10. Why nao iumi fit for sei olketa anointed Christian “garem paoa ovarem olketa nation and king”?

¹⁰ From Jehovah hem “King bilong olketa nation,” hem givim assignment long Jeremiah for talemaot judgment message long olketa nation and king. (Jer. 10:​6, 7) Bat long wanem wei nao olketa anointed Christian “garem paoa ovarem olketa nation and king”? (Jer. 1:​10) Olsem profet Jeremiah bifor, olketa anointed Christian kasem assignment from Barava Haefala God for talemaot olketa judgment message. Olketa iusim Bible for talemaot God bae finisim olketa nation and king wea rul distaem, long taem wea hem markem and long wei wea hem laekem. (Jer. 18:​7-​10; Rev. 11:18) Olketa anointed Christian nating givap for duim assignment wea God givim for talemaot olketa judgment message evriwea long world.

14, 15. (a) Wanem gud samting nao kamaot from wei wea Jeremiah faithful for duim assignment bilong hem? (b) Pipol bilong God distaem luksavve long wanem samting abaotem preaching waka?

¹⁴ Jeremiah gohed for talem olketa warning and judgment message bilong Jehovah, bat hem tingim tu assignment bilong hem “for build and for plant.” (Jer. 1:​10) Gud samting kamaot from waka wea hem duim. Samfala Jew and olketa wea no Jew stap laef taem Jerusalem finis long 607 B.C.E. Samfala hem olketa Rechabite, Ebed-melech, and Baruch. (Jer. 35:19; 39:15-​18; 43:​5-7) Olketa hia wea fren witim Jeremiah olketa faithful and fraet long God. Olketa piksarem sekson wea garem hope for stap long earth wea fren witim olketa anointed Christian. Olketa anointed Christian barava hapi for strongim faith bilong “big crowd” hia. (Rev. 7:9) Big crowd wea fren witim olketa anointed Christian barava hapi tu for helpem pipol wea garem gudfala heart for savve long truth.