Bible Buk Namba 59​—James

Man wea Raetem: James

Ples Hem Raetem: Jerusalem

Taem Hem Finis Raetem: Bifor 62 C.E.

“HEM kamap krangge nao.” Hem nao tingting bilong olketa relative bilong Jesus abaotem hem. Taem hem duim ministry bilong hem long earth, “olketa brata bilong hem no showimaot faith long hem,” and James, witim Joseph, Simon, and Judas, no midolwan long olketa firstfala disaepol bilong Jesus. (Mark 3:21; John 7:5; Matt. 13:55) Wanem nao pruv wea showimaot James, disfala haf brata bilong Jesus, hem raetem disfala buk long Bible wea nem followim hem?

² Record hem showim hao James lukim Jesus wea resurrect, and diswan mekem hem barava biliv evribit Jesus nao datfala Messiah. (1 Cor. 15:7) Acts 1:12-14 talem hao bifor Pentecost, Mary and olketa brata bilong Jesus hipap long Jerusalem for prea witim olketa aposol long wanfala rum antap. Bat, waswe, aposol wea garem nem James nao raetem leta hia? Nomoa, from disfala man for raet hem no talem hem wanfala aposol, bat ‘wanfala slave bilong Lord Jesus Christ.’ And tu, firstfala toktok bilong Jude hem klosap semsem witim James, wea storyim Jude (or Judas) olsem “wanfala slave bilong Jesus Christ, bat brata bilong James.” (Jas. 1:1; Jude 1) From diswan iumi savve sure James and Jude, olketa really haf brata bilong Jesus, raetem tufala buk long Bible wea nem followim tufala.

³ James hem barava fit for raetem wanfala leta bilong kaonsel long Christian kongregeson. Kongregeson long Jerusalem barava respectim hem olsem wanfala overseer. Paul story abaotem ‘James wea brata bilong Lord’ olsem wanfala “post” long kongregeson witim Cephas and John. (Gal. 1:19; 2:9) Wei wea James garem bigfala waka showaot taem Peter sendem message long “James and olketa brata” bihaen hem kamaot from prison. And tu, James nao man wea toktok for “olketa aposol and olketa older man” taem Paul and Barnabas go long Jerusalem for savve long wanem olketa disaedem abaotem wei for circumcise. Disfala leta bilong James and samting wea olketa disaedem start witim disfala toktok, “Greetings!”—narafala samting wea showimaot sem man nao hem raetem.—Acts 12:17; 15:13, 22, 23; Jas. 1:1.

⁴ Man for raetem history Josephus talem iumi hao Hae Priest Ananus (Ananias), wanfala Sadducee, garem blame for killim dae James witim ston. Diswan happen bihaen dae bilong governor bilong Rome, Festus, olsem long 62 C.E., and bifor Albinus, man wea changem hem, and tekem position bilong hem.a Bat wanem taem nao James hem raetem disfala leta? James raetem leta bilong hem from Jerusalem long “twelvfala tribe wea go stap olobaot,” really, “(olketa) wea gogo olobaot.” (Jas. 1:1, footnote) Hem tekem lelebet taem for disfala Christian Wei for go aot bihaen olketa kasem holy spirit long 33 C.E., and hem needim taem tu, for olketa nogud problem kamap wea disfala leta hem storyim. So, disfala leta showimaot hao olketa Christian no stap olsem smolfala grup nomoa bat olketa organize olsem olketa kongregeson wea garem mature “older man” wea fit for prea and sapotim olketa wik wan. And tu, inaf taem go pas finis for olketa insaed kongregeson for kamap wik and followim kastom. (2:1-4; 4:1-3; 5:14; 1:26, 27) Luk olsem, James hem raetem leta bilong hem maet bifor 62 C.E., sapos story bilong Josephus abaotem dae bilong Festus long 62 C.E. hem tru.

⁵ Olketa pepa olsem Vatican No. 1209, Sinaitic, and Alexandrine showimaot buk bilong James hem tru. Hem stap insaed tenfala buk from bifor winim datfala Council bilong Carthage 397 C.E. Plande taem olketa man wea raet abaotem Bible talem toktok from James. Hem klia hao leta bilong James garem wan mind witim narafala part bilong Holy Scripture.

⁶ Why nao James hem raetem disfala leta? Taem iumi lukluk gud long disfala leta hem showimaot hao living insaed kongregeson hem mekem olketa problem kamap for olketa brata. Christian mark hem start for gogo daon, yes, hem finis, mekem samfala duim spiritual adultery from olketa fren witim world. Samfala talem hao leta bilong James wea encouragem faith thru long olketa waka hem finisim nao olketa raeting bilong Paul wea sei salvation hem thru long faith and no from olketa waka, and samfala willing tumas for sapotim diswan. Bat, disfala leta showimaot hao James talem wei wea olketa waka sapotim faith, no from toktok nomoa, bat long kliafala wei Paul hem tok abaotem olketa waka bilong Law. James talem wei wea faith hem showaot klia, and addim go samfala moa information wea sapotim Paul. Kaonsel bilong James hem fitim olketa problem wea kasem olketa Christian evriday.

⁷ For strongim olketa toktok abaotem faith, patient fasin, and fasin for stand strong, James iusim olketa tokpiksa wea fitim living, olsem olketa animal, ship, farm, and plant. Wei wea hem followim sem wei for teach olsem Jesus hem mekem kaonsel bilong hem garem moa paoa. Disfala leta mekem iumi tingim hao James savve tumas long olketa samting wea muvim man.

WEI WEA HEM HELPEM IUMI

¹⁵ Nomata James talem nem bilong Jesus tufala taem nomoa (1:1; 2:1), hem talem plande gudfala wei for iusim teaching bilong Masta. Diswan showaot taem iumi markem leta bilong James witim datfala Sermon long Maunten. Long semtaem, nem bilong Jehovah hem stap 13-fala taem (New World Translation), and hem strongim olketa promis bilong hem olsem reward for olketa Christian wea keepim faith. (4:10; 5:11) James hem iusim plande tokpiksa and toktok from olketa Hebrew Scripture for showimaot gudfala kaonsel bilong hem. Hem showimaot wea nao hem tekem olketa toktok taem hem iusim samfala word olsem: “fitim disfala scripture,” “disfala scripture hem fulfill,” and “scripture hem sei”; and hem talem hao for followim olketa scripture hia long Christian living. (2:8, 23; 4:5) For mekem klia olketa point long kaonsel and for buildimap faith long Word bilong God olsem wanfala buk wea garem wan mind, James hem story abaotem waka bilong faith bilong Abraham and Rahab, fasin bilong Job for stand strong, and Elijah wea depend long prea.—Jas. 2:21-25; 5:11, 17, 18; Gen. 22:9-12; Josh. 2:1-21; Job 1:20-22; 42:10; 1 Ki. 17:1; 18:41-45.

¹⁶ Barava important kaonsel bilong James hem for kamap pipol wea obeyim word and no herem nomoa, for pruvim faith thru long olketa raeteous waka, for tingim olsem hapi samting taem iumi kasem difren kaen test, gohed for askem God for wisdom, evritaem kam klosap long God thru long prea, and for followim law bilong king, “Iu mas lovem neiba bilong iu olsem iuseleva.” (Jas. 1:22; 2:24; 1:2, 5; 4:8; 5:13-18; 2:8) Hem givim strongfala warning againstim rong teaching, for iusim tongue long nogud wei, for favorim eniwan long kongregeson, barava wantem samting wea body laekem, and for trustim olketa rich samting wea bae finis. (3:1, 8; 2:4; 4:3; 5:1, 5) James tok stret hao wei for fren witim world hem olsem iumi duim adultery long spiritual wei and kamap enemy bilong God, and hem minim gudfala wei for worship wea klin front long eye bilong God: “for lukaftarem olketa pikinini wea no garem dadi and mami and olketa widow woman wea kasem hardfala taem, and for stap klin from world.” (4:4; 1:27) Kaonsel hia hem gud and isi for minim, and samting wea fit for kam from wanfala “post” bilong Christian kongregeson bifor. (Gal. 2:9) Kaenfala message bilong hem gohed for leadim olketa Christian long hardfala taem distaem, from hem “wisdom from antap,” wea mekem grow “frut bilong raeteous fasin.”—3:17, 18.

¹⁷ James hem want for helpem olketa brata bilong hem for kasem goal bilong laef insaed Kingdom bilong God. So hem encouragem olketa: “Iufala tu showimaot patient fasin; strongim heart bilong iufala, from taem wea Lord bae stap moa hem klosap nao.” Olketa bae hapi sapos olketa stand strong bikos wei wea God acceptim olketa minim olketa bae kasem “crown bilong laef, wea Jehovah hem promisim for olketa wea gohed for lovem hem.” (5:8; 1:12) So promis bilong God abaotem crown bilong laef—maet laef wea kanduit dae long heven or laef olowe long earth—hem strongfala reason for stand strong witim olketa waka bilong faith. Disfala gudfala leta bae encouragem evriwan for kasem goal bilong laef olowe nomata long heven or insaed niu world bilong Jehovah, wea Lord Jesus Christ, datfala Kingdom Seed bae rulim.—2:5.

[Footnote]