Waka Anda Long Yoke

9, 10. Long taem bifor, wanem nao yoke piksarem, and why nao Jesus invaetem pipol for karem yoke bilong hem?

⁹ Waswe, iu lukim hao insaed toktok long Matthew 11:28, 29, Jesus hem sei: “Karem yoke bilong mi and lanem samting from mi.” Long datfala taem, wanfala man maet feel olsem hem waka anda wanfala yoke. Long taem bifor, yoke hem piksarem wei for slave. (Genesis 27:40; Leviticus 26:13; Deuteronomy 28:48) Planti wakman wea Jesus meetim iusim wanfala really yoke long shoulder bilong olketa, for karem olketa hevi samting. Yoke wea olketa wakem gud bae sidaon gud long shoulder, bat sapos olketa no wakem gud bae hem savve aotem skin. From hem wanfala carpenter, maet Jesus bin wakem olketa yoke, and hem bae savve hao for wakem yoke wea sheip bilong hem “kaenfala.” Maet hem bin putim kaleko or leather long olketa ples wea tasim body for hem no feel soa.

¹⁰ Taem Jesus sei, “Karem yoke bilong mi,” maet hem minim hemseleva olsem man for wakem olketa gudfala yoke wea bae “kaenfala” long nek and shoulder bilong wanfala wakman. Dastawe, Jesus sei moa: “Lod bilong mi hem no hevi.” Diswan showimaot hao man bae no feel nogud taem hem iusim datfala yoke, and waka bilong hem bae no feel olsem waka bilong slave. Hem tru, taem hem invaetem olketa for acceptim yoke bilong hem, Jesus no offerim wei for kamap free from evri hevi wea stap long datfala taem. Nomata olsem, difren tingting wea hem talem bae barava strongim man. For mekem olketa change insaed living and wei bilong olketa for duim samting bae helpem olketa tu. Bat moa important, wanfala klia and strongfala hope bae helpem laef bilong olketa for no hevi tumas.

Iu Savve Kasem Strong

11. Why nao Jesus no minim wei for exchangem wanfala yoke for narawan?

¹¹ Lukim hao Jesus hem no sei pipol bae exchangem wanfala yoke for narawan. Rome bae go ahed kontrolem land, long sem wei wea olketa gavman distaem kontrolem olketa ples wea olketa Christian stap. Wei for kolektem tax bilong Rome long first-century bae no finis. Olketa problem saed long health and selen bae still stap. Wei for no perfect and sin bae go ahed for affectim pipol. Nomata olsem, olketa savve kasem strong sapos olketa followim teaching bilong Jesus, wea iumi distaem tu savve kasem.

12, 13. Wanem samting nao Jesus mekhae long hem wea savve strongim man, and wanem nao samfala duim?

¹² Wanfala important wei for minim tokpiksa bilong Jesus abaotem yoke hem kamap klia long saed bilong waka for mek-disaepol. Iumi savve hao main waka bilong Jesus hem for teachim olketa narawan, witim wei for mekhae long kingdom bilong God. (Matthew 4:23) So taem hem sei: “Karem yoke bilong mi,” diswan mas minim tu wei for followim hem long datfala sem waka. Record long Gospel showimaot hao Jesus muvim honest pipol for changem waka bilong olketa, wanfala main wari long laef bilong planti. Tingim taem hem sei long Peter, Andrew, James, and John: “Kam followim mi, and mi bae mekem iufala kamap fisherman for lukaotem man.” (Mark 1:16-20) Hem showimaot long olketa fisherman hia wei wea olketa bae barava satisfae sapos olketa duim waka wea hemseleva putim olsem first samting long laef bilong hem, and for duim anda long lead and help bilong hem.

¹³ Samfala long olketa Jew wea lisin long hem minim teaching bilong hem and followim. Lukim long mind bilong iu samting wea happen long saedsea wea iumi read abaotem long Luke 5:1-11. Fofala fisherman bin waka full naet bat olketa no kasem eni fish. Seknomoa, net bilong olketa fulap! Diswan no happen nating; hem kamap from samting wea Jesus duim. Taem olketa luk go long saedsea, olketa lukim hao staka pipol barava interest long teaching bilong Jesus. Datwan helpem olketa for minim samting wea Jesus talem olketa: “Start long distaem iu bae kasem olketa man wea laef.” Wanem nao olketa duim? “Olketa tekem kam bak olketa boat long land and lusim evri samting and followim hem.”

14. (a) Hao nao iumi savve faendem strong distaem? (b) Wanem gud nius for strongim man nao Jesus talemaot?

¹⁴ Iumi tu savve duim sem samting. Waka for teachim pipol truth from Bible hem still go ahed. Samting olsem six million Jehovah’s Witness evriwea long world acceptim datfala invitation bilong Jesus for “karem yoke bilong [hem]”; olketa kamap olketa “fisherman for kasem man.” (Matthew 4:19) Samfala mekem diswan kamap full-taem waka bilong olketa; olketa narawan duim best bilong olketa fitim taem wea olketa garem. Evriwan faendem hao diswan strongim olketa, wea katem daon hevi long laef bilong olketa. Insaed diswan hem wei for duim samting wea olketa enjoyim, talem olketa narawan gud nius—“gud nius bilong kingdom.” (Matthew 4:23) Hem evritaem naes for storyim gudfala nius bat especially disfala gud nius. Bible nao garem main important information wea iumi needim for pruvim long pipol hao olketa savve garem laef wea no garem tumas hevi.—2 Timothy 3:16, 17.

15. Hao nao iu savve kasem gud samting from teaching bilong Jesus abaotem living?

¹⁵ Long samfala wei, nomata pipol wea just start for lane abaotem Kingdom bilong God kasem gud samting from teaching bilong Jesus abaotem living. Planti fit for sei teaching bilong Jesus hem strongim and helpem olketa changem laef bilong olketa. Iu savve pruvim diswan seleva sapos iu lukluk long samfala principle saed long living wea stap long record bilong laef and ministry bilong Jesus, especially long Gospel bilong Matthew, Mark, and Luke.

Wanfala Wei for Faendem Strong

16, 17. (a) Wea nao iu savve faendem samfala long olketa main teaching bilong Jesus? (b) Wanem nao man need for duim for kasem strong from wei for followim olketa teaching bilong Jesus?

¹⁶ Long spring season bilong 31 C.E., Jesus givim tok wea kam kasem distaem pipol evriwea long world savve long hem. Olketa kolem datwan Sermon long Maunten. Hem stap long Matthew chapter 5 go kasem 7 and long Luke chapter 6, and hem storyim planti long olketa teaching bilong hem. Iu savve faendem olketa nara teaching bilong Jesus insaed olketa Gospel. Klosap evri samting hem talem hem barava klia, bat for followim insaed laef bilong iumi nao hem wanfala challenge. Hem gud for readim and ting raonem olketa chapter hia. Letem paoa bilong olketa idea bilong hem affectim tingting and fasin bilong iu.

¹⁷ Iumi savve arrangem olketa teaching bilong Jesus long planti difren wei. Iumi savve markem wanfala main teaching for evriday insaed long month, witim goal for followim insaed laef bilong iu. Hao nao for duim? No kwiktaem readim olketa point nomoa. Tingim datfala rich ruler wea askem Jesus Christ: “Wanem nao mi mas duim mekem mi kasem laef olowe?” Taem Jesus talem moa olketa important samting for duim insaed law bilong God, datfala man sei hem go ahed for duim finis olketa samting hia. Nomata olsem, hem luksavve hem need for duim moa samting. Jesus askem hem for trae hard moa for followim olketa principle bilong God long olketa gudfala wei, for kamap wanfala disaepol wea duim samting. Bat luk olsem datfala man no laek for duim datwan. (Luke 18:18-23) Dastawe, eniwan wea herem teaching bilong Jesus distaem mas tingim hao wei for agree witim teaching bilong Jesus hem difren from wei for duim samting followim, wea diswan nao bae katem daon hevi.

18. Showim hao iu savve iusim box for helpem iu.

¹⁸ For helpem iumi start for lukluk gud and followim olketa teaching bilong Jesus, lukim point namba 1 long box. Hem abaotem Matthew 5:3-9. Tru tumas, eniwan long iumi savve sidaon kwaet and barava ting raonem olketa nambawan kaonsel wea stap long olketa verse hia. Bat taem iu luk long olketa olsem wanfala sekson, wanem nao iu lanem abaotem wei for tingting? Sapos iu really want for winim wei wea tumas hevi affectim iu, wanem nao bae help? Hao nao wei for moa busy witim olketa spiritual samting and for letem olketa samting hia fulimap mind bilong iu, savve helpem iu? Waswe, iu need for katem daon eni wari long laef bilong iu mekem iu savve tingting moa strong long olketa spiritual samting? Sapos iu duim datwan bae hem mekem iu moa hapi distaem.

19. Wanem nao iu savve duim for kasem moa savve and wei for minim?

¹⁹ Nara samting stap wea iu savve duim. Story abaotem olketa verse hia witim nara servant bilong God, maet marit partner bilong iu, wanfala klos relative, or wanfala fren. (Proverbs 18:24; 20:5) Tingim hao datfala rich ruler hem askem narafala man—Jesus—wanfala important samting. Ansa wea hem kasem savve mekem moa big chance bilong hem for hapi and kasem laef olowe. Brata or sista wea iu storyim olketa verse hia witim bae no semsem witim Jesus, bat story bilong iufala abaotem teaching bilong Jesus bae helpem iutufala evriwan. Trae for no letem longtaem go pas bifor iu duim diswan.

20, 21. Wanem program nao iu savve followim for lane abaotem teaching bilong Jesus, and hao nao iu savve lukluk long wei wea iu kamap moabeta?

²⁰ Lukluk moa long datfala box, “Olketa Teaching for Helpem Iu.” Olketa arrangem olketa teaching hia long wei wea mekem iu savve ting raonem wanfala or moa teaching evriday. Iu savve firstaem readim toktok bilong Jesus insaed olketa verse wea olketa raetem. Then ting raonem toktok bilong hem. Ting raonem hao nao iu savve followim olketa insaed laef bilong iu. Sapos iu ting iu duim olsem finis, ting raonem moa for lukim wanem moa iu savve duim for followim datfala teaching from God. Trae for followim insaed datfala day. Sapos iu hard for minim or no savve lukim hao bae iu followim, trae for duim moa long next day. Bat no tingse iu need for followim datwan evribit bifor iu muv go long next teaching. Next day, iu savve traem narafala teaching. Long end bilong wanfala week, iu savve lukim hao nao iu win for followim foa or faevfala teaching bilong Jesus. Long mek-tu week addim go samfala moa evriday. Sapos iu miss for followim samfala teaching, no wikdaon. Evri Christian bae kasem diswan. (2 Chronicles 6:36; Psalm 130:3; Ecclesiastes 7:20; James 3:8) Go ahed for followim olketa teaching hia long mek-thri and foa week.

²¹ Bihaen tu-thri month, maet iu duim finis 31 point hia. Nomata olsem, hao nao bae feeling bilong iu from diswan? Waswe, bae iu no feel moa hapi, maet moa relax? Nomata sapos iu kamap gud lelebet nomoa, bae hevi bilong iu katdaon, or kamap moa isi for iu deal witim, and iu bae garem samting for helpem iu go ahed. Remember hao staka nara gudfala point long teaching bilong Jesus stap wea no long list. Hem bae gud for iu lukaotem olketa and trae for followim.—Philippians 3:16.

22. Wanem nao savve kamaot from wei for followim olketa teaching bilong Jesus, bat wanem saed moa hem fitim iumi for study abaotem?

²² Iu savve lukim hao yoke bilong Jesus, nomata hem garem responsibility, hem really kaen. Lod bilong teaching bilong hem and for olsem disaepol bilong hem, hem no hevi. From olketa samting wea hem lukim insaed laef bilong hem for 60 year, aposol John, wea klos fren bilong Jesus, agree taem hem sei: “Diswan nao mining bilong love bilong God, for iumi obeyim evri komandment bilong hem; and olketa komandment bilong hem no hevi.” (1 John 5:3) Iu savve feel sure olsem tu. Taem iu go ahed for followim olketa teaching bilong Jesus, bae iu lukim hao olketa samting wea mekem pipol feelim hevi distaem bae no mekem iu feelim hevi olsem. Iu bae lukim wei wea iu faendem bigfala help. (Psalm 34:8) Nomata olsem, narasaed long kaenfala yoke bilong Jesus hem stap for iu ting raonem. Jesus story tu hao hem garem ‘kwaet fasin and hambol long heart.’ Hao nao diswan join witim wei wea iumi lane from Jesus and followim hem? lumi bae storyim diswan long next article.—Matthew 11:29.

“Lanem Samting From Mi”

“Karem yoke bilong mi and lanem samting from mi, from mi garem kwaet fasin and mi hambol long heart, and iufala bae faendem samting for strongim soul bilong iufala.”—MATTHEW 11:29.

1. Why nao wei for lane from Jesus hem savve naes tumas and mekem man kamap moabeta?

TEACHING, tingting, and samting wea Jesus duim, hem evritaem stret and fitim. Laef bilong hem long earth hem short, bat waka wea hem duim givim hem reward and feeling for satisfae, and hem nating lusim hapi. Hem hipimap olketa disaepol and teachim olketa hao for worshipim God, lovem olketa man, and for winim world. (John 16:33) Hem fulimap heart bilong olketa witim hope and “givim laet long laef and wei for no savve rotten thru long gud nius.” (2 Timothy 1:10) Sapos iu ting long iuseleva olsem wanfala disaepol bilong hem, wanem nao iu ting hem minim for kamap wanfala disaepol? Iumi savve lanem wei for mekem living bilong iumi moabeta taem iumi lukim wei wea Jesus story abaotem olketa disaepol. Diswan minim wei for acceptim tingting wea hem garem and for followim samfala main principle.—Matthew 10:24, 25; Luke 14:26, 27; John 8:31, 32; 13:35; 15:8.

2, 3. (a) Wanem nao wanfala disaepol bilong Jesus? (b) Why nao hem important for iumi askem iumiseleva, ‘Mi kamap disaepol bilong hu?’

² Long olketa Christian Greek Scripture, disfala word wea olketa transleitim “disaepol” hem really minim man wea directim mind bilong hem long samting, or wan wea lane. Wanfala word wea garem sem mining hem insaed theme scripture, Matthew 11:29: “Karem yoke bilong mi and lanem samting from mi, from mi garem kwaet fasin and mi hambol long heart, and iufala bae faendem samting for strongim soul bilong iufala.” Tru nao, wanfala disaepol hem wanfala wea lane. Olketa Gospel planti taem iusim word “disaepol” for olketa klos follower bilong Jesus, wea gogo witim hem taem hem preach and wea lane from hem. Samfala pipol maet acceptim teaching bilong Jesus nomoa, samfala long secret wei. (Luke 6:17; John 19:38) Olketa wea raetem Gospel story tu abaotem “olketa disaepol bilong John [Baptaesa] and olketa disaepol bilong olketa Pharisee.” (Mark 2:18) From Jesus warnim olketa follower bilong hem for “lukaot . . . long teaching bilong olketa Pharisee,” iumi savve askem iumiseleva, ‘Mi kamap disaepol bilong hu?’—Matthew 16:12.

³ Sapos iumi disaepol bilong Jesus, sapos iumi lane finis from hem, then pipol bae feel strong long spiritual wei taem olketa stap witim iumi. Olketa bae luksavve iumi garem kwaet fasin and hambol heart. Sapos iumi garem hae position long waka ples, iumi dadi or mami, or iumi shepherd insaed Christian kongregeson, waswe, olketa wea iumi lukaftarem feelim hao iumi deal witim olketa long sem wei wea Jesus deal witim olketa wea hem lukaftarem?

Hao Jesus Deal Witim Pipol

4, 5. (a) Why nao hem no hard for lanem hao Jesus deal witim pipol wea garem olketa problem? (b) Wanem nao happen long Jesus taem hem kaikai long haos bilong Pharisee?

⁴ Iumi need for savve long wei wea Jesus deal witim pipol, especially olketa wea garem olketa serious problem. Diswan shud no hard samting for lanem; Bible garem staka story abaotem wei wea Jesus deal witim pipol, wea samfala long olketa safa tumas. Iumi bae lukim tu wei wea olketa leader bilong religion, especially olketa Pharisee, deal witim pipol wea garem semkaen problem. Wei for markem Jesus witim olketa Pharisee savve helpem iumi.

⁵ Long year 31 C.E., taem Jesus duim wanfala preaching gogo long Galilee, “wanfala long olketa Pharisee go ahed for askem [Jesus] for kaikai witim hem.” Jesus no hol bak for acceptim invitation hia. “So hem go insaed haos bilong disfala Pharisee and sidaon long tebol. And, lukim! wanfala woman wea pipol long taon savve long hem olsem wanfala sinner herem hem kaikai long haos bilong datfala Pharisee, and hem tekem kam wanfala botol oil wea smel naes tumas, and, bihaen hem go bihaen long leg bilong Jesus, hem krae and wata from eye bilong hem mekem leg bilong Jesus tuwet and hem waepem witim hair bilong hem. And tu, hem kissim leg bilong Jesus and oilim witim oil wea smel naes tumas.”—Luke 7:36-38.

6. Why nao maet woman hia wea hem “wanfala sinner” hem insaed haos bilong datfala Pharisee?

⁶ Waswe, iu savve tingim datwan? Wanfala buk minim diswan olsem: “Datfala woman (v.37) hem mekius long kastom bilong datfala taem wea letem poor pipol for go insaed kaen feast olsem for kasem samfala leftova kaikai.” Diswan maet reason why man wea no kasem invitation savve go insaed. Maet olketa narawan tu stap wea hope for kasem leftova bihaen long feast. Nomata olsem, samting woman hia duim hem difren. Hem no lukluk nomoa and weit for feast hem finis. Hem garem nogud nem, olsem “wanfala sinner” wea staka savve long hem dastawe Jesus sei hem savve long ‘olketa sin bilong hem wea planti.’—Luke 7:47.

7, 8. (a) Sapos sem samting wea Luke 7:36-38 storyim hem kasem iumi, wanem nao maet iumi duim? (b) Hao nao Simon hem feel?

⁷ Tingim sapos iu stap long datfala taem and iu nao Jesus. Wanem nao bae iu duim? Waswe, bae iu feel nogud taem disfala woman kam long iu? Hao nao kaen samting olsem bae affectim iu? (Luke 7:45) Waswe, bae iu feel kros?

⁸ Sapos iu bin wanfala long olketa nara guest, maet iu tu ting olsem Simon datfala Pharisee? “Taem Pharisee wea invaetem hem lukim diswan, hem ting olsem long hemseleva: ‘Disfala man, sapos hem wanfala profet, bae hem savve hu nao disfala woman and fasin bilong hem, hao hem wanfala sinner.’” (Luke 7:39) Long wei wea difren, Jesus hem man wea barava kea long pipol. Hem minim living bilong woman hia and feelim pain bilong hem. Iumi no savve hao nao gogo hem garem laef bilong sin. Sapos hem really wanfala jury woman, luk olsem olketa man long taon, olketa Jew wea strong for worship, nating helpem hem.

9. Wanem nao Jesus duim, and wanem nao maet kamaot from diswan?

⁹ Bat Jesus laek for helpem hem. Hem talem woman hia: “Olketa sin bilong iu kasem forgiveness.” Then hem sei moa: “Faith bilong iu hem sevem iu; go long peace.” (Luke 7:48-50) Story hem end long hia. Samwan maet sei Jesus no mas helpem woman hia. Hem blessim hem and sendem hem awe. Waswe, iu ting woman hia nating changem nogud living bilong hem? Nomata iumi hard for sure long diswan, lukim nextfala toktok bilong Luke. Hem storyim hao Jesus hem gogo “from taon tu taon and from vilij tu vilij, for preach and talemaot gud nius bilong kingdom bilong God.” Luke reportim tu hao “samfala woman” stap witim Jesus and olketa disaepol bilong hem, “wea go ahed for provaed for olketa from samting [olketa woman hia] garem.” Maet disfala woman wea repent and tinghae hem wanfala long olketa hia, wea followim nao living wea mekem God hapi witim klinfala conscience, garem niu purpose long laef, and garem love for God wea barava moa deep.—Luke 8:1-3.

Hao Jesus Difren From Olketa Pharisee

10. Why nao hem gud samting for ting raonem story bilong Jesus and datfala woman long haos bilong Simon?

¹⁰ Wanem nao iumi savve lanem from disfala story? Hem muvim feeling bilong iumi, hem tru? Tingim iuseleva insaed haos bilong Simon. Hao nao bae iu feel? Waswe, bae iu duim sem samting Jesus duim, or bae iu feel lelebet olsem man wea invaetem hem, datfala Pharisee? Jesus hem Son bilong God, so iumi kanduit garem feeling and duim samting long barava sem wei olsem hem. Long narasaed, maet iumi les for sei iumi olsem Simon, datfala Pharisee. Staka bae shame for sei olketa olsem Pharisee.

11. Why nao iumi bae no laek for olsem olketa Pharisee?

¹¹ From wanem Bible and olketa savveman talem, iumi lukim hao olketa Pharisee barava tinghae long olketa seleva olsem pipol for protectim pablik living and wei wea kantri stap gud. Olketa no satisfae hao Law bilong God hem klia and isi for pipol minim. Taem olketa tingse Law no klia, olketa trae for talem hao nao for followim, wea mekem no eni need stap for pipol iusim conscience. Olketa leader bilong religion hia trae for mekem law for evrikaen fasin, nomata olketa samting wea no important nomoa.a

12. Hao nao olketa Pharisee ting long olketa seleva?

¹² Datfala man for raetem history long first century, Josephus, hem showimaot klia wei wea olketa Pharisee ting long olketa seleva olsem olketa wea kaen, isi witim pipol, followim justice, and fitim waka wea olketa duim. Iumi sure samfala long olketa olsem. Maet iu tingim Nicodemus. (John 3:1, 2; 7:50, 51) Gogo, samfala long olketa hapi for acceptim Christian wei. (Acts 15:5) Datfala Christian aposol Paul raet olsem abaotem samfala Jew, olsem olketa Pharisee: “Olketa garem strong for God; bat wea no followim stretfala savve.” (Romans 10:2) Bat, olketa Gospel storyim olketa olsem hao pipol lukim olketa—praod, raf, tingse olketa seleva raeteous, lukaotem rong, judgem and daonem pipol.

Hao Jesus Ting Long Olketa

13. Wanem nao Jesus talem abaotem olketa Pharisee?

¹³ Jesus tok stret againstim olketa scribe and Pharisee olsem olketa hypocrite. “Olketa taemapem olketa hevi lod and putim antap shoulder bilong olketa man, bat olketa seleva no willing for muvim witim finger bilong olketa.” Tru nao, lod hem hevi, and yoke wea olketa putim long pipol hem hard tumas. Jesus go ahed for kolem olketa scribe and Pharisee “krangge.” Wanfala krangge man hem wanfala danger long community. Jesus kolem olketa scribe and Pharisee tu olketa “blind guide” and talemaot klia hao olketa “nating tingim olketa moa important samting bilong Law, olsem, justice and mercy and faithful fasin.” Hu nao bae laekem Jesus for ting long hem olsem wanfala Pharisee?—Matthew 23:1-4, 16, 17, 23.

14, 15. (a) Taem wea Jesus kaikai witim Matthew Levi hem showimaot wanem samting abaotem wei bilong olketa Pharisee? (b) Olketa wanem important leson nao iumi lanem from disfala story?

¹⁴ Klosap evriwan wea readim olketa Gospel savve lukim wei wea klosap evri Pharisee savve judge tumas. Bihaen Jesus invaetem Matthew Levi, datfala man for kolektem tax, for kamap disaepol, Levi wakem wanfala big feast for hem. Datfala story sei: “From diswan olketa Pharisee and scribe start for komplen long olketa disaepol bilong hem, and sei: ‘Why nao iufala kaikai and drink witim olketa man for tekem tax and olketa sinner?’ Jesus sei long olketa: ‘. . . Mi kam for kolem, no pipol wea raeteous, bat olketa sinner for repent.’”—Luke 5:27-32.

¹⁵ Levi hem minim nara samting Jesus talem long datfala taem: “So, go, and lanem mining bilong diswan, ‘Mi wantem mercy, and no sakrifaes.’” (Matthew 9:13) Nomata olketa Pharisee sei olketa biliv long olketa raeting bilong olketa Hebrew profet, olketa nating acceptim toktok hia wea kam from Hosea 6:6. Sapos olketa bae fail long samfala fasin, olketa mek sure hem from olketa barava strong for obeyim kastom. Each wan long iumi savve askem seleva, ‘Waswe, pipol savve long mi olsem wan wea strong tumas long samfala rul, wea kam from tingting bilong miseleva or wea hem wei bilong pipol raonem mi? Or waswe, pipol ting long mi olsem man wea showaot mercy and kaenfala fasin?’

16. Wanem nao wei bilong olketa Pharisee, and hao nao iumi savve no olsem olketa?

¹⁶ Tokdaonem, tokdaonem, tokdaonem. Hem nao wei bilong olketa Pharisee. Olketa Pharisee lukaotem evri mistek—tru wan or wan wea olketa tingse nomoa. Olketa mekem pipol feel olsem olketa shud defendim olketa seleva and olketa evritaem talem wei wea olketa rong. Olketa Pharisee praod long wei wea olketa savve givim mek-ten part bilong olketa barava smol herb olsem mint, dill, and cumin. Olketa show-off witim wei for holy thru long kaleko and trae for leadim datfala nation. Tru nao, sapos iumi laekem samting iumi duim for olsem example bilong Jesus, iumi mas stap klia from wei for evritaem lukaotem and mekhae long mistek bilong nara pipol.

Long Wanem Wei Nao Jesus Stretem Olketa Problem?

17-19. (a) Explainim hao Jesus hem stretem wanfala problem wea savve kamap serious tumas. (b) Wanem samting abaotem disfala problem nao hem putim bigfala hevi long woman hia? (c) Sapos iu stap long datfala taem wea woman hia kam long Jesus, wanem nao bae iu duim?

¹⁷ Wei bilong Jesus for stretem olketa problem hem difren tumas from wei bilong olketa Pharisee. Tingim hao Jesus stretem wanfala problem wea savve kamap serious tumas. Hem abaotem wanfala woman wea blood kamaot from hem for 12 year. Iu savve readim disfala story long Luke 8:42-48.

¹⁸ Story bilong Mark sei disfala woman hem “fraet and seksek.” (Mark 5:33) Why? Iumi sure diswan hem bikos hem savve hem brekem Law bilong God. Olsem Leviticus 15:25-28 talem, woman wea blood kamaot from hem, hem no klin, nomata hao long diswan. Evriting hem tasim and evri pipol wea tasim hem bae kamap dirty. For kam long Jesus, disfala woman mas stragol thru long datfala crowd. Taem iumi readim disfala story 2,000 year bihaen, problem bilong woman hia hem muvim heart bilong iumi.

¹⁹ Sapos iu stap long datfala day, hao nao bae iu ting long diswan? Wanem nao iu bae talem? Lukim hao Jesus deal witim woman hia long kaen, loving wei, hem tingim feeling bilong woman, nating talem eniting abaotem eni problem woman hia maet kosim.—Mark 5:34.

20. Sapos Leviticus 15:25-28 hem wanfala law for distaem, wanem challenge nao maet iumi feisim?

²⁰ Waswe, iumi savve lanem samting from story hia? Tingim sapos iu wanfala elder insaed Christian kongregeson distaem. And tu, hao sapos Leviticus 15:25-28 hem wanfala law for olketa Christian followim and wanfala Christian woman hem brekem disfala law, and hem feel fraet tumas. Wanem nao bae iu duim? Waswe, iu bae mekem hem shame long wei for givim hem strong kaonsel front long pipol? “Bae mi nating duim datwan!” iu sei strong olsem. “For followim example bilong Jesus, mi bae trae evribit for showaot kaen fasin, love, tingim feeling and need bilong narawan.” Gud tumas! Bat, challenge nao hem for duim, for followim example bilong Jesus.

21. Wanem nao Jesus teachim pipol abaotem datfala Law?

²¹ Main point hia hem hao Jesus mekem pipol kasem moa strong and moa hapi. Taem Law bilong God tok stret, mining bilong hem barava klia. Sapos hem luk olsem man seleva mas disaed hao for followim, pipol mas iusim conscience bilong olketa and savve showim love for God thru long wanem olketa disaedem. Law letem olketa for disaed seleva. (Mark 2:27, 28) God lovem pipol bilong hem, evritaem duim samting for helpem olketa, and hem showim mercy taem olketa mistek. Jesus tu olsem.—John 14:9.