‘Healing for Bele Bilong Iu’

PIPOL biliv hao bigfala namba bilong olketa sik wea kasem man start witim olketa hevi saed long feeling olsem fraet, sorre, jealous fasin, wei for keepim kros, and guilty feeling. From diswan, toktok bilong Bible givim comfort taem hem sei wei for ‘fraet long Jehovah’ hem “healim bele bilong iu and strongim olketa bon bilong iu”!—Proverbs 3:7, 8.

Olketa bon nao frame for saportim body. Dastawe Bible storyim disfala toktok “olketa bon” long tokpiksa wei, for stand for full man—especially saed long man wea olketa deep feeling savve affectim hem. Bat hao nao wei for fraet long Jehovah savve “healim bele bilong iu”?

Olketa savveman bilong Bible garem olketa difren idea abaotem “bele” long disfala scripture. Wanfala sei bikos hem stap long “midol area bilong body,” datfala “bele” maet stand for evri important part bilong body. Nara savveman talem idea hao datfala word “bele” maet minim rope bilong bele long wei wea Ezekiel 16:4 iusim. Sapos diswan hem tru, toktok bilong Proverbs 3:8 maet mekhae long need bilong iumi for depend evribit long God—olsem wei wea wanfala baby wea stap yet long bele hem depend evribit long mami bilong hem for kaikai for stap laef. Nara idea moa hem hao “bele” long disfala scripture maet minim olketa masol and rope wea joinim masol long bon long body. Long wei wea disfala verse storyim, maet hem for markem olketa part hia witim “olketa bon”—olketa part bilong body wea moa strong.

Nomata wanem nao barava mining bilong hem, wanfala samting hem sure: For showimaot fraet long Jehovah witim respect hem nao wei bilong wisdom. For followim olketa mark bilong God savve helpem body bilong iumi stap healthy distaem. Winim datwan, hem savve mekem Jehovah appruvim iumi, wea bae lead long laef olowe long perfect health—saed long body and feeling—insaed long niu world bilong hem wea bae kam.—Isaiah 33:24; Revelation 21:4; 22:2.

[Piksa Credit Line long page 32]

Dr. G. Moscoso/SPL/Photo Researchers