Taem Wei for Stap Kwaet Appruvim
DATFALA buk Betrayal—German Churches and the Holocaust story long honest wei abaotem part wea religion duim long rul bilong Nazi. “Wei for saportim rul bilong disfala gavman hem samting wea planti Christian duim,” datfala buk hem sei, “and big sekson long olketa fail for tokaot againstim persecution wea kasem olketa Jew. Long disfala samting, wei for stap kwaet, hem tok big.”
Wanem nao pullim pipol wea sei olketa Christian long rul bilong Nazi? Datfala buk explainim hao “law-and-order bilong Hitler for German community” nao switim planti. Hem sei: “Hem againstim dirty piksa, jury fasin, killim dae baby insaed bele, homosexual fasin, ‘rabis fasin’ bilong art distaem, and hem givim olketa bronze, silver, and gold medal long olketa woman wea bornem foa, six, and eitfala pikinini, and there nao hem encouragem olketa for keepim disfala kastom for stap long haos. Diskaen wei for iusim kastom, witim mekhae bilong kantri wea army hem joinim, wea Hitler offerim olsem ansa long shame wea olketa kasem long Versailles Treaty, hem mekem planti pipol for laekem rul bilong Nazi, nomata planti Christian long Germany tu.”
Wanfala grup hem barava difren from olketa. Betrayal hem sei “Olketa Jehovah’s Witness no laek for share long raf fasin or long wei for iusim army.” Tru nao, diswan lead go long wei for attakim nogud disfala smolfala grup, and olketa torowem planti member bilong disfala grup insaed olketa concentration camp. Bat, nara pipol wea sei olketa follower bilong Christ nating duim eni samting nomoa. Datfala buk sei tu: “Olketa Catholic and Protestant showimaot fasin for enemy winim wei for sorre long Olketa Jehovah’s Witness, and olketa share long raf fasin bilong Hitler winim wei for againstim raf fasin olsem olketa Witness duim.” Wei wea olketa kwaet nomoa mekem kamap moa wei for treatim olketa Witness long nogud wei anda long rul bilong Nazi.
Nomata olketa go hed for argue abaotem wei wea olketa church join insaed long Nazi politik, Betrayal kolem Olketa Jehovah’s Witness “wanfala grup wea no laek for saportim or share long datfala rul.”