Waswe, Iu Remember?

Waswe, iu enjoyim wei for readim olketa Wastaoa insaed olketa month wea go pas finis? Sapos olsem, trae for ansarem olketa kwestin hia:

• Haomas chapter nao insaed buk bilong Micah, long wanem taem nao profet Micah raetem, and wanem nao kamap long datfala taem?

Buk bilong Micah garem sevenfala chapter. Profet Micah raetem long mek-eit century B.C.E., long taem wea olketa Israelite divaed long tufala nation—Israel and Judah.—8/15, page 9.

• Wanem nao God askem from iumi, olsem Micah 6:8 showimaot?

Iumi mas “showimaot justice.” Wei bilong God for duim olketa samting hem nao mark bilong justice, so iumi mas followim olketa principle bilong hem for honest and faithful. Hem talem iumi “for lovem kaenfala fasin.” Olketa Christian showimaot loving-kaeness long wei for provaedem need bilong nara pipol, olsem long taem bilong olketa disaster. For iumi “no ova tumas taem iumi wakabaot witim” Jehovah, iumi mas luksavve long wanem iumi fit for duim and depend long hem.—8/15, page 20-2.

• Wanem nao wanfala Christian maet duim sapos hem lusim waka bilong hem?

Hem bae wise for lukluk gud long living bilong hemseleva. Maet hem fit for mekem living moa simpol long wei for muv go long haos wea smol lelebet or no keepim samfala samting wea hem no needim. Hem barava important for no wari tumas abaotem wanem hem needim each day, bat for trust long God for provaedem olketa need bilong hem. (Matthew 6:33, 34)—9/1, page 14-15.

• Wanem nao iumi shud tingim taem iumi givim or kasem olketa wedding present?

Man no need for baem olketa present wea kost tumas, and no eniwan shud expectim datwan. Samting wea muvim man for give nao hem important. (Luke 21:1-4) Hem no showimaot kaenfala fasin for talemaot nem bilong man wea givim present. For duim olsem savve mekem man feel shame. (Matthew 6:3)—9/1, page 29.

• Why nao iumi mas prea evritaem?

For prea evritaem savve helpem iumi for strongim wei for fren witim God and redyim iumi for feisim olketa strongfala test. Olketa prea bilong iumi savve short or long fitim need and living. Prea savve buildimap faith bilong iumi and helpem iumi for deal witim olketa problem.—9/15, page 15-18.

• Hao nao iumi savve minim 1 Corinthians 15:29, from samfala Bible transleison olketa transleitim “baptaes for olketa wea dae finis”?

Aposol Paul minim hao olketa anointed Christian baptaes, or go insaed, long wanfala living wea olsem living bilong Christ wea hem faithful go kasem taem hem dae. Bihaen, olketa bae resurrect and kamap spirit tu olsem Christ.—10/1, page 29.

• Hao nao iumi savve for kamap wanfala Christian hem minim moa samting winim wei for stap klia nomoa from olketa nogud samting long 1 Corinthians 6:9-11?

Aposol Paul no sei for wanfala Christian stap klia nomoa long wei for duim samting wea rong olsem fornication, worshipim idol, and wei for drunk. Hem showimaot hao man need for mekem samfala nara change, from hem go ahed for sei long next verse: “Evri samting hem fitim law for mi, bat no evri samting hem helpem man.”—10/15, page 18-19.

• Hu long samfala woman long taem bifor nao mekem heart bilong God hapi?

Midolwan long olketa hem tufala woman wea help for bonem pikinini, Shiphrah and Puah, wea no obeyim Pharaoh for killim dae olketa Israelite baby boy wea born. (Exodus 1:15-20) Datfala jury woman Rahab bilong Canaan haedem tufala spae bilong Israel. (Joshua 2:1-13; 6:22, 23) From hem showimaot gudfala tingting, Abigail sevem laef bilong planti pipol and stopem David for guilty long blood. (1 Samuel 25:2-35) Olketa hia showimaot nambawan example for olketa woman distaem.—11/1, page 8-11.

• Hao nao “from heven olketa star faet” againstim Sisera, wea Judges 5:20 talem?

Samfala tingse disfala toktok hem minim olketa kasem help from God. Samfala narawan sei diswan hem minim help from olketa angel, olketa meteorite foldaon, or wei wea Sisera depend long pipol wea worshipim olketa star for talemaot future. From Bible no talem klia olketa samting insaed long diswan, hem stret for iumi tingim disfala toktok minim God nao helpem army bilong Israel.—11/15, page 30.

• Why nao planti pipol sei olketa biliv long God taem wei for no interest long religion hem kamap big tumas?

Samfala go long church for luk aotem peace long mind. Olketa narawan hope for kasem laef olowe bihaen dae, or health, richfala samting, and wei for win. Long samfala ples, pipol hope for faendem samting wea bae satisfaem emti feeling long spiritual saed wea kamap from wei wea olketa free from olketa Communist idea. For savve long olketa reason hia savve helpem wanfala Christian for startim story wea bae givim gud samting long haosholder.—12/1, page 3.