“Thrifala Wise Man”​—Hu Nao Olketa?

Olketa piksa bilong taem wea Jesus born evritaem showimaot thrifala man wea werem longfala kaleko witim olketa camel bilong olketa wea kam long wanfala haos bilong olketa animal wea baby Jesus hem leidaon insaed box for putim kaikai bilong animal. Pipol kolem olketa visitor hia wea werem naesfala kaleko thrifala wise man. Wanem nao Bible talem abaotem olketa?

Olsem Bible talem, olketa wise man hia kam “from east,” and long there olketa lanem hao Jesus hem born. (Matthew 2:1, 2, 9) Hem mas tek longtaem tumas for olketa man hia for go kasem Judea. Gogo, taem olketa faendem Jesus, hem no wanfala baby wea just born long wanfala ples for keepim olketa animal. Nomoa, bat olketa man hia faendem Mary and “datfala young pikinini” insaed wanfala haos.—Matthew 2:11.

Bible kolem olketa man hia magi, or “sekson wea studyim star for savve long future,” bat hem no talem haomas nao olketa. The Oxford Companion to the Bible hem explainim: “Wei wea magic and wei for studyim star for savve long future join tugeta hem showaot long wei wea olketa visitor hia interest tumas long star wea leadim olketa go long Bethlehem.” Long kliafala wei Bible tok strong againstim evrikaen wei bilong magic and wei bilong olketa bilong Babylon for trae for kasem information from olketa star.—Deuteronomy 18:10-12; Isaiah 47:13.

Information wea olketa man hia kasem nating lead go long eni gud samting. Hem mekem wicked King Herod kros and jealous. Hem mekem Joseph, Mary, and Jesus for ranawe go long Egypt, and tu, wei for killim dae evri boy long Bethlehem wea “tu year and go daon.” Herod barava mek sure abaotem taem wea Jesus hem born from samting wea hem faendemaot from sekson wea studyim star for savve long future. (Matthew 2:16) From evri trabol wea visit bilong olketa man hia kosim, fitim iumi for sei hao datfala star wea olketa lukim witim datfala message abaotem “datwan wea born wea hem king bilong olketa Jew” kam from enemy bilong God, Devil Satan, wea want for killim dae Jesus.—Matthew 2:1, 2.