1, 2. (a) Wanem nao iumi lanem from Genesis 2:3? (b) Olketa wanem kwestin nao bae iumi ansarem?

LONG Genesis chapter 1, iumi lanem insaed sixfala day God wakem earth for pipol stap long hem. Sixfala day hia hem no 24 hour long each day bat hem minim staka year. Bible story olsem abaotem end bilong each day: “Hem evening then hem morning.” (Gen. 1:5, 8, 13, 19, 23, 31) Bat mek-seven day hem difren. Bible sei: “God blessim mek-seven day and mekem hem holy, bikos long datfala day hem rest from waka bilong hem for wakem evri samting hem finis.”​—Gen. 2:3.

² Taem Moses raetem buk bilong Genesis long 1513 B.C.E., hem sei God hem “rest.” So datwan minim God gohed for rest yet long datfala taem. Bible sei pipol savve rest long day bilong God for rest tu. Waswe, God gohed for rest kam kasem distaem? Sapos olsem, hao nao iumi savve rest long day bilong God for rest? Hem barava important for savve long ansa bilong olketa kwestin hia.

5. (a) Wanem nao Jehovah laek for duim long mek-seven day? (b) Wanem taem nao plan bilong God bae kamap tru?

⁵ For savve long ansa bilong datfala kwestin, hem gud for tingim Jehovah markem mek-seven day for wanfala spesol samting. Genesis 2:3 sei: “God blessim mek-seven day and mekem hem holy.” Jehovah mekem datfala day holy bikos hem nao day wea hem markem for plan bilong hem for earth kamap tru. Plan bilong Jehovah hem for evriwan wea obeyim hem for stap long earth and lukaftarem evri samting long earth. (Gen. 1:28) Reason why Jehovah God and Jesus Christ, wea hem “man wea rulim Sabbath,” “gohed waka kam kasem distaem” hem for mekem plan bilong God for earth kamap tru. (Matt. 12:8) So day bilong God for rest bae gohed go kasem taem datfala plan kamap tru. Datwan bae happen long end bilong wan thousand year rul bilong Christ.