1, 2. Wanem sapraesing samting nao Elijah lukim firstaem, bat wanem barava spesol samting nao hem lukim taem hem stap long cave long Maunt Horeb?

ELIJAH bin lukim olketa sapraesing samting bifor. Hem lukim olketa raven bird karem kam kaikai for hem tufala taem each day long taem wea hem haed. Hem lukim container for flour and narawan for oil wea nating emti taem bigfala hangre go ahed. Hem lukim tu fire kamdaon from skae taem hem prea for datwan. (1 Kings, chapters 17, 18) Bat, Elijah nating lukim eniting olsem disfala next samting wea happen.

² Taem hem standap long mouth bilong wanfala cave long Maunt Horeb, hem lukim samfala barava spesol samting. Firstaem big wind. Masbi datwan mekem bigfala noise bikos strong bilong wind hia brekem olketa maunten and pisisim olketa bigfala ston. Then wanfala earthquake wea kamap taem strongfala paoa brek aot from deep daon insaed long earth. Bihaen, wanfala big fire hem kam. Taem fire hem go pas, masbi Elijah feelim barava strongfala hot.​—1 Kings 19:8-12.

3. Elijah hem lukim pruv wea showimaot wanem fasin bilong God, and wea nao iumi savve lukim pruv bilong disfala sem fasin?

³ Evri difren samting hia wea Elijah lukim olketa semsem long wanfala wei—olketa showimaot barava bigfala paoa bilong God. Bat iumi no need for lukim wanfala mirakol for luksavve God hem garem disfala fasin. Diswan showaot klia finis. Bible sei creation nao pruvim dat Jehovah hem ‘God and paoa bilong hem stap for olowe.’ (Romans 1:20) Tingim laetning and thunder wea kamap taem hem big wind and rain, wata wea foldaon long bigfala watafol, barava waed skae wea fulap witim olketa star! Waswe, iu lukim paoa bilong God long olketa samting hia? Nomata olsem, planti pipol long world distaem no really luksavve long paoa bilong God. And tu-thri nomoa garem stretfala tingting abaotem diswan. Wei for minim disfala fasin bilong God hem givim iumi planti reason for kam klos long Jehovah. Long disfala sekson bae iumi studyim planti samting abaotem bigfala paoa bilong Jehovah.

Wanfala Main Fasin Bilong Jehovah

4, 5. (a) Wanem nao Bible talem abaotem nem bilong Jehovah? (b) Why nao hem fitim Jehovah for chusim buluka for piksarem paoa bilong hem?

⁴ Paoa bilong Jehovah no olsem eni narawan. Jeremiah 10:6 sei: “No eniwan olsem iu, O Jehovah. Iu nambawan, and nem bilong iu hem barava hae and maeti.” Long hia Bible storyim nem bilong Jehovah hem barava hae, maeti, or garem paoa. Remember hao staka pipol sei disfala nem minim ‘Hem Bae Kamap.’ Wanem nao mekem Jehovah fit for creatim eni samting and kamap eni samting wea hem laek for kamap? Paoa nao wanfala samting. Tru nao, wei wea Jehovah fit for duim samting, for duim will bilong hem, hem no garem spialaen. Diskaen paoa nao hem wanfala main fasin bilong hem.

⁵ Bikos iumi bae hard for minim full paoa bilong hem, Jehovah iusim olketa tokpiksa for helpem iumi. Olsem iumi lukim finis, hem iusim buluka for piksarem paoa bilong hem. (Ezekiel 1:4-10) Datwan hem barava fitim bikos buluka hem wanfala big and strongfala animal. Pipol long Palestine long taem bilong Bible no lukim eni nara animal wea moa strong winim buluka. Bat olketa savve long wankaen buluka wea moa strong—wild buluka, or aurochs, wea no stap distaem. (Job 39:9-12) Ruler bilong Rome, Julius Caesar sei olketa buluka hia klosap sem size witim olketa elephant. Hem raet olsem abaotem olketa: “Olketa strong tumas and savve ran fast fogud.” Tingim wei wea iu bae feel smol and wik sapos iu standap saed long animal olsem!

6. Why nao Jehovah nomoa garem nem “Olmaeti”?

⁶ Long sem wei tu, man hem smol and wik taem iumi markem hem witim paoa bilong God, Jehovah. Long hem, olketa maeti nation olsem lelebet dust antap long scale. (Isaiah 40:15) No eniwan olsem Jehovah wea garem paoa evribit, dastawe hem nomoa garem nem “Olmaeti.”a (Revelation 15:3) Jehovah garem “barava bigfala paoa” and “paoa bilong hem barava nambawan.” (Isaiah 40:26) Paoa wea kamaot from hem no savve finis. Hem no depend long eni nara samting for strong, bikos “strong hem bilong God.” (Psalm 62:11) Bat, long wanem wei nao Jehovah iusim paoa bilong hem?

Hao Jehovah Iusim Paoa Bilong Hem

7. Wanem nao holy spirit bilong Jehovah, and wanem nao olketa word long firstfala languis bilong Bible showimaot saed long mining bilong diswan?

⁷ Holy spirit kamaot from Jehovah and nating savve finis. Hem paoa bilong God taem hem duim samting. Tru nao, long Genesis 1:2, Bible story abaotem diswan olsem “active force” bilong God. Datfala Hebrew and Greek word wea olketa transleitim “spirit” olketa transleitim long nara ples olsem “wind,” “brith,” and “strong wind.” Samfala dictionary sei hao olketa word hia long firstfala languis minim wanfala paoa wea man no savve lukim wea duim samting. Olsem wind, iumi no savve lukim spirit bilong God, bat iumi savve lukim olketa samting wea hem duim.

8. Olketa wanem toktok nao Bible iusim for storyim spirit bilong God, and why nao diswan hem fitim?

⁸ Holy spirit bilong God savve change long eni wei. Jehovah savve iusim for duim eni purpose bilong hem. Dastawe Bible hem sei spirit bilong God hem olsem “finger” bilong hem, “strongfala hand,” or “arm wea hem iusim.” (Luke 11:20; Deuteronomy 5:15; Psalm 8:3) Long sem wei wea wanfala man bae iusim hand bilong hem for duim planti difren waka witim strong or wei for isisi, God tu savve iusim spirit bilong hem for duim eni purpose—olsem for creatim barava smol atom or separatem Red Sea or mekem olketa Christian long first century fit for story long difren languis.

9. Paoa bilong Jehovah for rul hem kasem wea and ovarem hu?

⁹ Jehovah showimaot paoa bilong hem tu thru long wei wea hem Sovereign Bilong Universe. Tingim sapos iu rul ovarem planti million pipol wea garem savve and wea willing for obeyim evriting wea iu talem. Jehovah hem garem paoa for rul olsem. Hem garem pipol long earth wea servem hem, wea samtaem Bible kolem wanfala army. (Psalm 68:11; 110:3) Bat, man hem wik nomoa sapos iumi markem witim angel. Tru nao, taem army bilong Assyria attakim pipol bilong God, wanfala angel nomoa killim dae 185,000 soldia insaed long wanfala naet! (2 Kings 19:35) Olketa angel bilong God garem “strongfala paoa.”​—Psalm 103:19, 20.

10. (a) Why nao Olmaeti Wan garem nem, Jehovah bilong olketa army? (b) Hu nao garem paoa wea moa hae winim evri creation bilong Jehovah?

¹⁰ Haomas angel nao stap? Profet Daniel lukim wanfala vision long heven wea hem lukim winim 100 million angel front long throne bilong Jehovah, bat scripture hia no sei hem lukim evri angel wea Jehovah creatim. (Daniel 7:10) So maet planti handred million moa angel stap. Dastawe God garem nem, Jehovah bilong olketa army. Disfala title hem storyim barava haefala position bilong hem olsem Komanda bilong maeti army bilong olketa angel. Hem putim wanfala angel ovarem evriwan hia, Son wea hem lovem, “firstborn long evri creation.” (Colossians 1:15) From hem datfala archangel—chief ovarem evri angel, seraph, and cherub—Jesus nao garem paoa winim evri creation bilong Jehovah.

11, 12. (a) Long wanem wei nao toktok bilong God showimaot paoa? (b) Jesus sei paoa bilong Jehovah hem fit for duim wanem?

¹¹ Jehovah garem nara wei moa for showimaot paoa. Hebrews 4:12 sei: “Toktok bilong God hem laef and hem garem paoa.” Waswe, iu luksavve long barava spesol paoa bilong toktok bilong God, or message wea kam from hem wea stap insaed Bible distaem? Datwan savve strongim iumi, buildimap faith bilong iumi, and helpem iumi for barava changem fasin bilong iumi. Aposol Paul warnim olketa Christian againstim pipol wea join insaed barava dirty living. Then hem sei moa: “Hem nao wei bilong samfala long iufala bifor.” (1 Corinthians 6:9-11) Tru nao, “toktok bilong God” garem paoa wea affectim olketa and helpem olketa for change.

¹² Paoa bilong Jehovah hem big tumas and wei wea hem showimaot hem win evritaem, dastawe no eni samting savve stopem hem for iusim datfala paoa. Jesus sei: “God savve duim eni samting.” (Matthew 19:26) Jehovah iusim paoa bilong hem for duim wanem?

Paoa wea Followim Purpose

13, 14. (a) Why nao iumi fit for sei Jehovah hem no just samting wea paoa start kam from? (b) Hao nao Jehovah iusim paoa bilong hem?

¹³ Spirit bilong Jehovah hem samting wea winim eni physical paoa; and Jehovah no just olsem samting wea paoa start kam from. God hem wanfala really person wea kontrolem evribit paoa bilong hemseleva. So, wanem nao muvim hem for iusim datwan?

¹⁴ Olsem iumi bae lukim, God iusim paoa for create, distroe, protect, and mekem samting kam bak moa—or for duim eniting wea fitim olketa perfect purpose bilong hem. (Isaiah 46:10) Samfala taem Jehovah iusim paoa bilong hem for showimaot olketa important part long fasin bilong hem and olketa standard bilong hem. Winim evri samting, hem iusim paoa bilong hem for fulfillim will bilong hem—for mekhae lo holy nem bilong hem thru long datfala Messiah Kingdom wea bae showimaot only rul bilong hem nao best wan. No eni samting savve stopem datfala purpose.

15. Jehovah iusim paoa bilong hem for wanem purpose saed long olketa servant bilong hem, and hao nao diswan hem showaot long samting wea kasem Elijah?

¹⁵ Jehovah iusim paoa bilong hem tu for helpem iumi olketa man wanwan. Lukim samting wea 2 Chronicles 16:9 hem talem: “Jehovah hem lukluk gud long evri ples long earth, for showimaot paoa bilong hem for helpem olketa wea faithful long hem long full heart.” Wanfala example nao samting wea kasem Elijah wea iumi storyim long start bilong disfala chapter. Why nao Jehovah showimaot paoa bilong Hem long datfala spesol wei? Tingim hao wicked Queen Jezebel hem sei bae hem killim dae Elijah. Profet hia hem ranawe for laef bilong hem. Hem feel olsem hem stap seleva, hem feel fraet and wiki—from luk olsem hem hard waka nating nomoa. For givim comfort long hem, Jehovah showimaot klia long Elijah paoa bilong God. Wind, earthquake, and fire showim hao barava strongfala Person long universe hem long there witim Elijah. Waswe, hem shud fraetem Jezebel, taem olmaeti God stap long saed bilong hem?​—1 Kings 19:1-12.b

16. Why nao iumi savve kasem comfort taem iumi tingim bigfala paoa bilong Jehovah?

¹⁶ Nomata distaem hem no taem bilong hem for duim olketa mirakol, Jehovah no change start kam from taem bilong Elijah. (1 Corinthians 13:8) Hem willing tumas distaem for iusim paoa bilong hem for saed bilong olketa wea lovem hem. Hem tru, hem stap long wanfala haefala spiritual ples, bat hem no farawe from iumi. Paoa bilong hem no garem spialaen so hem savve go long eni ples. Tru nao, “Jehovah hem stap klosap long olketa wea kolem hem.” (Psalm 145:18) Wantaem, taem profet Daniel hem askem Jehovah for help, hem no finis prea yet bat angel kam front long hem finis! (Daniel 9:20-23) No eniting savve stopem Jehovah from wei for helpem and strongim olketa wea hem lovem.​—Psalm 118:6.

Waswe, Paoa Bilong God Mekem Hem Hard for Iumi Story Long Hem?

17. Paoa bilong Jehovah mekem iumi fraet long wanem wei, bat wanem kaen wei for fraet nao iumi no garem?

¹⁷ Waswe, paoa bilong God shud mekem iumi fraetem hem? Ansa bilong iumi hem yes and no. Yes, bikos disfala fasin givim iumi planti reason wea fit for mekem iumi fraet long God, datkaen wei for fraet witim respect wea iumi storyim lelebet long chapter bifor diswan. Bible sei disfala wei for fraet hem “start bilong wisdom.” (Psalm 111:10) Bat iumi ansa no tu, bikos paoa bilong God no mekem iumi garem nogud fraet long hem or mekem iumi hol bak for go long hem.

18. (a) Why nao planti pipol no trustim olketa wea garem paoa? (b) Hao nao iumi savve paoa wea Jehovah garem no savve spoelem hem?

¹⁸ “Paoa maet spoelem man; bat full paoa bae spoelem hem evribit.” Hem nao toktok bilong man from England for raetem history, Lord Acton long year 1887. Planti pipol talem datfala toktok staka taem bikos maet olketa lukim hem tru. History showimaot hao planti taem olketa man wea no perfect iusim paoa long rong wei. (Ecclesiastes 4:1; 8:9) From diswan, planti no trustim olketa wea garem paoa and stap klia from olketa. Jehovah hem garem full paoa. Waswe, datwan spoelem hem long eni wei? Nomoa nao! Olsem iumi lukim finis, hem holy, and no eniting savve spoelem hem. Jehovah hem barava difren from olketa man and woman wea no perfect and wea garem paoa long disfala nogud world. Hem nating iusim paoa bilong hem long rong wei and bae hem nating duim datwan long future.

19, 20. (a) Olketa wanem nara fasin nao Jehovah evritaem iusim witim paoa bilong hem, and why nao diswan comfortim iumi? (b) Hao nao maet iu explainim wei wea Jehovah kontrolem hemseleva, and why nao iu laekem tumas datwan?

¹⁹ Remember, paoa hem no only fasin bilong Jehovah. Bae iumi studyim tu justice, wisdom, and love bilong hem. Bat iumi mas no tingse Jehovah showimaot olketa fasin bilong hem long wei wea no showimaot feeling, olsem wanfala machine, long wei for just iusim wanfala fasin each taem nomoa. Long wei wea difren evribit, iumi bae lukim long olketa chapter wea kam bihaen hao Jehovah evritaem iusim paoa bilong hem long wei wea fitim justice, wisdom, and love. Tingim nara fasin wea God garem, wea no staka ruler long world garem—fasin for kontrolem seleva.

²⁰ Tingim sapos iu meetim wanfala man wea big fogud and garem staka paoa wea mekem iu feel wik tumas. Bat gogo iu lukim hem garem kaenfala fasin. Hem evritaem redy and willing for iusim paoa bilong hem for helpem and protectim pipol, especially olketa wea no garem eniting for protectim olketa seleva or isi tumas for pipol spoelem olketa. Hem no savve iusim strong bilong hem long rong wei. Iu lukim taem samfala tok laea againstim hem nomata olketa no garem eni reason for duim datwan, hem strong bat hem no kros, hem showimaot respect, and kaen tu. Iu start for ting, waswe, bae mi fit for showimaot sem kaen isisi wei, especially sapos mi strong olsem hem? Waswe, taem iu go ahed for savve gud long man olsem, bae iu start for feel moa klos long hem? Iumi garem planti reason moa for kam klos long olmaeti Jehovah. Tingim full sentence wea title bilong disfala chapter kam from: “Jehovah no savve kros kwiktaem and hem garem bigfala paoa.” (Nahum 1:3) Jehovah no kwiktaem for iusim paoa bilong hem againstim pipol, nomata wicked pipol tu. Hem garem kwaet fasin and hem kaen. Hem “no savve kros kwiktaem” nomata planti trae for mekem hem kros.​—Psalm 78:37-41.

21. Why nao Jehovah no forcem pipol for duim will bilong hem, and wanem nao diswan teachim iumi abaotem hem?

²¹ Tingim nara wei for lukim hao Jehovah showimaot fasin for kontrolem seleva. Sapos iu garem barava bigfala paoa, waswe, iu ting samfala taem iu maet laekem pipol for duim samting followim idea bilong iu? Nomata Jehovah garem barava bigfala paoa, hem no forcem pipol for servem hem. Nomata wei for servem God hem only wei for kasem laef olowe, Jehovah no forcem iumi for serve long wei olsem. Bat, hem showimaot respect long each wan taem hem givim olketa freedom for chus. Hem warnim olketa abaotem samting wea kamaot from wei for chusim nogud samting and olketa reward bilong wei for chus gud. Bat hem letem iumiseleva nao for chus. (Deuteronomy 30:19, 20) Jehovah barava no interest long man wea serve from samwan forcem hem or from hem barava fraetem bigfala paoa bilong hem. Hem luk aotem olketa wea willing for servem hem, from love nao muvim olketa.​—2 Corinthians 9:7.

22, 23. (a) Wanem nao showimaot Jehovah hem hapi for givim paoa long nara pipol? (b) Wanem nao iumi bae studyim long next chapter?

²² Iumi lukim lastfala reason why iumi no need for fraetem Olmaeti God. Olketa man wea garem bigfala paoa planti taem fraet for sharem paoa witim nara pipol. Bat Jehovah hapi for givim paoa long olketa loyal worshiper bilong hem. Hem givim bigfala paoa long samfala, olsem Son bilong hem. (Matthew 28:18) Jehovah givim paoa long olketa servant bilong hem long nara wei tu. Bible explainim olsem: “O Jehovah, iu barava hae tumas, iu garem bigfala paoa, iu gud tumas, iu garem glory, and iu barava nambawan, bikos evri samting long skae and long earth hem bilong iu. . . . Paoa and strong hem long hand bilong iu, and iu fit for mekem evriwan garem bignem and for givim strong long olketa.”​—1 Chronicles 29:11, 12.

²³ Tru nao, Jehovah hem hapi for givim iu strong. Hem givim “paoa wea winim wanem iumi garem” long olketa wea want for servem hem. (2 Corinthians 4:7) Waswe, iu laek for klos long strongfala God olsem, wea iusim paoa bilong hem long olketa kaenfala wei wea followim hae standard? Long next chapter bae iumi lukim hao Jehovah iusim paoa bilong hem for create.

1, 2. Hao nao sun showimaot paoa bilong Jehovah for create?

WASWE, enitaem iu standap klosap long wanfala fire taem hem cold long naet? Maet iu putim go hand bilong iu bat no klosap tumas mekem iu savve enjoyim hot bilong datfala fire. Sapos iu go klosap tumas, bae hem hot fogud. Sapos iu standap farawe tumas, wind long naet bae mekem iu feel cold.

² Wanfala “fire” stap wea mekem skin bilong iu feel hot long daytaem. Datfala “fire” hem stap 150 million kilometer long skae!a Tingim hao sun mas garem bigfala paoa dastawe iumi savve feelim hot bilong hem nomata hem stap farawe tumas! Bat, earth mas no farawe or klosap tumas taem hem go raonem datfala fire. Sapos hem klosap tumas, wata wea stap long earth bae change for kamap air; sapos hem farawe tumas, evri wata bae kamap ice. Wei for klosap or farawe tumas bae mekem no eniting fit for laef long planet bilong iumi. Laef long earth bae finis sapos no eni sun. And tu, laet from sun hem duim gud waka bilong hem, no mekem pollution kamap and iumi enjoyim.​—Ecclesiastes 11:7.

3. Sun hem pruvim wanem important samting wea tru?

³ Bat, planti pipol ting nating long sun nomata laef bilong olketa depend long datwan. So, olketa no lanem eni leson from sun. Bible sei olsem abaotem Jehovah: “Iu nao wakem laet and sun.” (Psalm 74:16) Yes, sun givim honor long Jehovah, “Datwan wea Wakem heven and earth.” (Psalm 19:1; 146:6) Hem wanfala nomoa long olketa star and planet wea showim long iumi barava bigfala paoa bilong Jehovah for create. Bae iumi lukluk gud long samfala hia and then lukluk long earth and olketa samting wea laef long hem.

“Luk Go Ap Long Heven and Lukim”

4, 5. Sun hem hao strong and hao big, bat wanem nao size bilong hem sapos iumi markem witim olketa narafala star?

⁴ Maet iu savve dat sun bilong iumi hem wanfala star. Hem luk moa big winim olketa star wea iumi lukim long naet bikos hem no farawe tumas. Hem garem haomas paoa? Long midol, hot bilong sun hem samting olsem 15,000,000 degrees Celsius. Sapos iu tekem wanfala smol pis bilong sun wea olsem hed bilong wanfala nila and putim hia long earth, iu bae need for standap 140 kilometer awe from datwan mekem hem no bonem iu! Evri second, sun hem givim aot energy wea semsem olsem planti handred million nuclear bomb wea bosta wantaem.

⁵ Sun hem big tumas and winim 1,300,000 planet wea size bilong earth bilong iumi bae fit for stap insaed. Waswe, sun hem star wea big winim olketa narawan? Nomoa, olketa man for studyim universe kolem sun wanfala yellow dwarf (smol yellow star). Aposol Paul hem sei “hao evri star olketa luk naes hem no semsem.” (1 Corinthians 15:41) Hem no really savve hao datfala toktok wea God muvim hem for raetem hem barava tru. Wanfala star stap wea barava big tumas and sapos olketa putim long ples wea sun hem stap, earth bilong iumi bae insaed long hem. Sapos olketa putim wanfala nara star long sem ples, bae hem go kasem planet Saturn—nomata datfala planet hem farawe tumas, dastawe wanfala rocket mas travel for fofala year for kasem long there and mas travel 40 taem moa fast winim bullet from strongfala gun!

6. Hao nao Bible showimaot wei wea namba bilong olketa star hem big tumas long tingting bilong man?

⁶ Samting wea barava narawe winim size bilong olketa star hem namba bilong olketa. Tru nao, Bible sei man hard for kaontem olketa star bikos olketa olsem “sandbis long sea.” (Jeremiah 33:22) Disfala toktok showimaot hao moa star stap winim wanem eye bilong man savve lukim. Sapos wanfala man wea raetem Bible, olsem Jeremiah, luk go ap long skae long naet and trae for kaontem olketa star wea hem lukim, bae hem kaontem nomoa thri thousand or samting olsem, bikos hem nomoa eye bilong man savve lukim long kliafala naet. Datfala namba maet lelebet sandbis nomoa wea man holem long hand bilong hem. Bat really, olketa star staka fogud, olsem sandbis long sea.b Hu nao savve kaontem namba olsem?

7. Hao nao bae iu explainim haomas star nao insaed galaxy wea iumi stap insaed or haomas galaxy nao stap insaed lo universe?

⁷ Isaiah 40:26 sei: “Luk go ap long heven and lukim. Hu nao creatim evri samting hia? Hem nao Datwan wea tekem kam army bilong olketa and hem savve haomas nao olketa, and kolem evriwan long nem bilong olketa.” Psalm 147:4 sei: “Hem kaontem namba bilong olketa star.” Wanem nao “namba bilong olketa star”? Datwan hem no simpol kwestin. Pipol wea studyim universe sei Milky Way galaxy wea iumi insaed garem winim 100 billion star.c Bat samfala sei hem winim datwan. Galaxy wea iumi insaed hem wanfala nomoa long planti galaxy, and planti long olketa hia garem staka moa star. Haomas galaxy nao stap? Samfala man wea studyim universe sei hem samting olsem staka handred billion or maet staka trillion galaxy. So luk olsem man no savve haomas galaxy nao stap, or haomas billion star nao olketa garem. Nomata olsem, Jehovah savve long namba hia. And hem givim nem long each star tu!

8. (a) Wanem nao size bilong Milky Way galaxy? (b) Jehovah iusim wanem for stretem gogo bilong olketa star and planet?

⁸ Bigfala respect wea iumi garem for God hem barava kamap moa big taem iumi tingim size bilong olketa galaxy. From wanfala end bilong Milky Way galaxy go kasem nara end hem samting olsem 100,000 laet year. Tingim wei wea laet hem travel fast tumas, 300,000 kilometer each second. Datfala laet mas gogo for 100,000 year bifor hem kasem narasaed long galaxy wea iumi insaed! And samfala galaxy barava moa big winim galaxy wea iumi stap insaed. Bible sei Jehovah hem “spreadim” full heven olsem hem wanfala kaleko. (Psalm 104:2) Hem directim tu gogo bilong olketa samting hia wea hem creatim. From barava smol dust wea stap midolwan olketa star go kasem mamaeti galaxy, evri samting muv followim olketa physical law wea God hem startim and iusim. (Job 38:31-33) Dastawe, olketa scientist sei gogo bilong olketa planet and star long heven olketa olsem wanfala spesol dance wea evriwan mas followim staka muvment! Tingim Datwan wea creatim olketa samting hia. Waswe, iu barava tinghae long God wea garem bigfala paoa olsem for create?

“Datwan wea Wakem Earth Witim Paoa Bilong Hem”

9, 10. Hao nao paoa bilong Jehovah showaot long hao hem putim solar system, Jupiter, disfala earth, and moon?

⁹ Paoa bilong Jehovah for create hem showaot klia long earth, hom bilong iumi. Hem putim earth long spesol ples insaed long disfala big universe. Samfala scientist sei planti galaxy maet no fit for letem laef go ahed long kaen planet wea iumi laef long hem. Big haf long Milky Way galaxy hem no fit tu for saportim olketa samting wea laef. Midol bilong galaxy hia hem fulap witim staka star. Radiation hem hae tumas, and planti taem olketa star klosap bangam each other. Olketa ples klosap long spialaen bilong disfala galaxy no garem olketa important samting for mekem laef go ahed. Solar system bilong iumi hem long barava ples wea free from danger and garem evri samting for laef.

¹⁰ Earth hem kasem gud samting from wanfala maeti samting wea protectim hem—datfala planet Jupiter. From size bilong Jupiter hem planti taem moa big winim Earth, gravity paoa bilong hem barava strong. Wanem nao kamaot from diswan? Hem savve pullim go or pushim aot eni samting wea speed go thru long space. Olketa scientist sei sapos Jupiter no stap, staka bigfala samting wea hitim earth bae 10,000 taems moa worse winim olketa samting wea hitim earth distaem. Nara samting wea moa klos long earth bilong iumi hem wanfala spesol satellite—hem nao moon. Hem no samting wea luk naes nomoa and givim “laet long naet,” hem mekem earth lei long saed olowe. Wei wea hem lei long saed hem mekem earth garem olketa season wea stedy and no olabaot—diswan tu important samting for laef go ahed long earth.

11. Hao nao air raonem earth hem olsem wanfala shield wea givim protection?

¹¹ Paoa bilong Jehovah for create hem showaot long evri part bilong earth. Tingim air raonem iumi, wea olsem shield wea givim protection. Samfala part long laet from sun hem gud and samfala part savve spoelem man. Taem nogud laet hia kam hitim air bilong earth, diswan mekem air for kamap ozone. Then, datfala ozone hem finisim datfala laet wea savve spoelem iumi. So, planet wea iumi stap long hem garem spesol samting olsem ambrela bilong hemseleva for protectim hem!

12. Hao nao wata cycle wea go ahed long air raonem iumi showimaot paoa bilong Jehovah for create?

¹² Datwan hem wanfala part nomoa bilong air raonem iumi, wea garem planti difren gas wea mix for keepim laef olketa samting wea laef long earth. Narafala barava spesol samting abaotem air raonem iumi hem wata cycle. Evri year sun hem mekem 400,000 cubic kilometer bilong wata from sea for kamap air. Wata hia formimap olketa cloud, wea wind hem blowim go farawe. Long disfala wei wata hia kamap klin, and hem foldaon olsem rain, snow, and ice, wea fulimap moa olketa ples wea wata kam from. Hem barava olsem samting wea Ecclesiastes 1:7 hem talem: “Evri river gogo long sea, bat sea seleva no full. Long ples wea olketa river gogo long hem, long there olketa go bak mekem olketa gogo moa.” Jehovah nomoa savve startim cycle olsem.

13. Wanem nao iumi lukim long olketa plant and graon bilong earth wea pruvim paoa bilong Creator?

¹³ Evri ples wea iumi lukim laef, iumi lukim samting wea pruvim paoa bilong Creator. Start long olketa mamaeti redwood tree wea hae winim 30 story building go kasem barava smol plant wea insaed long sea and givim aot bigfala part bilong oxygen wea iumi brithim, paoa bilong Jehovah for create hem showaot klia. Graon seleva hem fulap witim olketa samting wea laef—worm, fungi, and olketa microbe, evriwan hia waka tugeta long spesol wei for helpem olketa plant for grow. Dastawe Bible sei graon hem garem paoa for mekem kaikai grow gud.​—Genesis 4:12.

14. Wanem paoa nao stap insaed long barava smol atom?

¹⁴ No eni daot stap, Jehovah hem “Datwan wea Wakem earth witim paoa bilong hem.” (Jeremiah 10:12) Paoa bilong God hem showaot nomata long olketa barava smol creation bilong hem. Olsem example, sapos iumi leim wan million atom saed bae saed, hem bae no waed olsem wanfala hair bilong man. And nomata sapos iumi mekem big wanfala atom go kasem taem hem tol olsem wanfala 14-story building, nucleus (smol part long midol) bilong hem bae olsem size bilong smol pis salt long mek-seven floor bilong datfala building. Bat, from datfala barava smol nucleus bilong atom, bigfala paoa kamaot taem wanfala nuclear bomb bosta!

“Evri Samting wea Brith”

15. Taem Jehovah story abaotem olketa difren wild animal, wanem leson nao hem teachim long Job?

¹⁵ Nara samting wea barava pruvim paoa bilong Jehovah for create hem wei wea staka enikaen animal nao laef long earth. Psalm 148 hem garem list bilong planti samting wea praisem Jehovah, and verse 10 sei for “iufala olketa wild animal and iufala olketa tame animal” tu duim olsem. For showimaot why man shud garem barava bigfala respect for Creator, Jehovah storyim long Job olketa animal olsem lion, zebra, wild buluka, Behemoth (hippopotamus), and Leviathan (wea maet hem crocodile). Wanem point nao Jehovah laek for strongim? Sapos man hem fraetem and respectim olketa bigfala animal hia wea no savve kamap tame, hao nao hem shud feel abaotem Creator bilong olketa?​—Job, chapter 38-41.

16. Wanem nao samfala samting abaotem olketa bird wea Jehovah creatim wea mekem iu sapraes?

¹⁶ Psalm 148:10 story tu abaotem “olketa bird wea flae.” Tingim evri difren kaen bird! Jehovah talem Job abaotem ostrich, wea “laf long horse and man wea raedem.” Tru nao, bird hia wea 2.5 meter tol no savve flae, bat hem savve ran 65 kilometer insaed wan hour and long bilong wanfala step bilong hem 4.5 meter! (Job 39:13, 18) Long narasaed, albatross bird hem flae olowe ovarem sea. Wing bilong disfala bird hem 3 meter long, and hem savve float long air. Hem savve float for staka hour and no muvim wing bilong hem. Bird wea difren evribit from datwan hem bee hummingbird, wea long bilong hem 5 centimeter nomoa and hem nao barava smol winim eni nara bird long world. Hem savve muvim wing bilong hem ap and daon 80 taems insaed wanfala second! Olketa hummingbird, wea kalakala, savve flae olsem helicopter and flae reverse tu.

17. Hao big nao wanfala blue whale, and wanem nao iumi shud luksavve long hem taem iumi ting raonem olketa animal wea Jehovah creatim?

¹⁷ Long Psalm 148:7 “olketa sea animal” tu praisem Jehovah. Tingim animal wea planti pipol sei hem big animal winim evri narawan wea laef long disfala planet, hem nao blue whale. Long bilong datfala big animal wea stap long deep sea savve kasem 30 meter or winim. Hevi bilong hem olsem hevi bilong 30 full-grown elephant. Tongue bilong hem maet hevi olsem wanfala elephant. Heart bilong hem size bilong wanfala smol car. Diswan hem beat samting olsem 9 taems insaed wan minute​—wea difren evribit from heart bilong hummingbird, wea maet beat samting olsem 1,200 taems insaed wan minute. Wanfala blood vessel bilong blue whale hia hem big tumas and fitim wanfala pikinini for krol go insaed. Tru nao, heart bilong iumi muvim iumi for talem disfala toktok bilong praise wea stap long last verse long buk bilong Psalms: “Evri samting wea laef​—letem hem praisem Jah.”​—Psalm 150:6.

Lane From Paoa Bilong Jehovah for Create

18, 19. Haomas difren kaen samting wea laef nao Jehovah wakem long earth, and wanem nao creation teachim iumi abaotem sovereign rul bilong hem?

¹⁸ Wanem nao iumi lanem from wei wea Jehovah iusim paoa bilong hem for create? Iumi garem respect and givim praise for planti difren kaen samting wea hem creatim. Wanfala man wea raetem psalm sei: “Olketa waka bilong iu planti tumas, O Jehovah! . . . Earth hem fulap witim olketa samting wea iu wakem.” (Psalm 104:24) Datwan tru tumas! Olketa scientist sei winim wan million samting wea laef nao stap long earth; nomata olsem, samfala sei luk olsem staka million moa stap. Man wea savve drawim piksa maet samfala taem no savve nao wanem for drawim. Bat, wei for Jehovah create​—paoa wea hem garem for wakem and creatim planti niu and difren samting—hem no savve finis.

¹⁹ Wei wea Jehovah iusim paoa bilong hem for create hem teachim iumi samting abaotem sovereign rul bilong hem. Datfala word “Creator” hem mekem Jehovah stap separate from evri nara samting long universe, wea evriting hia part bilong “creation.” Nomata only-born Son bilong Jehovah, wea waka olsem wanfala “nambawan wakman” long taem bilong creation, hem nating garem nem Creator or Mek-tu Creator long Bible. (Proverbs 8:30; Matthew 19:4) Bat, hem nao “firstborn bilong evri creation.” (Colossians 1:15) Position bilong Jehovah olsem Creator givim hem full right for iusim paoa for rul ovarem full universe.​—Romans 1:20; Revelation 4:11.

20. Long wanem wei nao Jehovah hem rest start kam long taem wea hem finis for creatim olketa samting long earth?

²⁰ Waswe, Jehovah finis for iusim paoa bilong hem for create? Bible sei taem Jehovah stop for create long mek-six day, “hem start for rest long mek-seven day from evri waka wea hem duim.” (Genesis 2:2) Aposol Paul sei long bilong disfala mek-seven “day” hem planti thousand year, bikos hem still go ahed long taem bilong hem. (Hebrews 4:3-6) Bat waswe, datfala “rest” minim Jehovah hem stop for waka nao? Nomoa, Jehovah nating savve stop for waka. (Psalm 92:4; John 5:17) So, rest bilong hem minim wei wea hem stop for wakem eni samting wea iumi savve lukim long disfala earth. Nomata olsem, waka bilong hem for fulfillim olketa purpose bilong hem go ahed. Wanfala part long disfala waka hem wei wea hem muvim olketa man for raetem olketa Holy Scripture. Nara waka tu hem wei for mekem “wanfala niu creation,” wea iumi bae storyim long Chapter 19 bilong disfala buk.​—2 Corinthians 5:17.

21. Hao nao paoa bilong Jehovah for create bae affectim olketa faithful man for olowe?

²¹ Taem day bilong Jehovah for rest hem kasem end, hem bae fit for talemaot wei wea evri waka bilong hem long earth “gud tumas,” olsem hem duim long end bilong mek-six day for create. (Genesis 1:31) Iumi mas weit for lukim hao nao maet hem chus for iusim bigfala paoa bilong hem for create. Nomata wanem, iumi sure iumi bae go ahed for sapraes fogud long wei wea Jehovah iusim paoa bilong hem for create. For olowe, iumi bae lanem moa samting abaotem Jehovah thru long creation bilong hem. (Ecclesiastes 3:11) Taem iumi lanem moa samting abaotem hem, respect wea iumi garem for hem kamap moa big—and iumi bae kam moa klos long Nambawan Creator bilong iumi.

1-3. (a) Wanem danger nao olketa Israelite feisim from olketa bilong Egypt? (b) Hao nao Jehovah faet for pipol bilong hem?

OLKETA Israelite no wei nao—olketa stap midol long olketa steep maunten and sea wea hard for katkros long hem. Army bilong Egypt, barava raf sekson for killkill, aftarem olketa for killim olketa evriwan dae.a Nomata olsem, Moses encouragem pipol bilong God for no lus hope. Hem comfortim olketa taem hem sei: “Jehovah nao bae faet for iufala.”​—Exodus 14:14.

² Nomata olsem, Moses askem help bilong Jehovah, and hem ansa olsem: “Why nao iu krae kam long mi? . . . Apim walking stik bilong iu and liftimap hand bilong iu ovarem datfala sea, and divaedem sea hia.” (Exodus 14:15, 16) Piksarem evri samting wea go ahed for happen. Stretawe Jehovah givim komand long angel bilong hem, and datfala cloud muv go bihaen long olketa Israelite, maet hem kamap olsem wanfala wall wea blokem Egypt for attak. (Exodus 14:19, 20; Psalm 105:39) Moses putim aot hand bilong hem. Wanfala strong wind hem divaedem datfala sea. Wata hem kamap strong and standap olsem wall, wea mekem wanfala road wea fitim datfala full nation for wakabaot followim!​—Exodus 14:21; 15:8.

³ Taem hem lukim evri samting hia wea showimaot bigfala paoa, Pharaoh shud givim order nao for army bilong hem tan bak. Bat, praodfala Pharaoh givim order for olketa attak. (Exodus 14:23) Olketa bilong Egypt full speed go bihaenem olketa Israelite, bat wheel bilong olketa chariot hem start for foldaon and attak bilong olketa hem olabaot. Taem olketa Israelite arrive sef long narasaed, Jehovah givim komand long Moses: “Iu liftimap hand bilong iu ovarem datfala sea mekem sea hia kam bak for kavarem olketa Egyptian, olketa war chariot bilong olketa, and olketa soldia bilong olketa wea raedem olketa horse.” Wata hia foldaon and berem Pharaoh and olketa army bilong hem!​—Exodus 14:24-28; Psalm 136:15.

4. (a) Long Red Sea, Jehovah hem pruvim wanem abaotem hemseleva? (b) Hao nao diswan maet affectim wei wea samfala ting abaotem Jehovah?

⁴ Wei wea nation bilong Israel sev long Red Sea hem wanfala important samting wea happen long history saed long wei wea God deal witim olketa man. Long datfala taem Jehovah showimaot wei wea hem wanfala “strongfala warrior.” (Exodus 15:3) Bat, hao nao diswan affectim tingting bilong iu abaotem Jehovah? For tok stret, war hem kosim bigfala pain and sorre long olketa man. Waswe, wei wea God iusim paoa bilong hem for distroe hem mekem iu hol bak and no muvim iu for kam klos long hem?

War Bilong God and War Bilong Olketa Man

5, 6. (a) Why nao hem fitim God for garem title “Jehovah, komanda bilong olketa army”? (b) Hao nao olketa war bilong God difren from war bilong man?

⁵ Klosap tu handred and sixti taem insaed Hebrew Scripture and tufala taem insaed Christian Greek Scripture, God hem garem title “Jehovah, komanda bilong olketa army.” (1 Samuel 1:11) From hem Sovereign Ruler, Jehovah hem garem paoa ovarem wanfala big army bilong olketa angel long heven. (Joshua 5:13-15; 1 Kings 22:19) Paoa wea disfala army garem for distroe hem barava narawe. (Isaiah 37:36) For ting abaotem wei for distroem olketa man hem mekem man feel nogud. Bat, iumi mas remember hao olketa war bilong God difren tumas from olketa iusles war bilong olketa man. Olketa leader bilong army and politik maet trae for givim gudfala reason for raf samting wea olketa duim. Bat greedy and selfish fasin nao planti taem kosim war bilong olketa man.

⁶ Long wei wea difren evribit, Jehovah hem balance saed long feeling. Deuteronomy 32:4 sei: “Datfala Rok, waka bilong hem perfect, from evri wei bilong hem followim justice. Wanfala God bilong faithful fasin, wea showimaot justice evribit; hem nao raeteous and stret.” Bible hem tok againstim kros wea man no kontrolem and raf fasin. (Genesis 49:7; Psalm 11:5) So Jehovah no duim eniting sapos hem no garem reason for datwan. Hem no iusim paoa for distroe long wei wea ova tumas and hem only duim datwan sapos no eni nara wei stap for stretem datfala problem. Hem sei olsem thru long profet Ezekiel: “‘Waswe, mi hapi taem samwan wea wicked hem dae?’ hem nao toktok bilong Sovereign Lord Jehovah. ‘Waswe, mi no laekem for hem lusim olketa nogud wei bilong hem and go ahed for stap laef?’”​—Ezekiel 18:23.

7, 8. (a) Wanem rong tingting nao Job garem abaotem wei wea hem safa? (b) Hao nao Elihu stretem tingting bilong Job long diswan? (c) Wanem leson nao iumi lanem from samting wea kasem Job?

⁷ Sapos olsem, why nao Jehovah iusim paoa for distroe? Bifor iumi faendem ansa, hem gud for tingim raeteous man Job. Satan challengem sapos Job—or eni man—bae go ahed for stap faithful long taem bilong test. Jehovah ansarem datfala challenge taem hem letem Satan for testim faithful fasin bilong Job. From diswan, Job kasem bigfala sik, lusim olketa riches and pikinini bilong hem. (Job 1:1–2:8) From hem no savve long datfala challenge wea kamap, Job mistek for tingse wei wea hem safa hem from panis wea hem kasem from God. Hem askem God why nao Hem mekem hem kamap wanfala “target” and “wanfala enemy.”​—Job 7:20; 13:24.

⁸ Wanfala young man wea nem bilong hem Elihu showimaot hao tingting bilong Job hem rong taem hem sei: “Waswe, iu barava tingse iu nao stret dastawe iu sei, ‘Mi raeteous winim God’?” (Job 35:2) Tru nao, hem no wise for tingse iumi savve long samting winim God or sei hem duim samting wea no stret. Elihu sei: “Hem hard tumas for trufala God duim nogud samting, and for Olmaeti duim samting wea no stret.” Bihaen moa hem sei: “For minim Olmaeti, hem samting wea hard for iumi duim; hem garem bigfala paoa, and hem no enitaem duim samting wea spoelem justice bilong hem, and raeteous fasin bilong hem big tumas.” (Job 34:10; 36:22, 23; 37:23) Iumi sure taem God faet, hem garem gudfala reason for duim olsem. From iumi savve long datwan, hem gud for lukluk long samfala reason why God bilong peace hem samtaem kamap man for faet.​—1 Corinthians 14:33.

Why God Bilong Peace Hem Mas Faet

9. Why nao God wea holy tumas hem faet?

⁹ Bihaen hem praisem God olsem “strongfala warrior,” Moses sei: “Hu long olketa god nao hem olsem iu, O Jehovah? Hu nao olsem iu, wea barava holy tumas?” (Exodus 15:11) Profet Habakkuk tu raetem toktok wea klosap semsem: “Eye bilong iu klin tumas so iu hard for lukim samting wea nogud; and iu no acceptim olketa nogud wei.” (Habakkuk 1:13) Nomata Jehovah hem God bilong love, hem wanfala God bilong holy fasin, raeteous fasin, and justice tu. From olketa fasin hia, samfala taem, hem mas iusim paoa bilong hem for distroem samting. (Isaiah 59:15-19; Luke 18:7) So God no mekem holy fasin bilong hem kamap dirty taem hem faet. Nomoa, hem faet bikos hem holy.​—Exodus 39:30.

10. Wanem nao only wei wea feeling for enemy long Genesis 3:15 bae finis, and wanem gudfala samting nao olketa man wea raeteous bae kasem?

¹⁰ Tingim samting wea happen bihaen first man and woman, Adam and Eve, bighed for againstim God. (Genesis 3:1-6) Sapos hem letem rong samting wea tufala duim for go ahed, position bilong Jehovah olsem Sovereign bilong Universe bae kamap wik. Olsem wanfala raeteous God, hem mas judgem tufala for dae. (Romans 6:23) Long first Bible profesi, hem sei feeling for enemy bae stap midolwan olketa servant bilong hemseleva and olketa wea followim datfala “snek,” Satan. (Revelation 12:9; Genesis 3:15) Gogo, only wei for finisim disfala feeling for enemy hem for distroem Satan. (Romans 16:20) Datfala akson bilong judgment bae mekem olketa man wea raeteous kasem olketa bigfala blessing, taem hem aotem evri paoa bilong Satan and openem wei for wanfala paradaes kamap evriwea long earth. (Matthew 19:28) Go kasem datfala taem, olketa wea saed witim Satan bae go ahed for againstim pipol bilong God for spoelem olketa long physical saed and long spiritual saed. Samfala taem Jehovah bae need for helpem olketa.

Akson Bilong God for Aotem Wicked Fasin

11. Why nao God feel hem mas mekem wanfala flood kamap long full earth?

¹¹ Flood long taem bilong Noah hem wanfala example bilong wei wea God tek akson. Genesis 6:11, 12 hem sei: “Datfala tru God lukim evri samting hem nogud tumas long earth, and earth hem fulap witim raf fasin. Tru nao, God lukim evri samting long earth hem nogud tumas. Wei bilong evri pipol long earth hem nogud nao.” Waswe, God bae letem wicked pipol for finisim evri last gudfala fasin wea stap long earth? Nomoa. Jehovah hem feel dat hem mas mekem wanfala flood kamap long full earth for finisim olketa wea go ahed for duim raf fasin and dirty fasin.

12. (a) Wanem nao Jehovah talem saed long “pikinini” bilong Abraham? (b) Why nao olketa Amorite mas dae?

¹² Diswan semsem tu long judgment bilong God againstim pipol bilong Canaan. Jehovah showimaot hao thru long Abraham, wanfala “pikinini” bae kamap wea bae mekem evri famili bilong earth kasem blessing. For fitim datfala purpose, God sei olketa pikinini bilong Abraham mas tekem land bilong Canaan, wanfala land wea olketa Amorite stap insaed. Hao nao hem fitim justice for God raosem aot pipol hia from land bilong olketa? Jehovah sei hem bae no raosem olketa from datfala land for samting olsem 400 year—go kasem taem wea olketa Amorite bae kasem panis for nogud samting wea olketa duim.b (Genesis 12:1-3; 13:14, 15; 15:13, 16; 22:18) Long datfala taem, nogud fasin bilong olketa Amorite kamap moa worse. Canaan kamap wanfala land wea pipol worshipim idol, killim dae nara pipol, and garem barava nogud fasin saed long sex. (Exodus 23:24; 34:12, 13; Numbers 33:52) Pipol long datfala ples sakrifaesim olketa pikinini long fire. Waswe, wanfala holy God savve letem pipol bilong hem for stap witim wicked pipol olsem? Nomoa nao! Hem sei: “Land bilong olketa hem no klin, and mi bae panisim olketa wea stap long datfala land bikos long sin bilong olketa, and pipol hia bae aot from land bilong olketa.” (Leviticus 18:21-25) Nomata olsem, Jehovah no killkill krangge nomoa. Pipol bilong Canaan wea garem gudfala fasin, olsem Rahab and olketa Gibeonite, no dae.​—Joshua 6:25; 9:3-27.

Faet for Nem Bilong Hem

13, 14. (a) Why nao Jehovah hem mas mekem nem bilong hem kamap holy? (b) Hao nao Jehovah aotem shame from nem bilong hem?

¹³ Bikos Jehovah hem holy, nem bilong hem holy. (Leviticus 22:32) Jesus teachim olketa disaepol bilong hem for prea: “Mifala laekem nem bilong iu for holy.” (Matthew 6:9) Bighed fasin long Eden hem barava spoelem nem bilong God, and mekem daot kamap abaotem nem bilong God and wei bilong hem for rul. Jehovah kanduit acceptim laea toktok and bighed fasin hia wea againstim hem. Hem mas aotem shame wea kasem nem bilong hem.​—Isaiah 48:11.

¹⁴ Tingim moa olketa Israelite. Taem olketa stap olsem slave long Egypt, datfala promis bilong God for Abraham hao thru long pikinini bilong hem evri famili long earth bae kasem blessing, hem olsem emti toktok nomoa. Bat taem hem sevem olketa and mekem olketa kamap wanfala nation, Jehovah aotem shame from nem bilong hem. Profet Daniel prea olsem long God bilong hem: “O God bilong mifala Jehovah, iu tekem aot pipol bilong iu from land bilong Egypt witim strong hand and mekem pipol savve long nem bilong iu.”​—Daniel 9:15.

15. Why nao Jehovah sevem olketa Jew from wei for prisoner long Babylon?

¹⁵ Interesting samting, Daniel prea olsem long taem olketa Jew needim Jehovah for duim samting moa for saed long nem bilong Hem. From olketa Jew no obey olketa kamap prisoner moa, distaem long Babylon. Taon bilong olketa, Jerusalem, hem distroe. Daniel savve hao wei for tekem bak olketa Jew long homland bilong olketa bae mekem nem bilong Jehovah kamap hae. Dastawe Daniel prea olsem: “O Jehovah, forgivim mifala. O Jehovah, lukluk gud and duim samting! No delay, for saed bilong iuseleva, O God bilong mi, from nem bilong iu stap long taon bilong iu and pipol bilong iu.”​—Daniel 9:18, 19.

Faet for Pipol Bilong Hem

16. Explainim hao wei wea Jehovah interest for defendim nem bilong hem no minim hem no garem feeling and hem selfish.

¹⁶ Waswe, wei wea Jehovah interest for defendim nem bilong hem minim hem no garem feeling and hem selfish? Nomoa, bikos taem hem duim samting wea fitim holy fasin bilong hem and from hem lovem justice, hem protectim pipol bilong hem. Lukim Genesis chapter 14. Long there iumi read abaotem fofala king wea kasholem son bilong brata bilong Abraham, Lot and famili bilong hem. Witim help bilong God, Abraham go and winim datfala strongfala sekson! Story abaotem disfala wei for win hem first story insaed “Buk Abaotem Olketa War Bilong Jehovah,” wea maet hem wanfala buk wea storyim tu samfala faet wea no stap insaed long Bible. (Numbers 21:14) Hem winim planti moa war bihaen.

17. Wanem nao showimaot Jehovah hem faet for olketa Israelite bihaen olketa go insaed long land bilong Canaan? Talem samfala example.

¹⁷ No longtaem bifor olketa Israelite go insaed long land bilong Canaan, Moses promisim olketa: “God bilong iufala Jehovah nao go front long iufala, and bae hem faet for iufala olsem iufala lukim hem duim for iufala long Egypt.” (Deuteronomy 1:30; 20:1) Start long Joshua, man wea changem Moses, and long full taem bilong olketa Judge and rul bilong olketa faithful king bilong Judah, Jehovah barava faet for pipol bilong hem, and mekem olketa win long planti spesol wei ovarem olketa enemy bilong olketa.​—Joshua 10:1-14; Judges 4:12-17; 2 Samuel 5:17-21.

18. (a) Why nao iumi tinghae long wei wea Jehovah no change? (b) Wanem nao bae happen taem feeling for enemy wea Genesis 3:15 storyim hem kasem taem wea hem barava big?

¹⁸ Jehovah hem no change; and purpose bilong hem for mekem disfala earth kamap wanfala paradaes bilong peace tu hem no change. (Genesis 1:27, 28) God hem still heitim wicked fasin. Long semtaem hem lovem tumas pipol bilong hem and klosap nao bae duim samting for olketa. (Psalm 11:7) Tru nao, feeling for enemy wea Genesis 3:15 storyim bae klosap finis long bigfala and strong wei. For mekem nem bilong hem holy and protectim pipol bilong hem, Jehovah bae kamap “strongfala warrior”!​—Zechariah 14:3; Revelation 16:14, 16.

19. (a) Explainim why nao wei wea God iusim paoa bilong hem for distroe savve mekem iumi kam klos long hem? (b) Hao nao wei wea God willing for faet hem shud affectim iumi?

¹⁹ Tingim wanfala tokpiksa: Sapos wanfala barava raf animal hem attakim famili bilong wanfala man and datfala man hem jamp go and killim dae datfala raf animal. Waswe, iu ting waef and olketa pikinini bilong hem bae feel nogud long hem from disfala samting wea hem duim? Nomoa nao, wei wea hem no selfish for showimaot love long olketa bae barava muvim olketa. Olsem tu, iumi shud no feel nogud long wei wea God iusim paoa bilong hem for distroe. Wei wea hem willing for faet for protectim iumi shud mekem love bilong iumi for hem grow. Respect wea iumi garem for bigfala paoa bilong hem shud kamap moa strong tu. So, iumi savve givim holy service long God “long wei for fraet long hem and respectim hem.”​—Hebrews 12:28.

Kam Klos Long “Strongfala Warrior”

20. Taem iumi readim olketa story insaed Bible abaotem olketa war wea God faet insaed, wea iumi maet no minim evribit, wanem nao iumi shud duim, and why nao olsem?

²⁰ Tru, Bible no explainim evri information abaotem olketa disison bilong Jehovah saed long olketa war wea hem faet insaed. Bae iumi savve evritaem sure long diswan: No enitaem Jehovah hem iusim paoa bilong hem for distroe long wei wea no followim justice, wea ova tumas or long raf wei. Planti taem, wei for readim olketa verse wea stap raonem wanfala story bilong Bible savve helpem iumi for garem stretfala tingting. (Proverbs 18:13) Nomata taem iumi no savve long evri information, wei for lanem moa samting abaotem Jehovah and for ting raonem olketa nambawan fasin bilong hem savve helpem iumi for aotem eni daot wea maet kamap. Taem iumi duim olsem, bae iumi lukim hao iumi garem planti reason for trustim God bilong iumi, Jehovah.​—Job 34:12.

21. Nomata samfala taem hem “strongfala warrior”, wanem nao main fasin bilong Jehovah?

²¹ Nomata Jehovah hem “strongfala warrior” taem need kamap for faet, diswan no minim hem laekem war. Long vision bilong Ezekiel abaotem chariot long heven, Jehovah hem redy for faet againstim olketa enemy bilong hem. Nomata olsem, Ezekiel lukim wanfala rainbow hem stap raonem God—wea piksarem peace. (Genesis 9:13; Ezekiel 1:28; Revelation 4:3) Tru tumas, Jehovah hem kwaet and laekem peace. Aposol John hem raet olsem: “God hem love.” (1 John 4:8) Evri fasin bilong Jehovah balance long perfect wei. Dastawe hem bigfala privilege for iumi kam klos long God olsem wea strong tumas bat long semtaem hem loving!

1, 2. Olketa Israelite stap long wanem danger taem olketa go insaed long area bilong Sinai long 1513 B.C.E., and hao nao Jehovah comfortim olketa?

OLKETA Israelite stap long danger taem olketa go insaed area bilong Sinai long start bilong 1513 B.C.E. Wanfala bigfala wakabaot hem stap front long olketa, hem wanfala gogo thru long “bigfala wilderness wea danger and wea fulap witim olketa poison snek and scorpion.” (Deuteronomy 8:15, The New English Bible) Olketa feisim danger tu from olketa nation wea no laekem olketa. Jehovah nao tekem kam pipol bilong hem for feisim evri samting hia. From hem God bilong olketa, waswe, bae hem savve protectim olketa?

² Toktok bilong Jehovah barava givim comfort: “Iufala seleva lukim samting wea mi duim long olketa Egyptian. And hao mi tekem iufala kam long mi olsem eagle wea karem pikinini bilong hem long tufala wing bilong hem.” (Exodus 19:4) Jehovah remindim pipol bilong hem hao hem sevem olketa from pipol bilong Egypt, hem olsem hem iusim olketa eagle for karem olketa go long sef ples. Bat olketa nara reason stap why ‘olketa wing bilong eagle’ hem tokpiksa wea fitim wei wea God givim protection.

3. Why nao ‘olketa wing bilong eagle’ hem tokpiksa wea barava fitim protection from God?

³ Eagle hem no iusim big and strongfala wing bilong hem for flae hae nomoa. Long midol day, mami eagle bae putim aot wing bilong hem—wea maet long olsem 2 meter—for olsem wanfala ambrela, wea protectim olketa pikinini bilong hem from hot sun. Samfala taem hem iusim wing bilong hem for haedem olketa pikinini from cold wind. Long sem wei wea eagle hem protectim olketa pikinini bilong hem, Jehovah tu haedem and protectim datfala young nation bilong Israel. Taem olketa insaed wilderness, pipol bilong hem bae go ahed for faendem sef ples andanit long shadow bilong strongfala wing bilong hem sapos olketa go ahed for stap faithful. (Deuteronomy 32:9-11; Psalm 36:7) Bat waswe, hem stret for iumi distaem expectim God for protectim iumi?

Promis Bilong God for Givim Protection

4, 5. Why nao iumi trustim evribit promis bilong God for protectim iumi?

⁴ Jehovah barava fit for protectim olketa servant bilong hem. Hem nao “God Olmaeti”—wanfala title wea showimaot no eniwan savve stopem paoa bilong hem. (Genesis 17:1) Olsem wei wea no eni samting savve stopem hae taed or low taed, no eni samting savve stopem wei wea Jehovah iusim paoa bilong hem. From hem savve duim eni samting wea followim will bilong hem, iumi savve ask, ‘Waswe, hem will bilong Jehovah for iusim paoa bilong hem for protectim pipol bilong hem?’

⁵ Ansa hem, yes! Jehovah promisim iumi bae hem protectim pipol bilong hem. Psalm 46:1 sei: “God hem sef ples bilong iumi and strong bilong iumi, help wea isi for faendem long taem bilong trabol.” Bikos God “no savve laea,” iumi savve trustim evribit promis bilong hem for protectim iumi. (Titus 1:2) Iumi lukluk long samfala klia tokpiksa wea Jehovah iusim for storyim wei wea hem protectim pipol bilong hem.

6, 7. (a) Shepherd wea Bible storyim protectim sheep bilong hem long wanem wei? (b) Hao nao Bible storyim feeling bilong Jehovah for protectim and lukaftarem sheep bilong hem?

⁶ Jehovah hem Shepherd bilong iumi, and “iumi pipol bilong hem and sheep long land bilong hem.” (Psalm 23:1; 100:3) Sheep no savve lukaftarem olketa seleva. Shepherd wea Bible story abaotem mas no fraet for protectim sheep bilong hem from olketa lion, wolf, and bear, and tu from pipol for steal. (1 Samuel 17:34, 35; John 10:12, 13) Bat, samfala taem wei for protectim olketa sheep hia minim for kaen and isisi. Taem wanfala sheep bornem pikinini farawe from ples wea flock hem stap, loving shepherd bae helpem datfala mami sheep and then pikimap pikinini sheep and karem go long flock.

⁷ Taem Jehovah sei hem olsem shepherd, Hem talem wei wea hem garem strongfala feeling for protectim iumi. (Ezekiel 34:11-16) Tingim toktok bilong Jehovah wea stap long Isaiah 40:11, wea iumi storyim finis long Chapter 2 bilong disfala buk: “Olsem wanfala shepherd hem bae lukaftarem olketa sheep bilong hem. Hem bae hipimap olketa pikinini sheep long hand bilong hem; and hem bae karem olketa klosap long heart bilong hem.” Hao nao baby sheep stap “klosap long heart” bilong datfala shepherd—long kaleko bilong hem? Datfala pikinini sheep maet go long shepherd, and lelebet tasim leg bilong hem. Nomata olsem, datfala shepherd nao mas bendaon, pikimap datfala pikinini sheep, and putim klosap long heart bilong hem. Datwan hem piksarem loving wei wea Nambawan Shepherd bilong iumi hem willing for protectim iumi!

8. (a) God hem promis for protectim hu, and hao nao Proverbs 18:10 hem showimaot diswan? (b) Wanem nao insaed long wei for faendem sef ples long nem bilong God?

⁸ Promis bilong God for givim protection hem depend long wanfala samting—only olketa wea kam klos long hem savve kasem datwan. Proverbs 18:10 hem sei: “Nem bilong Jehovah hem nao strongfala taoa. Man wea raeteous ran go long diswan and kasem protection.” Long taem bilong Bible, samtaem pipol buildim olketa taoa long wilderness olsem sef ples for haed. Bat hem depend long man wea stap long danger for ranawe go long taoa olsem for stap sef. Hem semsem tu saed long wei for stap sef long nem bilong God. Moa samting hem insaed long diswan winim wei for talem nomoa nem bilong God; datfala nem nomoa hem no garem magic paoa. Bat, iumi need for savve and trustim Datwan wea garem datfala nem and garem living wea followim olketa raeteous mark bilong hem. Jehovah hem kaen tumas for promisim iumi hao sapos iumi garem faith long hem, bae hem kamap wanfala taoa for protectim iumi!

“God Bilong Mifala . . . Hem Fit for Sevem Mifala”

9. Hao nao Jehovah duim moa samting winim wei for promis for protectim man?

⁹ Jehovah hem duim moa samting winim wei for promis for protectim iumi. Long taem wea Bible storyim, hem showimaot long mirakol wei hao hem fit for protectim pipol bilong hem. Long history bilong Israel, maeti “hand” bilong Jehovah hem planti taem blokem olketa strongfala enemy. (Exodus 7:4) Nomata olsem, Jehovah iusim tu paoa bilong hem for protectim man wanwan.

10, 11. Wanem nao olketa Bible example wea showimaot wei wea Jehovah iusim paoa bilong hem for protectim man wanwan?

¹⁰ Taem thrifala young Hebrew​—Shadrach, Meshach, and Abednego​—no want for baodaon long gold image wea King Nebuchadnezzar wakem, datfala king wea kros fogud hem sei bae hem torowem olketa insaed long wanfala fire wea hot fogud. Nebuchadnezzar, king wea strong winim evri narawan long earth sei olsem for spoelem olketa: “Hu nao datfala god wea savve sevem iufala from hand bilong mi?” (Daniel 3:15) Thrifala young man hia trustim evribit paoa bilong God bilong olketa for protectim olketa, bat olketa no expectim hem for duim olsem. Dastawe olketa ansa olsem: “Sapos hem disaed for duim, God bilong mifala wea mifala servem hem fit for sevem mifala.” (Daniel 3:17) Tru nao, datfala barava hot fire, nomata taem olketa hotem sevenfala taem moa hot, hem samting nating long God bilong olketa wea garem bigfala paoa. Hem protectim olketa, and datfala king mas sei: “No eni god hem stap wea fit for sevem man olsem diswan.”​—Daniel 3:29.

¹¹ Jehovah showimaot tu long spesol wei paoa wea hem garem for protectim samting taem hem putim laef bilong only-born Son bilong hem go insaed long bele bilong datfala young Jew girl, Mary. Wanfala angel talem Mary hao hem bae “babule and bornem wanfala baby boy.” Datfala angel sei: “Holy spirit bae kam long iu and paoa bilong Barava Haefala God bae protectim iu.” (Luke 1:31, 35) Luk olsem diswan nao hem firstaem wea laef bilong Son bilong hem barava stap long danger. Waswe, sin and wei for no perfect bilong mami bilong hem bae spoelem datfala baby insaed long bele? Waswe, Satan bae fit for spoelem or killim dae datfala Son bifor Hem born? Nomoa nao! Hem olsem Jehovah putim wanfala wall raonem Mary for protectim hem mekem no eni samting—no eni sin, no eni nogud paoa, no eni man for killim man dae, or eni demon—savve spoelem datfala pikinini from taem wea hem start for grow insaed bele. Jehovah go ahed for protectim Jesus taem hem young. (Matthew 2:1-15) Go kasem taem God markem, no eni samting savve attakim Son bilong hem.

12. Why nao Jehovah duim mirakol for protectim samfala man long taem wea Bible storyim?

¹² Why nao Jehovah protectim samfala long olketa mirakol wei olsem? Planti taem Jehovah protectim samfala man mekem hem protectim samting wea moa important: wei wea purpose bilong hem fulfill. Olsem example, wei for baby Jesus stap laef hem important tumas for fulfillim purpose bilong God, and then diswan bae helpem evri man. Record abaotem wei wea hem iusim paoa bilong hem planti taem for protectim man hem part long Bible, wea “olketa raetem bifor hem for teachim iumi. Hem givim iumi hope bikos olketa Holy Raeting hia helpem iumi for no givap and comfortim iumi.” (Romans 15:4) Tru nao, olketa example hia strongim faith bilong iumi long God wea garem evri paoa. Bat wanem protection nao iumi savve expectim from God distaem?

Wanem Protection Bilong God Hem No Minim

13. Waswe, Jehovah mas duim mirakol for iumi evriwan? Explainim diswan.

¹³ Promis bilong God for protectim iumi hem no minim Jehovah mas duim mirakol for iumi. Nomoa, God no promis hao laef bilong iumi insaed disfala old system bae no garem eni problem. Planti faithful servant bilong Jehovah feisim barava hard taem, olsem poor living, war, sik, and dae. Jesus talem stret long olketa disaepol bilong hem hao olketa wanwan maet dae bikos long faith bilong olketa. Dastawe Jesus mekhae long need for go ahed strong kasem end. (Matthew 24:9, 13) Sapos Jehovah hem iusim paoa bilong hem for duim mirakol for sevem evri servant bilong hem, Satan bae garem reason for tok spoelem Jehovah and kwestinim really love wea iumi garem for God bilong iumi.​—Job 1:9, 10.

14. Wanem nao olketa example wea showimaot Jehovah no evritaem protectim evri servant bilong hem long semsem wei?

¹⁴ Nomata long taem wea Bible storyim, Jehovah no iusim paoa bilong hem for protectim evri servant bilong hem from dae. Olsem example, Herod killim dae aposol James long samting olsem 44 C.E.; bat no longtaem bihaen datwan, God sevem Peter from hand bilong “Herod.” (Acts 12:1-11) And John, brata bilong James, hem laef longtaem winim Peter and James. Tru nao, iumi no savve expectim God for protectim evri servant bilong hem long semsem wei. And tu, “taem and samting wea iumi no expectim hem kasem” iumi evriwan. (Ecclesiastes 9:11) So, hao nao Jehovah protectim iumi distaem?

Jehovah Protectim Man Long Physical Wei

15, 16. (a) Wanem samting nao pruvim Jehovah hem protectim olketa worshiper bilong hem olsem wanfala grup? (b) Why nao iumi savve sure Jehovah bae protectim olketa servant bilong hem distaem and long taem bilong “datfala big trabol”?

¹⁵ Tingim firstaem wei wea hem protectim iumi long physical wei. From iumi olketa worshiper bilong Jehovah, iumi expectim hem for protectim iumi olsem wanfala sekson. Sapos nomoa, bae hem isi for Satan finisim iumi. Tingim diswan: Satan, “ruler bilong disfala world,” hem laekem tumas for finisim tru worship evribit. (John 12:31; Revelation 12:17) Samfala barava strong gavman long earth tambuim preaching waka bilong iumi and trae for finisim iumi evribit. Nomata olsem, pipol bilong Jehovah go ahed strong and no givap for preach! Why nao olketa strongfala nation no savve stopem waka bilong disfala sekson bilong olketa Christian wea luk smol and luk olsem isi for spoelem olketa? Bikos Jehovah protectim iumi witim tokpiksa wing bilong hem!​—Psalm 17:7, 8.

¹⁶ Waswe long physical wei for protectim iumi long “datfala big trabol” wea klosap kam? Iumi no need for fraetem olketa judgment bilong God. Tru nao, “Jehovah hem savve hao for sevem pipol wea faithful long hem. Hem bae sevem olketa from olketa hard taem, and bae hem finisim pipol wea no raeteous long taem wea hem judgem evriwan.” (Revelation 7:14; 2 Peter 2:9) Go kasem datfala taem, iumi evritaem savve sure long tufala samting. First samting, Jehovah bae nating letem olketa loyal servant bilong hem for finis from disfala earth. Mek-tu samting, bae hem givim reward long olketa wea go ahed faithful, hem laef olowe insaed raeteous niu world bilong hem—for samfala, diswan hem thru long resurrection. For olketa wea dae, no eni ples hem moa sef winim wei for stap insaed memory bilong God.​—John 5:28, 29.

17. Hao nao Jehovah protectim iumi thru long Word bilong hem?

¹⁷ Nomata distaem, Jehovah protectim iumi thru long “word” bilong hem, wea garem paoa for muvim pipol, healim heart and changem laef bilong olketa. (Hebrews 4:12) Taem iumi followim principle bilong hem, long samfala wei diswan protectim iumi long physical wei. Isaiah 48:17 sei: “Mi, Jehovah, mi . . . teachim iufala for kasem gud samting for iufala seleva.” No eni daot stap, wei for live followim Word bilong God savve mekem health bilong iumi kamap moabeta and iumi laef longfala taem. Olsem example, bikos iumi followim kaonsel bilong Bible for stap klia from wei for durong and no mekem iumiseleva kamap dirty long eni wei, iumi savve missim olketa nogud wei and fasin wea barava spoelem laef bilong planti pipol wea no followim God. (Acts 15:29; 2 Corinthians 7:1) Iumi tinghae tumas long wei wea Word bilong God protectim iumi!

Jehovah Protectim Iumi Long Spiritual Wei

18. Hao nao Jehovah protectim iumi long spiritual wei?

¹⁸ Samting wea moa important, Jehovah protectim iumi long spiritual wei. Loving God bilong iumi protectim iumi from samting wea savve spoelem spiritual saed bilong iumi taem hem givim wanem iumi needim for stand strong long olketa test and wea protectim wei wea iumi fren witim hem. So Jehovah hem duim samting for keepim iumi laef, no for lelebet taem nomoa bat for olowe. Tingim samfala arrangement wea God provaedem for protectim iumi long spiritual wei.

19. Hao nao spirit bilong Jehovah savve helpem iumi for deal witim eni test wea iumi maet feisim?

¹⁹ Jehovah hem “Datwan wea herem prea.” (Psalm 65:2) Taem hem luk olsem olketa hevi long living hem big tumas, wei for talemaot evri samting insaed heart bilong iumi long hem, savve strongim iumi. (Philippians 4:6, 7) Maet hem no duim mirakol for aotem olketa test bilong iumi, bat hem savve ansarem prea bilong iumi long wei for givim iumi wisdom for deal witim olketa. (James 1:5, 6) Winim datwan, Jehovah givim holy spirit long olketa wea askem hem. (Luke 11:13) Datfala strongfala spirit savve mekem iumi fit for deal witim eni test or problem wea iumi feisim. Hem savve givim iumi paoa wea winim wanem iumi garem for stand strong go kasem taem Jehovah aotem evri nogud problem long niu world wea klosap tumas for kam.​—2 Corinthians 4:7.

20. Hao nao paoa bilong Jehovah for protectim iumi hem showaot thru long olketa wea worship witim iumi?

²⁰ Samfala taem, paoa wea Jehovah garem for protectim iumi savve kam thru olketa wea worship tugeta witim iumi. Jehovah mekem pipol bilong hem kamap wanfala “sekson bilong olketa brata” evriwea long world. (1 Peter 2:17; John 6:44) From love wea evri brata garem, iumi lukim pruv bilong paoa bilong holy spirit bilong God for muvim pipol long gudfala wei. Iumi showimaot olketa frut bilong datfala spirit—olketa spesol fasin wea iumi laekem olsem love, kaenfala fasin, and gudfala fasin. (Galatians 5:22, 23) So, taem iumi insaed trabol and wanfala brata givim kaonsel wea helpem iumi or talem toktok for encouragem iumi, iumi thankiu long Jehovah for olketa toktok hia wea showimaot fasin for kea wea protectim iumi.

21. (a) Wanem spiritual kaikai long barava taem nao Jehovah provaedem thru long “faithful and wise slave”? (b) Long wanem wei nao iuseleva kasem help from olketa samting wea Jehovah provaedem for iumi long spiritual wei?

²¹ Jehovah givim nara samting tu for protectim iumi: spiritual kaikai long barava taem. For helpem iumi kasem strong from Word bilong hem, Jehovah markem “faithful and wise slave” for givimaot spiritual kaikai. Datfala faithful slave iusim olketa pablikeson, witim olketa Wastaoa and Wekap! magasin and tu website bilong iumi jw.org, olketa meeting, assembly, and convention for givim iumi “kaikai long barava taem”​—samting iumi needim, long taem iumi needim. (Matthew 24:45) Waswe, enitaem iu herem wanfala samting long wanfala Christian meeting​—insaed wanfala koment, wanfala tok, or maet wanfala prea tu—wea givim iu strong and encouragement wea iu needim? Waswe, enitaem wanfala article insaed long olketa magasin bilong iumi muvim iu long laef bilong iu? Remember, Jehovah hem provaedem evri samting hia for protectim iumi long spiritual wei.

22. Jehovah evritaem iusim paoa bilong hem long wanem wei, and why nao wei wea hem duim olsem hem for best samting for iumi?

²² Jehovah hem wanfala shield “for evriwan wea go long hem olsem sef ples.” (Psalm 18:30) Iumi luksavve hao hem no iusim paoa bilong hem for protectim iumi from evri trabol wea kamap distaem. Bat, hem evritaem iusim paoa bilong hem for protectim wei wea purpose bilong hem fulfill. Gogo, wei wea hem duim diswan bae best samting for pipol bilong hem. Sapos iumi kam klos long hem and go ahed for stap insaed love bilong hem, Jehovah bae givim iumi perfect laef for olowe. Sapos iumi tingim datwan, bae iumi ting long eni wei for safa long disfala system olsem “for lelebet taem nomoa.”​—2 Corinthians 4:17.

1, 2. Wanem nao olketa problem wea affectim olketa man distaem, and hao nao olketa samting hia affectim iumi?

DOLE bilong wanfala pikinini hem lus or brek so hem krae big. Krae hia muvim heart bilong iumi! Bat waswe, enitaem iu lukim feis bilong wanfala pikinini hem change taem dadi or mami fixim or faendem samting wea lus? For dadi or mami, maet hem isi nomoa for faendem or for fixim datfala dole. Bat datfala pikinini hem hapi fogud and sapraes. Samting wea luk olsem hem no savve gud bak moa hem kamap gud nao!

² Jehovah, wea hem best Dadi, garem paoa for mekem olketa samting wea olketa pikinini bilong hem long earth tingse hem no wei nao, for kamap gud moa. Bat iumi no story abaotem dole nomoa. Long distaem wea ‘laef hem barava difren and hard tumas,’ iumi mas deal witim olketa samting wea moa serious. (2 Timothy 3:1-5) Olketa samting wea pipol barava tinghae long hem hem isi for lus, olsem haos, samting man ownim, waka for selen, and health tu. Maet iumi feel nogud tu long wei wea pipol spoelem environment and samting wea kamaot from datwan, olsem wei wea planti animal and samting wea laef no stap nao. Bat, samting wea barava affectim iumi winim eni nara samting hem wei wea samwan wea iumi lovem hem dae. Olketa feeling for missim hem and no garem hope savve big tumas.​—2 Samuel 18:33.

3. Wanem hope wea givim comfort nao stap long Acts 3:21, and Jehovah bae fulfillim thru long wanem?

³ So, iumi kasem comfort taem iumi lane abaotem paoa bilong Jehovah for mekem samting kam bak moa! Bae iumi lukim staka samting wea God bae mekem kam bak moa for olketa pikinini bilong hem long earth. Tru nao, Bible showimaot hao purpose bilong Jehovah hem for “mekem evri samting kam bak moa.” (Acts 3:21) For duim diswan, Jehovah bae iusim Messiah Kingdom, wea Son bilong hem Jesus Christ rulim. Evri samting pruvim disfala Kingdom hem start for rul long heven long 1914.a (Matthew 24:3-14) Wanem nao bae kam bak moa? Iumi bae lukluk long samfala nambawan wei wea Jehovah mekem samting kamap gud moa. Wanfala nao iumi lukim distaem and hem affectim iumi. Olketa narawan bae happen long bigfala wei long future.

Klin Worship Kam Bak Moa

4, 5. Wanem nao happen long pipol bilong God long 607 B.C.E., and wanem hope nao Jehovah givim long olketa?

⁴ Wanfala samting wea Jehovah mekem kam bak finis hem klin worship. For savve wanem nao diswan hem minim, iumi lukluk lelebet long history bilong kingdom bilong Judah. Taem iumi duim olsem iumi bae luksavve hao Jehovah iusim paoa bilong hem for mekem samting kam bak moa.​—Romans 15:4.

⁵ Tingim feeling bilong olketa faithful Jew long 607 B.C.E. taem Jerusalem hem distroe. Taon wea olketa lovem hem distroe, olketa brekem daon evri wall. Samting wea moa worse, nambawan temple wea Solomon buildim, datfala only ples bilong klin worship bilong Jehovah long full earth, hem pisis nao. (Psalm 79:1) Olketa wea stap laef go olsem prisoner long Babylon, and hom bilong olketa kamap ples wea olketa wild animal stap. (Jeremiah 9:11) Long lukluk bilong man, hem olsem evri samting lus nao. (Psalm 137:1) Bat Jehovah, wea talem longtaem finis hao hem bae distroe, givim hope for wanfala taem long future wea evri samting bae kamap gud bak moa.

6-8. (a) Wanem theme nao kamap planti taem insaed raeting bilong olketa Hebrew profet, and hao nao olketa profesi hia fulfill firstaem? (b) Long taem bilong iumi, hao nao plande profesi abaotem wei for kam bak moa hem fulfill long pipol bilong God?

⁶ Tru nao, wei for mekem samting kam bak moa hem wanfala theme wea stap planti taem long raeting bilong olketa Hebrew profet.b Thru long olketa, Jehovah promisim wanfala land wea kamap gud moa wea pipol go stap moa insaed, wea kaikai savve grow, wild animal no stap and enemy no attak. Hem storyim datfala land wea kamap niu moa olsem wanfala really paradaes! (Isaiah 65:25; Ezekiel 34:25; 36:35) Winim evri samting, klin worship bae kamap moa, and bae olketa buildim moa datfala temple. (Micah 4:1-5) Olketa profesi hia givim olketa Jew hope, and helpem olketa for go ahed strong long 70-year wea olketa prisoner long Babylon.

⁷ Gogo, hem kasem taem for evri samting kam bak moa. Olketa Jew go free from Babylon and go bak long Jerusalem and buildim moa temple bilong Jehovah long there. (Ezra 1:1, 2) Taem olketa go ahed for followim klin worship, Jehovah blessim olketa and mekem kaikai for grow gud. Hem protectim olketa from enemy and from olketa wild animal wea stap long land hia for planti year. Olketa hapi tumas long paoa bilong Jehovah for mekem samting kam bak moa! Bat olketa samting hia piksarem firstfala and smolfala wei wea olketa profesi abaotem wei for mekem samting kam bak moa fulfill. Bigfala wei for olketa hia fulfill bae happen long “lastfala part bilong olketa day,” long taem bilong iumi, taem datfala Son bilong King David sidaon long throne.​—Isaiah 2:2-4; 9:6, 7.

⁸ No longtaem bihaen Jesus kamap king insaed Kingdom long heven long 1914, hem duim samting saed long spiritual need bilong faithful pipol bilong God long earth. Long sem wei wea Cyrus bilong Persia mekem remnant bilong olketa Jew kamap free from Babylon long 537 B.C.E., Jesus mekem wanfala remnant bilong olketa spiritual Jew—olketa follower bilong hem—kamap free from paoa bilong Babylon distaem, world rul bilong giaman religion. (Revelation 18:1-5; Romans 2:29) Start long 1919, klin worship hem kam bak moa long stretfala ples bilong hem insaed laef bilong olketa tru Christian. (Malachi 3:1-5) From datfala taem, pipol bilong Jehovah worshipim hem insaed spiritual temple bilong hem wea hem klinim—arrangement bilong God for klin worship. Why nao datwan important distaem?

Mekem Spiritual Samting Kam Bak Moa​—Why Hem Important

9. Bihaen olketa aposol dae, wanem nao olketa church bilong Christendom duim saed long worship bilong God, bat wanem nao Jehovah duim long taem bilong iumi?

⁹ Iumi lukluk firstaem long history bilong diswan. Olketa Christian long first century enjoyim planti spiritual blessing. Bat Jesus and olketa aposol sei tru worship bae kamap dirty and lus. (Matthew 13:24-30; Acts 20:29, 30) Bihaen olketa aposol dae, Christendom kamap. Olketa bigman bilong hem acceptim olketa heathen teaching and kastom. Olketa mekem hem hard tumas for pipol go long God taem olketa sei hem wanfala Trinity wea man no savve minim, and teachim pipol for konfes long olketa priest and for prea long Mary and olketa difren “saint” and no long Jehovah. So bihaen planti year wea olketa followim wei olsem wea no stret, wanem nao Jehovah duim? Distaem—insaed wanfala world wea fulap witim giaman religion and barava nogud fasin wea no followim God—hem duim samting for mekem klin worship kam bak moa! Iumi barava fit for sei disfala wei for mekem samting kam bak moa hem wanfala important samting winim olketa nara samting long distaem.

10, 11. (a) Wanem nao tufala part bilong datfala spiritual paradaes, and hao nao diswan affectim iu? (b) Jehovah hem hipimap wanem kaen pipol insaed long datfala spiritual paradaes, and olketa bae garem privilege for lukim wanem?

¹⁰ Diswan minim olketa tru Christian distaem stap insaed long spiritual paradaes wea hem gohed for impruv distaem. Wanem nao insaed disfala paradaes? Tufala main samting. First wan hem klin wei for worshipim tru God, Jehovah. Hem blessim iumi witim wanfala wei for worship wea no eni laea teaching or wei for twistim truth hem insaed. Hem blessim iumi witim spiritual kaikai. Diswan mekem iumi fit for lane abaotem Father bilong iumi long heven, mekem hem hapi, and kam klos long hem. (John 4:24) Pipol nao join witim mek-tu part bilong datfala spiritual paradaes. Olsem Isaiah talem finis, “long lastfala part bilong olketa day,” Jehovah teachim wei bilong peace long olketa wea worshipim hem. Hem aotem wei for faet midolwan long iumi. Nomata iumi no perfect, hem helpem iumi for werem “niu fasin.” Hem blessim hard waka bilong iumi long wei for givim holy spirit bilong hem, wea mekem iumi garem olketa nambawan frut bilong hem. (Ephesians 4:22-24; Galatians 5:22, 23) Taem iu letem spirit bilong God leadim iu, iu barava part long datfala spiritual paradaes.

¹¹ Jehovah hem hipimap insaed disfala spiritual paradaes pipol wea hem lovem—olketa wea lovem hem, wea lovem peace, and wea “luksavve long spiritual need bilong olketa.” (Matthew 5:3) Pipol olsem bae kasem privilege for lukim narafala wei for mekem samting kam bak moa wea bae barava spesol—taem olketa man and full earth kamap gud moa.

“Lukim! Mi Bae Mekem Evri Samting Kamap Niu”

12, 13. (a) Why nao olketa profesi saed long wei for mekem samting kam bak moa bae fulfill long nara wei? (b) Wanem nao purpose bilong Jehovah wea hem talem long Eden, and why nao diswan givim iumi hope for future?

¹² Planti profesi abaotem wei for kamap niu hem no just minim wei for kamap niu long spiritual saed nomoa. Olsem example, Isaiah raet abaotem wanfala taem wea olketa wea sik, cripple, blind, and earpas bae kasem healing and wei for dae tu bae finis for olowe. (Isaiah 25:8; 35:1-7) Olketa promis olsem no fulfill long really wei long Israel bifor. And nomata iumi lukim olketa promis hia fulfill long spiritual wei distaem, strongfala pruv showimaot olketa hia bae fulfill evribit long physical wei long future. Hao nao iumi savve long datwan?

¹³ Long Eden, Jehovah talemaot klia purpose bilong hem for earth: Wanfala hapi and healthy famili bilong olketa man wea garem wan mind nao bae stap insaed. Firstfala man and woman garem assignment for lukaftarem earth and evri animal insaed, for mekem full earth kamap wanfala paradaes. (Genesis 1:28) Datwan hem difren tumas from living distaem. Nomata olsem, iumi savve sure hao olketa purpose bilong Jehovah nating savve fail. (Isaiah 55:10, 11) From hem nao Messiah King wea Jehovah appointim, Jesus bae mekem disfala Paradaes kamap long full earth.​—Luke 23:43.

14, 15. (a) Hao nao Jehovah bae mekem “evri samting niu”? (b) Laef long Paradaes bae hao, and wanem part long datwan nao hem gud tumas long iu?

¹⁴ Tingim taem disfala full earth bae kamap wanfala Paradaes! Jehovah sei olsem abaotem datfala taem: “Mi wakem evri niu samting.” (Revelation 21:5) Tingim wanem bae kamaot from diswan. Bihaen Jehovah finis for iusim paoa bilong hem for distroem disfala wicked system, “niu heven and niu earth” bae stap. Datwan minim wanfala niu gavman bae rul from heven ovarem wanfala niu earth wea pipol wea lovem Jehovah and duim will bilong hem bae stap insaed. (2 Peter 3:13) Satan, and olketa demon bilong hem, bae no savve duim eniting. (Revelation 20:3) Bihaen planti thousand year, bae diswan firstaem for olketa man free from wei wea Satan pullim man for raverave, garem heit and nogud fasin. Diswan bae mekem iumi hapi tumas.

¹⁵ Long datfala taem nao bae iumi lukaftarem disfala earth olsem olketa man shud duim firstaem. Earth seleva garem natural paoa for mekem samting gud bak moa. Olketa lake and river wea dirty savve klinim olketa seleva sapos samting wea mekem olketa kamap dirty hem finis; land wea war spoelem savve gud bak moa sapos olketa war stop. Hem bae gud tumas for waka tugeta witim olketa natural law bilong earth, for mekem hem kamap wanfala garden, wanfala Eden evriwea long world wea garem planti difren plant and animal! Winim wei for distroem olketa animal and plant, olketa man bae stap long peace witim full creation long earth. Olketa pikinini tu bae no fraetem olketa wild animal.​—Isaiah 9:6, 7; 11:1-9.

16. Long Paradaes, each faithful man bae kasem wanem wei for kamap gud moa?

¹⁶ Iumi seleva tu bae kamap gud moa. Bihaen Armageddon, olketa wea stap laef bae lukim healing kamap evriwea long world. Olsem hem duim taem hem stap long earth, Jesus bae iusim paoa wea God givim hem for mekem olketa blind pipol lukluk, olketa wea earpas herem samting, and olketa wea cripple and wik garem gudfala health. (Matthew 15:30) Olketa olo bae hapi tumas for garem strong and kamap healthy olsem olketa young wan. (Job 33:25) Olketa wrinkle bae finis, leg wea nogud bae gud bak, and masol bae garem strong paoa moa. Evri faithful man bae feelim hao olketa samting bilong sin and wei for no perfect bae isisi finis. Iumi bae thankiu long Jehovah God for nambawan paoa bilong hem for mekem samting kamap gud moa! Distaem bae iumi storyim wanfala nambawan part bilong disfala taem for mekem samting kam bak gud moa.

Olketa wea Dae Laef Bak Moa

17, 18. (a) Why nao Jesus givim strongfala kaonsel long olketa Sadducee? (b) Wanem nao muvim Elijah for askem Jehovah for duim wanfala resurrection?

¹⁷ Long first century C.E., samfala bigman bilong religion, olketa Sadducee, no biliv long resurrection. Jesus givim disfala strongfala kaonsel long olketa: “Tingting bilong iufala hem no stret bikos iufala no savve long olketa Holy Raeting and paoa bilong God.” (Matthew 22:29) Tru nao, Bible showimaot Jehovah garem paoa for duim datwan. Hao?

¹⁸ Tingim samting wea happen long taem bilong Elijah. Wanfala widow woman holem body bilong only pikinini bilong hem. Boy hia hem dae. Profet Elijah, wea stap long haos bilong datfala widow, hem masbi seke long diswan. No longtaem bifor, hem sevem disfala pikinini from wei for dae from hangre. Luk olsem Elijah maet garem klos feeling for datfala smol boy. Mami hia hem barava sorre fogud. Disfala boy nao only wan wea mekem hem ting bak long hasband bilong hem wea dae finis. Hem hope disfala son bae keepim hem taem hem olo. Datfala widow woman feel nogud tumas from hem tingse maet hem kasem panis for wanfala rong samting wea hem duim bifor. Elijah hem no laek for lukim woman hia go ahed for safa. Hem tekem datfala dead body from datfala mami, karem go ap long rum bilong hem, and askem Jehovah God for mekem soul, wea hem nao laef bilong datfala pikinini for kam bak.​—1 Kings 17:8-21.

19, 20. (a) Hao nao Abraham showimaot hem garem faith long paoa bilong Jehovah for mekem man laef bak moa, and wanem nao faondeson for faith hia? (b) Hao nao Jehovah givim reward long Elijah for faith bilong hem?

¹⁹ Elijah hem no first man for biliv long resurrection. Planti handred year bifor taem bilong hem, Abraham bilivim hao Jehovah garem paoa for mekem man laef bak moa—and hem garem gudfala reason for biliv olsem. Taem Abraham hem 100 year and Sarah hem 90 year, Jehovah mekem tufala fit for garem pikinini, and long mirakol wei Sarah bornem wanfala son. (Genesis 17:17; 21:2, 3) Bihaen, taem datfala boy growap big, Jehovah askem Abraham for sakrifaesim son bilong hem. Abraham showimaot faith, hem luksavve Jehovah savve mekem Isaac laef bak moa. (Hebrews 11:17-19) From Abraham garem strongfala faith olsem, bifor hem go ap long datfala maunten for offerim son, hem talem olketa servant bilong hem dat hem and Isaac bae kam bak tugeta.​—Genesis 22:5.

²⁰ Jehovah sevem Isaac, so hem no need for resurrectim hem long datfala taem. Bat long taem bilong Elijah, son bilong widow woman hia hem dae finis—bat for lelebet taem nomoa. Jehovah rewardim faith bilong datfala profet taem hem resurrectim datfala pikinini! Then Elijah givim go boy hia long mami bilong hem and talem disfala toktok wea hard for mami hia forgetim: “Lukim, son bilong iu hem laef nao”!​—1 Kings 17:22-24.

21, 22. (a) Wanem nao purpose bilong olketa resurrection wea Bible storyim? (b) Long Paradaes, hu nao bae kasem resurrection, and hu nao bae duim?

²¹ So diswan hem firstaem insaed record bilong Bible wea iumi lukim Jehovah iusim paoa bilong hem for mekem samwan laef bak moa. Bihaen, Jehovah givim paoa long Elisha, Jesus, Paul, and Peter for resurrectim samfala wea dae finis. Bat gogo, olketa hia wea resurrect olketa dae moa. Nomata olsem, olketa story olsem insaed long Bible showim long nambawan wei wanem bae happen long future.

²² Long Paradaes, Jesus bae fulfillim waka bilong hem olsem datfala “resurrection and laef.” (John 11:25) Hem bae resurrectim planti million pipol, and givim olketa chance for laef olowe insaed Paradaes long earth. (John 5:28, 29) Tingim wei for meetim moa olketa fren and relative wea dae for longtaem finis, taem evriwan hapi and holem each other! Evriwan bae praisem Jehovah from paoa bilong hem for mekem samting kam bak moa.

23. Wanem nao barava bigfala wei wea Jehovah showimaot paoa wea winim eni narataem, and hao nao diswan mekem iumi sure long hope bilong iumi for future?

²³ Jehovah hem givim barava strongfala promis hao kaen hope olsem bae kamap tru. Long taem hem resurrectim Son bilong hem olsem wanfala maeti spirit wea mek-tu long hemseleva, paoa bilong Jehovah showaot long wei wea winim eni narataem. Bihaen Jesus resurrect finis hem showim hemseleva long planti handred pipol. (1 Corinthians 15:5, 6) Nomata for pipol wea garem fasin for daot, diswan hem shud inaf pruv. Jehovah hem garem paoa for mekem man laef bak moa.

24. Why nao iumi savve sure Jehovah bae resurrectim olketa wea dae finis, and wanem hope nao each wan long iumi savve garem?

²⁴ Jehovah hem no just garem paoa for mekem olketa wea dae finis for laef bak bat hem want for duim datwan. Holy spirit muvim faithful man Job for sei Jehovah wantem tumas for mekem olketa wea dae for laef bak moa. (Job 14:15) Waswe, diswan no muvim iumi for want for kam klos long God bilong iumi wea laek tumas for iusim paoa bilong hem long loving wei olsem? Remember tu, hao resurrection hem wanfala part nomoa long bigfala waka wea Jehovah bae duim for mekem olketa samting kam bak moa. Taem iu go ahed for kakam moa klos long hem, no lusim datfala spesol hope for stap laef taem Jehovah “mekem evri samting kamap niu.”​—Revelation 21:5.

1-3. (a) Wanem samting wea mekem olketa disaepol fraet fogud nao happen long Sea Bilong Galilee, and wanem nao Jesus duim? (b) Why nao aposol Paul fit for sei ‘Christ hem paoa bilong God’?

OLKETA disaepol fraet fogud. Olketa go ahed sail akrosim Sea Bilong Galilee taem wanfala big wind kasem olketa. Olketa lukim kaen big wind olsem bifor long disfala lake—bikos samfala long olketa fisherman.a (Matthew 4:18, 19) Bat diswan hem “wanfala barava bigfala wind,” and kwiktaem nomoa hem mekem sea kamap raf fogud. Olketa man hia stragol for steerim datfala boat, bat wind hem big tumas. Olketa maeti wave “kam insaed long boat,” and boat start for fulap witim wata. Nomata evriting hia go ahed for happen, Jesus hem deepim sleep bihaen long boat, hem taed fogud from hem teachim pipol full day. From olketa fraet nogud olketa dae, olketa disaepol wekapem hem, and sei: “Lord, sevem iumi, iumi klosap dae nao ia!”​—Mark 4:35-38; Matthew 8:23-25.

² Jesus hem no fraet. Hem tok strong olsem long wind and sea: “Inaf nao! Stap kwaet!” Stretawe, wind and sea obeyim hem—big wind hia hem finis, and olketa wave no mumuv nao, and “sea hem barava stap kwaet.” Olketa disaepol barava fraet. Olketa askem each other: “Wanem kaen man nao diswan?” Tru tumas, wanem kaen man nao savve tok strong long wind and sea olsem hem disciplinem pikinini wea noti?​—Mark 4:39-41; Matthew 8:26, 27.

³ Bat Jesus hem no man nating. Jehovah showim paoa bilong hem thru long Jesus long olketa spesol wei. Dastawe aposol Paul talem tru samting abaotem hem taem hem sei ‘Christ hem paoa bilong God.’ (1 Corinthians 1:24) Wanem nao olketa wei wea paoa bilong God hem showaot thru long Jesus? And wei wea Jesus iusim paoa savve garem wanem mining long laef bilong iumi?

Paoa Bilong Only-Born Son Bilong God

4, 5. (a) Jehovah givim wanem paoa long only-born Son bilong hem? (b) Wanem nao helpem datfala son for fulfillim olketa purpose bilong Dadi bilong hem saed long creation?

⁴ Tingim paoa wea Jesus garem bifor hem kam long earth olsem man. Jehovah showimaot “paoa bilong hem wea stap for olowe” taem hem creatim only-born Son bilong hem, wea kamap Jesus Christ bihaen. (Romans 1:20; Colossians 1:15) Bihaen datwan, Jehovah givim bigfala paoa long Son bilong hem, and givim assignment long hem for duim purpose bilong Hem saed long creation. Bible sei olsem abaotem Son bilong hem: “God iusim hem for wakem evri samting, and no eni samting hem stap wea hem no helpem God for wakem.”—John 1:3.

⁵ Hem lelebet hard for tingim hao big nao datfala assignment. Trae tingim paoa wea hem needim for wakem planti million maeti angel, and universe wea iumi savve lukim and planti billion galaxy wea insaed, and earth wea garem staka difren kaen samting wea laef. For duim evri samting hia, datfala only-born Son free for iusim paoa wea strong winim eni narawan long universe—holy spirit bilong God. Disfala Son hem kasem bigfala hapi for olsem Nambawan Wakman, wea Jehovah iusim for creatim evri nara samting.—Proverbs 8:22-31.

6. Bihaen hem dae long earth and hem resurrect, Jesus kasem wanem paoa and position?

⁶ Waswe, datfala only-born Son savve kasem moa paoa and position? Bihaen Jesus dae long earth and resurrect, hem sei: “God givim paoa long mi ovarem evri samting long heven and earth.” (Matthew 28:18) Tru nao, Jesus hem kasem savve and right for iusim paoa evriwea long universe. From hem “King bilong olketa king and Lord bilong olketa lord,” hem garem paoa for “finisim evri gavman and evri rul and paoa”—wea iumi savve lukim and no lukim—wea againstim Dadi bilong hem. (Revelation 19:16; 1 Corinthians 15:24-26) God “putim evri samting anda long” Jesus—bat Jehovah nomoa no stap anda long hem.​—Hebrews 2:8; 1 Corinthians 15:27.

7. Why nao iumi sure Jesus bae nating iusim long rong wei paoa wea Jehovah givim long hem?

⁷ Waswe, iumi need for wari nogud Jesus iusim paoa wea hem kasem long rong wei? Barava nomoa nao! Jesus really lovem Dadi bilong hem and bae hem no duim eniting for mekem hem feel nogud. (John 8:29; 14:31) Jesus savve dat no enitaem Jehovah iusim olmaeti paoa bilong hem long rong wei. Jesus seleva lukim hao Jehovah luk aotem olketa chance “for showimaot paoa bilong hem for helpem olketa wea faithful long hem long full heart.” (2 Chronicles 16:9) Tru nao, Jesus garem sem love wea Dadi bilong hem garem for olketa man, so iumi savve trustim wei wea Jesus bae evritaem iusim paoa wea hem garem for helpem iumi. (John 13:1) No enitaem Jesus hem fail long diswan. Iumi bae storyim paoa wea hem garem taem hem long earth and wanem muvim hem for iusim datwan.

“Garem Bigfala Paoa Long . . . Toktok”

8. Bihaen hem kasem anointing, wanem nao Jesus kasem paoa for duim, and hao nao hem iusim paoa wea hem garem?

⁸ Jesus hem no duim eni mirakol taem hem wanfala boy wea growap long Nazareth. Bat bihaen hem baptaes long 29 C.E., taem hem 30 year, datwan hem change. (Luke 3:21-23) Bible sei: “God anointim hem witim holy spirit and paoa, and hem go insaed long land and duim olketa gudfala samting and healim olketa wea Devil hem spoelem.” (Acts 10:38) Waswe, wei for “duim olketa gudfala samting”—showimaot Jesus iusim paoa wea hem garem long stretfala wei? Bihaen anointing bilong hem, “hem wanfala profet wea God and olketa man tinghae long nambawan toktok bilong hem and olketa mirakol bilong hem.”​—Luke 24:19.

9-11. (a) Jesus hem teach planti taem long wea, and wanem challenge nao hem feisim? (b) Why nao olketa pipol sapraes tumas long wei bilong Jesus for teach?

⁹ Hao nao Jesus garem paoa saed long toktok? Planti taem hem story saed long lake and olketa hill and tu long road and marketples. (Mark 6:53-56; Luke 5:1-3; 13:26) Pipol wea lisin long hem free for go enitaem sapos toktok bilong hem no kasem interest bilong olketa. Long datfala taem olketa no wakem buk, so pipol wea tinghae long toktok bilong hem mas keepim long mind and heart bilong olketa. So teaching bilong Jesus mas kasholem mind, olketa mas minim, and isi for rememberim. Bat disfala challenge hem no hard long Jesus. Olsem example, tingim Sermon bilong hem long Maunten.

¹⁰ Early long wanfala morning long 31 C.E., wanfala big sekson hipap long saed hill klosap long Sea Bilong Galilee. Samfala kam from Judea and Jerusalem, wea hem 100 go kasem 110 kilometer from there. Olketa narawan kam from saedsea long Tyre and Sidon, long north saed. Planti sik pipol kam klosap long Jesus for tasim hem, and hem healim evriwan. Taem hem healim evriwan finis, hem start for teach. (Luke 6:17-19) Taem hem finis story, olketa sapraes fogud long samting wea olketa herem. Why?

¹¹ Samfala year bihaen, wanfala wea herem datfala sermon hem raet olsem: “Olketa pipol sapraes fogud long wei bilong hem for teach, from hem teachim olketa olsem man wea garem paoa.” (Matthew 7:28, 29) Olketa feelim paoa bilong toktok bilong Jesus. Hem story for God and saportim teaching bilong hem witim paoa bilong Word bilong God. (John 7:16) Toktok bilong Jesus hem klia, encouragement bilong hem barava muvim man, and olketa pruv wea hem givim hem tru evribit. Toktok bilong hem kasem main point bilong olketa important kwestin and tu heart bilong olketa wea lisin long hem. Hem teachim olketa hao for faendem hapi, hao for prea, hao for luk aotem Kingdom bilong God, and hao for duim samting for garem sef future. (Matthew 5:3–7:27) Toktok bilong hem muvim heart bilong olketa wea hangre for truth and raeteous fasin. Olketa hia willing for “lusim will” bilong olketa seleva and leavim evri samting for followim hem. (Matthew 16:24; Luke 5:10, 11) Datwan hem pruvim wei wea toktok bilong Jesus hem garem paoa!

“Garem Bigfala Paoa Long Waka”

12, 13. Long wanem wei nao Jesus “garem bigfala paoa long waka,” and wanem difren kaen mirakol nao hem duim?

¹² Jesus hem “garem bigfala paoa long waka” tu. (Luke 24:19) Olketa Gospel reportim winim 30 mirakol wea hem duim—witim “paoa bilong Jehovah.”b (Luke 5:17) Olketa mirakol bilong Jesus affectim laef bilong planti thousand pipol. Tingim tufala mirakol hia—taem hem feedim 5,000 man and bihaen 4,000 man. Witim “olketa woman and smol pikinini, luk olsem maet staka thousand moa lo there!​—Matthew 14:13-21; 15:32-38.

¹³ Jesus duim planti difren kaen mirakol. Hem garem paoa ovarem olketa demon, hem no hard for hem raosem olketa. (Luke 9:37-43) Hem garem paoa ovarem olketa physical samting, olsem taem hem changem wata for kamap wine. (John 2:1-11) Olketa disaepol bilong hem sapraes fogud taem hem wakabaot antap long Sea Bilong Galilee wea raf. (John 6:18, 19) Hem savve healim olketa sik wea man born witim, sik wea no savve finis, and sik wea savve killim man dae. (Mark 3:1-5; John 4:46-54) Hem duim kaen healing olsem long olketa difren wei. Samfala hem healim nomata hem no stap witim olketa, bat samfala narawan feelim hand bilong hem taem hem healim olketa. (Matthew 8:2, 3, 5-13) Samfala heal stretawe, olketa narawan isisi.​—Mark 8:22-25; Luke 8:43, 44.

14. Hao nao Jesus showimaot hem garem paoa for finisim dae?

¹⁴ Samting wea barava spesol hem wei wea Jesus garem paoa for mekem man laef moa. Record talem hao thrifala taem hem mekem samwan wea dae for laef bak, hem givim bak wanfala dota wea 12 year long parents bilong hem, wanfala only son long mami bilong hem, and wanfala brata long tufala sista bilong hem. (Luke 7:11-15; 8:49-56; John 11:38-44) No eniting hem hard tumas for hem. Hem mekem datfala girl wea 12 year laef moa no longtaem bihaen hem dae. Hem resurrectim son bilong datfala widow taem olketa gogo for berem hem, maet long sem day wea hem dae. And hem raisimap Lazarus from grev bihaen hem dae for fofala day finis.

Iusim Paoa Long Wei wea No Selfish, Wise and Tingim Pipol

15, 16. Wanem samting nao pruvim Jesus hem no selfish taem hem iusim paoa wea hem garem?

¹⁵ Tingim nogud samting wea savve happen sapos ruler wea no perfect kasem paoa olsem Jesus garem. Bat Jesus no garem eni sin. (1 Peter 2:22) Hem stap klia from selfish fasin, hae position, and greedy fasin wea muvim olketa man wea no perfect for iusim paoa for spoelem nara pipol.

¹⁶ Jesus hem nating selfish long wei wea hem iusim paoa, hem nating iusim for kasem samting for hemseleva. Taem hem hangre, hem no agree for changem olketa ston for kamap bred for hemseleva. (Matthew 4:1-4) Lelebet material samting wea hem garem showimaot hem no aftarem profit taem hem iusim paoa bilong hem. (Matthew 8:20) Moa pruv stap wea showimaot olketa reason wea no selfish nao muvim hem for duim olketa mirakol. Taem hem duim mirakol, hemseleva mas givim go samting. Taem hem healim olketa wea sik, paoa go aot from hem. Hem feelim paoa go aot from hem, nomata hem healim wanfala person nomoa. (Mark 5:25-34) Nomata olsem, hem letem staka pipol tasim hem, and olketa kasem healing. (Luke 6:19) Hem barava no tingim hemseleva!

17. Hao nao Jesus showimaot hem iusim paoa wea hem garem long wisefala wei?

¹⁷ Jesus hem iusim paoa wea hem garem long wisefala wei. No enitaem hem duim olketa mirakol for show-off or for mekem pipol lukluk long hem. (Matthew 4:5-7) Taem Herod askem hem for showim hem olketa saen, hem no willing for duim datwan. (Luke 23:8, 9) Hem no go announcem olabaot disfala paoa, bat planti taem Jesus givim instruction long olketa wea hem healim for no talem eniwan. (Mark 5:43; 7:36) Hem no laekem olketa report wea ova tumas for affectim wei wea pipol ting long hem.​—Matthew 12:15-19

18-20. (a) Wanem nao affectim wei wea Jesus iusim paoa wea hem garem? (b) Hao nao iu ting long wei wea Jesus healim wanfala man wea earpas?

¹⁸ Jesus, man wea fulap witim paoa, barava difren from olketa wea iusim paoa long wei wea nating tingim need and hao nara pipol safa. Jesus kea for pipol. Taem hem lukim pipol safa, diswan barava muvim hem so hem helpem olketa. (Matthew 14:14) Hem tingim feeling and need bilong olketa, and loving kea bilong hem affectim wei wea hem iusim paoa wea hem garem. Wanfala example wea fit for muvim iumi stap long Mark 7:31-37.

¹⁹ Long datfala taem, planti pipol faendem wea nao Jesus and tekem kam planti wea sik, and hem healim evriwan. (Matthew 15:29, 30) Bat Jesus chusim wanfala man wea hem helpem long spesol wei. Datfala man hem earpas and hem no savve toktok gud. Maet Jesus luksavve wei wea disfala man hem fraet and feel shame. From hem tingim hem, Jesus tekem datfala man awe from datfala crowd and tufala go long wanfala kwaet ples. Then Jesus iusim samfala saen for talem long hem wanem hem bae duim. Hem “putim finger bilong hem insaed tufala ear bilong hem. Hem spit, and then tasim tongue bilong hem.”c (Mark 7:33) Then, Jesus luk go ap long heven and talem wanfala prea. Olketa akson hia mekem klia long datfala man hao samting wea hem redy for duim hem from paoa bilong God. Gogo, Jesus sei: “Iu open nao.” (Mark 7:34) Long datfala taem, man hia savve herehere and hem savve toktok gud.

²⁰ Hem muvim feeling bilong iumi for tingim hao taem hem iusim paoa from God for healim olketa wea sik, Jesus tingim feeling bilong olketa! Iumi barava kasem comfort for savve Jehovah hem givim Messiah Kingdom long wanfala Ruler wea kea and tingim feeling bilong pipol.

Tokpiksa wea Point Go Long Future

21, 22. (a) Olketa mirakol bilong Jesus point go long wanem? (b) Bikos Jesus savve kontrolem olketa natural paoa, wanem nao iumi savve bae kamap anda long Kingdom rul bilong hem?

²¹ Olketa mirakol wea Jesus duim long earth hem point go long olketa blessing wea moabeta wea bae happen anda long rul bilong hem olsem king. Insaed niu world bilong God, Jesus bae duim moa olketa mirakol​—bat bae hem duim evriwea long world! Tingim samfala nambawan hope wea stap front long iumi.

²² Jesus bae mekem environment bilong earth for kamap perfect moa. Tingim hao hem kontrolem wanfala big wind. So, anda long Kingdom rul bilong Christ, olketa man bae no need for fraetem cyclone, earthquake, volcano, or olketa nara natural disaster. Bikos Jesus nao hem datfala Nambawan Wakman wea Jehovah iusim for creatim earth and evri samting wea laef insaed, hem minim evribit olketa samting long earth. Hem savve hao for iusim evriting long earth long stretfala wei. Anda long rul bilong hem, disfala full earth bae kamap wanfala Paradaes.​—Luke 23:43.

23. Taem hem King, hao nao Jesus bae givim olketa samting wea olketa man needim?

²³ Waswe long olketa samting wea olketa man needim? Wei wea Jesus fit for feedim planti thousand pipol witim lelebet kaikai nomoa hem mekem iumi sure rul bilong hem bae finisim wei for hangre. Tru nao, staka kaikai, wea olketa sharem aot long evriwan, bae mekem hangre finis for olowe. (Psalm 72:16) Wei wea hem healim sik showim long iumi hao olketa wea sik, blind, earpas, garekil, and cripple bae kasem healing​—evribit and for olowe. (Isaiah 33:24; 35:5, 6) From hem resurrectim finis samfala wea dae, iumi sure hao paoa bilong hem olsem King long heven bae showaot long wei for resurrectim planti million pipol wea Dadi bilong hem laek for rememberim.​—John 5:28, 29.

24. Taem iumi ting raonem paoa wea Jesus garem, wanem nao iumi shud rememberim, and why nao olsem?

²⁴ Taem iumi ting raonem paoa wea Jesus garem, iumi mas remember hao disfala Son hem followim Dadi bilong hem long perfect wei. (John 14:9) Wei wea Jesus iusim paoa hem showim long iumi hao Jehovah iusim paoa. Olsem example, tingim kaenfala wei wea Jesus healim wanfala man wea garem sik leprosy. From hem barava feel sorre, Jesus tasim datfala man and sei: “Mi barava laek for duim datwan.” (Mark 1:40-42) Thru long olketa story olsem diswan, hem olsem Jehovah sei, ‘Hem nao hao mi iusim paoa bilong mi!’ Waswe, diswan no muvim iu for praisem olmaeti God bilong iumi and sei thankiu bikos hem iusim paoa bilong hem long loving wei olsem?

1. Wanem trap wea haed nao olketa man wea no perfect isi tumas for foldaon insaed?

“TRAP wea haed hem stap for eniwan wea garem paoa.” Toktok hia hem bilong wanfala woman for raetem poetry long mek-19 century abaotem wanfala danger wea haed: wei for iusim paoa long rong wei. Sorre tumas, olketa man wea no perfect isi tumas for foldaon long disfala trap. Tru nao, long full history “man hem bossim man and spoelem hem.” (Ecclesiastes 8:9) Wei for iusim paoa long wei wea no showimaot love hem mekem olketa man safa long barava bigfala wei.

2, 3. (a) Wanem nao hem gud for luksavve long hem saed long wei wea Jehovah iusim paoa? (b) Wanem kaen paoa maet iumi garem, and hao nao iumi shud iusim paoa olsem?

² Bat, hem gud for luksavve hao Jehovah God, wea paoa bilong hem strong winim eniwan, hem nating iusim datfala paoa long rong wei. Olsem iumi lukim long olketa chapter bifor, hem evritaem iusim paoa bilong hem—nomata for creatim, distroem, protectim, or mekem samting kam bak moa—for fitim olketa loving purpose bilong hem. Taem iumi lukluk long wei wea hem iusim paoa bilong hem, diswan muvim iumi for kam klos long hem. Then, datwan hem muvim iumi for ‘followim wei bilong God’ taem iumi iusim paoa. (Ephesians 5:1) Bat wanem paoa nao iumi olketa man garem?

³ God creatim man long ‘image’ and wei olsem hem. (Genesis 1:26, 27) So, iumi tu garem paoa​—lelebet paoa. Part long paoa hia hem wei for garem savve for duim samting, for waka; wei for garem kontrol or paoa ovarem nara pipol; wei wea iumi savve muvim nara pipol, especially olketa wea lovem iumi; physical strong; or olketa material samting. Man wea raetem psalm sei olsem abaotem Jehovah: “Iu nao man wea givim laef.” (Psalm 36:9) So, eni paoa wea iumi fit for garem hem kam from God. Dastawe iumi want for iusim long olketa wei wea mekem hem hapi. Hao nao iumi savve duim olsem?

Love Hem Key

4, 5. (a) Wanem nao key for iusim paoa long stretfala wei, and hao nao example bilong God seleva showimaot diswan? (b) Hao nao love bae helpem iumi for iusim paoa wea iumi garem long stretfala wei?

⁴ Key for iusim paoa long stretfala wei hem love. Example bilong God seleva hem showimaot diswan. Tingim moa datfala information abaotem fofala main fasin bilong God—paoa, justice, wisdom, and love—​long Chapter 1. Long fofala fasin hia, which wan nao hem main wan? Love. Wan John 4:8 hem sei: “God hem love.” Tru nao, Jehovah seleva hem love; diswan affectim evri samting wea hem duim. So love nao muvim evri wei wea hem iusim paoa wea hem garem and gogo diswan helpem olketa wea lovem hem.

⁵ Love bae helpem iumi tu for iusim paoa wea iumi garem long stretfala wei. Tru nao, Bible sei love hem “kaen” and “no tingim hemseleva nomoa.” (1 Corinthians 13:4, 5) So, love bae no letem iumi for duim samting long nogud or raf wei long olketa wea iumi garem samfala paoa ovarem olketa. Long wei wea difren, iumi bae showim respect long nara pipol and tingim olketa need and feeling bilong olketa firstaem long iumiseleva.​—Philippians 2:3, 4.

6, 7. (a) Wanem nao wei for fraet long God, and why nao disfala fasin bae helpem iumi for no iusim paoa long rong wei? (b) Wanem tokpiksa nao showim iumi hao wei for fraet for mekem God no hapi hem join witim wei for lovem God?

⁶ Love hem join witim nara fasin wea savve helpem iumi for stap klia long wei for iusim paoa long rong wei: wei for fraet long God. Why nao disfala fasin hem gud? Proverbs 16:6 hem sei: “Man wea fraet long Jehovah hem tanawe from nogud samting.” Wei for iusim paoa long rong wei hem wanfala nogud samting wea iumi shud tanawe from hem. Wei for fraet long God bae mekem iumi hol bak from wei for spoelem olketa wea iumi garem paoa ovarem olketa. Why nao olsem? Wanfala samting nao, iumi mas givim ansa long God for wei wea iumi deal witim olketa hia. (Nehemiah 5:1-7, 15) Bat wei for fraet long God hem minim moa samting winim datwan. Long languis wea olketa raetem Bible long hem, datfala word wea iumi transleitim olsem “fraet” hem planti taem minim bigfala honor and respect for God. Dastawe Bible joinim wei for fraet long God witim love for God. (Deuteronomy 10:12, 13) Insaed long disfala honor and respect hem gudfala wei for fraet for mekem God no hapi​—no just bikos iumi fraetem samting wea bae happen bat bikos iumi really lovem hem.

⁷ Tingim tokpiksa hia: Gudfala wei for fren stap midolwan long wanfala smol boy and dadi bilong hem. Datfala boy hem feelim wei wea dadi interest long hem long loving wei. Bat boy hia savve tu long samting wea dadi expectim hem for duim, and hem savve dadi bilong hem bae disciplinem hem sapos hem noti. Boy hia no fraetem dadi bilong hem long nogud wei. Nomoa, hem lovem tumas dadi bilong hem. Datfala boy hem hapi for duim samting wea bae mekem dadi bilong hem hapi. Hem semsem tu witim wei for fraet long God. From iumi lovem Jehovah, Dadi bilong iumi long heven, iumi no want for duim eni samting wea bae mekem “heart bilong hem feel sorre.” (Genesis 6:6) Bat, iumi laekem tumas for mekem heart bilong hem hapi. (Proverbs 27:11) Dastawe iumi want for iusim paoa wea iumi garem long stretfala wei. Bae iumi lukluk gud long hao iumi savve duim olsem.

Insaed Long Famili

8. (a) Wanem paoa nao hasband garem insaed long famili, and hao nao hem shud iusim diswan? (b) Hao nao hasband savve showimaot hem honorim waef bilong hem?

⁸ Tingim firstaem long famili. Ephesians 5:23 hem sei: “Hasband hem hed bilong waef.” Hao nao hasband mas iusim paoa wea hem kasem from God? Bible talem olketa hasband for ‘mas gohed minim gud waef bilong olketa and mas respectim or honorim olketa bikos olketa olsem samting wea no strong.’ (1 Peter 3:7) Greek word wea olketa transleitim olsem “honor” hem minim “price, kost, . . . respect.” Olketa savve transleitim disfala word tu olsem “present” and “samting wea spesol.” (Acts 28:10; 1 Peter 2:7) Hasband wea honorim waef bilong hem bae nating attakim hem long physical wei; and bae hem nating mekem hem feel shame or tok spoelem hem, for mekem hem feel olsem hem iusles. Bat, hem luksavve long wei wea waef hem spesol and showimaot respect long hem. Hem showimaot thru long toktok and akson—taem tufala nomoa stap and long pablik​—hao hem ting long hem olsem hem spesol. (Proverbs 31:28) Hasband olsem bae kasem love and respect bilong waef, and moa important, God bae hapi long hem.

9. (a) Olketa waef garem wanem paoa insaed long famili? (b) Wanem nao helpem waef for iusim savve bilong hem for saportim hasband bilong hem, and wanem nao kamap from diswan?

⁹ Olketa waef tu garem samfala paoa insaed long famili. Bible story abaotem samfala woman wea lovem God, wea stap anda long hedship arrangement, bat duim samting firstaem for helpem hasband for no duim mistek. (Genesis 21:9-12; 27:46–28:2) Wanfala waef maet kwiktaem for minim samting winim hasband bilong hem, or maet hem garem savve wea hasband no garem. Nomata olsem, hem mas “barava respectim” hasband bilong hem and “stap anda” long hem “olsem olketa stap anda long Lord.” (Ephesians 5:22, 33) Wei for garem goal for mekem God hapi savve helpem waef for iusim savve bilong hem for saportim hasband and no tok daonem or bossim hem. “Wisefala woman” hem wan mind witim hasband bilong hem for buildimap famili. Long wei olsem hem keepim peace witim God.​—Proverbs 14:1.

10. (a) God hem givim wanem paoa long parents? (b) Wanem nao mining bilong word “discipline,” and hao nao for givim diswan? (Lukim tu footnote.)

¹⁰ Parents kasem paoa from God tu. Bible givim disfala kaonsel: “Olketa dadi mas no mekem olketa pikinini bilong iufala for kros, bat lukaftarem olketa gud long wei for [disciplinem] and trainim olketa followim samting wea Jehovah talem.” (Ephesians 6:4) Long Bible, datfala word “discipline” savve minim “lukaftarem, training, instruction.” Olketa pikinini needim discipline; olketa hapi and win taem olketa garem kliafala instruction and olketa spialaen for leadim olketa. Bible joinim discipline or instruction olsem witim love. (Proverbs 13:24) So, “stik bilong discipline” hem shud no spoelem pikinini—saed long feeling or long body bilong hem.a (Proverbs 22:15; 29:15) Dadi or mami wea givim discipline wea strong tumas or raf and no showimaot eni love, iusim paoa long rong wei and diswan savve mekem pikinini garem bigfala hevi. (Colossians 3:21) Long narasaed, discipline wea balance wea dadi or mami givim long stretfala wei helpem pikinini luksavve long love bilong tufala and wei wea tufala interest long hao datfala pikinini grow olsem wanfala person.

11. Hao nao olketa pikinini savve iusim paoa wea olketa garem long stretfala wei?

¹¹ Waswe long olketa pikinini? Hao nao olketa savve iusim paoa wea olketa garem long stretfala wei? Proverbs 20:29 hem sei: “Strong bilong olketa young man hem luk naes tumas.” No eni wei hem moabeta winim wei for young pipol iusim strong bilong olketa for servem “Nambawan Creator” bilong iumi. (Ecclesiastes 12:1) Olketa young wan shud remember hao akson bilong olketa savve affectim olketa feeling bilong dadi and mami. (Proverbs 23:24, 25) Taem olketa pikinini obeyim parents wea fraet long God and go ahed for followim stretfala wei, olketa savve mekem heart bilong dadi and mami feel hapi. (Ephesians 6:1) Kaen fasin olsem “hem mekem Lord for barava hapi.”​—Colossians 3:20.

Insaed Long Kongregeson

12, 13. (a) Wanem tingting nao olketa elder shud garem long paoa wea olketa garem insaed long kongregeson? (b) Minim why nao olketa elder shud deal long kaenfala wei witim sheep.

¹² Jehovah provaedem olketa overseer for lead insaed Christian kongregeson. (Hebrews 13:17) Olketa man hia shud iusim paoa wea God givim for helpem and mekem spiritual living bilong flock kamap moabeta. Waswe, position bilong olketa elder minim olketa savve olsem boss ovarem olketa nara brata and sista? Nomoa nao! Olketa elder need for garem balance tingting and hambol abaotem waka bilong olketa insaed long kongregeson. (1 Peter 5:2, 3) Bible sei olketa overseer mas shepherdim kongregeson bilong God, wea hem baem finis witim blood bilong Son bilong hem. (Acts 20:28) Diswan nao barava strongfala reason for deal witim each member bilong flock long wei bilong love.

¹³ Maet iumi minim diswan long wei olsem. Wanfala klos fren hem askem iu for lukaftarem wanfala spesol samting bilong hem. Iu savve fren bilong iu spendem staka selen for baem datwan. Waswe, bae iu barava keepim gud? Olsem tu, God hem givim olketa elder responsibility for lukaftarem wanfala spesol samting: kongregeson, wea olketa member insaed olsem olketa sheep. (John 21:16, 17) Jehovah lovem sheep bilong hem—hem barava lovem tumas dastawe hem baem olketa witim blood bilong only-born Son bilong hem, Jesus Christ. Price wea Jehovah peim for sheep bilong hem hae winim eni nara price. Olketa elder wea hambol tingim datwan evritaem and deal long gudfala wei witim sheep bilong Jehovah.

“Tongue Garem Paoa”

14. Tongue hem garem wanem paoa?

¹⁴ Bible hem sei: “Tongue garem paoa ovarem laef and dae.” (Proverbs 18:21) Tru nao, tongue savve barava spoelem man. Hu long iumi nao no feel pain taem samwan talem toktok bat no tingting firstaem or min for talem toktok wea daonem iumi? Bat tongue hem garem paoa for givim healing tu. Proverbs 12:18 sei: “Tongue bilong wisefala man savve healim man.” Tru nao, gudfala toktok wea encouragem man hem givim comfort and healim heart. Lukim samfala example.

15, 16. Olketa wanem wei nao iumi savve iusim tongue for encouragem narafala pipol?

¹⁵ Wan Thessalonians 5:14 hem sei: “Comfortim olketa wea sorre.” Tru nao, olketa faithful servant bilong Jehovah tu maet stragol samfala taem saed long wei for feel iusles. Hao nao iumi savve helpem olketa olsem? Talem hem olketa gudfala point bilong hem long honest wei wea bae helpem hem luksavve hao Jehovah tinghae long hem. Sharem toktok wea garem paoa from Bible wea showimaot hao Jehovah really kea and lovem olketa wea “heart bilong olketa brek” and “spirit bilong olketa pisis.” (Psalm 34:18) Taem iumi iusim paoa bilong tongue for comfortim nara pipol, iumi showimaot iumi willing for followim God wea garem mercy, “wea comfortim olketa wea feel sorre.”​—2 Corinthians 7:6, New American Standard Bible.

¹⁶ Iumi savve iusim tu paoa bilong tongue bilong iumi for givim encouragement wea olketa narawan barava needim. Waswe, wanfala brata or sista lusim samwan wea hem lovem long dae? Olketa toktok bilong sorre wea showimaot iumi kea and interest savve givim comfort long heart wea sorre. Waswe, wanfala olo brata or sista hem feel olsem no eniwan needim hem? Wei for talem olketa olo dat iumi tinghae tumas long olketa savve comfortim and encouragem olketa. Waswe, samwan hem stragol witim sik wea no savve finis? For ringim hem long telephone or go lukim hem for talem kaenfala toktok savve givim hapi long wanfala wea sik. Creator bilong iumi hem hapi tumas taem iumi iusim paoa for toktok for talem samting wea “strongim and helpem” man!​—Ephesians 4:29.

17. Long wanem important wei nao iumi savve iusim tongue bilong iumi for helpem nara pipol, and why nao iumi shud duim olsem?

¹⁷ No eni wei hem moa important for iusim paoa bilong tongue winim wei for sharem gud nius bilong Kingdom bilong God witim nara pipol. Proverbs 3:27 hem sei: “No holem bak gudfala samting from olketa wea fit for kasem, sapos iu fit for duim diswan.” Hem olsem iumi garem kaon witim pipol for talemaot gud nius wea savve sevem laef bilong olketa. Hem no stret for keepim long iumiseleva datfala important message wea Jehovah hem kaen tumas for givim. (1 Corinthians 9:16, 22) Bat haomas taem nao Jehovah expectim iumi for iusim insaed long disfala waka?

Servem Jehovah Witim “Full Strong” Bilong Iumi

18. Wanem nao Jehovah expectim from iumi?

¹⁸ Love bilong iumi for Jehovah muvim iumi for garem full share insaed long Christian ministry. Wanem nao Jehovah expectim from iumi long diswan? Samting wea iumi evriwan savve givim, nomata wanem kaen living iumi garem hem stap long disfala toktok: “Eni samting wea iufala duim, duim witim full heart and strong bilong iufala. Duim datwan olsem iufala waka for Jehovah and no for olketa man.” (Colossians 3:23) Taem hem talem komandment wea moa important, Jesus sei: “Iu mas lovem God bilong iu Jehovah witim full heart bilong iu and witim full soul bilong iu and witim full mind bilong iu and witim full strong bilong iu.” (Mark 12:30) Yes, Jehovah expectim each wan long iumi for lovem and servem hem witim full soul.

19, 20. (a) Why nao Mark 12:30 storyim heart, mind and strong olsem difren from soul? (b) Wanem nao hem minim for servem Jehovah witim full soul?

¹⁹ Wanem nao hem minim for servem God witim full soul? Soul hem minim full person, witim body and tingting bilong hem. From soul hem minim heart, mind and strong, why nao Mark 12:30 storyim olketa hia olsem olketa difren from soul? Tingim wanfala tokpiksa. Long taem bilong Bible, wanfala man maet sellim hemseleva (soul bilong hem) for kamap wanfala slave. Nomata olsem, datfala slave maet no servem masta witim full heart; maet hem no iusim full strong or tingting bilong hem for mekem olketa samting bilong masta kamap moabeta. (Colossians 3:22) Dastawe Jesus storyim olketa nara samting hia for strongim point hao iumi mas no holem bak eniting from service bilong iumi for God. Wei for servem God witim full soul hem minim for givim iumiseleva—iusim strong bilong iumi evribit insaed service bilong hem.

²⁰ Waswe, wei for serve witim full soul hem minim haomas taem and strong iumi iusim insaed long ministry mas semsem? Datwan bae hard tumas, bikos living and savve bilong each wan hem difren. Olsem example, wanfala young wan wea garem gudfala health and strong maet fit for iusim moa taem for preach winim wanfala olo wea no garem strong. Wanfala singol wan wea no garem eni famili responsibility maet fit for duim moa samting winim wanfala wea mas lukaftarem famili. Sapos iumi garem strong and living bilong iumi hem fitim for iumi duim planti samting insaed long ministry, iumi shud thankiu tumas long datwan! Tru nao, iumi no want for garem spirit for judgem narawan, for markem iumiseleva witim nara pipol saed long diswan. (Romans 14:10-12) Hem moabeta for iumi iusim paoa bilong iumi for encouragem nara pipol.

21. Wanem nao best and barava important wei for iusim paoa bilong iumi?

²¹ Jehovah hem showim perfect example for iusim paoa bilong hem long stretfala wei. Iumi want for followim hem long best wei wea fitim iumi wea no perfect. Iumi savve iusim paoa wea iumi garem long stretfala wei taem iumi showimaot respect long olketa wea iumi garem samfala paoa ovarem olketa. And tu, iumi want for duim witim full soul preaching waka for sevem laef, waka wea Jehovah givim iumi for duim. (Romans 10:13, 14) Remember, Jehovah hem hapi taem iu​—soul—​givim best bilong iu. Waswe, heart bilong iu muvim iu for want for duim evriting iu fit for duim for servem God wea loving and minim iu? No eni wei for iusim paoa bilong iu hem moa important or moabeta winim datwan.