Tingim wanem Noah and famili bilong hem duim insaed long 40-fala day bihaen Jehovah satem door bilong ark. Taem datfala rain hem gohed, evriday olketa need for duim samting olsem for wakem kaikai, klinim ples wea olketa stap, and feedim and lukaftarem olketa animal. Then gogo, olketa feelim datfala maeti ark hem start for muv! Ark hem start for float antap long wata wea kamap deep tumas. (Genesis 7:17) Datwan showimaot bigfala paoa bilong Olmaeti God, Jehovah!

ARK SEVEM OLKETA FROM FLOOD

Taem ark gohed float antap long wata wea raf, olketa wea stap insaed savve herem noise bilong olketa timba bilong ark taem hem muv. Waswe, Noah hem wari nogud olketa wave big tumas or nogud ark hem brek? Nomoa. Noah no olsem samfala man distaem wea daotem sapos datfala ark hem strong. Bible sei: “From Noah garem faith . . . hem wakem wanfala ark.” (Hebrew 11:7) Why nao hem garem faith? Jehovah mekem agreement witim Noah for sevem hem and famili bilong hem long taem bilong Flood. (Genesis 6:18, 19) Jehovah wakem universe, earth, and evri samting wea laef long earth, so hem fit for protectim datfala ark for no brek. Noah trustim Jehovah bae duim wanem hem promisim. And hem nao wanem Jehovah duim. Noah and famili bilong hem sev long datfala ark.—1 Peter 3:20.

Bihaen 40 day and 40 naet rain hem stop. Datwan hem happen long samting olsem December 2370 B.C.E. Bat famili bilong Noah bae stap for longtaem yet insaed long ark. Datfala ark hem gohed float antap long wata wea kavarem full earth, nomata olketa maunten tu. (Genesis 7:19, 20) Tingim, Noah and olketa son bilong hem Shem, Ham, and Japheth mas gohed waka hard for feedim, klinim, and lukaftarem olketa animal. God iusim paoa bilong hem for mekem olketa wild animal for no raf taem olketa go insaed long ark, and luk olsem hem duim sem samting tu for mekem olketa savve gohed stap kwaet olsem for longtaem insaed ark.a