From preaching waka hem important tumas, Jesus talem olketa disaepol for mas iusim gudfala tingting mekem olketa free for gohed duim disfala waka. Hem sei: “Taem olketa spoelem iufala long wanfala taon, ranawe go long nara taon bikos mi talem iufala tru samting: Bae hem hard for iufala kasem evri taon long Israel bifor Son bilong man hem kam.”—Matthew 10:23.

So nomata Jesus storyim olketa samting hia long olketa aposol, hem storyim samting wea bae happen long future. Jesus sei tu olketa disaepol bilong hem bae no preach long “evri taon long Israel bifor Son bilong man hem kam.” Diswan showimaot olketa disaepol bilong hem bae no finisim waka for preach abaotem Kingdom bilong God long full earth bifor Jesus Christ wea King hem kam for judgem pipol.