Hem sei: “Kam kasem taem bilong John, datfala Law and olketa profet talemaot toktok bilong God. Start long datfala taem nao pipol talemaot gud nius abaotem Kingdom bilong God, and evri didifren kaen pipol traem best for kasem datwan. Long sem wei wea iumi evriwan savve skae and earth bae no finis enitaem, iumi savve trustim tu hao evri word and evri smol part bilong disfala Law bae kamap tru.” (Luke 3:18; 16:16, 17) Hao nao disfala toktok bilong Jesus showimaot bigfala change hem gohed for happen?

Law bilong Moses hem leadim pipol go long Messiah. And tu, datfala Law hem gogo for finis. Olsem example, Law sei man savve divorce for samfala difren reason. Bat Jesus sei: “Eniwan wea lusim waef bilong hem and maritim narawan, datwan hem adultery. Sapos man maritim wanfala woman wea hasband bilong hem lusim hem, datwan hem adultery tu.” (Luke 16:18) Olketa toktok olsem mekem olketa Pharisee kros fogud bikos olketa laekem tumas for mekem olketa rul for evri samting!