KAVA SUBJECT | JESUS SEVEM IUMI—FROM WANEM SAMTING?
Why Nao Iumi Needim Samwan for Sevem Iumi?
“Man hem no laef for longtaem and hem kasem staka problem. Hem olsem flaoa wea open for lelebet taem then hem dae nao. Hem olsem shadow wea lus taem sun go daon.”—Job 14:1, 2.
Nomata long taem bifor, pipol laek for young and healthy, and olketa no laek for dae. Bat hem no savve olsem bikos iumi evriwan kamap olo and dae. Datfala toktok wea Job talem long Job 14:1, 2 winim thri thousand year go finis, hem kamap tru distaem tu.
Klosap evriwan laek for gohed laef and no dae. Bible sei God wakem iumi for laek laef olowe and datwan mekem iumi no laek for dae. (Ecclesiastes 3:11) Waswe, hem mek sense for God wea lovem iumi hem wakem iumi for laek laef olowe bat iumi dae nomoa? Nomoa, hem no mek sense and Bible sei dae hem wanfala enemy and God promisim dae bae hem finis.—1 Corinth 15:26.
Tru nao, dae hem wanfala enemy. Man wea tinghae long laef bae no duim samting wea putim laef bilong hem long danger. Taem danger kamap iumi duim samting for protectim iumiseleva. Taem iumi sik, iumi duim samting for iumi kamap gud moa.
Why nao iumi savve sure dae bae hem finis? Bikos taem Jehovah God wakem iumi, hem no plan bilong hem for iumi laef for lelebet taem then iumi dae. Hem plan bilong God for iumi laef olowe long earth and hem bae mekem datfala plan for kamap tru.—Isaiah 55:11.
Wanem nao God bae duim for finisim dae? Kam kasem distaem, olketa man gohed for lukaotem wei for finisim dae. Olketa scientist wakem olketa medicine for trae stopem samfala big sik for no spoelem iumi. Olketa studyim body bilong man for trae savve why nao iumi dae. Long samfala kantri, pipol distaem savve laef longtaem winim pipol wea laef 100 year bifor. Nomata olsem, pipol gohed for dae. Bible sei “evriwan bae go bak long dust.”—Ecclesiastes 3:20.
Gud samting nao Jehovah God markem finis Jesus Christ for sevem iumi from dae, so iumi no need for depend long man for finisim dae.