Taem Will Bilong God Kamap Long Earth

TAEM Jesus teachim olketa disaepol bilong hem for prea, “Mekem will bilong iu kamap long earth, olsem long heven,” hem story olsem from hem bin stap long heven witim Dadi bilong hem. (Matthew 6:10; John 1:18; 3:13; 8:42) Bifor Jesus kamap wanfala man, hem stap long wanfala taem wea evriting long heven and long earth kamap followim will bilong God. Hem wanfala taem bilong hapi and wei for satisfae from samting wea olketa duim.—Proverbs 8:27-31.

First samting wea God creatim hem olketa spirit, “olketa angel bilong hem, wea garem strongfala paoa, wea duim samting wea hem talem.” Bifor and distaem, olketa nao “minister bilong hem, wea duim will bilong hem.” (Psalm 103:20, 21) Waswe, each angel savve talemaot tingting and duim wanem hem laekem? Ia, and taem God creatim earth, olketa “son bilong God start for singaotem praise.” (Job 38:7) Wei wea olketa singaotem praise showimaot hapi bilong olketa long will bilong God, and olketa agree witim will bilong hem.

Bihaen God wakem earth, hem redyim for olketa man stap insaed and then hem creatim first man and woman. (Genesis, chapter 1) Waswe, datwan tu fit for kasem praise? Toktok bilong God sei: “Bihaen datwan God lukim evri samting wea hem wakem and, lukim! hem gud tumas,” barava nao, no eniting nogud, evriting perfect.—Genesis 1:31.

Wanem nao will bilong God for first parents bilong iumi and olketa pikinini bilong tufala? Olsem Genesis 1:28 showimaot, Jehovah ting diswan tu hem gud tumas: “God blessim tufala and God sei long tufala: ‘Garem pikinini and kamap planti and fulimap earth and lukaftarem, and olketa fish bilong sea and olketa bird bilong heven and evri living samting wea muv long graon mas stap anda long iufala.’” For fulfillim datfala nambawan komand, first parents bilong iumi and tu olketa pikinini bilong tufala bae need for laef, for olowe. No eniting showim hao trabol, wei for no followim justice, sorre long heart, or dae bae kamap.

Long datfala taem will bilong God kamap long heven and earth. Evriwan wea live followim will bilong hem bae barava hapi for duim datwan. Wanem nao hem spoelem?

Wanfala challenge kamap againstim will bilong God. Nomata olsem, ansa hem stap. Bat hem start bilong taem bilong sorre wea bae mekem kamap wei for konfius abaotem will bilong God for olketa man. From diswan iumi evriwan kasem wei for sorre. Wanem nao datfala challenge?

Will Bilong God Taem Fasin for Bighed Hem Stap

Wanfala spirit “son bilong God” lukim hao wei hem stap for spoelem will bilong God for olketa man. Hem plan for kasem gud samting for hemseleva. Taem hem ting go moa abaotem diswan, hem luksavve hao hem isi nomoa for duim and feeling for laekem diswan kamap moa big. (James 1:14, 15) Hem maet ting sapos hem savve mekem first man and woman for lisin long hem and no long God, then diswan bae forcem God for acceptim tufala wei for rul. Maet hem ting God bae no killim dae tufala, from datwan bae minim purpose bilong God hem fail. Maet disfala spirit son ting Jehovah God mas changem purpose bilong hem, and acceptim wei wea olketa man distaem obeyim hem. Dastawe hem barava fitim for datfala bighed spirit garem nem Satan, wea minim, “Man for Againstim Man.”—Job 1:6, footnote.

Satan followim datfala feeling, so hem go lukim datfala woman. Hem encouragem hem for no followim will bilong God and for kamap independent, hem sei: “Iu bae nating dae. . . . Iu bae kamap olsem God, savve long gud and nogud samting.” (Genesis 3:1-5) Datfala woman tingse wanem Satan talem bae givim hem freedom, and hem biliv hem bae kasem laef wea moabeta sapos hem lisin long hem. Bihaen, hem switim hasband bilong hem for followim hem.—Genesis 3:6.

Diswan hem no will bilong God for tufala. Hem will bilong tufala seleva. And olketa barava nogud samting bae kamaot from diswan. God talem tufala finis hao sapos tufala no obey tufala bae dae. (Genesis 3:3) God creatim tufala long wei wea tufala bae hard for win sapos tufala independent from hem. (Jeremiah 10:23) And tu, tufala bae no perfect nao, so wei for no perfect and dae bae pas go long pikinini bilong tufala. (Romans 5:12) Satan no savve stopem olketa samting hia for happen.

Waswe, olketa samting hia changem for olowe purpose or will bilong God for olketa man long earth? Nomoa. (Isaiah 55:9-11) Bat olketa mekem olketa kwestin kamap wea needim ansa: Waswe, olketa man savve “kamap olsem God, savve long gud and nogud samting,” olsem wanem Satan talem? Sapos iumi garem inaf taem, waswe, iumiseleva bae fit for luksavve wanem nao hem stret and rong, gud and nogud, long evriting long laef? From rul bilong God nao best wan, waswe, fitim God for kasem wei for obey evribit from olketa man? Waswe, will bilong hem stret, dastawe man shud obeyim evribit? Hao nao iu bae ansarem olketa kwestin hia?

Wanfala wei nomoa stap for stretem olketa samting hia front long olketa man and angel: Letem pipol wea laek independent from God pruvim sapos olketa bae win. For killim olketa dae bae no stretem diswan. Taem God letem olketa man go ahed aftarem independent tingting for samfala taem, diswan bae givim ansa bikos samting wea kamaot from wei for independent from God bae showaot klia. God showim hao hem bae duim diswan taem hem talem datfala woman hao hem bae garem pikinini. So famili bilong olketa man bae start. Bikos long disison bilong God for letem datfala woman for garem pikinini, hem nao iumi laef distaem!—Genesis 3:16, 20.

Bat, diswan no minim God bae letem olketa man and bighed angel for duim evriting wea olketa laek for duim. God no lusim wei wea hem sovereign ruler, and hem no lusim tu purpose bilong hem. (Psalm 83:18) Hem talem klia diswan taem hem profesi abaotem hao hem bae finisim evribit datwan wea startim bighed fasin and bae aotem evri nogud samting wea kamap from datwan. (Genesis 3:15) So, semtaem problem kamap, hem givim promis long olketa man hao evri samting bae kamap gud moa.

Bat long datfala taem tu, first dadi and mami separatem tufala seleva and tu future pikinini bilong tufala from rul bilong God. For God stopem evri sorre samting wea bae kamap from wanem tufala disaedem hem mas evritaem forcem man for followim will bilong hem. Hem bae semsem nomoa olsem wei for no letem olketa for independent from hem.

Nomata olsem, man seleva savve chus for stap anda long rul bilong God. Olketa savve lanem wanem nao will bilong God for pipol and trae hard for barava followim. (Psalm 143:10) Bat diswan no minim olketa bae missim olketa problem wea kamap insaed datfala taem wea kwestin abaotem wei for olketa man independent evribit hem go ahed.

First part long history bilong olketa man showimaot klia nogud samting wea kamaot from wei for chus seleva. Firstborn pikinini long famili bilong olketa man, Cain, killim dae brata bilong hem Abel bikos “olketa waka bilong hemseleva hem nogud, bat olketa waka bilong brata bilong hem, hem raeteous.” (1 John 3:12) Diswan no will bilong God, from God warnim Cain and bihaen hem panisim hem. (Genesis 4:3-12) Cain chusim wei for independent, wea followim Satan and dastawe hem “kam from datfala wicked wan.” Staka duim olsem tu.

Bihaen olketa man stap long earth winim 1,500 year, “earth hem kamap nogud tumas long eye bilong tru God and earth hem fulap witim raf fasin.” (Genesis 6:11) God need for duim samting for sevem disfala earth. God mekem wanfala flood kamap evriwea long earth and protectim wanfala raeteous famili for stap laef—Noah, waef bilong hem, olketa son bilong hem, and waef bilong olketa. (Genesis 7:1) Iumi evriwan kamaot from laen bilong olketa.

Start kam long taem bilong Noah, God provaedem direction for pipol wea barava laek for savve long will bilong hem. Hem muvim olketa faithful man for recordim toktok bilong hem for helpem eniwan wea luk go long hem for direction. Olketa toktok hia stap insaed Bible. (2 Timothy 3:16) Long loving wei hem letem olketa faithful man for kamap olketa fren bilong hem. (Isaiah 41:8) And hem givim strong wea olketa needim for winim olketa hard taem wea kasem olketa man insaed staka thousand year wea man independent from God. (Psalm 46:1; Philippians 4:13) Iumi barava hapi for kasem diskaen help!

‘Will Bilong Iu Kamap’—Evribit

Samting wea God duim kam kasem distaem hem no only samting wea hem bae duim for olketa man. Christian aposol Peter raet olsem: “Iumi weitim olketa niu heven and niu earth olsem hem promisim, wea raeteous fasin bae stap.” (2 Peter 3:13) Disfala toktok piksarem wanfala niu gavman wea bae rulim olketa man and wanfala niu sekson bilong pipol wea bae stap anda long datfala gavman.

Profet Daniel talem klia taem hem raet olsem: “Long taem bilong olketa king hia God bilong heven bae startim wanfala kingdom wea bae nating savve finis. . . . Hem bae smasem and finisim evri kingdom hia, and hemseleva nao bae stap olowe.” (Daniel 2:44) Disfala profesi hem storyim end bilong disfala system wea nating gud and hem storyim hao Kingdom, or gavman bilong God nao bae tekova. Diswan barava gud nius! Olketa raoa and selfish fasin wea mekem disfala world fulap witim raf fasin and mekem earth stap long danger moa, bae nomoa nao.

Wanem taem nao olketa samting hia bae happen? Olketa disaepol bilong Jesus ask olsem: “Wanem taem nao evri samting hia bae happen, and wanem nao bae saen for markem taem iu stap moa and taem bilong end bilong disfala system?” Wanfala part long ansa bilong Jesus hem sei: “Olketa bae talemaot disfala gud nius bilong kingdom evriwea long earth for givim witness long evri nation; and then end bae kam.”—Matthew 24:3, 14.

Evriwan savve hao disfala preaching waka hem go ahed distaem evriwea long world. Iuseleva maet lukim diswan kamap long ples wea iu stap. Long buk bilong hem These Also Believe, Professor Charles S. Braden raet olsem: “Olketa Jehovah’s Witness barava kasem full earth witim preaching waka bilong olketa. . . . No eni nara religion long world showimaot strong and wei for no givap for spreadim gud nius bilong Kingdom winim Olketa Jehovah’s Witness.” Olketa Witness go ahed for duim waka for talemaot disfala gud nius long winim 230 kantri and insaed klosap 400 languis. Disfala waka wea olketa profesi abaotem hem nating enitaem big kasem evriwea long earth olsem distaem. Diswan hem wanfala long olketa samting wea pruvim iumi klosap long taem wea datfala Kingdom bae tekova long olketa gavman bilong olketa man.

Datfala Kingdom wea Jesus sei olketa bae preach abaotem hem nao sem wan wea hem teachim olketa for prea for hem: “Mekem kingdom bilong iu kam. Mekem will bilong iu kamap long earth, olsem long heven.” (Matthew 6:10) Tru nao, datfala Kingdom hem samting God iusim for fulfillim purpose bilong hem, will bilong hem, for olketa man and for earth.

Wanem nao datwan minim? Ansa hem long Revelation 21:3, 4: “Mi herem wanfala bigfala voice from throne hem sei: ‘Lukim! Tent bilong God hem stap witim olketa man, and hem bae stap witim olketa, and olketa bae kamap pipol bilong hem. And God bae stap witim olketa. And hem bae aotem krae from eye bilong olketa, and dae bae nomoa, sorre and singaot and pain bae nomoa tu. Evri samting bifor hem finis nao.’ ” Then, will bilong God bae barava kamap long earth and long heven—evribit.a Waswe, iu laek for insaed diswan tu?

[Footnote]

[Piksa long page 5]

Wei for independent from will bilong God mekem bigfala sorre kamap