Respectim Olketa Hipap Bilong Iumi wea Holy
“Mi bae tekem olketa kam long holy maunten bilong mi tu and mekem olketa hapi insaed long haos bilong mi for prea.”—ISAIAH 56:7.
1. Wanem nao olketa reason long Bible for why iumi shud respectim olketa meeting bilong iumi?
JEHOVAH hem bringim tugeta olketa anointed Christian and nara sheep for worshipim hem long “holy maunten” bilong hem. Hem mekem olketa for hapi insaed long ‘haos bilong hem for prea,’ wea minim spiritual temple bilong hem, wea hem “wanfala haos for evri nation prea insaed.” (Isaiah 56:7; Mark 11:17) Samting wea Jehovah duim for bringim tugeta pipol for worshipim hem showimaot worship bilong hem holy, klin, and winim eni nara worship. Taem iumi barava respectim olketa meeting wea iumi studyim Bible and worship, iumi showimaot iumi garem tingting bilong Jehovah saed long olketa samting wea holy.
2. Wanem nao showimaot Jehovah ting long ples wea hem chusim for pipol worshipim hem olsem hem holy, and hao nao Jesus showimaot hem tu garem sem tingting?
2 Long Israel bifor, olketa mas ting long ples wea Jehovah chusim for pipol worshipim hem olsem ples wea holy. Olketa mas anointim tabernacle, and evri samting insaed ‘mekem olketa kamap barava holy.’ (Exodus 30:26-29) Tabernacle hem divaed long tufala part, wea wanfala hem “Holy Ples” and narawan hem “Most Holy.” (Hebrews 9:2, 3) Bihaen, temple long Jerusalem nao changem tabernacle. From Jerusalem hem kamap main ples for worshipim Jehovah, hem garem nem, “datfala holy taon.” (Nehemiah 11:1; Matthew 27:53) Taem Jesus duim ministry bilong hem long earth, hem barava respectim datfala temple. Hem kros long pipol from olketa no showimaot respect long temple and iusim courtyard bilong hem for bisnis and olsem wanfala shortkat.—Mark 11:15, 16.
3. Wanem nao showimaot olketa assembly bilong Israel olketa holy?
3 Olketa Israelite hipap evritaem for worshipim Jehovah and for lisin taem samwan readim Law bilong hem. Nem bilong olketa festival bilong olketa hem holy convention or holy assembly, wea showimaot wei wea olketa hipap hia hem holy. (Leviticus 23:2, 3, 36, 37) Long taem bilong Ezra and Nehemiah, taem olketa garem wanfala hipap, olketa Levite “gohed for explainim mining bilong law long olketa pipol.” From “evri pipol gohed for krae taem olketa herem olketa law,” olketa Levite “talem evriwan for stap kwaet taem olketa sei: ‘Iufala kwaet! bikos disfala day hem holy.’ ” Then olketa Israelite celebratem Festival bilong Olketa Smol Leaf Haos wea gohed for sevenfala day and olketa “barava hapi fogud.” And tu, “olketa read big from buk bilong law bilong tru God evriday, start long first day go kasem last day; and olketa gohed for celebratem festival for sevenfala day, and long mek-eit day olketa garem wanfala hipap, olsem law hem talem.” (Nehemiah 8:7-11, 17, 18) Olketa hia barava holy taem wea pipol wea attend mas showimaot respect taem olketa lisin.
Olketa Meeting Bilong Iumi Olketa Holy Hipap Tu
4, 5. Olketa wanem samting saed long olketa meeting bilong iumi nao showimaot olketa hipap hia hem holy?
4 Hem tru, distaem Jehovah no garem wanfala taon long earth wea holy, wea garem wanfala spesol temple for pipol worshipim hem insaed. Nomata olsem, iumi mas no forgetim hao olketa meeting wea iumi hipap for worshipim Jehovah, olketa nao olketa holy hipap. Thrifala taem insaed long week, iumi hipap for readim and studyim Bible. Olsem long taem bilong Nehemiah, olketa part long program “explainim” Word bilong Jehovah and helpem iumi kasem “mining” bilong hem. (Nehemiah 8:8) Iumi prea long start and end bilong evri meeting, and long klosap evri meeting iumi singsing for praisem Jehovah. (Psalm 26:12) Olketa kongregeson meeting barava part long worship bilong iumi and iumi shud luksavve diswan hem wanfala holy arrangement and showimaot respect long wei for lisin.
5 Jehovah blessim pipol bilong hem taem olketa hipap tugeta for worshipim hem, studyim Word bilong hem, and enjoyim wei for kaban tugeta witim olketa nara Christian brata and sista. Long olketa meeting, iumi savve sure hao hem nao ples wea ‘Jehovah komandim olketa blessing for stap.’ (Psalm 133:1, 3) Sapos iumi attendim and lisin gud long spiritual program hia, bae iumi kasem datfala blessing tu. And tu, Jesus hem sei: “Taem tufala or thrifala hipap tugeta long nem bilong mi, mi stap midolwan long olketa.” Olketa verse wea stap raonem disfala toktok showimaot hem for olketa Christian elder wea meet for deal witim olketa big problem wea kamap midolwan olketa brata, bat hem fitim tu olketa meeting bilong iumi. (Matthew 18:20) Sapos Christ hem stap taem olketa Christian hipap tugeta long nem bilong hem, hem fitim for iumi ting long olketa hipap hia olsem holy samting!
6. Nomata wanem ples iumi iusim for hipap, wanem tingting nao iumi shud garem abaotem olketa?
6 Hem tru, Jehovah no stap insaed olketa temple wea man wakem. Nomata olsem, olketa Kingdom Hall bilong iumi olketa ples for tru worship. (Acts 7:48; 17:24) Iumi hipap long there for studyim Word bilong Jehovah, prea long hem, and singim olketa praise long hem. Semsem tu witim olketa Assembly Hall. Eni building olsem skul hall or community hall wea iumi iusim for olketa convention kamap olsem ples bilong worship taem iumi iusim for olketa hipap bilong iumi wea holy. Nomata olketa hipap hia big or smol, wei wea iumi respectim datwan shud showaot long samting iumi duim and hao iumi ting long datwan.
Hao Iumi Savve Showimaot Respect for Olketa Hipap Bilong Iumi
7. Hao nao iumi savve showimaot respect for olketa hipap bilong iumi?
7 Olketa wei stap for iumi showimaot respect for olketa hipap bilong iumi. Wanfala nao hem wei for mek sure iumi stap for singim olketa Kingdom song. From plande long olketa song hia olsem prea, iumi shud singim long wei wea showimaot respect. Aposol Paul hem talem toktok bilong Jesus from Psalm 22 taem hem sei: “Mi bae talemaot nem bilong iu long olketa brata bilong mi; long midol bilong kongregeson mi bae singsing for praisem iu.” (Hebrews 2:12) Dastawe iumi shud traem best evritaem for sidaon long chair bifor chairman talem wanem song for singim and tingting strong long mining bilong olketa word taem iumi singsing. Singsing bilong iumi shud showimaot iumi garem sem feeling olsem man wea raetem psalm wea sei: “Mi bae praisem Jehovah witim full heart bilong mi midolwan long datfala grup bilong olketa wea raeteous and olketa wea hipap.” (Psalm 111:1) Tru tumas, for singim olketa praise long Jehovah hem gudfala reason for kam early long olketa meeting and stap go kasem taem olketa meeting finis.
8. Wanem example long Bible nao showim hao iumi mas showimaot respect for olketa prea long wei for lisin gud long olketa?
8 Nara samting wea mekem olketa meeting samting wea helpem spiritual saed bilong iumi hem olketa prea wea olketa brata talem from heart. Wanfala taem, olketa Christian long Jerusalem long first century hipap and “evriwan join tugeta for prea long God.” Samting wea kamaot from diswan nao, nomata olketa kasem persecution, olketa “no fraet for talemaot toktok bilong God.” (Acts 4:24-31) Waswe, iu ting mind bilong eniwan long hia hem go wakabaot taem olketa prea? Nomoa nao, olketa “join tugeta for prea.” Wei wea olketa brata prea long olketa meeting showimaot sem respect and love for God wea evriwan wea lisin garem tu. Dastawe hem barava fitim for iumi showimaot respect long wei for lisin gud.
9. Hao nao kaleko and fasin bilong iumi savve showimaot iumi respectim olketa holy hipap bilong iumi?
9 Narafala wei wea iumi savve showimaot iumi barava respectim wei wea olketa meeting hem holy hem for werem kaleko wea fitim. Kaleko and lukluk bilong iumi savve mekhae long wei wea olketa meeting hem holy and fitim for iumi showimaot respect long olketa. Aposol Paul hem talem disfala kaonsel: “Long evri ples mi laekem olketa man for gohed long prea, liftimap olketa loyal hand, lusim fasin for kros and argue. Long sem wei, mi laekem olketa woman for garem gudfala wei for werem kaleko, witim fasin wea showimaot respect and stretfala tingting, no long wei for staelem hair and for garem gold or olketa pearl and kaleko wea kostim staka selen, bat long wei wea fitim olketa woman wea sei olketa honorim God.” (1 Timothy 2:8-10) Narafala samting, from iumi respectim olketa hipap hia, bae iumi no kaikaim gum or eni nara kaikai taem olketa tok long assembly and convention gohed. Wei for werem kaleko wea fitim and for showimaot gudfala fasin long olketa hipap bilong iumi hem givim honor long Jehovah God, worship bilong hem, and olketa nara brata and sista.
Fasin wea Fitim Pipol Bilong God
10. Hao nao aposol Paul showimaot iumi mas garem fasin wea barava fitim long olketa Christian meeting?
10 Long 1 Corinthians, chapter 14, aposol Paul talem gudfala instruction long hao for duim olketa Christian meeting. Hem sei: “Evri samting mas followim stretfala wei and order.” (1 Corinthians 14:40) Olketa meeting barava important part bilong Christian kongregeson, and iumi mas showimaot fasin wea fitim pipol bilong Jehovah long olketa meeting hia.
11, 12. (a) Wanem nao parents shud helpem olketa pikinini wea attendim olketa meeting for tinghae long hem? (b) Hao nao olketa pikinini savve showimaot faith bilong olketa long olketa meeting?
11 Olketa pikinini nao main wan wea mas lane for sidaon kwaet and lisin long olketa meeting. Christian parents mas explainim long pikinini hao Kingdom Hall and ples for Kongregeson Buk Study hem no ples for plei. Olketa hia ples for worshipim Jehovah and studyim Word bilong hem. King Solomon hem sei: “Taem iu go long haos bilong tru God, careful long leg bilong iu; and iu mas kam klosap for lisin.” (Ecclesiastes 5:1) Moses teachim olketa Israelite for hipap tugeta, olketa man, woman, and “olketa smol pikinini.” Hem sei: “Hipimap olketa pipol . . . for olketa savve lisin and lane, from olketa mas fraet long God bilong iufala Jehovah and mas followim evri toktok bilong disfala law. And olketa son bilong olketa wea no savve shud lisin, and olketa mas lane for fraet long . . . Jehovah.”—Deuteronomy 31:12, 13.
12 Olsem tu distaem, main reason why olketa young wan bilong iumi attendim olketa meeting witim parents hem for lisin and lane. Taem olketa pikinini fit for lisin and start for minim olketa main truth insaed Bible, olketa savve ‘talemaot faith bilong olketa long pablik’ long wei for givim olketa short koment. (Romans 10:10) Maet wanfala smol pikinini start witim wei for givim short ansa for wanfala kwestin wea hem fit for minim. Firstaem, maet hem readim ansa, bat gogo, bae hem trae for givim ansa long toktok bilong hemseleva. Pikinini savve enjoyim diswan and hem helpem hem tu. Taem pikinini hem ansa seleva wea showimaot faith bilong hem, olketa insaed long kongregeson hapi tumas. Hem fitim for parents nao mas showimaot gudfala example taem olketa tu givim koment. Hem gud tu for olketa pikinini garem Bible, songbuk and buk or magasin bilong olketa seleva. Olketa mas lane for keepim gud olketa pablikeson. Evri samting hia bae mekem olketa pikinini luksavve olketa meeting bilong iumi olketa holy hipap.
13. Wanem nao iumi laekem pipol wea firstaem for attendim olketa meeting bilong iumi for luksavve long hem?
13 Bat iumi no laekem olketa meeting bilong iumi for olsem olketa service bilong olketa church long Christendom wea man no kasem eni naes encouragement, wea holyholy tumas, or laod olsem taem wanfala band pleim music. Iumi laekem pipol for feel welkam long olketa meeting long Kingdom Hall and kasem encouragement, bat long semtaem, hem no olsem wanfala hapitaem. Iumi hipap for worshipim Jehovah, so iumi mas evritaem showimaot respect wea fitim. Bihaen firstfala taem wea pipol attendim olketa meeting bilong iumi, lisin long wanem iumi storyim, and lukim fasin bilong iumi and olketa pikinini bilong iumi, iumi laekem olketa for sei: “God hem barava stap midolwan long iufala.”—1 Corinthians 14:25.
Wanfala Main Samting Insaed Worship Bilong Iumi
14, 15. (a) Hao nao iumi savve stap klia long wei for “ting smol long haos bilong God bilong iumi”? (b) Hao nao Isaiah 66:23 gohed for fulfill distaem?
14 Olsem iumi storyim finis, Jehovah hem gohed for hipimap pipol bilong hem and mekem olketa hapi insaed ‘haos bilong hem for prea,’ wea minim spiritual temple bilong hem. (Isaiah 56:7) Datfala faithful man Nehemiah remindim olketa nara Jew for showimaot respect for datfala really temple, long wei for sapotim witim olketa material samting. Hem sei: “Iumi shud no ting smol long haos bilong God bilong iumi.” (Nehemiah 10:39) And tu, iumi shud no ting smol long invitation bilong Jehovah for worshipim hem insaed ‘haos bilong hem for prea.’
15 Isaiah talem disfala profesi wea showim need for hipap tugeta for worship evritaem: “ ‘Hem bae barava happen hao from niu moon go kasem niu moon and from sabbath go kasem sabbath evriwan wea laef bae kam insaed for baodaon front long mi,’ Jehovah hem talem.” (Isaiah 66:23) Diswan gohed for happen distaem. Evri week olketa Christian wea dedicate hipap tugeta for worshipim Jehovah. Olketa duim diswan taem olketa attendim olketa Christian meeting and duim pablik ministry, and olketa narafala samting. Waswe, iu wanfala wea ‘kam and baodaon front long Jehovah’ evritaem?
16. Why nao wei for attendim olketa meeting evritaem shud main samting long laef bilong iumi distaem?
16 Isaiah 66:23 bae fulfill evribit insaed niu world wea Jehovah promisim. Long datfala taem, long really wei “evriwan wea laef” bae ‘kam and baodaon front long Jehovah’ evri week, wea minim olketa bae worshipim Jehovah for olowe. From wei for hipap tugeta for worshipim Jehovah bae main samting long spiritual laef bilong iumi long niu world, hem shud main samting long laef bilong iumi distaem.
17. Taem ‘iumi lukim hao datfala day hem kakam moa klos’ why nao iumi barava needim olketa meeting?
17 Taem end hem kakam klosap, iumi shud barava disaed strong for attendim olketa Christian hipap bilong iumi for worship. From iumi respectim wei wea olketa meeting hia holy, iumi no letem waka for selen, homwak from skul, or for duim extra class hem mekem iumi missim wei for hipap evritaem witim olketa Christian brata and sista. Iumi needim strong wea iumi savve kasem taem iumi kaban tugeta. Olketa kongregeson meeting mekem iumi kasem chance for savve gud long each other, for encouragem each other for “showimaot love and duim gudfala waka.” Iumi need for duim olsem ‘long wei wea moa big taem iumi lukim hao datfala day hem kakam moa klos.’ (Hebrews 10:24, 25) Dastawe iumi shud evritaem respectim olketa hipap bilong iumi wea holy taem iumi olowe attend, werem kaleko wea fitim, and showimaot gudfala fasin. Taem iumi duim olsem, iumi showimaot iumi garem tingting bilong Jehovah abaotem olketa samting wea holy.
Review
• Wanem nao showimaot Jehovah ting long olketa hipap wea pipol bilong hem duim olsem holy?
• Wanem nao olketa samting abaotem olketa meeting bilong iumi wea pruvim olketa hia olketa hipap wea holy?
• Hao nao olketa pikinini savve showimaot olketa respectim wei wea olketa meeting bilong iumi holy?
• Why nao wei for evritaem attendim olketa meeting shud wanfala main samting long laef bilong iumi?
[Piksa long page 28]
Nomata long wanem ples iumi hipap, olketa meeting for worshipim Jehovah olketa hipap wea holy
[Piksa long page 31]
Olketa pikinini attendim olketa meeting for lisin and lanem samting