Christmas and New Year—Waswe, Bae Iu Enjoyim?
“Peter [the Great] hem givim komand for evri church mekem spesol service for celebratem New Year long January 1. And tu, hem talem pipol for putim olketa branch bilong spesol tree raonem olketa door insaed long haos, and hem komandim evriwan long Moscow for mas ‘showimaot olketa hapi thru long wei for talemaot datwan witim bigfala voice’ long New Year.”—Peter the Great—His Life and World.
WANEM nao iu laekem tumas long taem bilong Christmas and New Year? Pipol evriwea long world sei main samting nao hem Christmas, wea olketa sei hem nao taem wea Christ hem born. Bat, insaed datfala taem bilong holiday pipol celebratem New Year tu. So hem wanfala longfala holiday. Maet olketa parents no waka and olketa pikinini no skul long datfala taem, so luk olsem hem wanfala gud chance for famili spendem taem tugeta. Bat plande pipol ting long disfala taem olsem wanfala spesol taem for honorim Christ. Maet iu tu ting olsem.
Evriwea long world, plande million hasband, waef, and pikinini barava laekem tumas datfala taem for holiday. Maet diswan bikos olketa laek for honorim Christ, or enjoyim wei for stap tugeta witim famili, or maet tufala evriwan. Waswe dis year, bae hem wanfala spesol taem for famili stap tugeta? And waswe, hem spesol long God? Sapos famili hipap tugeta, waswe, bae iu hapi or bae eni samting kamap wea bae spoelem datwan?
Plande pipol wea laek for honorim Christ long datfala taem lukim hao plande nating showimaot olketa fasin bilong Christ taem olketa celebratem Christmas and New Year. Staka ting long datfala holiday olsem taem for kasem present nomoa, chance for garem party wea insaed datwan fasin bilong pipol maet nating showimaot honor long Christ, or main samting nao hem for famili hipap tugeta. Plande taem wea pipol celebratem Christmas and New Year olketa no hapi bikos maet wanfala member bilong famili hem ova tumas for kaikai or drinkim tumas alcohol. Diswan maet mekem raoa kamap and plande taem hem lead go long wei for samwan insaed famili killim narawan. Maet iu lukim diswan happen or maet iuseleva kasem kaen samting olsem.
Sapos olsem, maet iu tingse evri samting hia semsem nomoa olsem long taem bilong King bilong Russia, Peter the Great, wea iumi read abaotem hem finis. Plande pipol wea no hapi long hao pipol distaem celebratem Christmas, laekem Christmas for kamap taem for honorim Christ and for famili stap gud tugeta. Samfala trae hard for duim samting for mekem diswan kamap, so olketa savve iusim olketa toktok olsem, Jesus nao reason for celebratem Christmas season. Bat waswe, diswan bae mekem eni change kamap? And waswe, datwan bae really honorim Christ? Waswe, eni reason stap wea mekem iumi fit for garem difren tingting abaotem Christmas and New Year?
For kasem olketa ansa wea savve mekem iu satisfae, hem gud for iumi lukluk firstaem long tingting bilong pipol long wanfala kantri wea shud garem spesol reason for tinghae long datfala taem long year.