KWESTIN 2
Why Nao Mi Wari Tumas Abaotem Lukluk Bilong Mi?
WANEM NAO BAE IU DUIM?
Tingim, taem Julia hem lukluk long mirror hem tingse hem fat tumas. Nomata dadi and mami and olketa fren bilong hem sei hem no fat nomoa, hem laek for on diet.
Julia tingse sapos hem no kaikai for tu-thri day, hem bae lus weight.
Wanem nao bae iu duim sapos iu garem sem tingting olsem Julia?
TINGTING GUD FIRSTAEM!
Hao iu ting long iuseleva savve olsem iu lukim iuseleva long kaen mirror olsem
Hem no rong for warim lukluk bilong iu. Bible storyim samfala man and woman wea barava luk naes olsem Sarah, Rachel, Abigail, Joseph, and David. Bible storyim tu wanfala woman wea nem bilong hem Abishag wea hem “naesbola tumas.”—1 Kings 1:4.
Staka young wan warim tumas lukluk bilong olketa. Wei for duim olsem savve barava spoelem olketa. Tingim diswan:
Wanfala report hem showimaot long wanfala grup bilong olketa gele, staka long olketa sei olketa fat tumas, bat datwan no tru, samfala nomoa fat.
Narafala report hem showimaot long wanfala grup bilong olketa woman, staka long olketa sei olketa fat, bat olketa nating fat nomoa!
From samfala gele ova tumas for trae for lus weight, olketa kasem sik wea olketa kolem anorexia, wea hem wanfala sik wea savve killim man dae, bikos olketa no kaikai gud.
Sapos iu tingse iu kasem anorexia or eni nara problem olsem, askem narawan for helpem iu. Story witim parents bilong iu or eni narawan wea mature wea iu trustim. Bible sei: “Gudfala fren hem showimaot love evritaem, and hem olsem brata wea iu savve depend long hem taem iu kasem hard taem.”—Proverbs 17:17.
BEST SAMTING FOR MEKEM IU LUK NAES!
Wei bilong man nao savve mekem hem for luk naes or nomoa. Tingim Absalom, wea hem nao son bilong King David. Bible hem sei:
“Pipol praisem tumas wei wea Absalom hem luk naes winim eni narawan. . . . No eni samting long body bilong hem luk nogud.”—2 Samuel 14:25.
Nomata olsem, Absalom, wea hem young man nomoa, hem praod tumas and willing for duim eni samting for kasem hae position! Bible no storyim eni gud samting abaotem Absalom, bat Bible sei hem man wea nating faithful and hem heitim narawan gogo hem laek killim narawan dae.
Dastawe Bible talem disfala advaes:
“Iufala mas garem niufala wei.”—Colossae 3:10.
“No mekem aotsaed long body nomoa for luk naes . . . . Bat samting wea mas mekem iufala luk naes nao hem samting wea hem long heart bilong iufala.”—1 Peter 3:3, 4.
Nomata hem stret nomoa for iu laek luk naes, samting wea important winim datwan nao hem wei bilong iu. Gogo, olketa gudfala wei bilong iu bae mekem pipol tinghae long iu winim wei for garem body or for luk naes! Wanfala gele wea nem bilong hem Phylicia hem sei: “Pipol bae kwiktaem for luksavve long samwan wea luk naes, bat olketa bae rememberim nomoa gudfala wei bilong hem and no lukluk bilong hem.”
TINGIM LUKLUK BILONG IU
Waswe, iu no laekem lukluk bilong iu samfala taem?
Waswe, enitaem iu tingting for followim diet wea ova tumas for changem lukluk bilong iu?
Wanem nao iu laek for changem? (Chusim.)
TOL
WEIGHT
HAIR
SHEIP BILONG BODY
FEIS
SKIN
Sapos iu ansa yes long tufala kwestin and iu chusim winim tufala samting wea iu laek for changem, tingim diswan: Maet olketa narawan no garem kaen tingting olsem abaotem lukluk bilong iu. Hem isi for iumi warim tumas lukluk bilong iumiseleva.—1 Samuel 16:7.