LESON 23

Wanem Nao Insaed Waka for Raetem and Transleitim Olketa Buk Bilong Mifala?

Wanfala man waka long Writing Department, U.S.A. — Raeting Department, U.S.A.

Samfala transleita long South Korea — South Korea

Wanfala man long Armenia holem wanfala buk wea Olketa Jehovah’s Witness transleitim — Armenia

Wanfala gele long Burundi holem buk wea Olketa Jehovah’s Witness transleitim — Burundi

Wanfala woman long Sri Lanka holem olketa magasin wea Olkta Jehovah’s Witness — Sri Lanka

For mekem mifala savve talemaot datfala “gud nius” long “pipol long evri kantri, tribe, and languis,” mifala wakem olketa buk long samting olsem 750 languis. (Revelation 14:6) Wanem nao insaed bigfala waka hia? Long staka kantri, mifala garem olketa wea raetem olketa article long olketa buk and magasin, and tu, samfala transleitim olketa article hia long languis. Evriwan hia Olketa Jehovah’s Witness.

Olketa raetem article long English firstaem. Governing Body nao lukaftarem waka long Raeting Department long world hedquarter. Disfala department organizem olketa man wea raet long hedquarter and long samfala branch office tu. Olketa wea raetem olketa article hia pipol from olketa difren ples. So mifala savve raet abaotem olketa subject wea pipol evriwea long world interest for readim and wea affectim olketa.

Olketa transleitim olketa article. Bihaen olketa raetem and appruvim olketa article, olketa iusim Internet for sendem go long olketa transleison team evriwea raonem world, wea transleitim and chekim gud olketa article hia. Olketa traem best for chusim olketa toktok long languis wea barava garem sem mining olsem English.—Ecclesiastes 12:10.

Computer mekem datfala waka hem fast. Computer no savve changem man wea raetem article or wea transleit. Nomata olsem, olketa computer program helpem olketa for duim datfala waka kwiktaem. Olketa Jehovah’s Witness wakem computer program wea olketa kolem Multilangauge Electronic Publishing System (MEPS) wea helpem olketa for transleit long staka languis and then putim olketa piksa and nara samting long article mekem hem redi for printim.

Mifala duim bigfala waka hia for languis wea no staka pipol story long datfala languis tu! Why nao olsem? Bikos samting wea Jehovah laekem nao hem for “evri difren kaen man mas sev and for garem stretfala savve abaotem olketa tru teaching.”—1 Timothy 2:3, 4.

Wanem nao insaed waka for raetem and printim olketa buk bilong mifala?
Why nao mifala transleit long staka languis?