Jehovah Protectim Olketa wea Hope Long Hem
“Mi laekem loving-kaeness and trufala fasin bilong iu for protectim mi evritaem.” —Psalm 40:11.
1. Wanem nao King David askem Jehovah for duim, and hao nao Jehovah duim datwan distaem?
KING DAVID bilong Israel bifor “barava hope long Jehovah” and sei Jehovah savve “herem [hem] and herem singaot bilong [hem] for help.” (Psalm 40:1) Plande taem nao David lukim wei wea Jehovah protectim olketa wea lovem hem. Dastawe, hem feel free for askem Jehovah for protectim hem evritaem. (Psalm 40:11) David hem wanfala long olketa faithful man wea kasem promis for “wanfala resurrection wea moabeta.” So nomata long disfala taem David hem stap sef, from Jehovah gohed for protectim hem thru long wei for rememberim hem olsem man wea fit for kasem datfala reward. (Hebrews 11:32-35) From diswan future bilong hem set finis. Nem bilong hem stap insaed datfala ‘buk bilong Jehovah for rememberim’ olketa wea fit for kasem laef olowe.—Malachi 3:16.
2. Jehovah bae protectim iumi long wanem wei and hao nao Bible helpem iumi for luksavve long datwan?
2 Nomata Jesus Christ no kam yet long earth, olketa faithful man wea Hebrews chapter 11 storyim, olketa followim disfala samting wea Jesus teachim: “Man wea lovem soul bilong hem, hem distroem, bat man wea heitim soul bilong hem insaed long disfala world, hem protectim soul bilong hem for laef olowe.” (John 12:25) Dastawe, wei wea Jehovah protectim iumi no minim bae iumi no safa or no kasem persecution. Hem minim Jehovah bae protectim iumi long spiritual wei mekem iumi savve keepim gud wei wea iumi fren witim hem.
3. Wanem nao showimaot Jehovah hem protectim Jesus Christ, and wanem nao kamaot from datwan?
3 Pipol tok spoelem and persecutim Jesus tu. Gogo olketa enemy bilong hem killim hem dae long wei wea mekem pipol barava ting daonem hem and mekem hem kasem bigfala pain. Bat diswan no minim Jehovah forgetim promis bilong hem for protectim Messiah. (Isaiah 42:1-6) Resurrection bilong Jesus long mek-thri day bihaen hem dae hem showimaot hao Jehovah herem singaot bilong Jesus for help, olsem hem herem David tu. From datwan Jehovah givim Jesus strong for gohed faithful. (Matthew 26:39) From Jehovah protectim Jesus long wei olsem, Jesus kasem laef long heven wea no savve finis, and plande million pipol tu garem chance for laef olowe from olketa showimaot faith long datfala ransom.
4. Wanem nao Jehovah promisim olketa anointed Christian and “nara sheep”?
4 Jehovah willing and fit for protectim olketa servant bilong hem long taem bilong David and Jesus. Iumi distaem tu, savve barava trustim hao hem bae duim sem samting. (James 1:17) Olketa anointed brata bilong Jesus wea stap yet long earth, fit for trustim promis bilong Jehovah wea sei: “Wanfala laef wea no savve finis, wea klin evribit and wea no savve lus. Diswan stap finis long heven for iufala wea paoa bilong God protectim iufala thru long faith mekem iufala kasem salvation wea redi for showaot long lastfala part bilong taem.” (1 Peter 1:4, 5) Olketa “nara sheep,” wea garem hope for stap long disfala earth savve trustim God, and tu, promis bilong hem wea man for raetem psalm hem talem: “O lovem Jehovah, iufala evriwan wea loyal long hem. Jehovah bae protectim olketa wea faithful long hem.”—John 10:16; Psalm 31:23.
Jehovah Protectim Wei for Fren Witim Hem
5, 6. (a) Hao nao pipol bilong God kasem protection distaem? (b) Wanem kaen wei for fren nao olketa anointed wan garem witim Jehovah, and waswe long olketa wea garem hope for stap long earth?
5 Long disfala taem, Jehovah provaedem olketa samting for protectim pipol bilong hem long spiritual wei. Hem no protectim olketa from persecution or olketa sorre and hard samting wea olketa mas feisim, bat hem loyal for givim olketa encouragement and help for protectim wei wea olketa fren witim hem. Faith wea olketa garem long ransom wea Jehovah provaedem, hem nao faondeson bilong olketa for buildimap wei for fren witim God. Holy spirit hem anointim samfala long olketa faithful Christian hia for kamap olketa ruler witim Christ long heven. God ting long olketa hia olsem olketa raeteous spiritual son bilong hem, and disfala toktok hem for olketa: “Hem tekem iumi aot from paoa bilong darkness and putim iumi go insaed long kingdom bilong Son wea hem lovem, wea thru long hem iumi kamap free thru long ransom, from iumi kasem forgiveness for olketa sin bilong iumi.”—Colossians 1:13, 14.
6 Bible promisim tu hao plande million nara faithful Christian savve kasem gud samting from wei wea God provaedem ransom. Hem sei: “Son bilong man hem kam, no for olketa waka for hem, bat for hem nao waka and for givim soul bilong hem olsem wanfala ransom for baem bak plande pipol.” (Mark 10:45) Olketa Christian hia barava hope for kasem datfala “nambawan freedom olsem olketa pikinini bilong God.” (Romans 8:21) Bat long disfala taem, olketa tinghae and protectim wei wea olketa fren witim God and olketa gohed for barava waka hard for strongim datwan.
7. Hao nao Jehovah hem protectim wei for fren wea stap midolwan hem and pipol bilong hem?
7 Wanfala samting wea Jehovah duim for protectim wei wea hem fren witim pipol bilong hem, hem for provaedem wanfala program for gohed trainim pipol bilong hem. Diswan gohed for mekem savve bilong olketa abaotem truth hem kamap moa stret. Jehovah gohed for provaedem tu help thru long Word, organization, and holy spirit bilong hem. From direction wea olketa kasem from “faithful wise slave,” pipol bilong God evriwea long world kamap olsem wanfala big famili. Nomata olketa rich or poor or kam from olketa difren kantri, disfala slave hem lukaftarem spiritual need, and samfala taem, physical need bilong disfala famili wea servem Jehovah.—Matthew 24:45.
8. Jehovah trustim olketa wea loyal long hem for duim wanem, and wanem nao hem promisim olketa?
8 Jehovah no protectim Jesus long physical wei taem olketa enemy attakim hem, and long distaem tu, Hem no protectim olketa Christian long physical wei. Bat diswan no minim God rejectim olketa. Tru nao, God hem no duim datwan! Really, diswan showimaot hao hem trustim olketa for sapotim hem insaed datfala kwestin wea affectim full universe. (Job 1:8-12; Proverbs 27:11) Jehovah bae no enitaem leavim olketa wea loyal long hem, “from Jehovah hem lovem justice, and hem bae no lusim olketa loyal wan bilong hem. Hem bae protectim olketa for olowe.”—Psalm 37:28.
Kasem Protection From Loving-Kaeness and Trufala Fasin
9, 10. (a) Hao nao trufala fasin bilong Jehovah hem protectim pipol bilong hem? (b) Hao nao Bible showimaot Jehovah hem protectim olketa loyal wan bilong hem thru long loving-kaeness?
9 Taem David raetem prea bilong hem long Psalm 40, hem ask for kasem protection from loving-kaeness and trufala fasin bilong Jehovah. Trufala fasin and raeteous fasin bilong Jehovah muvim hem for showimaot klia olketa standard bilong hem. Taem man followim olketa standard hia, bae hem kasem protection from olketa wari, fraet, and problem wea savve kasem olketa wea no followim olketa standard olsem. Olsem example, iumi savve protectim famili and iumiseleva from bigfala sorre taem iumi no iusim drug, no ova tumas for drinkim alcohol, no garem olobaot fasin, and no garem raf fasin. And sapos samfala go difren from trufala fasin bilong Jehovah, olsem David duim, olketa savve trustim hao Jehovah hem still ‘ples for haed’ for olketa sapos olketa repent. Olketa savve singaot witim hapi and sei: “Iu nao bae protectim mi from trabol.” (Psalm 32:7) Tru nao, datwan wanfala barava nambawan wei wea God showimaot loving-kaeness!
10 Nara example wea showimaot loving-kaeness bilong God, hem nao wei wea hem warnim olketa servant bilong hem for stap separate from world wea hem klosap for distroem. Hem sei: “No lovem world or olketa samting insaed long world. Sapos eniwan lovem world, hem no lovem Father; bikos evri samting long world—samting wea body wantem and samting wea eye wantem and wei for show-off witim samting wea man garem—hem no kam from Father, bat hem kam from world.” Sapos iumi lisin long disfala warning and duim samting fitim datwan, bae iumi protectim laef bilong iumi for olowe, from datfala scripture gohed for sei: “World and evri samting wea pipol long world laekem hem gogo for finis, bat man wea duim will bilong God bae stap olowe.”—1 John 2:15-17.
Kasem Protection From Fasin for Tingting Gud, Fasin for Luksavve, and Wisdom
11, 12. Explainim why nao fasin for tingting gud, fasin for luksavve, and wisdom savve protectim iumi.
11 God muvim Solomon, son bilong David, for raet olsem long olketa wea laekem God for acceptim olketa: “Fasin for tingting gud bae gardim iu, fasin for luksavve bae protectim iu.” Hem sei tu: “Kasem wisdom . . . No lusim datwan and bae hem keepim iu gud. Lovem, and bae hem protectim iu.”—Proverbs 2:11; 4:5, 6.
12 Iumi iusim fasin for tingting gud taem iumi ting raonem olketa samting wea iumi lanem from Word bilong God. Taem iumi duim datwan iumi savve mekem grow fasin for luksavve, wea bae helpem iumi for markem samting wea moa important. Datwan barava important, bikos maet iumi faendem hao plande problem kamap taem man no markem gud, samting wea shud moa important. World bilong Satan switim iumi for aftarem olketa goal for kasem material samting, bignem, and hae position, bat Jehovah encouragem iumi for aftarem olketa spiritual goal wea hem nao moa important. Taem man no markem spiritual goal olsem samting wea important winim physical goal, bae diswan savve spoelem famili and wei for fren witim olketa narawan, and gogo, hem savve lusim olketa spiritual goal bilong hem. From datwan, man savve kasem sorre samting wea Jesus storyim, taem hem sei: “Sapos wanfala man kasem full world, hao nao bae diswan helpem hem sapos hem lusim soul bilong hem?” (Mark 8:36) Sapos man wise hem bae followim disfala samting wea Jesus talem: “Gohed for luk aotem fastaem kingdom and raeteous fasin bilong hem, and iufala bae kasem olketa narafala samting hia.”—Matthew 6:33.
Danger From Wei for Ova Tumas for Tingim Seleva
13, 14. Wei for ova tumas for tingim seleva hem minim wanem, and why nao hem no wise for iumi kamap olsem?
13 Hem normal samting nomoa for man tingim seleva. Bat sapos olketa samting man wantem and interest long hem kamap main samting long laef, bae trabol kamap. So, from Jehovah laek for protectim wei wea iumi fren witim hem, hem teachim iumi for stap klia long wei for ova tumas for tingim seleva. Ova tumas for tingim seleva hem minim man tingim nomoa samting wea hemseleva laekem, needim, or interest long hem. Datfala toktok barava fitim fasin bilong plande pipol distaem! Bible talem stret hao insaed “olketa last day” bilong nogud world bilong Satan, “olketa man bae lovem olketa seleva.” Diswan minim olketa bae ova tumas for tingim seleva.—2 Timothy 3:1, 2.
14 Olketa Christian luksavve hem wise for obeyim komand from Bible for interest long narawan and lovem narawan olsem wei wea olketa lovem olketa seleva. (Luke 10:27; Philippians 2:4) Maet staka pipol tingse hem hard tumas for duim diswan. Bat, man mas duim diswan sapos hem laek mekem marit bilong hem gud, garem hapi famili, and fren gud witim olketa narawan. Dastawe, trufala servant bilong Jehovah mas no letem datfala normal feeling for interest long seleva, kamap main samting long laef from diswan savve mekem hem no duim olketa samting wea moa important. Barava important samting winim evri nara samting hem nao waka bilong hem saed long worship bilong hem for God bilong hem, Jehovah.
15, 16. (a) Wei for ova tumas for tingim seleva savve lead go long wanem, and example bilong hu nao showimaot datwan? (b) Taem man kwiktaem judgem narawan, wanem nao hem really duim?
15 Wei for ova tumas for tingim seleva savve mekem man tingse hem raeteous winim narawan. Kaen tingting olsem savve lead go long praod fasin and wei for no acceptim eni idea wea difren from wanem iu tingim. Bible talem stret diswan: “Dastawe, O man, nomata hu nao iu, iu no garem eni excuse sapos iu judgem narawan; from taem iu judgem nara man long wanfala samting, iu judgem iuseleva, from iu wea olsem judge duim olketa sem samting tu.” (Romans 2:1; 14:4, 10) Olketa leader bilong religion long taem bilong Jesus barava bilivim hao olketa raeteous. Diswan mekem olketa tingse olketa fit for judgem Jesus and olketa follower bilong hem. Taem olketa duim datwan, olketa mekem olketa seleva kamap judge. From olketa no luksavve long wik point bilong olketa seleva, really olketa judgem olketa seleva.
16 Judas, datfala follower bilong Jesus wea givim hem go long olketa enemy, letem hemseleva kamap man for judgem narawan. Long datfala taem long Bethany wea Mary, sista bilong Lazarus, hem putim oil wea smel naes tumas long Jesus, Judas barava tok againstim datwan. Hem showimaot kros bilong hem taem hem sei: “Why nao hem no salem disfala oil wea smel naes for thri handred denarii and givim datfala selen long poor pipol?” Bible showimaot why nao hem tok olsem: “Hem talem diswan no from hem tingim olketa wea poor, bat from hem man for steal and keepim box bilong selen and savve aotem olketa selen wea olketa putim insaed.” (John 12:1-6) Iumi mas no letem iumiseleva kamap olsem Judas or olketa leader hia bilong religion, wea kwiktaem judgem olketa narawan, bat really olketa judgem olketa seleva.
17. Storyim danger wea savve kamap from wei for tinghae long seleva or ova tumas for trustim seleva.
17 Sorre tumas from samfala Christian bifor kamap olsem Judas. Olketa no steal, bat olketa kamap praod and tinghae long olketa seleva. James raet olsem abaotem olketa: “Iufala praod long toktok bilong iufala for mekhae long iufala seleva.” Then hem sei moa: “Evrikaen wei olsem for praod hem wicked.” (James 4:16) Iumi spoelem iumiseleva taem iumi tok praod abaotem samting wea iumi duim or olketa privilege wea iumi kasem insaed service bilong Jehovah. (Proverbs 14:16) Tingim samting wea happen long aposol Peter, wea trustim hemseleva and tok praod taem hem sei: “Nomata evri narawan stambol long iu, mi bae nating stambol! . . . Nomata sapos mi mas dae witim iu, mi bae nating denyim iu.” Tru nao, iumi man no fit for tok praod abaotem iumiseleva. Evri samting wea iumi kasem hem kam from loving-kaeness bilong Jehovah nomoa. Wei for tingim diswan bae helpem iumi for no tinghae long iumiseleva.—Matthew 26:33-35, 69-75.
18. Wanem nao tingting bilong Jehovah abaotem praod fasin?
18 Bible sei, “praod fasin mekem man foldaon, and fasin for bighed hem bae mekem man stambol.” Why nao olsem? Jehovah hem sei: “Mi heitim wei for mekhae long seleva and praod fasin.” (Proverbs 8:13; 16:18) Dastawe Jehovah hem kros fogud long ‘praodfala heart bilong king bilong Assyria and from wei wea hem tinghae long hemseleva’! (Isaiah 10:12) Jehovah hem panisim hem from wei wea hem bighed and praod. Klosap nao Jehovah bae judgem world bilong Satan witim olketa praodfala leader bilong hem wea tingse olketa seleva nao important, nomata olketa hia man or demon. Iumi mas no letem iumiseleva garem kaen tingting olsem olketa enemy bilong Jehovah wea laek for followim tingting bilong olketa seleva!
19. Long wanem wei nao pipol bilong God olketa praod, bat long semtaem olketa hambol tu?
19 Olketa tru Christian fit for praod long wei wea olketa servant bilong Jehovah. (Jeremiah 9:24) Bat long semtaem, olketa mas gohed for hambol tu. Why? Bikos “evriwan sin and no kasem glory bilong God.” (Romans 3:23) So for protectim wei wea iumi servant bilong Jehovah, iumi mas garem sem tingting olsem aposol Paul, wea sei: “Christ Jesus kam long world for sevem olketa sinner,” and then hem sei: “Mi nao main wan long olketa hia.”—1 Timothy 1:15.
20. Hao nao Jehovah protectim pipol bilong hem distaem, and hao nao bae hem protectim olketa long future?
20 Pipol bilong Jehovah hapi for putim waka bilong God fastaem and mekem samting wea olketa seleva interest long hem kamap mek-tu samting long laef. From olketa duim datwan, iumi savve barava trustim hao Jehovah bae gohed for protectim wei wea olketa fren witim hem. Iumi trustim tu hao Jehovah bae protectim pipol bilong hem, long spiritual and physical wei, taem datfala bigfala trabol hem start. Taem olketa go insaed niu world bilong God, olketa bae hapi and singaot olsem: “Lukim! Diswan nao God bilong iumi. Iumi hope long hem, and hem bae sevem iumi. Diswan hem Jehovah. Iumi hope long hem. Iumi mas hapi long salvation thru long hem.”—Isaiah 25:9.
Waswe, Iu Remember?
• Jehovah protectim King David and Jesus Christ long wanem wei?
• Hao nao Jehovah protectim pipol bilong hem distaem?
• Why nao iumi shud nao ova tumas for tingim seleva?
• Why nao iumi savve praod and long semtaem iumi hambol?
[Olketa Piksa long page 9]
Jehovah protectim David and Jesus long wanem wei?
[Olketa Piksa long page 10, 11]
Hao nao God protectim pipol bilong hem long spiritual wei distaem?
[Olketa Piksa long page 12]
Nomata iumi praod for servem Jehovah, iumi mas gohed for hambol evritaem