Hu Nao Preachim Gud Nius?

“ . . . bae talemaot disfala gud nius abaotem kingdom long evri ples long world.”—MATTHEW 24:14.

OLKETA Jehovah’s Witness nao talemaot gud nius evriwea long world. Olketa duim diswan long staka difren wei. Wanfala wei nao hem for . . .

Story Long Pipol. Olketa Jehovah’s Witness go long pipol for storyim gud nius, olsem Jesus and olketa disaepol bilong hem duim. (Luke 8:1; 10:1) Olketa no weitim pipol for kam long olketa. Evri Jehovah’s Witness wea winim 7 million long olketa nao preach long pipol abaotem Kingdom bilong God. Olketa preach long haos tu haos, long street, long telephone, and samfala nara wei moa. Last year, Olketa Jehovah’s Witness iusim winim wan and haf billion hour long disfala waka.

Olketa no just teachim pipol abaotem Kingdom bilong God, bat olketa teachim tu ‘evri samting wea [Jesus] laekem olketa for duim.’ (Matthew 28:20) Olketa evritaem duim winim 8 million free Bible study.

Olketa Jehovah’s Witness preach long full world, long 236 kantri. Olketa preach long evri difren kaen pipol. Olketa preach long vilij, and long taon, long olketa forest long Amazon and Siberia, long olketa drae ples long Africa, and long olketa maunten long Himalaya. Olketa no kasem pei for disfala waka, bat olketa seleva nao peim wanem olketa needim and iusim taem bilong olketa, bikos olketa lovem God and pipol. Olketa talemaot gud nius tu long . . .

Olketa Pablikeson. Olketa pablisim disfala magasin, wea garem full title Wastaoa wea Talemaot Kingdom Bilong Jehovah, long 185 languis and olketa givimaot winim 42 million copy long each magasin. Nara magasin hem Awake!, wea storyim tu datfala Kingdom, and olketa pablisim long 83 languis and olketa givimaot klosap 40 million copy long each magasin.

Olketa buk, brochure, tract, CD/MP3, and DVD wea explainim olketa Bible teaching hem stap long samting olsem 540 languis. Olketa Jehovah’s Witness wakem and givimaot winim 20 billion pablikeson long last tenfala year, wea minim each man wea stap long earth savve garem thrifala pablikeson!

Olketa Jehovah’s Witness printim or arrangem olketa narawan for printim olketa difren transleison long Bible tu. Man savve kasem full New World Translation of the Holy Scriptures or samfala part bilong hem wea Olketa Jehovah’s Witness transleitim, printim, and givimaot, long 96 languis. Winim 166 million copy nao olketa givimaot finis. Olketa Jehovah’s Witness talemaot tu gud nius abaotem Kingdom long . . .

Olketa Christian Meeting. Evri week, olketa meeting kamap long Kingdom Hall wea no just for lotu nomoa, bat for lanem pipol. Olketa tok long olketa meeting hem abaotem Bible, and olketa iusim Wastaoa magasin and samfala nara pablikeson for studyim Bible. Long olketa meeting, Olketa Jehovah’s Witness lane tu hao for preachim gud nius long gudfala wei.

Olketa Jehovah’s Witness studyim sem samting long winim 107,000 kongregeson long full world, wea helpem olketa for wan mind. Eniwan savve kam long olketa meeting hia. No enitaem olketa duim kolekson. Bat evri samting hia bae iusles nomoa sapos Olketa Jehovah’s Witness no followim wanem olketa preach abaotem. Dastawe, olketa trae for showimaot datfala gud nius long . . .

Example Bilong Olketa. Olketa trae for showimaot gudfala example and duim samting for pipol long sem wei olketa laekem pipol for duim long olketa. (Matthew 7:12) Nomata olketa no perfect and samfala taem duim mistek, olketa traem best for kaen long evriwan, no just long wei for preachim gud nius, bat for helpem pipol long olketa nara wei tu.

Olketa Jehovah’s Witness no duim preaching waka for trae changem full world. Bat taem datfala waka hem finis fitim wanem Jehovah laekem, world bae finis olsem Jesus talem. Wanem nao diswan bae minim for earth and evriwan wea stap long earth?

[Piksa long page 7]

Olketa Jehovah’s Witness nao talemaot gud nius evriwea long world

Wanem Nao Disfala Toktok “World Bae Finis” Hem Minim?

“. .  bihaen datwan nao, world bae finis.”—MATTHEW 24:14.

IUMI savve herem staka pipol storyim hao disfala world maet finis. Olketa buk, movie, and magasin storyim olketa samting wea maet happen for finisim disfala world, olsem long fani wei and tu wanem olketa scientist talem. Olketa samting hia nao olsem nuclear war, samting wea flae kam long earth, sik wea killim dae staka pipol, bigfala change saed long weather (climate change), or samfala tingse difren kaen laef stap long nara planet and maet kam spoelem iumi.

Staka religion tu garem difren tingting abaotem hao “world bae finis” and samfala biliv hao laef long earth bae nomoa nao. Wanfala savveman saed long religion, hem storyim Matthew 24:14 olsem wanfala warning. Hem sei: “Disfala verse hem important winim eni nara verse long Bible . . . Staka pipol barava no laek for tingim hao disfala world bae finis for olowe long barava nogud wei.”

Bat pipol olsem no tingim disfala important samting: Jehovah God “wakem [earth] for stap olowe.” Hem “no wakem earth for stap nating, bat for pipol stap long hem.” (Isaiah 45:18) So taem Jesus storyim “world bae finis,” hem no minim earth bae distroe. Hem no minim evri man bae finis for olowe. Jesus hem minim pipol wea barava no laek followim wanem Jehovah talem, olketa nao bae finis.

Tingim disfala tokpiksa. Iu ownim wanfala naes haos and iu letem pipol for stap free nomoa. Samfala stap gud tugeta and lukaftarem gud haos bilong iu. Bat olketa narawan kosim staka problem, faetem each other, and spoelem olketa wea lukaftarem gud haos bilong iu. Olketa spoelem haos bilong iu and gohed nomoa for duim datwan nomata iu trae for stopem olketa.

Wanem nao bae iu duim for stretem datfala problem? Waswe, bae iu distroem nao haos bilong iu? Nomoa. Maet iu raosem olketa wea nogud and stretem bak samting wea olketa spoelem.

Jehovah tu bae duim olsem. Hem iusim man wea raetem psalm for sei: “Olketa wea duim nogud samting bae finis, bat Jehovah bae givim earth long olketa wea trustim hem. And klosap nao man wea duim rabis samting bae finis; nomata iu lukaotem olketa, bae iu no savve faendem olketa. God bae givim earth long olketa wea hambol, and olketa bae hapi fogud bikos olketa stap gud.”—Psalm 37:9-11.

Aposol Peter story abaotem sem samting. Hem sei: “Long bifor kam, skae and earth hem stap. Long earth, hem garem land and hem garem sea and wata hem stap long skae tu. Evri samting hia hem stap bikos long toktok bilong God. Olketa samting hia nao finisim pipol wea stap long datfala taem. Diswan hem happen taem wata hem kavarem full earth.” (2 Peter 3:5, 6) Long hia aposol Peter storyim Flood long taem bilong Noah. Pipol wea no followim God nao distroe, no disfala earth. Datfala big Flood “showimaot samting wea bae kasem pipol wea no followim God.”—2 Peter 2:6.

Peter sei moa: “Skae and earth wea stap distaem for mas finis long fire.” Sapos iumi no readim full verse, maet iumi no minim stret diswan. Bat tingim, verse gohed for sei God bae “finisim pipol wea no obeyim hem.” Pipol wea no obeyim God nao bae finis, no disfala earth. Wanem nao bae happen bihaen? Peter sei: “Iumi weitim wanfala niu skae [Kingdom bilong God wea Christ rulim] and wanfala niu earth [olketa raeteous pipol] wea hem promisim, wea evri samting bae raeteous.”—2 Peter 3:7, 13.

Bible profesi showimaot tu taem for “world bae finis” hem klosap. Readim Matthew 24:3-14 and 2 Timothy 3:1-5 for lukim olketa samting wea pruvim datwan.a

Hem hard for bilivim staka pipol konfius long mining bilong Matthew 24:14, wea nomata wanfala pikinini bat savve minim disfala verse! Samfala reason stap for diswan. Satan hem blindim pipol for no luksavve long olketa tru teaching wea stap insaed Bible. (2 Corinthians 4:4) And tu, God haedem plan bilong hem from pipol wea praod, bat hem showim long pipol wea hambol. Jesus sei olsem abaotem diswan: “Mi praisem iu Dadi, wea iu nao rulim heven and earth, bikos iu haedem olketa samting hia from olketa wea wise and skul gud and iu showimaot long olketa wea hambol olsem olketa smol pikinini.” (Matthew 11:25) Iumi garem privilege for stap witim olketa wea hambol, wea minim wanem nao Kingdom bilong God and wea luk forward for kasem olketa blessing from datwan!