Waswe, Iu Garem Wise Fasin?

LONG taem for appointim olketa judge ovarem Israel, Moses trae for faendem “olketa man wea garem wisdom and wise fasin and experience.” (Deuteronomy 1:13) Experience, wea depend long age, hem no only mark nomoa. Wisdom and wise fasin important tu.

Wanfala man wea garem wise fasin showimaot gudfala tingting long toktok and fasin. Olsem Webster’s Ninth New Collegiate Dictionary talem, man wea garem wise fasin hem “savve hao for stap kwaet” tu. Tru nao, “taem for toktok” and “taem for stap kwaet” hem stap, and man wea garem wise fasin luksavve long wei wea tufala difren. (Ecclesiastes 3:7) Planti taem, gudfala reason stap for stap kwaet, from Bible sei: “Long olketa planti toktok sin bae kamap, bat wan wea kontrolem mouth bilong hem duim wisefala samting.”—Proverbs 10:19.

Olketa Christian mas careful and showim wise fasin taem olketa deal witim narawan. Man wea toktok evritaem or tok strong hem planti taem no man wea barava important or wea olketa needim. Remember, Moses hem “garem bigfala savve long toktok bilong hem,” bat hem no fit for leadim nation bilong Israel long gudfala wei go kasem taem hem mekem grow patient fasin, kwaet fasin, and fasin for bossim seleva. (Acts 7:22) Dastawe, olketa wea garem paoa ovarem narafala pipol mas barava trae hard for no ova tumas and for balance witim pipol.—Proverbs 11:2.

Word bilong God storyim wanfala sekson wea Jesus Christ givim “evri samting bilong hem” long olketa olsem “faithful and wise.” (Matthew 24:45-47) Olketa no ova tumas for duim samting kwiktaem winim Jehovah and followim idea bilong olketa seleva; and olketa no slow for duim samting taem olketa klia long tingting bilong Jehovah abaot wanfala samting. Olketa savve long wanem taem nao for toktok and wanem taem for weit long kwaet wei for olketa samting kamap moa klia. Hem gud tumas for evri Christian for no just followim nomoa bat for pruvim tu olketa seleva garem wise fasin, olsem slave class duim.—Hebrews 13:7.