Laef Story

Nomata Mi Blind, Mi Fit for Lukluk!

STORY BILONG EGON HAUSER

Bihaen mi blind for tufala month long really wei, mi start for luksavve olketa Bible truth wea mi fail for luksavve long full laef bilong mi.

TAEM mi ting abaotem winim seventi year wea go finis, mi barava satisfae witim planti samting long laef bilong mi. Bat sapos mi fit for changem wanfala samting, mi laekem for mi mas savve long Jehovah God taem mi young yet.

Mi born long 1927 long Uruguay, long wanfala smol kantri wea stap midol long Argentina and Brazil and hem garem olketa ples wea barava luk naes wea kavarem planti kilometer followim Atlantic Coast. Pipol long there kam from laen bilong olketa wea kam from Italy and Spain. Bat, parents bilong mi kam from Hungary, and taem mi barava smol yet, mifala stap long wanfala ples wea pipol garem simpol living nomoa, and mifala stap gud tugeta. Mifala no need for putim lok long door or eniting for satem olketa window bilong mifala. Wei for ting daonem narakaen pipol no stap midolwan mifala. Olketa man from nara kantri, olketa lokol pipol, olketa blak man and white man—mifala fren gud witim evriwan.

Parents bilong mi olketa strong tumas long Catholic, and taem mi ten year mi kamap altar boy. Taem mi kamap big, mi waka witim lokol parish and kamap member bilong wanfala grup wea waka for givim advaes long bishop. From mi chusim medical waka, mi kasem invitation for tekpart long wanfala meeting wea Catholic Church nao organizem wea kamap long Venezuela. Olsem olketa doctor wea savve tumas saed long olketa difren sik bilong olketa woman, olketa assignim grup bilong mifala for studyim olketa niu medicine saed long famili planning long datfala taem.

Samting wea Barava Affectim Mi Taem Mi Medical Student

Taem mi medical student yet and studyim body bilong man, mi barava interest long wisdom wea showaot long design bilong body. Olsem example, mi barava sapraes hao body fit for healim hemseleva and kamap gud moa, olsem taem olketa aotem part long liver or samfala bon long ribs and bihaen hem fit for grow bak.

Long semtaem, mi lukim planti wea insaed barava nogud accident, and mi sorre tumas taem olketa dae from olketa kasem blood transfusion. Mi still tingim distaem hao hem barava hard for talem olketa relative bilong olketa patient wea dae hao hem from samfala samting from blood transfusion. Planti taem, olketa relative hia nating savve hao datwan wea olketa lovem hem dae from blood transfusion. Bat, difren samting nao bae olketa sei hem mekem hem dae. Nomata bihaen planti year, mi still tingim hao mi no feel sure abaotem olketa blood transfusion, and gogo mi savve hao diswan hem barava no stret. Hem bae barava gud tumas sapos mi bin savve long law bilong Jehovah hao blood hem holy! Sapos olsem, bae mi savve why mi no sure long datfala taem abaotem blood transfusion.—Acts 15:19, 20.

Satisfae From Wei for Helpem Pipol

Gogo, mi kamap wanfala doctor for operate and director bilong wanfala medical center long Santa Lucía. Mi duim samfala waka tu long National Institute of Biological Science. Diswan mekem mi barava satisfae. Mi helpem pipol wea sik, safa saed long body, planti taem sevem laef bilong pipol, and bringim kam planti niu laef long world long wei for helpem olketa mami for bornem pikinini. From samting wea mi lukim saed long blood transfusion bifor, mi stap klia from wei for givim blood and mi duim planti thousand operation wea no iusim blood. Mi tingim hao taem man lusim staka blood hem olsem wanfala container wea leak. Only ansa hem for fixim datfala leak, no go ahed for fulimap.

Givim Treatment for Olketa Witness wea Sik

Mi start for savve long Olketa Jehovah’s Witness long olketa year bilong 1960 taem olketa kam long clinic bilong mifala for kasem operation wea no iusim blood. Mi bae nating forgetim samting wea happen long wanfala sik woman, wanfala pioneer (full-taem minister) wea nem bilong hem Mercedes Gonzalez. Hem barava short long blood wea mekem olketa doctor long datfala university hospital no want for operatem hem from hem danger tumas and olketa barava sure sapos olketa duim bae hem dae. Nomata hem lusim staka blood, mifala operatem hem long clinic bilong mifala. Operation hia barava win, and hem go ahed for pioneer winim 30 year and dae taem hem 86 year.

Mi evritaem tinghae long love and interest wea olketa Witness showimaot taem olketa lukaftarem olketa Christian brata bilong olketa wea stap long hospital. Taem mi gogo raon visitim olketa sikman, mi hapi tumas for lisin taem olketa storyim biliv bilong olketa, and mi savve tekem olketa pablikeson wea olketa offerim long mi. Mi nating tingim hao bae mi no kamap doctor bilong olketa nomoa bat spiritual brata bilong olketa tu.

Mi kamap moa klos long olketa Witness taem mi maritim Beatriz, dota bilong wanfala patient. Staka long famili bilong hem olketa Witness finis, and taem mitufala marit, hem tu kamap wanfala strong Witness. Bat mi, mi busy tumas long waka bilong mi, and enjoyim lelebet bignem wea mi kasem saed long medical waka. Laef barava gud tumas. Mi nating tingim hao klosap laef bilong mi bae change evribit.

Trabol Kasem Mi

Hem barava nogud samting for wanfala doctor for operate kamap blind. Hem nao samting wea happen long mi. Seknomoa, tufala eye kasem problem—mi kamap blind and no savve sapos mi bae lukluk moa. Bihaen operation, mi leidaon long bed witim plasta long tufala eye and mi sorre fogud. Mi feel iusles evribit and barava no garem hope wea mekem mi disaed for endim laef bilong mi. From mi stap long mek-foa story long datfala hospital, mi go aot from bed and start for wakabaot followim wall, trae for faendem window. Mi ting for jamp mekem mi dae. Batawea, mi end ap nao long corridor bilong datfala hospital, and wanfala nurse tekem mi go bak long bed bilong mi.

Mi no trae for duim datwan moa. Bat from mi still blind, mi go ahed for feel sorre and isi tumas for feel nogud. Long datfala taem wea mi blind, mi promis long God hao sapos mi lukluk moa, mi bae readim full Bible. Gogo, mi lukluk lelebet and mi fit for read. Bat mi no fit for go ahed for waka olsem doctor for operate nao. Nomata olsem, long Uruguay wanfala toktok wea evriwan savve “No hay mal que por bien no venga,” “Gud samting savve evritaem kamaot from nogud samting.” No longtaem bihaen, mi savve datwan hem tru.

Start Long Wei wea No Stret

Mi laek for baem wanfala transleison bilong The Jerusalem Bible wea garem big raeting, bat mi faendaot hao Bible wea Olketa Jehovah’s Witness garem hem no kost tumas, wea wanfala young Witness sei bae hem tekem kam long haos. Next morning, hem kam long haos witim datfala Bible. Waef bilong mi openem door and story witim hem. Mi singaot big kam from insaed long haos hao sapos waef bilong mi baem datfala Bible from hem, hem mas no kam insaed haos and hem shud go nao, and hem nao wanem datfala Witness hem duim. Mi nating tingim hao disfala sem man bae kamap important long laef bilong mi.

Wantaem mi mekem wanfala promis long waef bilong mi wea mi no fulfillim. So for duim samting hem laekem and for mekem hem hapi, mi talem bae mi go witim hem long Memorial bilong dae bilong Christ. Long datfala day, mi tingim promis bilong mi and mi go witim hem. Mi tinghae long wei wea olketa barava fren gud and kaenfala welkam wea olketa showimaot long mi. Taem datfala speaker startim tok bilong hem, mi sapraes for lukim hem datfala young man wea mi raosem from haos bilong mi. Datfala tok barava affectim mi narawe, and mi feel nogud tumas abaotem hao mi no kaen long hem. Hao nao bae mi sei sorre for samting wea mi duim long hem?

Mi askem waef bilong mi for invaetem hem for kam kaikai long haos, bat waef bilong mi sei: “Waswe, iu ting bae hem barava gud tumas sapos iu nao invaetem hem? Weit long hia, bae hem kam long iumi.” Samting wea waef bilong mi talem hem tru. Hem kam sei hello long mifala and barava hapi for acceptim datfala invitation.

Story bilong mifala long evening wea hem kam visitim mifala hem start bilong planti change for mi. Hem showim mi datfala buk Truth Where Bringim Man Long Life All-The-Way,a and mi showim long hem sixfala copy bilong datfala sem buk. Olketa difren Witness patient nao givim olketa buk hia long mi long hospital, bat mi nating readim olketa. Taem mitufala kaikai and bihaen, mi askem planti kwestin—long evri kwestin hem iusim Bible for ansarem. Mitufala story gogo klosap kasem daylaet. Bifor hem go, datfala young man offer for iusim datfala Truth buk for studyim Bible witim mi. Mifala finis for studyim datfala buk insaed thri month and mifala go ahed long buk “Babylon the Great Has Fallen!” God’s Kingdom Rules!b Bihaen datwan, mi dedicatem laef bilong mi long Jehovah God and mi baptaes.

Fit for Duim Samting Moa

Samting wea kamaot from mi blind long really wei nao ‘eye bilong heart bilong mi’ hem open for lukim olketa Bible truth wea mi no ting strong long hem kam kasem datfala taem! (Ephesians 1:18) For savve long Jehovah and loving purpose bilong hem barava changem full laef bilong mi. Distaem moa, mi ting mi fit for duim samting and mi hapi. Mi helpem pipol long physical and spiritual saed bilong olketa and showim olketa hao for laef longtaem lelebet long disfala system and for olowe long niu system.

Mi trae for ap-tu-date witim olketa niu medicine, and mi duim research abaotem danger wea maet kamap from blood, olketa treatment wea man iusim mekem hem no tekem blood, olketa right bilong sikman, and bioethics. Mi garem chance for sharem olketa information hia witim olketa lokol medical community taem olketa invaetem mi for givim tok abaotem olketa subject hia long olketa medical meeting. Long 1994, mi attendim first meeting abaotem treatment wea no iusim blood long Rio de Janeiro, Brazil, and givim wanfala tok long hao for deal witim taem man lusim staka blood. Part bilong datfala information hem insaed long wanfala article wea mi raetem, “Una propuesta: Estrategias para el Tratamiento de las Hemorragias” (“A Strategic Proposition for Anti-Hemorrhagic Treatment”), wea olketa pablisim insaed long datfala medical magasin Hemoterapia.

Faithful Nomata Kasem Hevi

Firstaem, olketa daot wea mi garem saed long blood transfusion hem kam from savve bilong science. Bat, taem miseleva nao sikman, mi faendem hao hem hard samting for no acceptim blood transfusion and keepim faith bilong mi taem olketa doctor putim hevi long mi. Bihaen mi kasem wanfala bigfala heart attak, mi mas explainim disison bilong mi saed long blood long wanfala doctor for winim tu hour. Datfala doctor hem son bilong wanfala gud fren bilong mi and hem sei bae hem no letem mi dae sapos hem tingse blood transfusion bae sevem laef bilong mi. Mi prea smol long Jehovah, mi askem hem for helpem disfala doctor for luksavve and respectim tingting bilong mi nomata sapos hem no agree long datwan. Gogo, doctor hia promis for respectim samting wea mi laekem.

Long narataem, olketa mas aotem wanfala big tumor from wanfala part long private part bilong mi. Mi lusim staka blood. Distaem moa, mi mas talem olketa reason bilong mi for no tekem blood transfusion, and nomata mi lusim staka blood, olketa doctor respectim disison bilong mi.

Tingting Hem Change

Olsem member bilong Internatioal Association of Bioethics, mi hapi for lukim olketa medical staff and olketa wea garem paoa saed long law changem tingting bilong olketa long right bilong olketa sikman. Strong tingting bilong olketa doctor bifor hem change and olketa start for respectim right bilong sikman. Distaem olketa letem olketa sikman for chusim treatment. Distaem, olketa no tingim Olketa Jehovah’s Witness olsem pipol wea ova tumas wea olketa doctor westem taem witim olketa. Bat, olketa ting long olketa olsem olketa sikman wea savve long sik bilong olketa and wea olketa doctor shud respectim right bilong olketa. Long olketa medical meeting and long olketa television program, olketa professor talem kaen toktok olsem: “From hard waka bilong Olketa Jehovah’s Witness, distaem nao mifala savve . . . ” “Mifala lane from olketa Witness . . . ” and “Olketa teachim mifala for kamap moabeta.”

Olketa talem hao no eniting hem moa important winim laef bikos freedom and respect bae no garem eni mining sapos laef no stap. Distaem planti acceptim barava important idea saed long law hao each wan garem right bilong hemseleva and hemseleva nomoa fit for disaedem samting long laef bilong hem. From diswan, respect, freedom for chusim samting, and biliv saed long religion nao important. Patient garem right for mekem disison saed long health bilong hemseleva. Hospital Information Service, wea Olketa Jehovah’s Witness startim helpem planti doctor for savve abaotem olketa samting hia.

Wei wea famili bilong mi go ahed for sapotim mi hem mekem mi fit for duim samting yet long service bilong Jehovah and tu for serve olsem elder long Christian kongregeson. Olsem mi talem finis, mi barava sorre mi no savve long Jehovah taem mi young yet. Nomata olsem, mi barava hapi hao hem openem eye bilong mi for lukim nambawan hope for stap anda long Kingdom arrangement bilong God, wea “no eniwan bae sei: ‘Mi sik.’”—Isaiah 33:24.c

[Olketa Footnote]

[Piksa long page 24]

Taem mi winim 30 year, and waka long hospital long Santa Lucía

[Piksa long page 26]

Witim waef bilong mi, Beatriz, long 1995