfala God bilong faithful fasin, wea showimaot justice evribit.”​—Deuteronomy 32:4.

Garem Trust Long Justice Bilong Jehovah

19. Wanem nao iumi savve duim sapos iumi garem olketa kwestin wea mekem iumi konfius abaotem wei wea Jehovah showimaot justice?

¹⁹ Bible no givim ansa long evri kwestin abaotem samting wea Jehovah duim bifor; and tu hem no storyim evri information abaotem wei wea Jehovah bae mekem judgment kasem olketa man wanwan and olketa grup long future. Taem iumi konfius long olketa story or profesi insaed Bible wea no storyim information olsem, iumi savve showim semkaen loyal fasin olsem profet Micah, taem hem raet olsem: “Mi bae showimaot fasin for weit long God bilong salvation bilong mi.”​—Micah 7:7.

20, 21. Why nao iumi sure Jehovah bae duim stret samting evritaem?

²⁰ Iumi sure Jehovah bae duim stret samting evritaem. Nomata hem luk olsem olketa man no duim samting for stretem wei wea no followim justice, Jehovah talem disfala promis: “Mi nao bae changem bak nogud samting. Mi nomoa savve duim diswan.” (Romans 12:19) Sapos iumi showimaot fasin for weit, iumi bae showimaot sem tingting olsem aposol Paul wea sei: “Waswe, God savve duim samting wea no stret? Barava nomoa nao!”​—Romans 9:14.

²¹ Go kasem datfala taem, iumi stap long olketa last day wea “evri samting hem hard tumas.” (2 Timothy 3:1) Samting wea no followim justice and “wei for putim hevi” hem mekem planti nogud raf samting kamap. (Ecclesiastes 4:1) Nomata olsem, Jehovah hem no change. Hem still heitim fasin wea no followim justice, and hem barava kea for olketa wea safa from datwan. Sapos iumi stap loyal long Jehovah and sovereign rul bilong hem, bae hem givim iumi strong for go ahed kasem taem wea hem markem anda long Kingdom rul for stretem evri samting wea no followim justice.​—1 Peter 5:6, 7.

1, 2. Why nao planti pipol no tinghae long law, bat wanem kaen feeling nao iumi savve mekem grow abaotem olketa law bilong God?

“LAW hem wanfala hol wea no garem botom, hem . . . kaikaim evriting.” Datfala toktok hem stap insaed wanfala buk wea olketa pablisim long 1712. Man wea raetem datwan tok strong againstim legal system wea samfala taem mekem olketa kot case go ahed for planti year, wea mekem pipol wea luk aotem justice for lusim evri selen. Long planti land, olketa legal and judicial system barava hard tumas for minim, fulap witim wei wea no followim justice, wei for teksaed, and wei wea change olabaot, dastawe planti pipol no respectim law.

² Long narasaed, tingim samting wea wanfala man raetem 2,700 year go finis: “Mi barava lovem law bilong iu!” (Psalm 119:97) Why nao man wea raetem psalm hem garem strongfala love olsem? Bikos law wea hem praisem hem start kam, no from eni gavman bilong disfala world, bat from Jehovah God. Taem iu studyim olketa law bilong Jehovah, maet bae iu garem sem olsem man wea raetem psalm. Kaen wei for study olsem bae mekem iu minim nambawan mind bilong Datwan wea judge long full universe.

Barava Main Wan for Givim Law

3, 4. Wanem nao olketa wei wea Jehovah hem Man for Givim Law?

³ Bible talem iumi: “God nomoa hem givim law and hem nomoa judge.” (James 4:12) Tru nao, Jehovah hem only tru Wan for Givim Law. Mumuv bilong olketa star and planet long heven tu followim “olketa law bilong heven.” (Job 38:33, The New Jerusalem Bible) Planti million holy angel bilong Jehovah stap anda law bilong God tu, bikos olketa organize long difren position and serve anda Jehovah olsem minister bilong hem.​—Psalm 104:4; Hebrews 1:7, 14.

⁴ Jehovah givim olketa law long olketa man tu. Each wan long iumi garem wanfala conscience, wea showimaot justice bilong Jehovah. Conscience hem wanfala law insaed long iumi, wea savve helpem iumi for luksavve long stret samting and rong samting. (Romans 2:14) First dadi and mami bilong iumi kasem wanfala perfect conscience, so tufala no needim staka law. (Genesis 2:15-17) Bat, man wea no perfect hem needim samfala law moa for leadim hem for duim will bilong God. Samfala laen dadi olsem Noah, Abraham, and Jacob kasem olketa law from Jehovah God and talem diswan long famili bilong olketa. (Genesis 6:22; 9:3-6; 18:19; 26:4, 5) Jehovah kamap Man for Givim Law long barava spesol wei taem hem givim datfala nation bilong Israel full sekson bilong olketa law thru long Moses. Disfala full sekson bilong olketa law hem helpem iumi long bigfala wei for lukim justice bilong Jehovah.

Law Bilong Moses​—Wanfala Review

5. Waswe, Law Bilong Moses hem hard tumas for followim from staka difren part stap insaed, and why nao iu ansa olsem?

⁵ Planti pipol ting Law Bilong Moses hem no isi for followim from staka difren part stap insaed. Tingting olsem hem no tru. Winim 600 law nao stap insaed diswan. Maet datwan here olsem hem staka tumas, bat tingim: Kasem end bilong mek-20 century, olketa law bilong gavman bilong United States fulimap 150,000 page bilong olketa law buk. Evri tu year olketa joinim go 600 law moa long datwan! So namba bilong law bilong olketa man hem barava big winim olketa law insaed Law Bilong Moses. Nomata olsem, Law bilong God leadim olketa Israelite long samfala part bilong living wea olketa law distaem no talem eniting abaotem. Iumi bae reviewim Law hia.

6, 7. (a) Wanem nao mekem Law Bilong Moses hem difren from eni nara law, and wanem nao nambawan komandment bilong datfala Law? (b) Hao nao olketa Israelite savve showimaot olketa acceptim sovereign rul bilong Jehovah?

⁶ Datfala Law mekhae long sovereign rul bilong Jehovah. Dastawe, Law Bilong Moses hem winim eni nara law. Nambawan law saed long diswan nao hem: “Lisin, O Israel: Jehovah God bilong iumi hem wanfala Jehovah. Iu mas lovem God bilong iu Jehovah witim full heart and full soul and full strong bilong iu.” Hao nao pipol bilong God mas showimaot love for hem? Olketa mas servem hem and stap anda long sovereign rul bilong hem.​—Deuteronomy 6:4, 5; 11:13.

⁷ Each Israelite showimaot wei wea hem acceptim sovereign rul bilong Jehovah taem hem stap anda long olketa wea garem position ovarem hem. Evriwan wea stand for paoa bilong God nao dadi and mami, olketa chief, judge, priest and gogo, olketa king. Jehovah ting long eni wei for againstim olketa wea garem paoa olsem wei for againstim hem. Long narasaed, olketa wea garem paoa bae kasem kros bilong Jehovah sapos olketa deal long wei wea no followim justice or bossim olketa pipol bilong hem long nogud wei. (Exodus 20:12; 22:28; Deuteronomy 1:16, 17; 17:8-20; 19:16, 17) Tufala saed hia garem responsibility for saportim sovereign rul bilong God.

8. Hao nao Law bilong Jehovah apim standard saed long holy fasin?

⁸ Datfala Law hem apim standard bilong Jehovah saed long holy fasin. Datfala word “holy” and “holy fasin” kamap winim 280 taem insaed long Law Bilong Moses. Datfala Law helpem pipol bilong God for luksavve samting wea klin and samting wea no klin, taem hem talem 70 difren samting wea savve mekem wanfala Israelite no klin saed long law. Olketa law hia storyim wei for klin saed long body, kaikai, and saed long wei for torowem rabis tu. Olketa law olsem barava helpem man saed long health.a Bat olketa garem goal wea moa hae​—for mekem Jehovah acceptim olketa, taem olketa stap separate from evri nogud samting bilong olketa nation raonem olketa. Tingim wanfala example.

9, 10. Law covenant garem olketa wanem law abaotem sex and for bornem pikinini, and wanem nao olketa gud samting wea kamaot from olketa law hia?

⁹ Olketa law bilong datfala Law covenant sei wei for duim sex—nomata tufala wea marit finis—and wei for bornim pikinini, savve mekem man for no klin for lelebet taem. (Leviticus 12:2-4; 15:16-18) Olketa law hia no spoelem olketa klin present olsem wea kam from God. (Genesis 1:28; 2:18-25) Bat, olketa law hia apim holy fasin bilong Jehovah, and mekem olketa wea worshipim hem no kamap dirty. Hem interesting for lukim hao olketa nation wea stap raonem Israel mixim worship witim sex and ceremony for apim sex. Religion bilong olketa Canaanite garem jury man and woman. Barava nogud samting nao kamaot from diswan. Long wei wea difren, Law mekem wei for worshipim Jehovah barava separate from olketa samting saed long sex.b Diswan help long olketa nara wei tu.

¹⁰ Olketa law hia teachim wanfala important samting wea tru.c Hao nao sin bilong Adam pas go long next genereson? Waswe, hem thru long sex and wei for bornem pikinini? (Romans 5:12) Tru nao, Law Bilong God mekem pipol bilong hem luksavve hao sin stap long olketa. Yes, iumi evriwan born long sin. (Psalm 51:5) Iumi needim forgiveness and wei for kamap free from sin for iumi kam klos long holy God bilong iumi.

11, 12. (a) Wanem important principle bilong justice nao datfala Law mekhae long hem? (b) Datfala Law hem protectim man from olketa wanem wei for spoelem justice?

¹¹ Datfala Law hem apim perfect justice bilong Jehovah. Law Bilong Moses saportim principle bilong wei for balance saed long justice. Dastawe Law hem sei: “Laef for laef, eye for eye, teeth for teeth, hand for hand, leg for leg.” (Deuteronomy 19:21) So, taem samwan duim criminal fasin, panis wea hem kasem mas fitim wanem hem duim. Disfala part bilong justice bilong God hem insaed evri part long Law bilong hem and kasem distaem iumi mas savve long diswan for minim ransom sakrifaes bilong Christ Jesus, olsem Chapter 14 bae storyim.​—1 Timothy 2:5, 6.

¹² Insaed long Law, protection hem stap againstim wei for spoelem justice. Olsem example, tufala or moa witness mas stap bifor olketa fit for accusim samwan. Man wea givim laea witness mas kasem bigfala panis. (Deuteronomy 19:15, 18, 19) Hem tambu tumas for man acceptim raverave fasin and bribe. (Exodus 23:8; Deuteronomy 27:25) Nomata taem olketa duim bisnis, pipol bilong God mas followim hae standard bilong God saed long justice. (Leviticus 19:35, 36; Deuteronomy 23:19, 20) Datfala hae law wea followim justice hem nambawan blessing for Israel!

Olketa Law wea Mekhae Long Mercy and Wei for No Teksaed

13, 14. Hao nao Law helpem olketa for deal witim man for steal and datwan wea safa long wei wea followim justice?

¹³ Waswe, Law Bilong Moses hem wanfala sekson bilong olketa rul wea hard tumas and no showimaot mercy? Nomoa nao! God muvim King David for raet olsem: “Law bilong Jehovah hem perfect.” (Psalm 19:7) Hem savve gud hao datfala Law hem saportim mercy and wei for no teksaed. Hao nao Law duim datwan?

¹⁴ Long samfala kantri distaem, luk olsem law hem no strong and hem saed witim olketa criminal winim olketa wea safa. Olsem example, man for steal maet stap long prison for samfala taem. Long semtaem, man wea hem steal from hem no kasem bak wanem hem lusim, bat hem mas peim tax wea saportim prison for olketa criminal. Long Israel bifor, no eni prison stap olsem distaem. Olketa garem spialaen wea no eniwan mas ovarem saed long wei for givim panis. (Deuteronomy 25:1-3) Man wea steal mas changem bak samting wea hem stealim. And tu, datfala man for steal mas peim extra samting. Haomas extra samting? Hem no semsem evritaem. Olketa judge nao free for lukluk gud long olketa samting, olsem sapos datfala sinner hem repent or nomoa. Datwan nao reason why compensation wea man for steal mas peim long Leviticus 6:1-7 hem no big olsem datwan wea Exodus 22:7 hem storyim.

15. Hao nao Law mek sure man wea accident for killim dae samwan hem kasem mercy and justice?

¹⁵ Mercy nao insaed datfala Law from hem acceptim hao man no evritaem min for duim rong samting. Olsem example, taem wanfala man hem accident for killim dae samwan, hem bae no peim laef for laef sapos hem ranawe go long wanfala taon wea olketa markem for stap sef wea stap long planti ples long Israel. Bihaen olketa judge wea fit lukluk long case bilong hem, hem mas stap long taon for stap sef go kasem taem wea hae priest hem dae. Then bae hem free for stap long eni ples wea hem laekem. So, hem kasem gud samting from mercy bilong God. Long semtaem, disfala law mekhae long wei wea laef bilong man hem important tumas.​—Numbers 15:30, 31; 35:12-25.

16. Hao nao Law hem protectim samfala right bilong man wanwan?

¹⁶ Datfala Law hem protectim olketa rights bilong man wanwan. Tingim wei wea hem protectim olketa wea garem kaon. Law stopem eniwan for go insaed haos bilong man wea garem kaon for tekem eniting olsem security for datfala kaon. Bat, man wea givim kaon mas stap aotsaed and man wea kaon long hem nao tekem kam datfala security for hem. So no eniwan savve spoelem haos bilong man. Sapos man wea givim kaon hem tekem coat olsem security for datfala kaon, hem mas givim bak bifor naet, bikos man wea kaon long hem maet needim for kavarem hemseleva long naet.​—Deuteronomy 24:10-14.

17, 18. Long saed bilong war, hao nao olketa Israelite difren from olketa nara nation, and why nao olsem?

¹⁷ Datfala Law hem kontrolem war tu. Pipol bilong God savve faet, no from olketa laekem paoa or for win, bat for duim samting olsem wakman bilong God long “Olketa War Bilong Jehovah.” (Numbers 21:14) Planti taem, olketa Israelite offerim pipol wei for sarenda firstaem. Sapos wanfala taon rejectim datfala offer, then Israel savve attakim—bat followim olketa rul bilong God. No olsem planti soldia long history, olketa man long army bilong Israel mas no rapem olketa woman or killkill olabaot. Olketa mas respectim environment tu, no katem daon olketa frut tree bilong enemy.d Olketa nara army barava no garem olketa rul olsem.​—Deuteronomy 20:10-15, 19, 20; 21:10-13.

¹⁸ Waswe, iu feel nogud tumas for herem hao long samfala land olketa trainim olketa smol pikinini for kamap soldia? Long Israel bifor, olketa no acceptim eni man wea anda 20 year for joinim army. (Numbers 1:2, 3) Nomata full-grown man hem no join tu sapos hem fraet tumas. Man wea just marit hem no join long danger samting olsem war for wanfala full year, mekem hem savve lukim firstfala pikinini bilong hem taem hem born. Law sei long wei olsem, young hasband savve mekem waef bilong hem “hapi.”​—Deuteronomy 20:5, 6, 8; 24:5.

19. Wanem nao Law provaedem for protectim olketa woman, pikinini, famili, widow, and pikinini wea no garem dadi or mami?

¹⁹ Law hem protectim tu olketa woman, pikinini, and famili long wei for lukaftarem olketa. Hem givim komand long dadi and mami for story evritaem long pikinini bilong olketa and givim instruction saed long spiritual samting. (Deuteronomy 6:6, 7) Hem tambuim evri kaen wei for sex witim famili member, and dae nao panis bilong diswan. (Leviticus, chapter 18) Hem tambuim tu adultery, wea planti taem mekem famili brekdaon and distroem gudfala living and respect bilong famili. Law hem provaedem samting for olketa widow and pikinini wea no garem dadi and mami taem hem givim strongfala toktok for no deal witim olketa long nogud wei.​—Exodus 20:14; 22:22-24.

20, 21. (a) Why nao Law Bilong Moses hem letem wanfala Israelite for garem winim wanfala waef? (b) Saed long divorce, why nao datfala Law hem difren from standard wea Jesus startim bak moa?

²⁰ Bat samfala maet garem kwestin abaotem diswan olsem, ‘Why nao Law letem man for garem planti waef?’ (Deuteronomy 21:15-17) Iumi need for tingting long olketa law hia saed long taem wea olketa stap. Olketa wea judgem Law Bilong Moses from tingting bilong distaem and olketa kastom bilong distaem bae nating minim Law hia. (Proverbs 18:13) Standard bilong Jehovah, wea start long Eden, hem mekem marit olsem wanfala kontrak wea stap olowe midolwan wanfala hasband and waef. (Genesis 2:18, 20-24) Bat gogo, taem Jehovah givim datfala Law long Israel, olketa kastom olsem wei for garem planti waef hem samting wea pipol duim for planti handred year finis. Jehovah savve tu hao “bighed” pipol bilong hem bae planti taem fail for obey, nomata olketa firstfala komand bilong hem tu, olsem wei for worshipim idol. (Exodus 32:9) From hem wise, hem no chusim datfala taem for stretem bak evri samting saed long marit. Remember tu dat Jehovah hem no startim wei for garem planti waef. Nomata olsem, hem iusim Law Bilong Moses for kontrolem wei for tekem winim wanfala waef and tu Law stopem olketa for iusim diskaen wei for marit long nogud wei.

²¹ Olsem tu, Law Bilong Moses letem man for divorcem waef for samfala difren, bat serious reason. (Deuteronomy 24:1-4) Jesus kolem diswan samting wea God letem for Jew pipol duim bikos long “wicked heart bilong [olketa].” Nomata olsem, diswan hem for lelebet taem nomoa. For olketa follower bilong hem, Jesus startim bak firstfala standard bilong Jehovah saed long marit.​—Matthew 19:8.

Law Hem Mekhae Long Love

22. Wanem nao olketa wei wea Law Bilong Moses hem encouragem man for showim love, and olketa mas showim diswan long hu?

²² Waswe, iu savve tingim eni system saed long law distaem wea encouragem love? Love nao main samting wea Law Bilong Moses hem mekhae long hem. Tru nao, insaed buk bilong Deuteronomy nomoa, datfala word for “love” hem kamap winim 20 taem. “Iu mas lovem narawan long sem wei wea iu lovem iuseleva” hem mek-tu main komandment insaed full Law. (Leviticus 19:18; Matthew 22:37-40) Pipol bilong God mas showim love no for each other nomoa bat for olketa stranger wea stap witim olketa, from olketa Israelite tu olsem stranger long bifor. Olketa mas showim love long pipol wea poor and safa, helpem olketa long material saed and no mekius long olketa. Olketa mas deal tu witim olketa animal long kaenfala wei wea showimaot kea.​—Exodus 23:6; Leviticus 19:14, 33, 34; Deuteronomy 22:4, 10; 24:17, 18.

23. Wanem nao man wea raetem Psalm 119 hem duim, and wanem nao maet iumi savve disaed strong for duim?

²³ No eni nara nation kasem blessing from system bilong law olsem. Dastawe man wea raetem psalm hem raet: “Mi barava lovem law bilong iu!” Nomata olsem, love bilong hem no wanfala feeling nomoa. Diswan muvim hem for duim samting, bikos hem traem best for obeyim datfala law and live followim. Then, hem sei moa: “Mi gohed for ting raonem law bilong iu long full day.” (Psalm 119:11, 97) Tru nao, hem planti taem studyim olketa law bilong Jehovah. Iumi sure taem hem duim datwan, love bilong hem for olketa law hia hem grow. Long semtaem, love bilong hem for Datwan wea Givim Law, Jehovah God, hem grow tu. Taem iu go ahed for studyim law bilong God, iu tu savve kam moa klos long Jehovah, Main Wan for Givim Law and God bilong justice.

1, 2. Hao nao Bible story abaotem nogud samting wea kasem evri man, and wanem nao only wei for aot from diswan?

“EVRI samting wea God wakem gohed for krae long heart and safa tugeta kam kasem distaem.” (Romans 8:22) Long hia aposol Paul hem storyim nogud samting wea kasem iumi evriwan. From lukluk bilong man, luk olsem no eni ansa stap for stretem wei for safa, sin, and dae. Bat Jehovah hem no short long eni samting olsem iumi olketa man. (Numbers 23:19) God bilong justice hem givim iumi wei for aot from trabol wea iumi insaed. Hem nao ransom.

² Datfala ransom hem nambawan present bilong Jehovah for olketa man. Hem openem wei for iumi sev from sin and dae. (Ephesians 1:7) Hem nao faondeson bilong hope for laef olowe, nomata long heven or long paradaes earth. (Luke 23:43; John 3:16; 1 Peter 1:4) Bat wanem nao datfala ransom? Hao nao hem teachim iumi abaotem justice bilong Jehovah wea winim eni narawan?

Hao Need for Wanfala Ransom Kamap

3. (a) Why nao need hem kamap for datfala ransom? (b) Saed long olketa pikinini bilong Adam, why nao God no changem panis for dae witim difren panis?

³ Need hem kamap for datfala ransom bikos long sin bilong Adam. Taem Adam disobey long God, hem givim go long evri pikinini bilong hem wei for sik, sorre, pain, and dae. (Genesis 2:17; Romans 8:20) God bae no followim feeling nomoa and changem panis for dae witim difren panis. Sapos hem duim datwan, hem bae no followim law bilong hemseleva: “Pei wea sin givim hem dae.” (Romans 6:23) And sapos Jehovah finisim olketa standard bilong hemseleva saed long justice, then wei for olabaot and brekem law bae kamap big tumas long full universe!

4, 5. (a) Hao nao Satan tok laea againstim God, and why nao hem stret for Jehovah ansarem olketa challenge hia? (b) Wanem nao Satan talem for accusim olketa loyal servant bilong Jehovah?

⁴ Olsem iumi lukim long Chapter 12, bighed fasin long Eden hem kosim samfala kwestin wea moa important for kamap. Satan hem mekem gudfala nem bilong God kamap nogud. Hem accusim Jehovah for laea and for wanfala raf ruler wea no givim freedom long olketa wea hem creatim. (Genesis 3:1-5) From luk olsem hem spoelem nao purpose bilong God for fulimap earth witim olketa raeteous pipol, hem olsem Satan sei God hem fail. (Genesis 1:28; Isaiah 55:10, 11) Sapos Jehovah no ansarem olketa challenge hia, creation bilong hem wea garem tingting bae lusim full trust bilong olketa long rul bilong hem.

⁵ Satan hem tok laea tu againstim olketa loyal servant bilong Jehovah, taem hem accusim olketa for sei olketa servem Hem from selfish reason nao muvim olketa and sapos olketa kasem hevi, no eniwan bae stap faithful long God. (Job 1:9-11) Olketa kwestin hia moa important winim nogud samting wea kasem olketa man. Hem stret for Jehovah disaed hem mas ansarem olketa laea toktok bilong Satan. Bat hao nao God savve ansarem olketa kwestin hia and sevem olketa man tu?

Ransom—Samting wea Semsem

6. Wanem nao samfala toktok wea Bible iusim for storyim arrangement bilong God for sevem olketa man?

⁶ Ansa bilong Jehovah hem barava showimaot mercy and hem followim justice—ansa wea no eni man fit for tingim seleva. Nomata olsem, hem simpol long spesol wei. Bible iusim toktok olsem baem bak, fren bak moa, kamap free, and kavarem. (Psalm 49:8; Daniel 9:24; Galatians 3:13; Colossians 1:20; Hebrews 2:17) Bat, maet toktok wea barava storyim klia diswan hem samting wea Jesus seleva talem. Hem sei: “Son bilong man hem kam, no for olketa servem hem, bat for serve and for givim laef bilong hem olsem ransom [Greek languis, lyʹtron] for baem bak staka pipol.”​—Matthew 20:28.

7, 8. (a) Wanem nao datfala word “ransom” hem minim long Bible? (b) Long wanem wei nao ransom hem minim samting wea semsem?

⁷ Wanem nao wanfala ransom? Greek word wea olketa iusim long hia hem kam from wanfala verb wea minim “for let go, for letem go free.” Olketa iusim disfala word for story abaotem selen wea olketa peim for letem go free olketa prisoner bilong war. So, wanfala ransom hem selen wea man peim for kasem bak wanfala samting. Long Hebrew Scripture, word for “ransom” (koʹpher) hem kam from verb wea minim “for kavarem.” Olsem example, God talem Noah hem mas “kavarem” (wanfala word wea minim sem samting) ark witim tar. (Genesis 6:14) Diswan helpem iumi for minim hao ransom hem minim tu for kavarem olketa sin.​—Psalm 65:3.

⁸ The Theological Dictionary of the New Testament givim moa mining long diswan taem hem sei disfala word (koʹpher) “hem evritaem minim samting wea semsem.” So, ransom, or wei for kavarem sin, hem minim olketa mas peim price wea semsem witim, or wea kavarem evribit, evri nogud samting wea sin hem kosim. So Law bilong God for Israel hem sei: “Laef for laef, eye for eye, teeth for teeth, hand for hand, leg for leg.”​—Deuteronomy 19:21.

9. Why nao olketa faithful man offerim olketa animal sakrifaes, and hao nao Jehovah ting long olketa sakrifaes olsem?

⁹ Evri faithful man, start kam from taem bilong Abel offerim olketa animal sakrifaes long God. Taem olketa duim olsem, hem showimaot olketa luksavve sin hem stap and olketa need for kamap free from sin. And tu, olketa showimaot faith bilong olketa long promis bilong God for kamap free thru long “pikinini” bilong hem. (Genesis 3:15; 4:1-4; Leviticus 17:11; Hebrews 11:4) Jehovah appruvim olketa sakrifaes olsem and acceptim olketa worshiper hia for stand front long hem. Nomata olsem, olketa animal sakrifaes olsem wanfala saen nomoa. Olketa animal no savve really kavarem sin bilong man, bikos olketa stap anda long man. (Psalm 8:4-8) Dastawe Bible sei: “Blood bilong olketa buluka and goat no savve finisim olketa sin.” (Hebrews 10:1-4) Olketa sakrifaes olsem piksarem nomoa trufala ransom sakrifaes wea bae kam.

“Ransom wea Semsem”

10. (a) Man wea givim ransom mas semsem witim hu, and why nao olsem? (b) Why nao sakrifaes bilong wanfala man nomoa hem fitim?

¹⁰ Aposol Paul sei: “Evriwan dae bikos long Adam.” (1 Corinthians 15:22) So for peim datfala ransom, wanfala man wea semsem witim Adam mas dae​—wanfala perfect man. (Romans 5:14) No eni narakaen man savve balancem scale bilong justice. Only wanfala perfect man, samwan wea no stap anda long panis for dae wea kam from Adam savve offerim “[ransom] wea semsem wea sevem evri pipol”—wea datwan semsem evribit witim Adam. (1 Timothy 2:6) No eni need stap for planti million man for sakrifaes for fitim each wan long olketa pikinini bilong Adam. Aposol Paul sei: “Thru long wanfala man [Adam] sin hem kam insaed long world and dae hem kam from sin.” (Romans 5:12) And “from dae tu hem kam thru long wanfala man,” God mekem wanfala arrangement for baem bak olketa man thru “long wanfala man.” (1 Corinthians 15:21) Long wanem wei?

11. (a) Hao nao man wea peim ransom “hem dae for evriwan”? (b) Why nao Adam and Eve no kasem help bilong datfala ransom? (Lukim footnote.)

¹¹ Jehovah arrangem for wanfala perfect man volunteer for sakrifaesim laef bilong hem. Romans 6:23 hem sei “pei wea sin givim hem dae.” Taem hem givim laef bilong hem olsem sakrifaes, datfala man wea givim ransom “hem dae for evriwan.” Diswan minim, hem bae peim wages for sin bilong Adam. (Hebrews 2:9; 2 Corinthians 5:21; 1 Peter 2:24) Samting wea kamaot from diswan garem bigfala paoa saed long law. Taem datfala ransom aotem panis bilong dae from olketa pikinini bilong Adam wea obey, datwan bae aotem paoa wea sin garem for killim man dae.a​—Romans 5:16.

12. Storyim hao wei for peim wanfala kaon savve helpem planti pipol.

¹² Tingim example hia: Iu stap long wanfala taon wea klosap evriwan long there waka insaed wanfala bigfala factory. Iu and olketa neiba bilong iu kasem gudfala pei and gudfala living. Bat wanday, factory hia hem klos daon. Wanem nao reason? Boss bilong factory hem kamap man for raverave, and diswan kosim bisnis for brekdaon. Seknomoa, iu and olketa neiba bilong iu no savve peim bak olketa kaon bilong iufala. Olketa marit partner, pikinini, and pipol wea iufala kaon long olketa safa nao bikos long raverave fasin bilong wanfala man. Waswe, eni wei stap for stretem diswan? Yes! Wanfala rich man hem disaed for help. Hem luksavve long gud samting wea company hia duim. Hem garem feeling tu for planti wakman and famili bilong olketa. So hem arrange for peim datfala bigfala kaon bilong company and openem moa datfala factory. Wei for peim bak datfala kaon hem helpem planti wakman and famili bilong olketa and pipol wea givim kaon. Long sem wei, wei for peim bak kaon bilong Adam hem helpem planti million pipol.

Hu Nao Provaedem Ransom?

13, 14. (a) Long wanem wei nao Jehovah provaedem datfala ransom for olketa man? (b) Price bilong ransom hem go long hu, and why nao wei for peim ransom hem mas happen?

¹³ Jehovah nomoa savve provaedem “Pikinini Sheepsheep . . . wea aotem sin bilong evri pipol long disfala world.” (John 1:29) Bat God no sendem just eni angel nomoa for sevem olketa man. Hem sendem Datwan wea savve givim ansa evribit long challenge bilong Satan againstim olketa servant bilong Jehovah. Tru nao, Jehovah givim barava nambawan sakrifaes taem hem sendem only-born Son bilong hem, “datwan wea hem laekem tumas.” (Proverbs 8:30) Son bilong God willing for “lusim evri samting wea hem garem” long wei for lusim laef bilong hem long heven. (Philippians 2:7) Long mirakol wei, Jehovah putim laef bilong firstborn Son bilong hem long heven insaed long bele bilong wanfala young Jew girl wea nem bilong hem Mary. (Luke 1:27, 35) Taem hem wanfala man, nem bilong hem Jesus. Bat saed long law, olketa fit for kolem hem mek-tu Adam, bikos hem semsem evribit witim Adam. (1 Corinthians 15:45, 47) Dastawe Jesus savve offerim hemseleva olsem wanfala ransom sakrifaes for olketa man wea sin.

¹⁴ Price bilong datfala ransom bae go long hu? Psalm 49:7 sei olketa mas peim datfala ransom “long God.” Bat waswe, hem no Jehovah nao wea mekem arrangement for datfala ransom? Yes, bat diswan no daonem ransom olsem samting wea no spesol or wanfala samting wea no garem paoa or eni mining​—olsem for aotem selen from wanfala basket and givim go long narawan. Hem important for minim hao datfala ransom hem no wei for exchangem physical samting, bat hem wanfala arrangement wea fitim law. Taem hem peim datfala ransom, nomata hemseleva mas safa from diswan, Jehovah pruvim long barava strong wei hao hemseleva followim perfect justice bilong hemseleva.​—Genesis 22:7, 8, 11-13; Hebrews 11:17; James 1:17.

15. Why nao Jesus mas safa and dae?

¹⁵ Long spring season bilong 33 C.E., Jesus Christ willing for kasem barava hardfala samting wea lead go for hem peim datfala ransom. Hem letem pipol arrestim hem for reason wea no stret, judgem hem olsem hem guilty, and nilam hem long wanfala post for dae. Waswe, Jesus need for safa long barava big wei olsem? Yes, bikos kwestin abaotem faithful fasin bilong olketa servant bilong God mas kasem ansa. Tingim hao God no letem Herod for killim dae Jesus taem hem baby. (Matthew 2:13-18) Bat taem Jesus kamap full-grown man, hem fit for stand strong long olketa nogud attak bilong Satan and minim evribit olketa kwestin wea insaed long diswan.b Taem hem stap “faithful, no garem blame, holy, hem barava no olsem olketa wea sin” nomata pipol barava spoelem hem, Jesus pruvim evribit hao Jehovah garem olketa servant wea stap faithful nomata olketa kasem test. (Hebrews 7:26) Dastawe just bifor hem dae, Jesus feel hao hem win and singaot: “Mi duim finis evri samting wea iu askem mi for duim!”​—John 19:30.

Finisim Waka Bilong Hem for Aotem Sin

16, 17. (a) Hao nao Jesus go ahed for duim waka bilong hem for aotem sin? (b) Why nao Jesus mas kam “front long God for iumi”?

¹⁶ Jesus no finisim yet waka bilong hem for aotem sin. Long mek-thri day bihaen Jesus dae, Jehovah mekem hem laef bak from dae. (Acts 3:15; 10:40) Taem Jehovah duim disfala important samting, hem no just givim reward long Son bilong hem for faithful service, bat hem givim hem chance for duim waka bilong hem for aotem sin olsem Hae Priest bilong God. (Romans 1:4; 1 Corinthians 15:3-8) Aposol Paul explainim diswan olsem: “Taem Christ hem kam, hem hae priest . . . , hem go insaed datfala holy ples. Hem no tekem go blood bilong olketa goat or young buluka, bat hem tekem nao blood bilong hemseleva. Hem duim diswan wantaem nomoa and from datwan hem sevem iumi for olowe. Christ no go insaed wanfala holy ples wea man wakem, wea datwan piksarem datfala holy ples long heven. Nomoa, bat distaem hem barava go insaed long heven for hem savve go front long God for iumi.”​—Hebrews 9:11, 12, 24.

¹⁷ Christ no savve tekem really blood bilong hem go insaed long heven. (1 Corinthians 15:50) Bat, hem tekem samting wea datfala blood piksarem: price wea fitim law bilong perfect laef bilong hem. Then, front long God, hem offerim datfala laef wea hem peim olsem wanfala ransom for baem bak olketa man wea sin. Waswe, Jehovah acceptim datfala sakrifaes? Yes, and diswan showaot klia long Pentecost 33 C.E., taem holy spirit hem kam daon antap long samting olsem 120 disaepol long Jerusalem. (Acts 2:1-4) Nomata datwan barava spesol, ransom hem just start for givim olketa nambawan samting.

Olketa Gudfala Samting Bilong Ransom

18, 19. (a) Wanem tufala sekson nao bae kasem gudfala samting from wei for fren bak witim God wea kamap thru long blood bilong Christ? (b) For olketa bilong datfala “big crowd,” wanem nao samfala gud samting wea olketa kasem from ransom distaem and long future?

¹⁸ Long leta bilong hem for olketa long Colossae, Paul sei hao God wantem evri nara samting fren bak moa witim Hem thru long Christ taem hem mek peace thru long blood wea Jesus offerim long torture stake. Paul sei tu hao tufala difren sekson bae fren bak moa witim God, hem nao “evri samting long heven” and “evri samting long earth.” (Colossians 1:19, 20; Ephesians 1:10) Insaed long first grup hem 144,000 Christian wea garem hope for serve olsem olketa priest long heven and rul olsem king ovarem earth witim Christ Jesus. (Revelation 5:9, 10; 7:4; 14:1-3) Thru long sekson hia olketa gudfala samting bilong ransom bae isisi kasem olketa man wea obey insaed long wan thousand year.​—1 Corinthians 15:24-26; Revelation 20:6; 21:3, 4.

¹⁹ “Evri samting long earth” nao olketa man wea luk forward for kasem perfect laef insaed wanfala Paradaes long earth. Revelation 7:9-17 storyim olketa olsem “wanfala big crowd” wea bae laef thru long datfala “big trabol” wea bae kam. Bat olketa no need for weit go kasem datfala taem for enjoyim olketa gudfala samting bilong ransom. Olketa “wasim finis kaleko bilong olketa and mekem kamap white long blood bilong Lamb.” From olketa showimaot faith long ransom, distaem olketa kasem spiritual blessing from datfala loving arrangement. God lukim olketa olsem raeteous and olketa kamap fren bilong hem! (James 2:23) From disfala sakrifaes bilong Jesus, olketa “no hol bak for kam long throne bilong God wea hem kaen tumas.” (Hebrews 4:14-16) Taem olketa mekem mistek, olketa kasem trufala forgiveness. (Ephesians 1:7) Nomata olketa no perfect, conscience bilong olketa kamap klin. (Hebrews 9:9; 10:22; 1 Peter 3:21) So, wei for fren bak moa witim God hem no samting wea man hope for kasem long future, bat samting wea hem garem distaem! (2 Corinthians 5:19, 20) Long datfala Wan Thousand Year, olketa bae isisi “kamap free from wei for slave bilong sin and kasem datfala nambawan freedom olsem olketa pikinini bilong God.”​—Romans 8:21.

20. Hao nao wei for ting raonem ransom hem muvim iuseleva?

²⁰ “Thankiu long God thru long Jesus Christ” for datfala ransom! (Romans 7:25) Hem simpol samting saed long principle, bat hem barava spesol long wei wea mekem iumi fulap witim respect and praise. (Romans 11:33) And taem iumi ting raonem witim wei for sei thankiu, ransom hia muvim heart bilong iumi, and mekem iumi kam moa klos long God bilong justice. Olsem man wea raetem psalm, iumi garem planti reason for praisem Jehovah olsem “man wea lovem raeteous fasin and justice.”​—Psalm 33:5.

1, 2. Wanem taem nao Jesus hem kros, and why nao olsem?

JESUS hem kros fogud—and barava fitim nao for hem kros. Maet iu faendem hard for tingim hem olsem, bikos hem man wea barava garem kwaet fasin. (Matthew 21:5) Nomata olsem, hem kontrolem hemseleva long perfect wei, bikos kros bilong hem raeteous.a Bat wanem nao mekem disfala man wea lovem peace for feel kros? Bigfala samting wea no followim justice.

² Jesus hem lovem tumas temple long Jerusalem. Long full world, datwan nao only holy ples wea dedicate for worshipim Dadi bilong hem long heven. Olketa Jew from planti kantri travel from farawe ples for worship long there. Olketa Gentile wea fraet long God kam tu for go insaed long courtyard bilong temple wea olketa markem for olketa. Bat long start long ministry bilong hem, Jesus go insaed long temple area and lukim wanfala barava nogud samting. Sorre tumas, datfala ples hem olsem wanfala market and no wanfala haos bilong worship! Hem fulap witim olketa bisnisman and pipol for sellim and baem samting. Bat, wanem samting nao no followim justice? For olketa man hia, temple bilong God hem ples for ravem pipol—for steal from olketa tu. Long wanem wei?​—John 2:14.

3, 4. Wanem greedy wei for ravem pipol nao happen long haos bilong Jehovah, and wanem nao Jesus duim for stretem datwan?

³ Olketa bigman bilong Jew religion sei wankaen coin nomoa man savve iusim for peim tax long temple. Pipol wea kam mas changem selen bilong olketa for kasem diskaen coin. So pipol for changem selen putim tebol bilong olketa insaed long temple, and tekem wanfala fee for each taem man peim coin olsem. Olketa wea sellim olketa animal barava mek profit tu. Olketa wea visit kam wea want for offerim sakrifaes savve baem from eni bisnisman long taon, bat olketa bigman bilong temple maet rejectim offering bilong olketa. Bat, offering wea olketa baem long area bilong temple bae olketa acceptim. From pipol no wei nao, olketa bisnisman hia putim barava hae price.b Diswan hem no just wei for duim bisnis wea ova tumas and no fitim. Diswan hem wei for steal!

⁴ Jesus no savve acceptim samting wea no followim justice. Diswan hem haos bilong Dadi bilong hem! Hem mekem wanfala rope for whipim man and raosem olketa buluka and sheep from datfala temple. Then hem go long pipol for changem selen and kapsaetem tebol bilong olketa. Tingim evri coin wea foldaon and rola long datfala smooth ston floor! Hem tok strong long olketa man wea sellim kurukuru: “Tekem go olketa samting hia from disfala ples!” (John 2:15, 16) Luk olsem evriwan fraet for againstim disfala man wea showimaot strong.

Son Hem Olsem Dadi

5-7. (a) Hao nao laef bilong Jesus bifor hem kam long earth affectim tingting bilong hem saed long justice, and wanem nao iumi savve lanem taem iumi studyim example bilong hem? (b) Hao nao Jesus deal witim wei wea Satan duim samting wea no followim justice and wat nao bae hem duim long future?

⁵ Bat, olketa bisnisman hia kam bak. Samting olsem thrifala year bihaen, Jesus deal witim sem samting wea no followim justice, and distaem hem iusim toktok bilong Jehovah againstim olketa wea mekem haos bilong Hem kamap “olsem cave bilong olketa man for steal.” (Jeremiah 7:11; Matthew 21:13) Tru nao, taem Jesus lukim olketa ravem pipol and wei for mekem temple bilong God kamap dirty, hem garem sem feeling olsem Dadi bilong hem. And iumi nating sapraes! For planti million year, Dadi bilong hem long heven teachim hem. From diswan, hem garem sem kaen feeling olsem Jehovah saed long justice. Hem barava fitim disfala toktok, Son hem olsem dadi. So sapos iumi want for garem klia idea long justice fasin bilong Jehovah, best wei hem for ting abaotem example bilong Jesus Christ.​—John 14:9, 10.

⁶ Only-born Son bilong Jehovah hem stap taem Satan sei Jehovah God hem laea and challengem wei wea rul bilong Hem stret. Datwan hem barava laea toktok againstim God! Disfala Son herem tu challenge bilong Satan hao no eni man bae servem Jehovah from love bat selfish samting nao muvim olketa. Laea toktok hia mas barava mekem raeteous heart bilong Son for feel pain. Hem mas feel hapi tumas taem hem savve hem nao bae duim main samting for stretem olketa laea toktok hia! (2 Corinthians 1:20) Hao nao bae hem duim datwan?

⁷ Olsem iumi lanem finis long Chapter 14, Jesus Christ givim finis ansa evribit long challenge bilong Satan againstim faithful fasin bilong olketa wea servem Jehovah. Taem olsem Jesus putim faondeson for kliarem holy nem bilong Jehovah from wei wea olketa tok spoelem datfala nem, and tok spoelem perfect wei bilong God for rul. Olsem Chief Wan bilong Jehovah, Jesus bae mekem justice bilong God kamap long full universe. (Acts 5:31) Full laef bilong hem long earth tu showimaot justice bilong God. Jehovah sei olsem abaotem hem: “Mi bae givim hem spirit bilong mi, and hem bae showimaot [justice] long evri didifren kaen pipol.” (Matthew 12:18) Hao nao Jesus fulfillim olketa toktok hia?

Jesus Mekem Klia “Wanem Nao Justice”

8-10. (a) Hao nao law wea olketa bigman bilong Jew religion talem hem mekhae long wei for daonem pipol wea no Jew and olketa woman? (b) Long wanem wei nao olketa law wea olketa addim mekem Sabbath law bilong Jehovah kamap wanfala hevi?

⁸ Jesus lovem Law bilong Jehovah and live followim datwan. Bat olketa leader bilong religion long taem bilong hem twistim and followim Law long rong wei. Jesus sei long olketa: “Iufala man wea teachim law and olketa Pharisee, iufala laea tumas! Barava nogud samting nao bae kasem iufala bikos . . . iufala ting nating long olketa barava important samting long Law, olsem for duim samting wea stret, for showimaot mercy long narawan, and for faithful.” (Matthew 23:23) For sure, olketa teacher hia bilong Law bilong God no mekem klia “wanem nao justice.” Olketa mekem hem hard for lukim justice bilong God. Hao nao olsem? Tingim tu-thri example.

⁹ Jehovah talem pipol bilong hem for stap separate from olketa heathen nation raonem olketa. (1 Kings 11:1, 2) Nomata olsem, samfala bigman bilong religion wea ova tumas encouragem pipol for lukdaonem evriwan wea no Jew. Datfala Mishnah garem disfala rul: “Mas no leavim eni animal long hotel bilong olketa gentile bikos olketa maet duim sex witim animal hia.” Kaen wei for daonem evriwan wea no Jew hem no fitim justice and barava difren from tru mining bilong Law Bilong Moses. (Leviticus 19:34) Olketa nara rul olsem daonem olketa woman. Law hia sei waef mas wakabaot bihaen hasband bilong hem, no saed long hem. Man mas no story witim wanfala woman long pablik, nomata sapos hem waef bilong hem. Olsem olketa slave, olketa woman no fit for givim witness long kot. Olketa garem tu wanfala prea wea olketa man sei thankiu long God from olketa no woman.

¹⁰ Olketa leader bilong religion haedem Law bilong God taem olketa mekem staka rul bilong olketa seleva. Olsem example, Sabbath law stopem waka long Sabbath, hem markem datfala day for worship, kasem spiritual strong, and rest. Bat olketa Pharisee mekem datfala law kamap wanfala hevi. Olketa seleva disaedem wanem samting nao hem ‘waka.’ Olketa markem 39 difren waka, olsem for harvest or go hunting. Olketa waka hia mekem planti kwestin kamap. Sapos wanfala man killim dae wanfala flea long Sabbath, waswe, hem hunting? Sapos hem pikim samfala grain for kaikaim taem hem wakabaot, waswe, hem harvest? Sapos hem healim samwan wea sik, waswe, hem waka? Olketa deal witim olketa kwestin hia witim staka hardfala rul.

11, 12. Hao nao Jesus showimaot hem againstim olketa kastom bilong olketa Pharisee wea no followim scripture?

¹¹ From kaen samting olsem go ahed, hao nao Jesus helpem pipol for minim wanem nao justice? Long olketa teaching and living bilong hem, hem stand strong againstim olketa bigman bilong religion hia. Tingim firstaem samfala teaching bilong hem. Hem tok strong againstim planti rul bilong olketa wea kam from man, taem hem sei: “Kastom bilong iufala wea evri genereson followim hem mekem toktok bilong God hem iusles nomoa.”​—Mark 7:13.

¹² Jesus strong for teachim hao olketa Pharisee talem rong samting abaotem Sabbath law​—hao olketa no minim purpose bilong datfala law. Hem sei Messiah nao “man wea rulim Sabbath” dastawe hem fit for healim pipol long Sabbath. (Matthew 12:8) For strongim datfala point, hem duim mirakol healing long Sabbath front long pipol. (Luke 6:7-10) Olketa healing hia showim long smol wei samting wea hem bae duim insaed Thousand Year Rul bilong hem. Datfala Kingdom Rul bae barava main Sabbath, taem evri faithful man bae rest from planti handred year wea olketa stap anda long olketa hevi bilong sin and dae.

13. Wanem law nao kamap bihaen Christ finisim ministry bilong hem long earth, and hao nao hem difren from datwan wea kam firstaem?

¹³ Jesus mekem klia tu wanem nao hem tru justice taem wanfala niu law, “law bilong Christ,” hem start bihaen hem finisim ministry bilong hem long earth. (Galatians 6:2) Disfala law hem difren from Law Bilong Moses wea kam firstaem bikos hem depend no long olketa komand wea olketa raetem, bat long olketa principle. Nomata olsem, hem garem samfala kliafala komand tu. Jesus kolem wanfala long olketa hia ‘wanfala niu komandment.’ Jesus teachim evri follower bilong hem for lovem each other long sem wei wea hem lovem olketa. (John 13:34, 35) Tru nao, love wea willing for sakrifaesim seleva hem spesol mark bilong evriwan wea live followim “law bilong Christ.”

Wanfala Example Bilong Justice

14, 15. Hao nao Jesus showimaot hem luksavve long olketa spialaen bilong paoa bilong hem, and why nao diswan comfortim iumi?

¹⁴ Jesus duim moa samting winim wei for teach abaotem love. Hem live followim “law bilong Christ.” Diswan showaot thru long full laef bilong hem. Tingim thrifala wei wea example bilong Jesus showimaot klia wanem nao justice.

¹⁵ First wan, Jesus stap klia evribit long wei for duim eni samting wea no followim justice. Maet iu lukim hao planti samting wea no followim justice hem happen taem olketa man kamap praod and ovarem spialaen bilong paoa wea olketa garem. Jesus no duim datwan. Wantaem, wanfala man kam long Jesus and sei: “Teacher, dadi bilong mi hem dae finis so iu talem brata bilong mi for sharem olketa samting wea dadi leavim for mitufala.” Hao nao Jesus ansarem man hia? “Man, mi no garem paoa for disaedem kaen samting olsem for iutufala!” (Luke 12:13, 14) Maet iumi sapraes long datwan. Savve bilong Jesus, fasin bilong hem for luksavve, and paoa wea hem kasem from God hem winim eniwan long earth; nomata olsem, hem no laek join insaed raoa hia, bikos hem no kasem paoa for duim datwan. Nomata long planti thousand year wea hem laef bifor hem kam long earth, Jesus hem evritaem hambol long wei olsem. (Jude 9) Wei wea Jesus hambol for trustim Jehovah for disaedem samting saed long justice hem showimaot Jesus garem nambawan fasin.

16, 17. (a) Hao nao Jesus showimaot justice taem hem preachim gud nius abaotem Kingdom bilong God? (b) Hao nao Jesus showimaot hao justice wea hem garem join witim mercy?

¹⁶ Mek-tu, Jesus showimaot justice long wei bilong hem taem hem preachim gud nius abaotem Kingdom bilong God. Hem no saedem eniwan. Bat, hem traem best for kasem evri difren kaen pipol, nomata olketa rich or poor. Long wei wea difren, olketa Pharisee les long poor pipol, and kolem olketa long disfala nogud nem ʽam-ha·ʼaʹrets, wea minim olketa man nating, or “pipol bilong land.” Jesus hem no fraet for stretem disfala wei for no followim justice. Taem hem teachim pipol gud nius—and tu, taem hem kaikai witim pipol, feedim, healim, or resurrectim olketa—hem saportim justice bilong datfala God wea want for helpem “evri difren kaen man.”c​—1 Timothy 2:4.

¹⁷ Mek-thri, justice bilong Jesus hem fulap witim mercy. Hem duim bigfala samting for helpem olketa sinner. (Matthew 9:11-13) Hem willing tumas for helpem pipol wea no garem paoa for protectim olketa seleva. Olsem example, Jesus no joinim olketa leader bilong religion for apim wei for no trustim evri Gentile. Hem showimaot mercy taem hem helpem and teachim samfala hia, nomata main waka bilong hem for helpem olketa Jew pipol. Hem agree for duim mirakol for healim servant bilong army komanda bilong Rome, and sei: “Mi no savve long eniwan long Israel wea garem strongfala faith olsem disfala man.”​—Matthew 8:5-13.

18, 19. (a) Wanem nao olketa wei wea Jesus apim wei for respectim olketa woman? (b) Hao nao example bilong Jesus helpem iumi for lukim hao wei for no fraet hem join witim justice?

¹⁸ Long sem wei, Jesus no saportim tingting bilong planti pipol long dat taem saed long olketa woman. Bat long wei wea difren, hem no fraet for duim samting wea followim justice. Pipol ting olketa Samaritan woman no klin olsem olketa Gentile. Nomata olsem, Jesus no hol bak for preach long datfala Samaritan woman long well bilong Sychar. Tru nao, woman hia nao first wan wea Jesus talemaot klia hao hem nao datfala promis Messiah. (John 4:6, 25, 26) Olketa Pharisee sei olketa shud no teachim eni woman law bilong God, bat Jesus iusim planti taem and strong for teachim olketa woman. (Luke 10:38-42) And nomata kastom sei olketa no savve trustim olketa woman for givim stretfala witness long kot, Jesus givim honor long samfala woman taem olketa nao first for lukim hem bihaen hem resurrect. Hem talem tu olketa woman hia for go talem olketa man disaepol abaotem disfala barava important samting!​—Matthew 28:1-10.

¹⁹ Tru nao, Jesus showimaot klia long olketa nation wanem nao justice. Planti taem hem duim olsem nomata datwan bae mekem hem stap long danger. Example bilong Jesus helpem iumi for lukim hao man mas no fraet sapos hem want for saportim trufala justice. Dastawe hem fit for garem nem, “datfala Lion wea kam from tribe bilong Judah.” (Revelation 5:5) Remember hao lion hem piksarem wei for no fraet for followim justice. Klosap nao Jesus bae mekem justice wea moa big kamap. Hem bae “mekem justice kamap long full earth.”​—Isaiah 42:4.

Messiah King “Mekem Justice Kamap Long Full Earth”

20, 21. Long taem bilong iumi, hao nao Messiah King hem apim justice long earth and insaed long Christian kongregeson?

²⁰ Start long taem wea hem kamap Messiah King long 1914, Jesus hem apim justice long earth. Long wanem wei? Hem acceptim waka for mek sure profesi bilong hem long Matthew 24:14 bae fulfill. Olketa follower bilong Jesus long earth teachim truth abaotem Kingdom bilong Jehovah long pipol bilong evri kantri long earth. Olsem Jesus, olketa preach long wei for no saedem eniwan and long wei wea followim justice wea luk aotem wei for givim evriwan​—young or olo, rich or poor, man or woman—chance for savve long Jehovah, datfala God bilong justice.

²¹ Olsem Hed, Jesus hem apim justice tu insaed long Christian kongregeson. Olsem profesi talem, hem givim “olketa man olsem present,” wea hem nao olketa faithful Christian elder wea lead insaed long kongregeson. (Ephesians 4:8-12) Taem olketa shepherdim flock bilong God, olketa man hia followim example bilong Jesus Christ for apim justice. Olketa evritaem tingim hao Jesus laekem olketa for deal witim sheep bilong hem long wei wea followim justice​—nomata wanem position, nem, or living olketa garem.

22. Wanem nao tingting bilong Jehovah saed long olketa samting wea no followim justice distaem, and hem markem Son bilong hem for duim wanem?

²² Klosap nao, Jesus bae mekem justice kamap long earth long wei wea winim enitaem bifor. Fasin wea no followim justice hem big tumas long disfala world wea olabaot. Evri pikinini wea dae from hangre hem from fasin wea no followim justice wea no garem eni excuse. Diswan hem barava tru sapos iumi tingim selen and taem wea pipol spendem for mekem olketa samting for faet long war and wakem evri kaen samting for selfish hapitaem. Dae bilong planti million pipol wea shud no dae each year hem wanfala nomoa long planti samting wea no followim justice, wea mekem Jehovah kros long raeteous wei. Hem markem Son bilong hem for faetem wanfala raeteous war againstim disfala full wicked system for finisim for olowe evri samting wea no followim justice.​—Revelation 16:14, 16; 19:11-15.

23. Bihaen Armageddon, hao nao Christ bae apim justice for olowe?

²³ Nomata olsem, justice bilong Jehovah mas duim moa samting winim wei for distroem wicked pipol nomoa. Hem markem tu Son bilong hem for rul olsem “Prince bilong Peace.” Bihaen long war bilong Armageddon, rul bilong Jesus bae mekem peace kamap long full earth, and hem bae rul “followim justice.” (Isaiah 9:6, 7) Then Jesus bae hapi tumas for finisim evri samting wea no followim justice wea kosim planti pain and safa insaed long world. For olowe hem bae faithful for saportim perfect justice bilong Jehovah. Dastawe hem important tumas for iumi followim justice bilong Jehovah distaem. Bae iumi lukim hao nao iumi savve duim datwan.

1-3. (a) Why nao iumi garem kaon long Jehovah? (b) Wanem nao loving Wan wea Sevem iumi hem askem iumi for givim bak long hem?

TINGIM sapos iu insaed wanfala ship wea gogo for sink daon and no eni wei stap for iu go aot. Taem iu ting no eni hope stap nao, wanfala man kam and pullim iu aot and iu sef. Iu bae feel hapi tumas taem man wea sevem iu hem tekem iu go from danger and sei: “Iu sef nao”! Waswe, bae iu feel olsem iu garem big kaon long datfala man? Long wanfala wei, hem olsem iu garem kaon long hem for laef bilong iu.

² Long samfala wei, diswan showimaot samting wea Jehovah duim for iumi. Tru nao iumi garem bigfala kaon long hem. No eni daot stap hao hem givim ransom wea mekem iumi kamap free from sin and dae wea kasholem iumi. Iumi feel sef taem iumi savve dat sapos iumi go ahed for garem faith long datfala sakrifaes, iumi kasem forgiveness for olketa sin bilong iumi, and future bilong iumi for olowe hem sef. (1 John 1:7; 4:9) Olsem iumi lukim long Chapter 14, ransom hem nambawan wei wea Jehovah showimaot love and justice. Diswan shud muvim iumi for duim wanem?

³ Hem fitim for iumi tingim samting wea disfala loving Wan wea Sevem iumi hem askem iumi for givim long hem. Jehovah sei olsem thru long profet bilong hem Micah: “Hem bin talem iu finis O man, samting wea gud. And wanem nao Jehovah laekem iu for duim? Hem nao for [followim justice], for tinghae long wei for loyal, And for hambol taem iu wakabaot witim God bilong iu!” (Micah 6:8) Lukim hao wanfala samting wea Jehovah askem bak from iumi hem for iumi “followim justice.” Hao nao iumi savve duim olsem?

Aftarem ‘Trufala Raeteous Fasin’

4. Hao nao iumi savve Jehovah expectim iumi for followim olketa raeteous standard bilong hem?

⁴ Jehovah expectim iumi for followim olketa standard bilong hem saed long samting wea stret and samting wea rong. From olketa standard bilong hem followim justice and raeteous fasin, iumi aftarem justice and raeteous fasin taem iumi followim olketa. Isaiah 1:17 hem sei: “Lane for duim gud samting; followim justice.” Word bilong God encouragem iumi for “lukaotem raeteous fasin.” (Zephaniah 2:3) Hem encouragem iumi tu for ‘werem niufala fasin wea God wakem fitim wanem hem laekem long trufala raeteous fasin.’ (Ephesians 4:24) Trufala raeteous fasin​—trufala justice—​hem no acceptim raf fasin, fasin wea no klin, and dirty fasin, bikos olketa samting hia spoelem samting wea holy.​—Psalm 11:5; Ephesians 5:3-5.

5, 6. (a) Why nao hem no wanfala hevi for iumi followim olketa standard bilong Jehovah? (b) Hao nao Bible showimaot wei for aftarem raeteous fasin hem samting wea man mas go ahed for duim?

⁵ Waswe, hem wanfala hevi for followim olketa raeteous standard bilong Jehovah? Nomoa. Heart wea kam klos long Jehovah bae no les for duim wanem hem askem. From iumi lovem God and evri fasin bilong hem, iumi want for live long wei wea mekem hem hapi. (1 John 5:3) Tingim hao Jehovah “lovem olketa raeteous samting.” (Psalm 11:7) Sapos iumi barava followim justice bilong God, or raeteous fasin, iumi mas lovem samting wea Jehovah lovem and heitim samting wea hem heitim.​—Psalm 97:10.

⁶ Hem no isi for olketa man wea no perfect for aftarem raeteous fasin. Iumi mas aotem oldfala fasin and olketa sin bilong hem and werem niufala fasin. Bible sei datfala niufala fasin hem ‘go ahed for kamap niu’ thru long stretfala savve. (Colossians 3:9, 10) Datfala toktok ‘go ahed for kamap niu’ showimaot hao wei for werem niufala fasin hem samting wea man mas go ahed for duim, wea hem mas waka hard long hem. Nomata iumi traem best for duim samting wea stret, samfala taem sin mekem iumi stambol long tingting, toktok, or fasin.​—Romans 7:14-20; James 3:2.

7. Hao nao iumi shud ting sapos samfala taem iumi fail long wei for aftarem raeteous fasin?

⁷ Hao nao iumi shud ting sapos samfala taem iumi fail long wei for aftarem raeteous fasin? Tru, iumi no want for ting smol long wei wea sin hem serious samting. Long semtaem, iumi mas nating givap and tingse olketa wik point bilong iumi mekem iumi no fit for servem Jehovah. Kaenfala God bilong iumi hem mekem olketa arrangement for olketa wea really repent for kasem bak wei for fren witim hem. Tingim disfala toktok bilong aposol John wea givim comfort: “Mi raetem kam olketa samting hia long iufala mekem iufala no sin.” Bat then hem sei moa: “Bat sapos eniwan hem sin, [bikos long wei for no perfect wea hem born witim], wanfala man wea raeteous hem stap for helpem iumi, wea hem nao Jesus Christ wea stap witim Dadi long heven.” (1 John 2:1) Tru nao, Jehovah provaedem ransom sakrifaes bilong Jesus mekem iumi savve servem Hem long wei wea hem acceptim nomata iumi sin. Waswe, datwan no muvim iumi for want for duim best bilong iumi for mekem Jehovah hapi?

Disfala Gud Nius and Justice Bilong God

8, 9. Hao nao wei for talemaot disfala gud nius showimaot justice bilong Jehovah?

⁸ Iumi savve showimaot justice—tru nao, showimaot justice bilong God—taem iumi share evribit for preachim disfala gud nius bilong God long nara pipol. Hao nao justice bilong Jehovah hem join witim gud nius?

⁹ Jehovah bae no distroem disfala wicked system sapos hem no talemaot warning firstaem. Long profesi abaotem samting wea bae happen long taem bilong end, Jesus sei: “Datfala waka for preachim gud nius mas gohed long evri kantri firstaem.” (Mark 13:10; Matthew 24:3) Wei wea hem talem datfala word “firstaem” showimaot olketa nara samting bae happen bihaen preaching waka go ahed. Insaed disfala nara samting hem datfala big trabol, wea minim wicked pipol bae distroe, wea bae hem openem wei for wanfala raeteous niu world. (Matthew 24:14, 21, 22) Tru nao, no eniwan savve fit for sei Jehovah hem no showimaot justice long wicked pipol. From hem mek sure warning hem go aot, hem givim olketa hia planti chance for changem olketa wei bilong olketa mekem olketa no dae.​—Jonah 3:1-10.

10, 11. Hao nao wei wea iumi share for preachim gud nius hem showimaot justice bilong God?

¹⁰ Hao nao wei wea iumi preachim disfala gud nius showimaot justice bilong God? First samting, hem stret for iumi duim evriting iumi fit for duim for helpem nara pipol kasem salvation. Tingim moa tokpiksa abaotem wei wea samwan sevem iu from ship wea sink daon. Taem iu stap sef insaed long wanfala laefboat, iu bae want for helpem nara pipol wea still stap insaed long sea. Long sem wei, iumi garem responsibility for olketa wea stragol yet insaed “sea” bilong disfala wicked world. Hem tru, planti rejectim message bilong iumi. Bat taem Jehovah go ahed for patient, iumi garem responsibility for givim chance long olketa for “repent” and kasem salvation.​—2 Peter 3:9.

¹¹ Taem iumi preachim datfala gud nius long evriwan wea iumi meetim, iumi showimaot justice long nara important wei: Iumi showimaot iumi no saed witim eniwan. Remember hao “God hem no favorim eniwan. Long evri kantri long world, sapos man worshipim God and duim samting wea stret, God bae hapi long hem.” (Acts 10:34, 35) Sapos iumi want for followim justice bilong Hem, iumi mas no judgem pipol firstaem. Bat, iumi shud sharem disfala gud nius witim nara pipol nomata wanem kala skin, position, or living olketa garem. Long wei olsem, iumi givim chance long evriwan wea bae lisin for herem and acceptim gud nius.​—Romans 10:11-13.

Hao Iumi Deal Witim Pipol

12, 13. (a) Why nao iumi shud no kwiktaem for judgem pipol? (b) Wanem nao mining bilong kaonsel bilong Jesus for stop for judgem and stop for sei narawan fit for kasem panis? (Lukim footnote tu.)

¹² Iumi savve showimaot justice taem iumi deal witim pipol long sem wei wea Jehovah deal witim iumi. Hem isi tumas for judgem nara pipol, tok againstim wik point bilong olketa and kwestinim wanem nao muvim olketa. Bat hu long iumi nao wantem Jehovah for lukluk strong long wanem nao muvim iumi or olketa wik point bilong iumi long wei wea no showimaot mercy? Datwan hem no hao Jehovah deal witim iumi. Man wea raetem psalm sei olsem: “Sapos olketa mistek nao samting wea iu lukluk for hem, O Jah, O Jehovah, hu nao bae fit for standap?” (Psalm 130:3) Iumi tinghae tumas long God bilong iumi wea showimaot justice and mercy wea no chus for lukluk long olketa wik point bilong iumi. (Psalm 103:8-10) So hao nao iumi shud deal witim nara pipol?

¹³ Sapos iumi tinghae long mercy wea showaot thru long justice bilong God, iumi bae no kwiktaem for judgem nara pipol long olketa samting wea no bisnis bilong iumi or wea no important. Long Sermon long Maunten, Jesus givim disfala warning: “[Stop for] judgem narawan mekem God no judgem iufala.” (Matthew 7:1) Long story bilong Luke, Jesus sei tu: “[Stop for] sei narawan fit for kasem panis mekem God no sei iufala nao fit for kasem panis.”a (Luke 6:37) Jesus showimaot hem luksavve long fasin bilong man wea no perfect for kwiktaem for judge. Eniwan wea lisin long man wea garem fasin for judgem pipol long hard wei mas finis for duim datwan.

14. Wanem nao olketa reason why iumi mas “stop for judgem” pipol?

¹⁴ Why nao iumi mas “stop for judgem” pipol? Wan samting nao, paoa bilong iumi garem spialaen. Disaepol James hem sei moa long iumi: “God nomoa hem givim law and hem nomoa Judge.” Dastawe James sei olsem: “Hem no stret for iu judgem narawan.” (James 4:12; Romans 14:1-4) And tu, fasin bilong iumi for sin mekem wei wea iumi judge no fitim justice. Planti tingting and samting wea muvim iumi—olsem wei for daonem nara man, feel nogud bikos samwan no deal witim iumi long gud wei, jealous fasin, and fasin for apim seleva—savve twistim tingting bilong iumi abaotem nara pipol. Iumi garem olketa wik point tu, and wei for ting raonem olketa hia shud mekem iumi hol bak for faendem rong bilong nara pipol. Iumi no savve readim heart bilong pipol; and iumi no fit for savve tu long evri part long living bilong pipol. So waswe, fitim iumi for kwestinim samting wea olketa nara brata duim or tok againstim hard waka wea olketa duim insaed service bilong God? Hem moabeta for followim Jehovah long wei for luk aotem gudfala wei bilong olketa brata and sista bilong iumi and no long olketa wik point bilong olketa!

15. Wanem kaen toktok and wei for deal witim pipol nao olketa wea worshipim God mas no garem, and why nao olsem?

¹⁵ Waswe long olketa famili member bilong iumi? Sorre for sei, long world distaem wei for ova tumas for judge hem kamap insaed long ples wea peace shud stap—insaed famili. Hem normal samting for herem wei wea hasband, waef, or dadi and mami spoelem olketa famili member bilong olketa long toktok or long body. Bat raf toktok, nogud wei for mekfani, and wei for hitim narawan hem samting wea God no acceptim midolwan olketa wea worshipim hem. (Ephesians 4:29, 31; 5:33; 6:4) Taem iumi stap witim famili, iumi gohed for followim kaonsel bilong Jesus for “stop for judgem” and “stop for sei narawan fit for kasem panis.” Remember hao wei for iusim justice hem minim for deal witim pipol long sem wei wea Jehovah deal witim iumi. And no enitaem God bilong iumi hem raf taem hem deal witim iumi. Bat, hem evritaem “lovem man” wea lovem hem. (James 5:11) Datwan hem nambawan example for iumi followim!

Olketa Elder Serve “for Justice”

16, 17. (a) Jehovah expectim olketa elder for duim wanem? (b) Wanem nao olketa elder mas duim taem samwan wea duim rong hem fail for showimaot trufala wei for repent, and why nao olsem?

¹⁶ Iumi evriwan garem responsibility for showimaot justice, bat olketa elder long Christian kongregeson nao barava garem responsibility saed long diswan. Lukim profesi toktok wea Isaiah talem abaotem olketa “prince” or olketa elder: “Lukim! Wanfala king bae rul followim raeteous fasin, and olketa prince bae rul followim justice.” (Isaiah 32:1) Tru nao, Jehovah expectim olketa elder for duim samting followim justice. Hao nao olketa savve duim diswan?

¹⁷ Olketa man hia wea fit long spiritual saed luksavve hao wei for keepim kongregeson klin evribit mas followim justice, or raeteous fasin. Samfala taem, olketa elder garem responsibility for judgem bigfala rong. Taem olketa duim olsem, olketa remember hao justice bilong God hem showimaot mercy long evritaem sapos hem fitim. So olketa trae for leadim man wea sin for repent. Bat waswe sapos man wea sin hem fail for showimaot trufala wei for repent nomata olketa trae for helpem hem? For followim perfect justice, Word bilong Jehovah sei olketa mas strong for duim samting: “Aotem man wea duim rabis samting from kongregeson.” Datwan hem minim datfala man bae no part lo kongregeson. (1 Corinthians 5:11-13; 2 John 9-11) Olketa elder feel sorre taem olketa mas duim samting olsem, bat olketa luksavve olketa mas duim for protectim wei wea kongregeson klin long fasin and spiritual saed. Nomata olsem, olketa hope wanday datwan wea duim rong bae kasem bak gudfala tingting bilong hem and kam bak long kongregeson.​—Luke 15:17, 18.

18. Wanem nao olketa elder mas no forgetim taem olketa offerim kaonsel from Bible long nara pipol?

¹⁸ For duim samting followim justice hem minim tu for offerim kaonsel wea kam from Bible taem need hem stap. Bat, olketa elder no lukluk for olketa mistek bilong pipol. And olketa no luk aotem nomoa eni chance for kaonselem man. Bat wanfala brata or sista maet “start for go rong bat hem no luksavve long datwan.” Wei for tingim hao justice bilong God hem no raf and garem feeling, bae muvim olketa elder for “trae for stretem hem” lo kaenfala wei. (Galatians 6:1) So, olketa elder bae no iusim raf toktok or hotem wanfala wea duim rong samting. Bat, kaonsel wea man givim long loving wei bae encouragem man wea kasem datwan. Nomata taem olketa givim kaonsel wea barava fitim—wea talem stret nogud samting wea bae kamaot from samting hem duim wea no wise—olketa elder mas no forgetim hao datfala brata or sista wea duim rong samting hem sheep bilong Jehovah.b (Luke 15:7) Taem love nao muvim man for givim kaonsel and repruv and hem givim witim love, kaonsel hia garem moa chance for stretem datwan wea duim rong samting.

19. Wanem samting nao olketa elder mas disaedem, and disison bilong olketa mas garem faondeson long wanem?

¹⁹ Planti taem olketa elder mas disaedem samting wea affectim olketa insaed long kongregeson. Olsem example, olketa elder savve meet for lukluk sapos samfala brata insaed long kongregeson fit for kamap elder or ministerial servant. Olketa elder savve hem important tumas for no teksaed. For olketa appointment hia, olketa letem olketa mark bilong God for leadim olketa taem olketa disaedem samting and no depend long feeling bilong olketa seleva. So, olketa duim samting long wei for “lukluk gud long evri samting and no favorim eniwan.”​—1 Timothy 5:21.

20, 21. (a) Olketa elder traem best for kamap wanem, and why nao olsem? (b) Wanem nao olketa elder savve duim for helpem “olketa wea sorre”?

²⁰ Olketa elder iusim justice bilong God long olketa nara wei tu. Bihaen hem talem profesi hao olketa elder bae serve “for justice,” Isaiah go ahed for sei: “Each wan bae hem olsem wanfala ples for haed from wind, wanfala ples for haed from bigfala rain, olsem olketa stream bilong wata long land wea no garem wata, olsem shadow bilong bigfala ston long land wea drae fogud.” (Isaiah 32:1, 2) So, olketa elder traem best for givim comfort and strongim olketa brata and sista.

²¹ Bikos long evri problem wea savve mekem man wiki distaem, planti needim encouragement. Olketa elder, wanem nao iu savve duim for helpem “olketa wea sorre”? (1 Thessalonians 5:14) Tingim feeling bilong olketa taem iu lisin long olketa. (James 1:19) Maet olketa need for storyim “wari” wea stap insaed heart bilong olketa witim samwan wea olketa trustim. (Proverbs 12:25) Helpem olketa for feel sure Jehovah, and tu olketa brata and sista needim olketa, tinghae and lovem olketa. (1 Peter 1:22; 5:6, 7) And tu, iu savve prea witim olketa and for olketa. Wei for herem wanfala elder talem prea from heart for olketa savve givim bigfala comfort. (James 5:14, 15) God bilong justice bae lukim loving help wea iu givim for olketa wea feel sorre.

22. Wanem nao olketa wei wea iumi savve followim justice bilong Jehovah, and wanem nao kamaot from datwan?

²² Tru nao, iumi kam moa klos long Jehovah taem iumi followim justice bilong hem! Taem iumi saportim olketa raeteous standard bilong hem, taem iumi sharem gud nius wea sevem laef witim nara pipol, and taem iumi chus for lukluk long gud saed bilong pipol and no long mistek bilong olketa, iumi showimaot justice bilong God. Olketa elder, taem iu protectim wei wea kongregeson hem klin, taem iu offerim Bible kaonsel wea buildimap man, wei wea iu no teksaed taem iu disaedem samting, and taem iu encouragem olketa wea feel wikdaon, iu showimaot justice bilong God. Heart bilong Jehovah hapi tumas taem hem luk daon from heven and lukim pipol bilong hem traem best bilong olketa for “showimaot justice” taem olketa wakabaot witim God bilong olketa!