Kwestin Box
◼ Wanem nao kongregeson savve duim for mekem hem isi for evriwan lane long taem bilong olketa meeting? (Deut. 31:12)
From evriwan long kongregeson barava respectim Jehovah and olketa meeting wea hem givim, datwan bae mekem olketa for kam early bifor meeting start and redi for Jehovah teachim olketa. Hem gud for sidaon long front mekem olketa wea garem smol pikinini and olketa wea maet kam leit for sidaon long bihaen. Bifor meeting hem start, hem gud for offem mobile phone mekem hem no ring and mek noise long taem bilong meeting. Kongregeson bae kasem gud samting taem evriwan wea kam long meeting tinghae and showimaot respect long taem bilong meeting.—Eccl. 5:1; Phil. 2:4.
Taem olketa niu wan start for kam long meeting, hem gud for eniwan long kongregeson wea savve long olketa for sidaon witim olketa. And sapos olketa garem pikinini, hem gud tu for helpem olketa for trainim pikinini. Maet wei for kam long olketa meeting hem niu samting long famili bilong olketa. So olketa bae hapi for sidaon bihaen, mekem hem isi for tekem pikinini go aotsaed for lelebet taem and no spoelem olketa wea lisin. (Prov. 22:6, 15) Long taem bilong meeting hem nogud for tekem olketa pikinini go aotsaed and letem olketa for plei. Hem gud sapos dadi or mami tekem pikinini for go long toilet or disciplinem hem and then tekem hem kam bak for sidaon.
Waka bilong olketa attendant hem for mekem evri samting gohed gud long ples for worship. Olketa attendant savve helpem olketa famili and olketa narawan wea maet kam leit for faendem ples for sidaon. Taem olketa attendant faendem ples for sidaon for olketa wea maet kam leit, olketa mas tingim olketa narawan wea sidaon finis and no spoelem olketa. Sapos eni samting happen, olketa mas iusim gudfala tingting for olketa deal witim datwan. Sapos pikinini hem mek noise or duim samting wea spoelem olketa narawan, hem gud for olketa attendant go deal witim datwan.
Evriwan wea kam long olketa meeting for worshipim God savve duim samting mekem evriwan savve lane abaotem Jehovah and plan bilong hem for datfala niu world wea raeteous pipol bae stap gud tugeta.—Heb. 10:24, 25.