• “Mi Laekem King Long Rome Nao for Judgem Case Bilong Mi!”
    “Barava Storyim Gud Kingdom Bilong God”

    • 5. Hao nao Festus deal witim Paul?

      5 Samfala day bihaen, Festus “sidaon long ples for judgem man” long Caesarea.b Paul and olketa wea accusim hem standap front long Festus. Olketa Jew accusim Paul long staka nogud samting, bat Paul hem sei: “Mi no duim eni samting wea againstim Law bilong olketa Jew, or againstim temple, or againstim King long Rome.” Paul no duim eni rong samting and hem shud no stap long prison. Wanem nao Festus disaedem? Festus laekem olketa Jew for hapi long hem, so hem sei long Paul: “Hao, iu laek for go long kot long Jerusalem? Mi bae stap long there taem olketa judgem iu long kot.” (Acts 25:6-9) Datwan hem krangge samting for duim! Sapos Paul agree for go bak long Jerusalem, olketa wea accusim hem nao bae judgem hem and killim hem dae. Festus talem datwan bikos hem laek for mekem olketa Jew hapi winim wei for duim stret samting. Pontius Pilate duim semkaen samting tu long Jesus. (John 19:12-16) Maet olketa judge distaem disaedem samting wea no stret for mekem nara pipol hapi long olketa. Iumi shud no sapraes sapos kot disaedem samting wea no stret taem olketa kotem pipol bilong God.