KWESTIN FROM READER

Long bifor, staka taem olketa pablikeson bilong iumi sei samfala story long Bible hem piksarem samting. Bat distaem olketa no duim datwan tumas. Why nao olsem?

Insaed long The Watchtower bilong September 15, 1950 hem sei samfala taem olketa man, olketa samting wea happen, or samfala samting wea Bible storyim, hem piksarem samwan or samting. Olsem example, long bifor olketa pablikeson bilong iumi sei olketa faithful man and woman olsem Deborah, Elihu, Jephthah, Job, Rahab, Rebekah, and staka narawan tu olketa piksarem olketa anointed Christian or datfala “big crowd.” (Rev. 7:9) Olketa pablikeson sei Jephthah, Job, and Rebekah piksarem olketa anointed Christian, and Deborah and Rahab piksarem datfala big crowd. Bat long olketa year wea go pas, olketa pablikeson no duim tumas datwan. Why nao olsem?

Hem tru, Bible hem storyim samfala man and woman wea piksarem samwan or samting. Olsem example, long Galatia 4:21-31, Paul story abaotem tufala woman wea piksarem samting. Wanfala woman hem Hagar, wea hem slave gele bilong Abraham. Paul sei Hagar hem piksarem datfala nation bilong Israel, wea stap anda long Jehovah and mas followim Law bilong Moses. Mek-tu woman hem Sarah, waef bilong Abraham, wea hem “woman wea free.” Hem piksarem waef bilong God, wea hem nao part bilong organization bilong God long heven. Paul story tu abaotem wei wea Melchizedek, wea hem king and priest, hem piksarem Jesus. (Heb. 6:20; 7:1-3) And tu, Paul hem sei profet Isaiah and olketa son bilong hem piksarem Jesus and olketa anointed Christian. (Heb. 2:13, 14) Jehovah givim holy spirit long Paul for raetem evri samting hia, so iumi savve sure samting wea Paul talem hem stret.

Bat nomata taem Bible sei samwan hem piksarem narawan, iumi shud no tingse evri smol samting wea happen long laef bilong datfala man hem piksarem samting. Olsem example, Paul sei Melchizedek hem piksarem Jesus. Nomata olsem, Paul no story abaotem taem wea Melchizedek givim bred and wine long Abraham bihaen Abraham faet and winim fofala king. So Bible no storyim eni samting for showimaot wanem Melchizedek duim long datfala taem hem piksarem samting.—Gen. 14:1, 18.

Insaed olketa year bihaen Christ hem dae, samfala man for raet tingse klosap evri story long Bible piksarem samting. The International Standard Bible Encyclopaedia storyim olketa teaching bilong Origen, Ambrose, and Jerome, and hem sei: “Long evri story long Bible olketa trae for faendem wei wea evri samting insaed long datfala story, nomata evri sismol samting tu, hem piksarem samting. Olketa tingse evri samting wea happen hem garem barava important mining.” Olsem example, olketa tingse “153-fala fish wea olketa disaepol kasem long naet wea olketa lukim Jesus bihaen hem resurrect, hem piksarem samting tu. Staka narawan tu tingse datfala namba hem piksarem samting!”

Nara man for raet, Augustine of Hippo, sei datfala story long Bible wea Jesus feedim 5,000 man witim faevfala bred and tufala fish hem piksarem samting. Hem sei faevfala bred hia wea olketa wakem from barley hem piksarem first faevfala buk long Bible. From pipol bifor tingse wheat nao hem gud winim barley, Augustine sei datfala story showimaot “Niu Testament” hem gud winim “Old Testament.” Nara samting tu, hem sei tufala fish hia hem piksarem wanfala king and wanfala priest. Narafala savveman sei wei wea Jacob baem raet bilong Esau olsem firstborn witim pleit supsup wea red, hem piksarem wei wea Jesus iusim red blood bilong hem for baem datfala hope for go long heven for olketa man!

Maet olketa samting wea olketa man hia bilivim hem no mek sense long iu. Diswan maet mekem iu luksavve long disfala tru samting: Olketa man no fit for savve sapos wanfala story long Bible hem piksarem samting or nomoa. So wanem nao wise samting for duim? Taem Bible sei wanfala man, wanfala samting wea happen, or wanfala samting hem piksarem samting, iumi acceptim datwan. Bat iumi shud no sei wanfala story long Bible hem piksarem samting sapos no eni nara scripture long Bible hem sapotim datwan.

So hao nao iumi savve kasem gud samting from olketa story and example wea iumi read abaotem long Bible? Aposol Paul sei: “Evri samting wea olketa raetem bifor hem for teachim iumi. Hem givim iumi hope bikos olketa Holy Raeting hia helpem iumi for no givap and comfortim iumi.” (Rome 15:4) Long disfala scripture, Paul story long olketa anointed Christian long first century abaotem olketa gudfala samting wea olketa savve kasem from olketa story long Bible. Nomata olsem, olketa “nara sheepsheep” tu savve kasem olketa gudfala samting from olketa story long Bible.—John 10:16; 2 Tim. 3:1.

So staka story long Bible hem for olketa anointed Christian and for olketa “nara sheepsheep” tu. And nara samting, olketa story hia fitim olketa Christian wea stap long bifor and long distaem tu. Olsem example, wei wea Job safa hem no piksarem nomoa wei wea olketa anointed Christian safa long World War I. Staka man and woman wea worshipim God, nomata olketa anointed Christian or olketa “nara sheepsheep,” evriwan hia safa olsem Job. And olketa kasem gud samting taem olketa studyim story bilong Job. Olketa lukim samting wea Jehovah duim for Job wea showimaot “Jehovah hem lovem man and hem showimaot mercy long hem.”—Jas. 5:11.

Tingim diswan: Insaed long olketa kongregeson distaem, staka olo sista stap wea faithful olsem Deborah, and staka young elder stap wea wise olsem Elihu. And staka pioneer tu stap wea strong and no fraet olsem Jephthah, and staka faithful brata and sista stap wea patient olsem Job. Iumi thankiu long Jehovah bikos hem givim iumi Bible wea mekem iumi garem hope and “helpem iumi for no givap and comfortim iumi”!

So distaem, taem olketa pablikeson bilong iumi explainim olketa story long Bible, main samting wea olketa mekhae long hem nao hem wanem iumi savve lanem from olketa story hia, and no wanem olketa story hia piksarem.