Buk wea Staka Young Pipol No Readim

“HAO nao bae mi sure Bible hem really Word bilong God? Hem buk wea mi no interest long hem,” wanfala young woman, Beate hem sei.

Long Germany, ples Beate hem stap, staka young pipol garem sem feeling olsem hem; olketa no ting hem important for readim Bible. Wanfala survey wea olketa duim long there no longtaem go nomoa showimaot samting olsem 1 percent long young pipol readim Bible evritaem, 2 percent planti taem, 19 percent no tumas, and klosap 80 percent nomoa nao. Namba hia semsem long olketa nara kantri, maet long ples wea iu stap tu. Hem klia, Bible hem wanfala buk staka young pipol no readim.

Dastawe, wei for no garem savve long Bible hem big midolwan young pipol! Long start bilong year 2000, niuspepa Lausitzer Rundschau reportim haomas pipol nao savve long Ten Komandment and followim long living. For olketa wea age bilong olketa winim 60 year, 67 percent savve long olketa komandment and followim; for olketa wea no kasem 30 year, 28 percent nomoa duim olsem. Tru nao, Word bilong God hem samting wea staka young pipol no savve abaotem.

Samfala Ting Difren

Long narasaed, evriwea long world, planti million young pipol lukim hao Word bilong God hem barava helpem olketa. Olsem example, Alexander hem 19 year and readim Bible evri morning bifor hem go long waka. “Mi hard for tingim eni beta wei for startim day,” hem sei. Sandra followim wei for readim wanfala sekson bilong Bible evri evening. “Hem schedule bilong mi evriday,” hem sei. And Julia, wea hem 13 year, savve readim wanfala or moa chapter bilong Bible, bifor hem sleep long naet. “Mi barava enjoyim, and mi laek for duim diswan evritaem long future.”

Wanem tingting nao hem stret and wise? Waswe, Bible hem really gud for readim? Waswe, hem givim gud samting and important for young pipol? Wanem nao tingting bilong iu?