• “Toktok Bilong Jehovah” No Savve Fail
    Wastaoa—2004 | July 15

    • Olketa Nation Olobaot

      4. Wanem nao olketa main point bilong Psalm 2:1, 2?

      4 Taem hem storyim samting wea olketa nation duim and olketa bigman bilong olketa, man wea raetem psalm startim singsing bilong hem olsem: “Why nao olketa nation olobaot and olketa sekson long olketa nation go ahed for storyim samting nating? Olketa king bilong earth standap and olketa bigman hipap tugeta olsem wanfala sekson for againstim Jehovah and againstim anointed wan bilong hem.”—Psalm 2: 1, 2.a

      5, 6. Wanem nao datfala “samting nating” wea olketa sekson long olketa nation “go ahed for storyim”?

      5 Wanem nao “samting nating” wea olketa sekson long olketa nation distaem olketa “go ahed for storyim”? Olketa nation no acceptim Anointed Wan bilong God, datfala Messiah, or Christ, bat olketa “go ahed for storyim,” or tingting strong long wei for go ahed long rul bilong olketa seleva. Olketa toktok hia bilong mek-tu psalm hem fulfill tu long first century C.E. taem gavman bilong olketa Jew and Rome waka tugeta for killim dae King wea God markem, Jesus Christ. Nomata olsem, diswan hem start fulfill long bigfala wei long 1914 taem Jesus kamap King long heven. Start long datfala taem, no eni organization bilong politik long earth hem acceptim King wea God markem.

      6 Wanem nao man wea raetem psalm hem minim taem hem ask ‘why nao olketa nation storyim samting nating’? Purpose bilong olketa nao samting nating; hem iusles and bae hem fail nomoa. Olketa no savve mekem peace and wan mind kamap long disfala earth. Nomata olsem, wei wea olketa go ahed saed long diswan mekem olketa againstim rul bilong God. Tru nao, from olketa garem feeling for heit olketa hipap tugeta for againstim Most Hae and Anointed Wan bilong hem. Datwan hem krangge tumas!

      King Bilong Jehovah wea Win

      7. Taem olketa disaepol bilong Jesus bifor prea, olketa sei Psalm 2:1, 2 hem story abaotem hu?

      7 Olketa disaepol bilong Jesus luksavve hao toktok long Psalm 2:1, 2 story abaotem hem. From olketa hia kasem persecution bikos long faith bilong olketa, olketa prea olsem: “Sovereign Lord [Jehovah], iu nao Datwan wea wakem heven and earth and sea and evri samting insaed long olketa, and wan wea thru long holy spirit iu talem thru long mouth bilong laen dadi bilong mifala David, servant bilong iu, ‘Why nao olketa nation olobaot tumas and pipol ting strong long olketa samting nating? Olketa king bilong earth standap and olketa bigman hipap tugeta olsem wanfala sekson for againstim Jehovah and againstim anointed wan bilong hem.’ Nomata olsem, really samting nao hem wei wea Herod [Antipas] and Pontius Pilate witim olketa man bilong olketa nation and pipol bilong Israel hipap tugeta long taon and againstim holy servant bilong iu Jesus, wea iu anointim.” (Acts 4:24-27; Luke 23:1-12)b Tru tumas, nogud plan nao olketa mekem againstim Jesus, anointed servant bilong God long first century. Nomata olsem, disfala psalm bae fulfill narataem moa, staka handred year bihaen.

      8. Hao nao Psalm 2:3 hem fitim olketa nation distaem?

      8 Taem Israel bifor garem man olsem king, olsem David, olketa heathen nation and ruler hipap tugeta for againstim God and anointed king wea hem markem. Bat waswe long taem bilong iumi? Olketa nation distaem no laek for obeyim olketa mark bilong Jehovah and Messiah. Dastawe olketa sei olsem: “Iumi brekem olketa rope and torowem olketa string bilong olketa from iumi!” (Psalm 2:3) Eni law wea God and Anointed Wan bilong hem putim bae olketa ruler and nation againstim. Bat, eni samting wea olketa duim for brekem rope and torowem olketa string bae fail.