Bible Buk Namba 16​—Nehemiah

Man wea Raetem: Nehemiah

Ples Hem Raetem: Jerusalem

Taem Hem Finis Raetem: Bihaen 443 B.C.E.

Taem Hem Storyim: 456–bihaen 443 B.C.E.

NEHEMIAH, wea nem bilong hem minim “Jah Comfortim,” hem wanfala Jew servant bilong king Artaxerxes (Longimanus) bilong Persia. Hem man wea karem kap bilong king. Diswan hem position wea garem bigfala trust and honor, wea plande pipol laekem, from man olsem savve stap klosap long king taem hem hapi and redi for givim reward. Bat, Nehemiah hem wanfala faithful prisoner wea barava laekem Jerusalem winim olketa samting wea savve “mekem [hemseleva] hapi.” (Ps. 137:5, 6) Nehemiah nating tingim position or material samting, bat hem barava tingim wei for mekem worship bilong Jehovah kamap gud moa.

² Long year 456 B.C.E. olketa “wea stap yet from taem olketa prisoner,” wea hem nao smol sekson bilong olketa Jew wea go bak long Jerusalem, olketa no stap gud. Olketa garem barava sorre living. (Neh. 1:3) Wall bilong taon hem pisis, olketa enemy ting long pipol hia olsem samting wea bringim kam shame. Nehemiah hem barava feel nogud. Bat hem taem bilong Jehovah nao for duim samting long wall bilong Jerusalem. Nomata olketa enemy stap or nomoa, olketa mas buildim Jerusalem and wall for protectim, olsem taem for markem profesi wea Jehovah givim long Daniel abaotem kakam bilong Messiah. (Dan. 9:24-27) For fitim datwan, Jehovah leadim evri samting for happen, Hem iusim Nehemiah wea faithful and strong for duim will bilong Hem.

³ Iumi no daot hao Nehemiah nao man wea raetem buk wea garem nem bilong hem. Toktok for startim buk hia, “Toktok bilong Nehemiah son bilong Hacaliah,” and wei wea hem iusim disfala word mi long raeting, hem barava pruvim diswan. (Neh. 1:1) Firstaem, buk bilong Ezra and Nehemiah wanfala buk nomoa, wea olketa kolem Ezra. Bihaen, olketa Jew divaedem buk hia long First and Second Ezra, and bihaen moa, olketa changem nem Second Ezra for kamap Nehemiah. Samting olsem 12 year hem go pas midolwan evri samting wea happen long end bilong Ezra go kasem start bilong Nehemiah, wea storyim history from end bilong year 456 B.C.E. go kasem bihaen 443 B.C.E.—1:1; 5:14; 13:6.

⁴ Buk bilong Nehemiah hem wan mind witim evri narafala part bilong Scripture wea kam from God, wea hem stret for hem kamap part bilong hem. Hem storyim plande samting abaotem Law, olsem wei for no maritim olketa stranger (Deut. 7:3; Neh. 10:30), wei for kaon (Lev. 25:35-38; Deut. 15:7-11; Neh. 5:2-11), and Festival Bilong Olketa Smol Leaf Haos (Deut. 31:10-13; Neh. 8:14-18). And tu, disfala buk markem start bilong wei wea profesi bilong Daniel fulfill, hao olketa bae buildim moa Jerusalem, bat samfala bae againstim olketa, “long taem bilong trabol.”—Dan. 9:25.

⁵ Waswe, hem tru hao year 455 B.C.E. hem year wea Nehemiah gogo long Jerusalem for buildim moa wall bilong taon? Olketa pruv from history bilong olketa long Greece, Persia, and Babylon, point go long 475 B.C.E. olsem year wea Artaxerxes kasem paoa and 474 B.C.E. olsem first year wea hem rul.a There nao, mek-20 year bilong hem bae hem 455 B.C.E. Nehemiah 2:1-8 showimaot hao bihaen long cold season long datfala year, long month Nisan bilong olketa Jew, king letem Nehemiah, man wea karem kap bilong hem, for go bak and buildim moa Jerusalem, wall bilong hem, and olketa gate bilong hem. Profesi bilong Daniel talem hao 69 week bilong year, or 483 year, bae start “from taem wea toktok go aot for buildim moa Jerusalem go kasem Messiah datfala Leader”—profesi wea barava fulfill taem God anointim Jesus long 29 C.E., year wea fit evribit witim history bilong world and Bible.b (Dan. 9:24-27; Luke 3:1-3, 23) Tru nao, buk bilong Nehemiah and Luke barava join witim profesi bilong Daniel for showimaot hao Jehovah God hem Man Wea Talemaot and Fulfillim trufala profesi! Buk bilong Nehemiah hem barava part bilong olketa Scripture wea kam from God.

WEI WEA HEM HELPEM IUMI

¹⁶ Wei wea Nehemiah showimaot fasin for lovem God shud muvim evriwan wea lovem stretfala worship. Hem lusim bigfala position for kamap hambol overseer midolwan long pipol bilong Jehovah. Hem les for tekem olketa material samting wea hem fit for kasem, and hem talemaot stret hao fasin for lovem tumas material samting hem wanfala trap. Nehemiah mekhae long wei for strong for busy and sapotim worship bilong Jehovah long full nation. (5:14, 15; 13:10-13) Nehemiah hem nambawan example for iumi long wei wea hem nating garem selfish fasin and hem wise, man for duim samting, and hem nating fraet for duim raeteous samting long taem bilong danger. (4:14, 19, 20; 6:3, 15) Hem showimaot stretfala wei for fraet long God and hem interest for strongim olketa wea serve witim hem long faith. (13:14; 8:9) Hem barava trae hard for followim law bilong Jehovah, especially saed long tru worship and wei for rejectim olketa wei bilong nara nation, olsem wei for maritim heathen pipol.—13:8, 23-29.

¹⁷ Disfala buk showimaot klia hao Nehemiah garem bigfala savve long law bilong Jehovah, and hem barava iusim gud diswan. Hem kasem blessing from God bikos olsem Jehovah promisim long Deuteronomy 30:1-4, hem barava bilivim hao Jehovah bae duim samting long loyal wei for helpem hem. (Neh. 1:8, 9) Hem arrangem plande assembly, for helpem olketa Jew for savve long olketa raeting bilong bifor kam. Taem Nehemiah and Ezra readim Law, olketa barava careful for mekem Word bilong God hem isi for pipol minim and for followim.—8:8, 13-16; 13:1-3.

¹⁸ Wei wea Nehemiah depend evribit long Jehovah and askem samting long God long hambol wei shud encouragem iumi for garem semkaen fasin for depend long God thru long prea. Lukim hao olketa prea bilong hem givim glory long God, showaot hem luksavve long sin bilong pipol bilong hem, and ask strong for mekem nem bilong Jehovah holy. (1:4-11; 4:14; 6:14; 13:14, 29, 31) Wei wea disfala overseer strongim pipol bilong God for duim waka hem showaot long wei wea olketa pipol redi evritaem for followim wisefala wei wea hem lead and hapi wea olketa kasem taem olketa waka witim hem for duim will bilong God. Diswan hem nambawan example! Bat, taem wanfala wisefala overseer no stap, kwiktaem nomoa fasin for laekem tumas material samting, raverave fasin, and apostate kamap! Tru nao, diswan shud mekem evri overseer midolwan long pipol bilong God distaem for wekap, redi evritaem, strong for helpem olketa Christian brata bilong olketa, and garem gudfala tingting and strong for leadim olketa long olketa wei bilong trufala worship.

¹⁹ Nehemiah showimaot hem barava depend long Word bilong God. Hem wanfala teacher wea strong for teachim olketa Scripture and tu, hem iusim olketa for pruvim olketa laen dadi and service bilong olketa priest and Levite midolwan long pipol bilong God wea kamap gud moa. (Neh. 1:8; 11:1–12:26; Josh. 14:1–21:45) Diswan mas encouragem disfala smol sekson bilong olketa Jew. Hem strongim biliv bilong olketa long olketa nambawan promis wea olketa kasem bifor abaotem Seed and olketa gudfala samting wea Kingdom bilong Hem bae mekem kamap. Disfala hope bilong Kingdom hem encouragem olketa servant bilong God for faet strong for olketa samting bilong Kingdom and for busy for mekem trufala worship kamap evriwea long earth.

[Olketa Footnote]