“Wanfala Naes Maunten Goat”
NAES hem wanfala word wea staka long iumi bae no ting for iusim long wanfala goat. Iumi maet tingim goat olsem gud animal wea savve kaikaim klosap evriting and provaedem meat wea teist naes and milk wea gud for health—bat iumi bae nating sei hem naes.
Nomata olsem, Bible sei wanfala waef hem olsem “wanfala mere deer wea iu savve lovem and wanfala naes maunten goat.” (Proverbs 5:18, 19) Solomon, wanfala wea raetem buk bilong Proverbs, savve interest tumas for lukluk long olketa animal bilong Israel, so hem mas garem gud reason for iusim disfala tokpiksa. (1 Kings 4:30-33) Maet, olsem dadi bilong hem David, hem lukluk gud long olketa maunten goat wea go evritaem long area raonem En-gedi, klosap long saedsea bilong Dead Sea.
Olketa smol grup bilong maunten goat from Desert Bilong Judea wea stap klosap, savve evritaem kam long springwata bilong En-gedi. From hem nomoa ples wea evritaem garem wata, En-gedi hem ples bilong olketa maunten goat for kasem wata for staka handred year. Tru nao, disfala nem En-gedi luk olsem garem mining “springwata bilong pikinini goat,” wea pruvim wei wea olketa young goat evritaem kam long disfala area. King David haed long hia from persecution bilong King Saul, nomata hem mas stap “long olketa open maunten area bilong olketa goat” olsem man wea ranawe.—1 Samuel 24:1, 2.
Long En-gedi iu still savve lukim wanfala mere ibex, or maunten goat, isisi chusim gud ples for wakabaot kamdaon long steep hill bihaenem wanfala man goat, for gogo long wata. Then iu savve start for minim nao wei wea mere ibex hem semsem witim wanfala loyal waef. Kwaet fasin bilong hem and naesfala lukluk bilong hem showimaot olketa fasin bilong woman. So disfala word “naes” mas minim naes fasin and naesfala lukluk bilong maunten goat.a
Wanfala mere ibex mas strong bat long semtaem naes. Olsem Jehovah talem long Job, maunten goat hem bornem pikinini long olketa bigfala ston, long olketa rok, ples wea hard for man kasem wea no staka kaikai stap and weather hem ova tumas. (Job 39:1) Nomata long olketa hard samting hia, hem kea for olketa pikinini bilong hem and teachim olketa for klaem and jamp midolwan olketa rok long wei wea careful olsem hem. Disfala ibex hem no fraet tu for protectim pikinini bilong hem from olketa enemy. Wanfala man lukim wanfala maunten goat hem faetem wanfala eagle for haf hour, taem pikinini bilong hem haed andanit long hem for protection.
Olketa Christian waef and mami planti taem mas bringimap pikinini bilong olketa insaed hardfala living. Olsem olketa maunten goat, olketa showim wei for sakrifaesim seleva and wei for no selfish taem olketa lukaftarem disfala responsibility from God. And olketa no fraet and waka hard for protectim pikinini bilong olketa from olketa spiritual danger. So, Solomon nating iusim disfala tokpiksa for daonem olketa woman, bat hem laek mekhae long naes fasin and naesfala wei bilong olketa woman—olketa spiritual fasin wea showaot nomata long barava hardfala living.
[Footnote]
a Olsem The New Brown-Driver-Briggs-Gesenius Hebrew and English Lexicon hem talem, olketa verse raonem disfala verse showimaot datfala Hebrew word chen, wea olketa transleitim “naes,” hem minim ‘fasin and lukluk wea naes.’
[Piksa long page 30]
Christian waef and mami showimaot spiritual fasin wea luk naes tumas taem hem duim responsibility bilong hem from God