From pipol spoelem olketa Christian, olketa go stap long olketa nara ples, and Philip go long Samaria. Luk olsem hem waka tugeta witim governing body bikos “taem olketa aposol long Jerusalem herem pipol long Samaria olketa biliv, olketa sendem Peter and John long there.” Peter and John putim hand bilong tufala long olketa pipol hia, and God givim holy spirit long olketa.—Acts 8:14-17.
Luke storyim Philip long Acts chapter 8, and hem storyim hem wanfala taem moa long chapter 21. Samting olsem 20 year bihaen Philip start for preach, aposol Paul and olketa wea go witim hem gogo for Jerusalem long end bilong mek-thri missionary gogo bilong Paul. Bihaen olketa kasem Ptolemais, Luke sei: “Long next day, mifala go moa and kasem long Caesarea. Mifala go stap long haos bilong Philip wea hem man for talemaot gud nius. Hem wanfala long sevenfala man wea olketa aposol chusim long Jerusalem. Disfala man hem garem fofala dota wea no marit wea savve talem profesi.”—Acts 21:8, 9.