Waswe, Iu Kaontem Kost?

JESUS CHRIST givim hope bilong laef olowe long olketa disaepol bilong hem, bat hem encouragem olketa for kaontem kost bilong wei for olsem wanfala Christian. Hem showimaot klia disfala point taem hem ask: “Hu nao long iufala wea want for buildim wanfala taoa no sidaon firstaem and kaontem kost, for lukim sapos hem garem inaf selen for finisim?” (Luke 14:28) Wanem kost nao Jesus minim?

Evri Christian feisim olketa test—samfala hem serious. (Psalm 34:19; Matthew 10:36) Dastawe iumi need for redy long mind and long spiritual wei mekem iumi no sapraes taem iumi feisim wei for againstim iumi or olketa nara problem. Iumi shud kaontem finis olketa challenge olsem insaed kost for olsem wanfala disaepol bilong Christ, from iumi savve hao datfala reward—salvation from sin and dae—hem barava winim eni samting wea disfala system savve givim long iumi. Tru nao, no eni samting wea God letem—nomata dae—savve spoelem iumi for olowe sapos iumi go ahed for servem hem.—2 Corinthians 4:16-18; Philippians 3:8.

Hao nao faith bilong iumi savve kamap strong olsem? Faith bilong iumi grow moa strong each taem iumi mekem stretfala disison, taem iumi stand strong for saed bilong olketa Christian principle, or duim wanfala samting wea fitim will bilong God—especially taem iumi kasem test for go difren. Taem iumi kasem olketa blessing bilong Jehovah bikos long faithful fasin bilong iumi, faith bilong iumi kamap moa strong and moa deep. Long wei olsem, iumi followim example bilong Jesus, olketa firstfala disaepol bilong hem, and olketa man and woman bilong faith long olketa difren taem bilong history wea long stretfala wei ‘kaontem kost’ bilong wei for servem God.—Mark 1:16-20; Hebrews 11:4, 7, 17, 24, 25, 32-38.