Kwestin From Reader
Bible storyim “buk bilong Jashar” and “buk bilong olketa War bilong Jehovah.” (Josh. 10:13; Num. 21:14) Bat tufala no stap long Bible distaem. Waswe, tufala buk hia kam from God bat lus nao?
No eni pruv stap for showim hao tufala buk hia kam from God and bihaen tufala lus. Olketa man wea raetem Bible iusim staka toktok wea kam from olketa nara buk. Samfala long olketa toktok hia maet kam from Bible bat distaem iumi no luksavve long datwan. Tingim toktok long 1 Chronicles 29:29 wea sei, “toktok bilong profet Samuel,” “toktok bilong profet Nathan,” and “toktok bilong profet Gad.” Olketa toktok hia maet minim olketa buk wea iumi savve long olketa olsem 1 and 2 Samuel, or buk bilong Judges.
Sapos nomoa, maet olketa storyim samfala buk wea no part long Bible bat garem nem wea klosap semsem olsem olketa nara buk long Bible. For minim diswan, iumi tingim fofala buk bifor olsem: “buk bilong olketa samting wea olketa king bilong Judah duim,” “Buk bilong olketa King bilong Judah and bilong Israel,” “Buk bilong olketa King bilong Israel,” and “Buk bilong olketa King bilong Israel and bilong Judah.” Nomata olketa nem hia here semsem witim nem bilong olketa buk long Bible olsem 1 Kings and 2 Kings, fofala buk hia no kam from God and olketa no part long Bible. (1 Ki. 14:29; 2 Chron. 16:11; 20:34; 27:7) Maet hem olketa oldfala raeting wea stap long taem wea profet Jeremiah and Ezra raetem story bilong olketa wea stap long Bible distaem.
Hem tru, samfala wea raetem Bible iusim or storyim samfala toktok wea stap bifor kam bat no kam from God. Esther 10:2 storyim “Buk bilong olketa samting wea olketa king bilong Media and Persia duim.” Luke duim tu samting olsem taem hem raetem Gospel bilong hem and hem ‘chekim gud evri story abaotem diswan.’ Diswan minim maet hem lukluk long samfala buk taem hem raetem famili laen bilong Jesus wea iumi savve readim long Gospel bilong Luke. (Luke 1:3; 3:23-38) Olketa buk hia wea Luke lukluk long hem no kam from God, bat datfala Gospel wea hem raetem nao kam from God. And datfala Gospel barava helpem iumi distaem.
Tufala buk wea iumi storyim firstaem, “buk bilong Jashar” and “buk bilong olketa War bilong Jehovah,” hem luk olsem oldfala raeting wea stap bifor bat wea no kam from God. Dastawe Jehovah no keepim for iumi distaem. Olketa savveman long Bible talem hao luk olsem tufala buk hia hem olketa poem or singsing abaotem olketa raoa midolwan long olketa Israelite and olketa enemy bilong hem. (2 Sam. 1:17-27) Wanfala Bible encyclopedia talem hao, olketa samting wea stap long olketa buk hia “maet hem olketa kastom story or singsing wea storyim laef bilong pipol long Israel bifor.” Samfala profet wea Jehovah iusim bifor raetem samfala story moa wea God no putim long Bible “for teachim man, for givim kaonsel, for stretem evri samting” distaem.—2 Tim. 3:16; 2 Chron. 9:29; 12:15; 13:22.
Wei wea Bible storyim samfala buk olsem and olketa fit for iusim, mas no mekem iumi tingse olketa kam from God. Bat Jehovah God keepim olketa buk wea garem evri “toktok bilong God bilong iumi,” and olketa “bae stap for olowe.” (Isa. 40:8) Tru nao, wanem Jehovah chusim for stap insaed long 66 Bible buk wea iumi garem distaem, hem wanem iumi barava needim for mekem iumi “fit evribit, barava redi for duim evri gudfala waka.”—2 Tim. 3:16, 17.