‘Evriday Jehovah Helpem Mi Long Olketa Problem Bilong Mi’
Mi born witim bigfala sik wea barava spoelem mi. Nomata olsem, Dadi bilong iumi long heven barava helpem mi kam kasem distaem, and for winim 20 year mi hapi for duim pioneer waka.
Mi born long 1956. Mi garem sik wea olketa kolem spina bifida. Bikos samting hem rong witim spine bilong mi, datwan affectim olketa nerve bilong mi wea mekem hem hard for mi wakabaot and mekem mi kasem olketa nara problem saed long health.
Bifor mi born, tufala missionary bilong Olketa Jehovah’s Witness start for studyim Bible witim parents bilong mi. Taem mi smol tu-thri pablisa nomoa stap long homtaon bilong mi Usakos, long Namibia. From no eni kongregeson stap, famili bilong mi studyim Wastaoa magasin and olketa nara samting for olketa meeting long haos. Taem mi seven year, mi kasem wanfala operation wea olketa kolem urostomy. Disfala operation hem for wakem smol hol long body mekem mimi savve kamaot followim datfala hol. Then taem mi 14 year, mi kasem epilepsy. From no eni hae skul stap klosap and mi needim spesol kea from mami and dadi, mi no savve finisim skul bilong mi.
Nomata olsem, mi disaed for strongim wei wea mi fren witim Jehovah. Long datfala taem staka pablikeson bilong iumi no stap yet long Afrikaans languis, wea hem languis bilong mi. So mi lanem English mekem mi savve readim olketa buk bilong iumi. Taem mi 19 year mi kamap pablisa and then bihaen mi baptaes. Insaed fofala year bihaen mi baptaes, mi kasem staka problem saed long health and staka taem mi savve feel iusles and sorre. And tu, from mi stap long smol taon wea evriwan savve gud long each other, datwan mekem mi hol bak for strong for duim ministry.
Taem mi klosap 25 year, famili bilong mi lusim Namibia and muv go long South Africa. Long there nao hem firstaem for mi joinim wanfala kongregeson. Datwan mekem mi hapi tumas! Bat mi mas kasem nara operation moa, wea olketa kolem colostomy.
Gogo, wantaem mi herem wanfala circuit overseer storyim pioneer waka. Wanem hem storyim mekem mi laek for pioneer. Mi savve bae hem no isi for pioneer from mi garem staka problem saed long health, bat mi luksavve Jehovah helpem mi long staka hard taem wea mi kasem finis. So mi apply for duim regular pioneer waka. Bat olketa elder hol bak for appruvim application bilong mi bikos long health bilong mi.
Mi no givap bat mi disaed for duim best bilong mi long ministry. From mami bilong mi and olketa narawan helpem mi, insaed sixfala month mi kasem hour bilong pioneer. From datwan mi luksavve mi savve duim pioneer waka wea mi laek for duim, nomata mi garem olketa health problem. So mi apply moa and distaem olketa acceptim application bilong mi. Long September 1, 1988, mi start for duim regular pioneer waka.
Mi luksavve Jehovah helpem mi taem mi gohed pioneer. Pioneer waka helpem mi for no tingim tumas olketa health problem bilong mi, and hem helpem mi for fren gud witim Jehovah. Mi hapi tumas for helpem samfala for dedicate long Jehovah and baptaes.
Nomata mi gohed for deal witim olketa health problem bilong mi, ‘evriday Jehovah helpem mi long olketa problem bilong mi.’ (Ps. 68:19) Hem no helpem mi nomoa for deal witim olketa problem bilong mi, bat hem helpem mi tu for enjoyim laef!