Waswe, Iu Shud Isisi Nomoa?

LANTI pipol maet feel hao hem gud samting for pipol ting long olketa olsem man wea kwaet, and no feel nogud kwiktaem. Bat, samfala taem datfala fasin savve lead go long fasin for isisi. Bible hem sei: “Isisi fasin bilong stupid man bae spoelem olketa.” (Proverbs 1:32) Wanem nao datwan minim?

Olketa nara Bible version transleitim disfala first Hebrew word witim olketa toktok olsem “no kea” (American Standard Version), “bighed” (The New American Bible), and “no ting hevi.” (The New English Bible). So, fasin for isisi hem join witim lesy fasin and wei for no kea and hem join tu long stupid and krangge fasin.

Long first century, olketa Christian long kongregeson bilong Laodicea no laek for ting hevi long wei wea olketa short long spiritual samting. Olketa bighed for tingse olketa “no needim eni samting moa.” Jesus Christ stretem olketa, and talem olketa for kasem bak moa strong bilong olketa olsem Christian.—Revelation 3:14-19.

Wei for no ting hevi hem fasin bilong olketa pipol long taem bilong Noah tu. Olketa busy tumas witim evriday samting, “olketa kaikai and drink, olketa man marit and givim olketa woman for marit . . . , and olketa nating lisin gogo flood hem kam and swipim olketa go.” Jesus sei tu: “Olsem tu long taem wea Son bilong man bae stap moa.”—Matthew 24:37-39.

Olketa profesi bilong Bible wea fulfill finis showimaot hao iumi stap long taem wea “Son bilong man bae stap moa,” Jesus Christ. Iumi mas no garem rongfala wei for isisi olsem wei for no ting hevi, no kea, and bighed fasin.—Luke 21:29-36.