Mining Bilong Lord’s Prea for Iu
Disfala Lord’s Prea wea Jesus Christ storyim long Sermon Long Maunten, hem stap insaed Bible long Matthew chapter 6, verse 9 go kasem 13. Bifor Jesus talem disfala prea hem sei: “Taem iufala prea, no talem sem samting evritaem, olsem pipol bilong olketa nation duim, from olketa tingse olketa bae kasem ansa from olketa iusim staka toktok.”—Matthew 6:7.
Diswan showimaot klia, Jesus nating minim for iumi baeheartim Lord’s Prea. Bihaen moa hem talem disfala prea for difren sekson wea hem story witim. (Luke 11:2-4) Bat toktok bilong disfala prea wea stap long Gospel bilong Matthew and Luke hem difren. And tu, samfala prea wea Jesus and olketa disaepol bilong hem talem bihaen, no followim barava toktok bilong datfala Lord’s Prea.
Why nao Lord’s Prea stap insaed Bible? Long disfala prea, Jesus teachim iumi for prea long wei wea God bae acceptim. Insaed disfala prea iumi kasem ansa long samfala main kwestin abaotem laef. Bae iumi lukluk long each part bilong Lord’s Prea.
Wanem Nao Nem Bilong God?
“Dadi bilong mifala wea stap long heven, mekem nem bilong iu hem kamap holy.” (Matthew 6:9) Olketa firstfala toktok bilong disfala prea helpem iumi kam klos long God taem iumi story long hem olsem “Dadi bilong mifala.” Olsem wanfala pikinini wea feel klos long dadi wea lovem and minim hem, iumi savve story long Dadi bilong iumi long heven and feel sure hem bae willing for herem iumi. King David hem sing olsem: “O Datwan wea Herem prea, evri difren kaen pipol bae kam long iu.”—Psalm 65:2.
Jesus talem iumi for prea for nem bilong God for kamap holy. Bat hu nao nem bilong God? Bible talem ansa: “Iu, wea nem bilong iu Jehovah, iu nomoa Most Hae ovarem full earth.” (Psalm 83:18) Waswe, enitaem iu lukim disfala nem Jehovah insaed Bible?
For tok stret, nem bilong God, Jehovah, hem kamap klosap 7,000 taem insaed olketa oldfala raeting bilong Bible bifor. Bat, samfala man for transleit aotem disfala nem from Bible bilong olketa. So, hem stret for iumi prea for Creator bilong iumi for mekem nem bilong hem kamap holy. (Ezekiel 36:23) Wanfala wei for followim disfala prea nao for iusim disfala nem Jehovah taem iumi prea long God.
Wanfala woman wea nem bilong hem Patricia wea hem wanfala Catholic hem savve gud long Lord’s Prea. Hao nao tingting bilong hem taem wanfala Jehovah’s Witness showim nem bilong God long Bible? “Mi nating savve bilivim!” hem sei. “So mi tekem Bible bilong miseleva and mi lukim insaed. Then disfala Witness showim Matthew 6:9, 10 long mi and minim hao nem bilong God hem join witim Lord’s Prea. Mi barava hapi and mi askem hem for studyim Bible witim mi.”
Will Bilong God Bae Kamap Long Earth
“Mekem kingdom bilong iu kam. Mekem will bilong iu kamap long earth, olsem long heven.” (Matthew 6:10) Hao nao bae disfala part long prea bilong Jesus hem fulfill? Planti pipol ting heven hem ples wea garem peace. Bible storyim hao heven hem ples bilong Jehovah wea “holy and luk naes tumas.” (Isaiah 63:15) Dastawe iumi prea for will bilong God for fulfill long earth “olsem long heven”! Bat waswe, diswan bae kamap?
Profet bilong Jehovah, Daniel, talem diswan: “God bilong heven bae startim wanfala kingdom wea bae nating savve finis. And bae no eni nara pipol tekova long datfala kingdom. Hem bae smasem and finisim evri kingdom hia [long earth], and hemseleva nao bae stap olowe.” (Daniel 2:44) Klosap nao disfala Kingdom or gavman long heven, bae duim samting thru long raeteous rul bilong hem for mekem peace kamap long full world.—2 Peter 3:13.
Taem iumi prea for Kingdom bilong God for kam and for will bilong hem kamap long earth, diswan showimaot iumi garem faith diswan bae barava kamap. Christian aposol John raet olsem: “Mi herem wanfala bigfala voice from throne hem sei: ‘Lukim! Tent bilong God hem stap witim olketa man, and hem bae stap witim olketa, and olketa bae kamap pipol bilong hem. And God bae stap witim olketa. And hem bae aotem krae from eye bilong olketa, and dae bae nomoa, sorre and singaot and pain bae nomoa tu. Evri samting bifor hem finis nao.’” Then John sei moa: “And Datwan wea sidaon long throne hem sei: . . . ‘Raetem, from olketa toktok hia hem faithful and tru.’”—Revelation 21:3-5.
Prea for Olketa Need Bilong Iumi
From wanem Jesus talem long disfala prea, hem showimaot hao main samting wea iumi mas prea for hem nao nem and will bilong God. Bat, disfala prea go ahed for talem hao iumi savve askem Jehovah for olketa samting wea iumi needim.
First wan nao: “Givim mifala kaikai for tuday.” (Matthew 6:11) Diswan no minim iumi ask for olketa rich material samting. Jesus encouragem iumi for prea for “bred for disfala day for fitim need bilong disfala day.” (Luke 11:3) For fitim disfala Lord’s Prea, sapos iumi lovem and obeyim hem iumi savve garem faith hao God bae givim wanem iumi needim evriday sapos iumi prea for datwan.
Sapos iumi wari tumas abaotem problem saed long selen diswan savve mekem iumi for no tingim spiritual need bilong iumi and from diswan bae iumi no duim wanem God laekem iumi for duim. Bat sapos iumi putim wei for worshipim Jehovah olsem first samting long laef bilong iumi, bae iumi savve sure hem herem iumi taem iumi ask for olketa material samting olsem kaikai and kaleko. Jesus sei: “Go ahed for luk aotem firstaem kingdom and raeteous fasin bilong [God], and iufala bae kasem olketa narafala samting hia.” (Matthew 6:26-33) Hem no isi for luk aotem raeteous fasin bilong God, from iumi evriwan sin and needim forgiveness. (Romans 5:12) Disfala Lord’s Prea storyim datwan tu.
Prea for Forgiveness
“Forgivim olketa kaon bilong mifala, olsem mifala tu forgivim olketa wea garem kaon long mifala.” (Matthew 6:12) Long story bilong Luke abaotem disfala Lord’s Prea, olketa “kaon” hia nao “olketa sin.” (Luke 11:4) Waswe, hem tru Jehovah God bae forgivim olketa sin bilong iumi?
Nomata King David bilong Israel bifor hem duim samfala bigfala sin, hem repent and prea olsem: “Iu, O Jehovah nao garem gudfala fasin and redy for forgive; and loving-kaeness for olketa wea singaot long iu hem big tumas.” (Psalm 86:5) Datwan barava givim comfort! Dadi bilong iumi long heven hem ‘redy for forgivim’ sin bilong olketa wea singaot long hem and repent. Long sem wei wea wanfala kaon savve finis, Jehovah God savve barava forgivim olketa sin bilong iumi.
Bat, Jesus talem wanfala samting wea iumi mas duim firstaem: For God forgivim iumi, iumi mas forgivim olketa narawan. (Matthew 6:14, 15) Nomata olketa fren bilong datfala raeteous man Job, olketa tok spoelem hem, Job forgivim olketa and prea for olketa tu. (Job 42:10) Sapos iumi forgivim olketa wea sin againstim iumi, bae iumi mekem God hapi and bae iumi kasem mercy bilong hem.
From iumi savve God willing for herem prea bilong iumi, diswan shud muvim iumi for duim samting wea hem appruvim. And iumi savve duim olsem nomata iumi no perfect. (Matthew 26:41) Long hia tu Jehovah savve helpem iumi, olsem Jesus showimaot long end bilong disfala prea wea hem askem wanfala important samting.
Kasem Help for Aftarem Raeteous Fasin
“No letem mifala go insaed temptation, bat sevem mifala from wicked wan.” (Matthew 6:13) Jehovah no savve lusim iumi taem iumi kasem temptation or mekem iumi foldaon long sin. Word bilong hem sei: “Man no savve testim God witim nogud samting and God tu no testim eniwan.” (James 1:13) God letem iumi kasem test, bat hem savve sevem iumi from Main Wan wea Testim iumi—disfala “wicked wan” wea hem nao Devil Satan.
Aposol Peter encouragem olketa Christian: “Keepim gudfala tingting bilong iufala, luk aot gud. Enemy bilong iufala, Devil, hem wakabaot olsem wanfala lion wea singaot strong, and luk aotem samwan for kaikaim.” (1 Peter 5:8) Satan testim disfala perfect man Jesus Christ tu! Wanem nao goal bilong Devil? For mekem Jesus stop for worshipim Jehovah God. (Matthew 4:1-11) Sapos iu trae for servem God, goal bilong Satan hem for stopem iu tu!
Thru long disfala world wea stap long paoa bilong hem, Devil maet trae for testim iumi for tekpart long samfala samting wea God no acceptim. (1 John 5:19) So hem barava important for iumi tan go long God for hem helpem iumi, especially taem wanfala samting go ahed for testim iumi. And sapos iumi worshipim Jehovah followim Word bilong hem, Bible, bae hem sevem iumi taem hem helpem iumi for againstim Devil. Bible talem iumi: ‘God hem faithful, and hem bae no letem eni temptation kasem iumi wea iumi no fit for winim.’—1 Corinthians 10:13.
Important for Garem Faith Long God
Hem barava muvim feeling bilong iumi for savve hao Dadi bilong iumi long heven hem interest long iumi wanwan! Hem markem tu, Son bilong hem Jesus Christ for lanem iumi hao for prea. Diswan barava mekem iumi laek for mekem Jehovah God hapi. Hao nao iumi savve duim diswan?
Bible sei: “Sapos man no garem faith hem kanduit mekem [God] hapi, from man wea kam long God mas biliv hem stap and hem kamap datwan wea givim reward long olketa wea barava luk aotem hem.” (Hebrews 11:6) Hao nao for kasem kaen faith olsem? Bible hem sei: “Faith kamap bihaen man herem samting.” (Romans 10:17) Olketa Jehovah’s Witness hapi for story abaotem eniting long Bible witim eniwan wea laek for servem God witim trufala faith.
Mifala hope disfala story abaotem Lord’s Prea hem helpem iu for luksavve long mining bilong hem. Iu savve strongim faith bilong iu long God sapos iu kasem moa savve abaotem Jehovah and olketa blessing bilong hem for “olketa wea barava luk aotem hem.” Mifala invaetem iu for kasem moa savve abaotem hem and olketa purpose bilong hem mekem iu savve enjoyim klos wei for fren witim Dadi bilong iu long heven, for olowe.—John 17:3.
[Blurb long page 5]
“Dadi bilong mifala wea stap long heven, mekem nem bilong iu hem kamap holy. Mekem kingdom bilong iu kam. Mekem will bilong iu kamap long earth, olsem long heven. Givim mifala kaikai for tuday and forgivim olketa kaon bilong mifala, olsem mifala tu forgivim olketa wea garem kaon long mifala. And no letem mifala kasem temptation, bat sevem mifala from wicked wan.”—Matthew 6:9-13
[Piksa long page 7]
Jehovah givim wanem olketa wea lovem hem needim
[Piksa long page 7]
God helpem iumi tu for againstim Devil
[Piksa long page 7]
Olsem Job, sapos iumi forgivim olketa wea sin againstim iumi, iumi savve kasem mercy bilong God