Glory Bilong Jehovah Hem Shaen Long Pipol Bilong Hem
“Jehovah hemseleva bae kamap for iu wanfala laet wea bae go ahed for olowe.”—ISAIAH 60:20.
1. Long wanem wei nao Jehovah blessim pipol bilong hem wea faithful?
“JEHOVAH hem hapi long pipol bilong hem. Hem mekem olketa wea hambol luk naes witim salvation.” (Psalm 149:4) Hem nao samting wea man wea raetem psalm hem talem, and history pruvim hao toktok bilong hem tru. Taem pipol bilong Jehovah faithful, hem lukaftarem olketa, mekem olketa garem frut, and hem protectim olketa. Long taem bifor, hem mekem olketa winim olketa enemy. Distaem, hem keepim olketa strong long spiritual wei and promisim salvation long faondeson bilong sakrifaes bilong Jesus. (Romans 5:9) Hem duim olsem bikos olketa luk naes tumas long eye bilong hem.
2. Nomata olketa enemy againstim olketa, pipol bilong God feel sure long wanem samting?
2 Tru nao, long world wea fulap witim darkness, pipol bae againstim olketa wea “stap witim wei for lovem God.” (2 Timothy 3:12) Nomata olsem, Jehovah hem lukim olketa enemy hia and givim disfala warning: “Eni nation and eni kingdom wea bae no servem iu bae finis; and olketa nation seleva mas finis evribit.” (Isaiah 60:12) Distaem, olketa enemy iusim planti difren wei. Long samfala kantri, olketa trae for daonem or tambuim worship wea olketa tru Christian givim for Jehovah. Long samfala nara ples, samfala attakim olketa wea worshipim Jehovah and bonem property bilong olketa. Bat, no forget, Jehovah disaedem finis samting wea bae kamaot from wei wea olketa trae stopem will bilong hem for fulfill. Olketa enemy bae fail. Olketa wea faet againstim Zion, wea olketa pikinini bilong hem long earth piksarem, kanduit win. Datwan hem bigfala encouragement from nambawan God bilong iumi, Jehovah.
Kasem Blessing Winim Wanem Olketa Expectim
3. Wanem samting nao piksarem frut and naesfala lukluk bilong olketa wea worshipim Jehovah?
3 Hem stret for talem hao insaed olketa last day bilong disfala system, Jehovah blessim pipol bilong hem winim wanem olketa expectim. Hem barava mekem ples bilong worship bilong hem and olketa wea karem nem bilong hem for luk naes tumas. Olsem profesi bilong Isaiah talem, hem sei long Zion: “Long iu barava glory bilong Lebanon bae kam, juniper tree, ash tree and cypress long semtaem, for mekem sanctuary bilong mi luk naes tumas; and mi bae mekem ples bilong leg bilong mi garem glory.” (Isaiah 60:13) Olketa maunten wea bush wea grow gud kavarem olketa luk naes tumas. So olketa tree wea grow gud tumas barava fit for piksarem wei wea olketa wea worshipim Jehovah garem staka frut and luk naes tumas.—Isaiah 41:19; 55:13.
4. Wanem nao “sanctuary” and datfala “ples bilong leg bilong [Jehovah],” and wanem nao mekem olketa luk naes tumas?
4 Wanem nao “sanctuary” and “ples bilong leg bilong [Jehovah]” wea Isaiah 60:13 storyim? Toktok hia minim olketa courtyard bilong bigfala spiritual temple bilong Jehovah, hem nao arrangement for worshipim hem thru long Jesus Christ. (Hebrews 8:1-5; 9:2-10, 23) Jehovah talem finis purpose bilong hem for givim glory long datfala spiritual temple long wei for hipimap pipol from evri nation for kam and worship long there. (Haggai 2:7) Bifor, Isaiah lukim olketa crowd from evri nation kakam long haefala maunten bilong worship bilong Jehovah. (Isaiah 2:1-4) Planti handred year bihaen, aposol John lukim long vision “wanfala big crowd, wea no eni man savve kaontem, wea kamaot from evri nation and tribe and pipol and languis.” Olketa standap “front long throne bilong God . . . , givim holy service long hem day and naet long temple bilong hem.” (Revelation 7:9, 15) Taem olketa profesi hia fulfill long taem bilong iumi, iumiseleva lukim hao haos bilong Jehovah hem luk naes tumas.
5. Wanem nao bigfala change wea gud tumas wea kasem olketa pikinini bilong Zion?
5 Diswan hem bigfala change for Zion wea gud tumas! Jehovah hem sei: “Iu bae no olsem samwan wea olketa barava lusim and heitim, and no eniwan go thru long iu, bat mi bae mekem iu kamap wanfala samting for praod long hem for olowe, wanfala samting for givim hapi long evri genereson.” (Isaiah 60:15) Klosap long end bilong first world war, “datfala Israel bilong God” barava kasem wanfala trabol for lelebet taem. (Galatians 6:16) Hem feel olsem Jehovah “barava lusim” hem, bikos olketa pikinini bilong hem long earth no lukim klia wanem nao will bilong God for olketa. Then, long 1919, Jehovah strongim moa olketa anointed servant bilong hem, and start from datfala taem hem blessim olketa witim nambawan spiritual samting. Waswe, disfala promis no mekem iumi hapi? Jehovah bae ting long Zion olsem “wanfala samting for praod long hem.” Yes, olketa pikinini bilong Zion, and Jehovah seleva, bae praod long Zion. Hem bae “wanfala samting for givim hapi,” bigfala hapi. And datwan bae no for shortfala taem nomoa. Gudfala living bilong Zion, wea olketa pikinini bilong hem long earth piksarem, bae go ahed “long evri genereson.” Bae hem nating finis.
6. Hao nao olketa tru Christian iusim olketa gudfala samting bilong olketa nation?
6 Distaem, lisin long narafala promis from God. Jehovah talem Zion: “Iu bae susum milk bilong olketa nation, and susu bilong olketa king iu bae susum; and iu bae savve hao mi, Jehovah, mi nao Man Wea Sevem iu, and Strong Wan bilong Jacob, Wan Wea Baem Iu Bak.” (Isaiah 60:16) Hao nao Zion kaikaim “milk bilong olketa nation” and susum “susu bilong olketa king”? Long wei wea olketa anointed Christian and olketa “nara sheep,” wea fren bilong olketa, iusim olketa gudfala samting bilong olketa nation for mekem klinfala worship muv ahed. (John 10:16) Olketa contribution bilong selen wea pipol willing for givim hem help for mekem disfala preaching and teaching waka go ahed raonem full world. From olketa iusim niu technology long wisefala wei, olketa savve pablisim olketa Bible and Bible pablikeson long planti handred languis. Distaem, truth bilong Bible hem stap for moa pipol iusim winim enitaem bifor long history. Pipol long staka nation lanem hao Jehovah, wea baem bak olketa anointed servant bilong hem wea olsem prisoner long spiritual wei, hem nao Savior.
Wei wea Organization Hem Muv Ahed
7. Long wanem wei nao olketa pikinini bilong Zion barava muv ahed?
7 Jehovah mekem pipol bilong hem luk naes tumas long narafala wei. Hem blessim olketa witim wei wea organization bilong hem muv ahed. Long Isaiah 60:17 iumi read: “For changem copper mi bae tekem kam gold, and for changem iron mi bae tekem kam silver, and for changem wood, copper, and for changem olketa ston, iron; and mi bae appointim peace olsem olketa overseer bilong iufala and raeteous fasin olsem olketa man for givim waka for iufala.” For changem copper witim gold mekem hem moabeta, and hem semsem witim olketa nara material wea hem storyim. For fitim diswan, insaed olketa last day, Israel bilong God experiencem olketa change saed long organization for mekem hem moabeta. Tingim samfala example.
8-10. Storyim samfala samting insaed organization wea kamap moabeta start kam from 1919.
8 Bifor 1919, olketa member bilong kongregeson votem olketa elder and deacon wea lukaftarem kongregeson. Start long datfala year, “faithful and wise slave” appointim wanfala service director long each kongregeson for organizem preaching waka. (Matthew 24:45-47) Bat, long planti kongregeson diswan hem no mas gud bikos samfala elder wea olketa votem no barava saportim datfala preaching waka. Dastawe, long 1932, olketa kongregeson kasem instruction for finis for votem olketa elder and deacon. For changem datwan, olketa votem olketa man for serve long wanfala service komiti witim datfala service director. Datwan hem olsem “copper” changem “wood”—hem barava moabeta!
9 Long 1938, olketa kongregeson raonem world agree for acceptim wanfala niu arrangement, wea followim Bible long wei wea moa klos. Olketa givim responsibility for organizem kongregeson long wanfala company servant and samfala nara servant, wea faithful and wise slave nao appointim olketa. Wei for vote finis nao! Long disfala wei, olketa appointim evri servant long kongregeson long theocratic wei. Datwan hem olsem “iron” changem “olketa ston” or “gold” changem “copper.”
10 Kam kasem distaem, organization go ahed for muv ahed. Olsem example, long 1972 olketa luksavve hao for really followim wei bilong Christian kongregeson long first century, hem moabeta for garem wanfala body of elders for lukaftarem kongregeson wea kasem appointment long theocratic wei and wea no eniwan long olketa garem paoa ovarem narawan. And tu, samting olsem tufala year go finis, olketa muv ahed moa. Olketa mekem change long hu nao leadim olketa legal corporation, mekem Governing Body garem moa taem for tingim olketa spiritual samting bilong pipol bilong God and no busy witim olketa legal samting.
11. Hu nao bihaenem olketa change insaed organization bilong Jehovah, and wanem nao kamaot from olketa change hia?
11 Hu nao bihaenem olketa change hia? Hem Jehovah God nao. Hem nao datwan wea sei: “Mi bae tekem kam gold.” And hem nao datwan wea go ahed for sei: “Mi bae appointim peace olsem olketa overseer bilong iufala and raeteous fasin olsem olketa man for givim waka for iufala.” Tru nao, hem waka bilong Jehovah for lukaftarem pipol bilong hem. Wei wea organization hem muv ahed hem narafala wei wea hem mekem pipol bilong hem luk naes. And from diswan, Olketa Jehovah’s Witness kasem planti blessing. Long Isaiah 60:18, hem sei: “Bae raf fasin no stap moa long land bilong iu, wei for barava spoelem or brekdaon insaed long area bilong iu. And iu bae kolem olketa wall bilong iu Salvation and olketa gate bilong iu Praise.” Datfala toktok hem barava naes tumas! Bat hao nao diswan fulfill?
12. Hao nao peace hem kamap big midolwan long olketa tru Christian?
12 Olketa tru Christian barava luk long Jehovah for instruction and help, and Isaiah talem wanem nao kamaot from diswan: “Olketa son bilong iu bae kamap pipol wea Jehovah teachim, and peace bilong olketa son bilong iu bae kamap big.” (Isaiah 54:13) And tu, spirit bilong Jehovah hem stap long pipol bilong hem, and wanfala part bilong frut bilong datfala spirit hem peace. (Galatians 5:22, 23) Wei wea pipol bilong Jehovah garem peace hem olsem wanfala sef ples insaed disfala world wea raf tumas. Peace bilong olketa, wea garem faondeson long love wea olketa tru Christian garem for each other, hem example bilong kaen living iumi bae garem insaed long niu world. (John 15:17; Colossians 3:14) Each wan long iumi barava hapi for enjoyim and mekem datfala peace kamap, wea hem wanfala main part bilong spiritual paradaes bilong iumi and wea givim praise and honor long God bilong iumi!—Isaiah 11:9.
Laet Bilong Jehovah Bae Go Ahed for Shaen
13. Why nao iumi savve sure laet bilong Jehovah bae shaen for olowe long pipol bilong hem?
13 Waswe, laet bilong Jehovah bae go ahed for shaen long pipol bilong hem? Yes! Long Isaiah 60:19, 20, hem sei: “Long iu sun bae finis for olsem laet for day, and for shaen braet moon seleva bae finis for givim iu laet. And Jehovah mas kamap long iu wanfala laet for olowe, and God bilong iu samting wea mekem iu luk naes tumas. Sun bilong iu bae no go daon, and moon bilong iu bae no katdaon, bikos Jehovah hemseleva bae kamap for iu wanfala laet wea bae go ahed for olowe, and olketa day bilong sorre bilong iu samting wea kasem end finis.” Taem “sorre” bilong olketa wea olsem prisoner long spiritual wei hem finis long 1919, laet bilong Jehovah hem start for shaen long olketa. Winim 80 year bihaen, olketa go ahed yet for enjoyim favor bilong Jehovah taem laet bilong hem go ahed for shaen. And diswan bae no finis. Saed long olketa wea worshipim hem, God bilong iumi bae no “go daon” olsem sun or “katdaon” olsem moon. Bat, hem bae shaenim laet long olketa for olowe. Datwan hem wanfala nambawan promis for iumi wea stap insaed olketa last day bilong disfala world wea stap long darkness!
14, 15. (a) Long wanem wei nao evri pipol bilong God “raeteous”? (b) Olketa nara sheep luk forward long wanem important wei wea Isaiah 60:21 bae fulfill?
14 Distaem, lisin long nara promis wea Jehovah talem abaotem olketa wea stand for Zion long earth, datfala Israel bilong God. Isaiah 60:21 hem sei: “Saed long pipol bilong iu, evriwan long olketa bae raeteous; go kasem taem olowe olketa bae keepim datfala land, grow bilong samting wea mi plantim, waka bilong hand bilong mi, for mekem mi luk naes tumas.” Long 1919, taem olketa anointed Christian start for waka moa, olketa wanfala grup pipol wea difren tumas. Long world wea fulap witim sin, Jehovah “kolem olketa raeteous” long faondeson bilong strongfala faith bilong olketa long ransom sakrifaes bilong Christ Jesus. (Romans 3:24; 5:1) Then, olsem olketa Israelite wea kamap free from Babylon, olketa tekem wanfala “land,” wanfala spiritual land, or ples wea olketa bae waka wea olketa bae enjoyim wanfala spiritual paradaes. (Isaiah 66:8) Wei wea datfala land hem olsem paradaes bae nating finis bikos Israel bilong God olsem wanfala nation bae faithful olowe, no olsem Israel bifor. Faith, fasin for stand strong, and strong bilong olketa bae givim honor long nem bilong God for olowe.
15 Evri member bilong datfala spiritual nation insaed datfala niu covenant. Jehovah raetem law bilong hem long heart bilong each wan and long faondeson bilong ransom sakrifaes bilong Jesus, Jehovah forgivim sin bilong olketa. (Jeremiah 31:31-34) Hem kolem olketa raeteous olsem “olketa son” and hem tingim olketa olsem perfect taem hem deal witim olketa. (Romans 8:15, 16, 29, 30) Olketa fren bilong olketa, olketa nara sheep, kasem forgiveness for sin bilong olketa tu long faondeson bilong sakrifaes bilong Jesus and, olsem Abraham, God kolem olketa raeteous olsem olketa fren bilong Hem thru long faith. “Olketa wasim finis kaleko bilong olketa and mekem kamap white long blood bilong Lamb.” And olketa nara sheep hia luk forward long nara nambawan blessing. Bihaen olketa winim “datfala big trabol” or bihaen olketa resurrect, olketa bae lukim Isaiah 60:21 fulfill long really wei taem full earth hem kamap paradaes. (Revelation 7:14; Romans 4:1-3) Long datfala taem, “olketa wea garem kwaet fasin bae kasem earth and olketa bae kasem nambawan hapi long bigfala peace.”—Psalm 37:11, 29.
Increase Hem Go Ahed
16. Wanem nao spesol promis wea Jehovah mekem, and hao nao datwan fulfill?
16 Long last verse bilong Isaiah 60, iumi readim lastfala promis wea Jehovah mekem long disfala chapter. Hem sei long Zion: “Smol wan seleva bae kamap wan thousand, and wan wea no mas big bae kamap wanfala maeti nation. Mi, Jehovah, bae speedim diswan long taem bilong hem.” (Isaiah 60:22) Long taem bilong iumi, Jehovah keepim promis bilong hem. Taem olketa anointed wan start for waka moa long 1919, namba bilong olketa smol nomoa—wanfala barava “smol wan.” Namba bilong olketa kamap moa big taem samfala moa spiritual Israelite kam insaed. And then olketa nara sheep start for kam long olketa and namba bilong olketa go ahed for grow. Peace bilong pipol bilong God, datfala spiritual paradaes wea go ahed long “land” bilong olketa, hem pullim staka wea garem honest heart mekem datfala “smol wan” hem barava kamap “wanfala maeti nation.” Distaem, disfala “nation”—Israel bilong God and winim six million “man from difren ples” wea dedicate—hem garem moa pipol winim namba bilong pipol long planti kantri. (Isaiah 60:10) Olketa citizen bilong hem share for showimaot laet bilong Jehovah, and datwan nao mekem evriwan long olketa luk naes tumas long eye bilong hem.
17. Hao nao disfala study long Isaiah chapter 60 hem affectim iu?
17 Tru nao, hem strongim faith bilong iumi for tingim olketa main point bilong Isaiah chapter 60. Hem comfortim iumi for lukim hao from bifor kam, Jehovah savve hao pipol bilong hem bae kamap olsem prisoner long spiritual wei and then kamap gud moa. Iumi sapraes fogud for savve hao Jehovah lukim firstaem bigfala increase long namba bilong olketa tru worshiper long taem bilong iumi. And tu, hem barava comfortim iumi for remember hao Jehovah bae nating lusim iumi! Hem wanfala loving promis hao olketa gate bilong “datfala taon” bae stap open for welkamim olketa “wea garem fasin fitim laef olowe”! (Acts 13:48) Jehovah bae go ahed for shaen long pipol bilong hem. Zion bae go ahed olsem samting for praod long hem taem olketa pikinini bilong hem letem laet bilong olketa shaen moa and moa braet. (Matthew 5:16) Iumi barava disaed strong winim enitaem bifor for stap klosap long Israel bilong God and for barava tinghae long privilege bilong iumi for showimaot laet bilong Jehovah!
Waswe, Iu Savve Minim?
• Saed long wei wea pipol againstim iumi, iumi feel sure long wanem samting?
• Long wanem wei nao olketa pikinini bilong Zion ‘susum milk bilong olketa nation’?
• Long olketa wanem wei nao Jehovah ‘tekem kam copper for changem wood’?
• Isaiah 60:17, 21 mekhae long wanem tufala fasin?
• Hao nao datfala “smol wan” hem kamap “wanfala maeti nation”?
[Box/Olketa Piksa long page 18]
ISAIAH’S PROPHECY—Light for All Mankind
Information insaed olketa article hia hem kam from wanfala tok long 2001/02 “Olketa wea Teachim Word Bilong God” Distrik Convention. Long planti ples, long end bilong datfala tok, speaker hem releasem wanfala niu pablikeson wea garem title Isaiah’s Prophecy—Light for All Mankind, Volume Tu. Year bifor, olketa releasem Isaiah’s Prophecy—Light for All Mankind, Volume Wan. From olketa releasem disfala niu pablikeson, iumi garem wanfala ap-tu-date study long klosap evri verse long buk bilong Isaiah. Olketa pablikeson hia barava helpem iumi for minim and tinghae long profesi buk bilong Isaiah wea savve buildimap faith.
[Olketa Piksa long page 15]
Nomata pipol againstim olketa long raf wei, ‘Jehovah mekem pipol bilong hem luk naes tumas witim salvation’
[Olketa Piksa long page 16]
Pipol bilong God iusim olketa gudfala samting bilong olketa nation for mekem klinfala worship muv ahed
[Piksa long page 17]
Jehovah blessim pipol bilong hem witim peace and wei wea organization hem muv ahed