Wanday Abraham kam long Sarah and laek for talem hem wanfala important nius. Hem sapraes tumas long samting wea happen long hem. God wea tufala worshipim hem kam long Abraham and story long hem. Luk olsem wanfala angel nao kam story long hem! Tingim Sarah hem lukluk strong long hasband bilong hem and hem ask olsem: “Wanem nao hem talem long iu? Plis iu talem mi!” Maet Abraham hem sidaon firstaem and tingim wanem nao bae hem talem. Then hem talem Sarah samting wea Jehovah talem long hem. Jehovah sei: “Lusim hom and pipol bilong iu and go long nara ples wea bae mi showim long iu.” (Acts 7:2, 3) Bihaen Abraham talem datwan, tufala ting raonem wanem Jehovah askem tufala for duim. Tufala bae lusim gudfala laef bilong tufala and go stap long nara ples! Wanem nao bae Sarah talem? Luk olsem Abraham hem lukluk strong long Sarah for lukim sapos hem bae willing for duim wanem God askem tufala for duim.

Maet samting wea happen long Sarah no happen long iumi. Maet iumi ting olsem, ‘No enitaem God askem mi or marit partner bilong mi for duim eni samting olsem!’ Nomata olsem, iumi evriwan tu mas disaedem sem samting olsem Sarah. Iumi stap long disfala world wea mekhae long wei for garem gudfala laef, olketa material samting, and for garem staka selen. Bat Bible encouragem iumi for duim difren samting. Hem sei samting wea shud important long iumi nao hem for duim olketa samting wea God laekem, and no olketa samting wea iumiseleva laekem. (Matthew 6:33) Taem iumi ting abaotem wanem Sarah duim, hem gud for tingim diswan, ‘Waswe, bae mi mekem sem disison olsem Sarah?’

Waswe long famili bilong Sarah? Hu nao olketa long famili wea bae hem lusim olketa? Taem God sei long tufala: “Lusim hom and pipol bilong iu” maet datwan hem barava hard samting for Sarah. Maet hem garem olketa brata and sista, olketa niece and nephew, and olketa aunty and uncle wea hem barava lovem wea maet bae hem no lukim olketa moa. Nomata olsem, Sarah hem gohed for redyim olketa samting for datfala gogo.