Solomon hem report olsem: “Seknomoa hem go bihaenem hem, olsem wanfala buluka wea kam for olketa busarem, and olsem olketa chainim for discipline bilong wanfala krangge man, go kasem taem wea wanfala arrow katem open liver bilong hem, olsem wanfala bird wea hariap go insaed long trap, and hem no savve diswan minim barava soul bilong hem.”—Proverbs 7:22, 23.

Young man hia hard for againstim invitation. From hem no laekem gud tingting, hem go bihaenem hem ‘olsem wanfala buluka for busarem.’ Olsem man wea olketa chainim hem hard for ranawe from panis, diswan pullim go young man hia for sin. Hem nating luksavve long danger go kasem taem “wanfala arrow katem open liver bilong hem,” wea minim, gogo hem kasem garekil wea savve kosim dae bilong hem. Maet dae hia long physical wei from hem putim hemseleva long danger from olketa sik bilong dirty fasin.b Datfala garekil savve kosim hem for dae long spiritual wei tu; “diswan minim barava soul bilong hem.” Diswan barava affectim evri part bilong hem and laef bilong hem, and hem duim bigfala sin againstim God. Long datfala wei hem kwiktaem gogo for dae kasholem hem olsem bird wea flae go insaed trap!