14, 15. Wanem nao mekem iumi savve Jesus tingim iumi and “bae sevem man wea poor wea singaot for help”?

¹⁴ From iumi born sin, iumi barava needim help. Bat iumi garem hope. (Readim Psalm 72:​12-​14.) Jesus wea winim Solomon hem tingim iumi, bikos hem savve iumi no perfect. Jesus safa from hem laek duim samting wea stret, and God letem hem for kasem hard taem. From Jesus wari fogud, “swet bilong hem wea foldaon long graon hem olsem blood”! (Luke 22:44) Taem hem hange long post, hem singaot: “God bilong mi, God bilong mi, why nao iu lusim mi?” (Matt. 27:​45, 46) Nomata evri nogud samting kasem Jesus and Satan tu trae hard for mekem hem no obeyim Jehovah, Jesus faithful long Jehovah God.

16. Why nao Solomon savve tingim pipol bilong hem?

¹⁶ From Solomon garem wisdom and wei for luksavve, hem “feel sorre long olketa man nating.” Staka nogud samting happen long laef bilong hem tu. Brata bilong hem Amnon rapem sista bilong hem Tamar, and nara brata bilong hem Absalom talem olketa narawan for killim dae Amnon. (2 Sam. 13:​1, 14, 28, 29) Absalom plan for aotem David for no king, bat plan bilong hem no waka and Joab killim hem dae. (2 Sam. 15:​10, 14; 18:​9, 14) Gogo Adonijah, brata bilong Solomon, laekem hemseleva nao for king. Sapos hem kamap king, hem mas killim dae Solomon firstaem. (1 Ki. 1:​5) Prea wea Solomon talem taem olketa dedicatem temple bilong Jehovah showimaot hem tingim pipol wea safa. King prea olsem for pipol bilong hem: “Each wan savve long trabol and pain bilong hemseleva . . . Iu [Jehovah] mas forgivim olketa and givim long each wan samting wea fitim wanem olketa duim.”​—⁠2 Chron. 6:​29, 30.

17, 18. Wanem pain nao samfala kasem, and wanem nao helpem olketa for gohed strong and no givap?

¹⁷ Olketa samting wea happen long laef bilong man mekem ‘each wan savve long pain bilong hemseleva.’ Mary,a wanfala Jehovah Witness wea winim 30 year, hem sei: “Mi shud hapi tumas, bat staka taem mi shame and feel nogud long wanem mi duim bifor. Mi sorre tumas and mi krae olowe bikos hem olsem samting hia happen yesterday nomoa. Hem mekem mi feel iusles and guilty.”

¹⁸ Staka wea worshipim God feel olsem tu, bat wanem nao savve helpem olketa for gohed strong and no givap? Mary sei: “Olketa trufala fren and olketa brata and sista mekem mi hapi. Mi tingim tu olketa promis bilong Jehovah wea bae kamap tru long future, and mi savve mi bae no krae moa bat bae singaot from mi hapi.” (Ps. 126:⁠5) Iumi mas trustim Son wea God givim kam for rulim iumi. Bible sei: “Hem bae feel sorre long olketa man nating and man wea poor, and hem bae sevem olketa. Hem bae sevem olketa from hard taem and from pipol wea raf, and hem barava tingim laef bilong olketa.” (Ps. 72:​13, 14) Datwan barava strongim iumi!