Lanem Leson From Datfala Stork
“NOMATA datfala stork long skae—hem savve long olketa taem bilong hem . . . Bat long saed bilong pipol bilong mi, olketa nating savve long judgment bilong Jehovah.” (Jeremiah 8:7) Profet Jeremiah talem toktok hia taem hem talemaot judgment bilong Jehovah long apostate pipol bilong Judah wea lusim God bilong olketa Jehovah and worshipim olketa difren god. (Jeremiah 7:18, 31) Why nao Jeremiah chusim stork olsem tokpiksa for teachim olketa Jew wea no faithful?
For olketa Israelite, stork, especially datfala white stork, hem samting wea olketa lukim olowe taem hem flae ovarem olketa area wea Bible storyim. Hebrew nem bilong disfala bigfala bird wea garem long leg for wakabaot insaed wata hem wanfala word wea minim “loyal wan; datwan bilong loving-kaeness.” Diswan barava fitim, bikos, long wei wea difren from staka nara bird, man and mere white stork stap tugeta for full laef bilong tufala. Bihaen olketa flae go long olketa hot ples for missim cold season, klosap evri stork savve go bak long sem ples evri year and planti taem olketa iusim sem nest wea olketa iusim bifor.
Loyal fasin bilong stork hem showaot long olketa nara spesol wei tu. Man and mere bird evriwan share for lukaftarem olketa egg and feedim olketa baby bilong tufala. Datfala buk Our Magnificent Wildlife explainim olsem: “Olsem parents, olketa stork garem spesol loyal fasin for each other. Wanfala man stork long Germany flae go bangam electric wire and hem dae. Partner bilong hem go ahed seleva for lukaftarem olketa egg for 3-fala day, insaed datfala taem wantaem nomoa hem go from nest for shortfala taem for lukaotem kaikai. . . . Long narataem, taem olketa sutim wanfala mere stork, dadi wan nao lukaftarem olketa baby.”
Tru nao, wei wea hem showim faithful fasin long partner bilong hem for full laef and loving kea for olketa baby, datfala stork barava followim mining bilong nem bilong hem—“loyal wan.” Dastawe, stork hem wanfala nambawan leson for olketa bilong Israel wea no faithful and wea bighed.
Planti pipol distaem tingim loyal fasin and faithful fasin olsem idea bilong bifor—wea naes bat no really fitim man for followim. Wei wea divorce, wei for lusim famili member, steal, and olketa narakaen wei for laea kamap moa big distaem showimaot hao pipol no tinghae long loyal fasin. Long wei wea difren, Bible mekhae long loyal fasin wea kamap from love and kaenfala fasin. Hem strong for encouragem olketa Christian for “werem niufala fasin wea God wakem fitim will bilong Hem long trufala raeteous fasin and loyal fasin.” (Ephesians 4:24) Tru nao, datfala niufala fasin hem helpem iumi for loyal, bat iumi savve lanem tu wanfala leson abaotem loyal fasin from datfala stork.