Operation wea No Iusim Blood​—“Important Change Long Medical”

ANDA long heding “Operation wea ‘no iusim blood,’” magasin bilong Maclean’s reportim hao olketa doctor long Canada go ahed for “duim samfala niu wei wea, insaed faevfala year, mekem operation wea no iusim blood for kamap important change long medical.” Brian Muirhead, wanfala doctor long Health Science Centre long Winnipeg, hem wanfala long olketa doctor hia. Wanem nao muvim hem for lukaotem treatment wea no iusim blood?

Long 1986, Dr. Muirhead traem disfala challenge for duim operation long wanfala 70-year-old man wea garem ulcer wea blood hem ran, hu, from biliv wea hem garem from Bible olsem wanfala long Olketa Jehovah’s Witness, ask for treatment wea no iusim blood transfusion. (Acts 15:28, 29) Dr. Muirhead “iusim wanfala teknik wea olketa no iusim planti taem for pumpim saline solution insaed long sikman for keepim blood pressure stret,” Maclean’s hem report. “Disfala wei hem win, and hem strongim biliv bilong Muirhead hao ‘iumi givim tumas blood transfusion. Mi ting hem taem nao for lukluk long samfala difren wei.’”

Wei for aftarem operation wea no iusim blood hem “kamap from wari abaotem supply bilong blood long future wea pipol donatem—and wei wea planti sikman fraet nogud olketa kasem sik from wanfala transfusion.” Bikos long olketa doctor wea willing for traem niu wei, Olketa Jehovah’s Witness, and planti narawan tu kasem gud samting. Maclean’s hem sei: “Witim wei for finisim evribit need for iusim transfusion long planti case, operation wea no iusim blood katem daon—nomata hem smol fogud—olketa danger bilong blood wea no klin.” Bat nomata “klinfala” blood tu savve givim sik taem hem daonem immune system bilong olketa sikman.

Wanem nao bihaenem strongfala biliv bilong Olketa Jehovah’s Witness long wei for no iusim blood? Iu maet interest tumas for readim datfala brochure How Can Blood Save Your Life? Olketa Jehovah’s Witness bae hapi tumas for sharem diswan witim iu.