6-8. Wanem profesi nao stap long Zephaniah 1:4-6, and hao nao datfala profesi fulfill long Judah bifor?

⁶ Taem hem talem profesi abaotem akson from God againstim olketa wea duim giaman worship, Zephaniah 1:4-6 sei olsem: “Mi bae putim aot hand bilong mi againstim Judah and againstim evri pipol bilong Jerusalem, and mi bae killim dae from disfala ples olketa wea stap yet bilong Baal, nem bilong olketa heathen-god priest witim olketa priest, and olketa wea baodaon antap long ruf long olketa army bilong heven, and olketa wea baodaon, wea mekem promis long Jehovah and mekem promis thru long Malcam; and olketa wea hol bak for followim Jehovah and wea no lukaotem Jehovah and no ask for hem.”

9. (a) Christendom hem guilty long wanem? (b) Long difren wei from olketa bilong Judah wea no faithful, wanem nao iumi shud disaed strong for duim?

⁹ Evri samting hia mekem iumi tingim Christendom, wea fulap witim giaman worship and wei for studyim olketa star. Wei wea olketa sakrifaesim planti million laef long altar bilong war wea olketa bigman bilong church saportim hem samting wea nogud tumas! Iumi mas no kamap olsem olketa bilong Judah wea no faithful, wea “hol bak for followim Jehovah,” wea no kea and no lukaotem hem moa or lukaotem gaedens bilong hem. Bat, letem iumi keepim faithful fasin bilong iumi long God.